Lumàns 7

Saki fè kəta wi gha hi nì ha ghàn

1Ghàn ywo khɨli gha ye a mu khɨŋa hi jìs chin a wana noma beka nâbi nde a ghàn a fùtɨ̂n khəlò te saki yi malâ mò. Ghàn khə na saki kəta kə jyaka a wùt a tû a wu yu afa wù baha chyə. 2Gha tɨni mò wu lum afân ni. Wùt ywên kəta hi faŋ ghê lɨm à wûn kə hi tàn te lɨm àtɨ̂n baha chyə, lɨm à wûn ki kpû nâbi yini, sak yi malani hi fê khɨte wi wûn. 3Yi ni chwùtè na lɨm à wûn shìki baha chyə̂, wù yen chyə ghê wùt lɨmà wùlè, ma yi hi chwûtè na wù ti khɨm sak yi malani, lɨm à wûn ki kpû nâbi yini, saki tê fè khɨte wûn; wù ki fê malâ, ma yi hi fê chwûtè wi na wù ti khɨm sak yi malani. 4Yi ni boŋa mô kə wu lum afân ha ghàn chin a wana noma. Ghàn hi boŋa mô kəbi ni te ghàn ti kputî, Saki fê kəta wi gha hi nì ha ghàn beka ghàn tì kpû ghàn à Klistù ghàn hì mô bâh à wuna ghɨ wùna. Yi ni chwùtè na, a kəta wun ghàn chîn, a mô wun we a Yènfù tì lòhe a yi kpû hi nì na ghàhnà hi mô tam wu jûŋù ha wûn. 5À ndùku mô te ghàhnà baha chyə wu lum afa a njyàsu wùnsu ghàhnàsu ndùku khɨŋa, Saki china ghàhnà na ghɨ hi nê be, yi bênà kə nì kpû. 6Chin hì mô Saki fê kəta wi gha yile hi nì nì ghàhnà beka ghàhnà hì mô ni te ghɨ ti kputî ha yi sak afa ghàhnà ndùku fêtà chyak atɨ̂n. Ghàhnà fê nê wi fêt yi Fùyènì wu lum wu mwu afa a ghɨ chehì nê atɨ̂n, fêtà a tô gha, ma ghɨ nyak a yi sak. Ghàhnà hi bɨlà fêtà wu lum wu fe afa Yohnà Yulena chwùtè ha ghàhnà.

Saki chwùtè shyə ghe a be mò ghɨna

7Gha yina ni chwùtè na ghə? Yi ni mò na Saki mò a shyə a be ma? Yi wijə ni nâ hakoh beka a ndùku bu ha Saki ma mu khə wi gha ghe a be mò ghɨna. Saki ndùku faŋa hi jìs na, “Kə se ghana hi fwo a ghɨta a mwə̀,” ma mu khə wi gha mi yîn. 8Biyani sak mi ye bɨlà nê na be ni, se a ma hi fwo kə mwə̀ mù jɨ̀m. Saki hì bu ma be hi kəta wi jyaka. 9Mu ndùku chyə teka mu hi khə Saki biyani saki ben nâbi yini mu hì kôŋà nâ haŋaŋ hi tè nè be, ki kpû. 10Sak mi yina ni mò hi nì na mu hi chyə̂ biyani yi bɨlà nê na mu kpu. 11Be tì lehi mu tohne kə a gha afa saki tì tunhe ki ywe mu.

12Yi ni chwùtè na Sak yulelò, nâbi ghə te yi jîsà boŋa yulê, mô chilichili fê jwôfà. 13A ni mò na shyə hi jwôfà ni bɨlà nê na mu kpu ma? Yi wijə ni nâ hakoh! À tì ben be nì kpu ha mu. Be tì tohna a shyə̀ a jûŋà hi ben nì kpu ha mu. Yi tì gan ni shyəma sah yi be bân. Saki ni mò shyə ghe a ghɨ gâmtè hi chwùtì banhî na be bəma nâ a be.

Ngək ye a yì mò a ghàhnà fùtɨ̂n

14Ghàhnà khə na Saki mò ma à fo Fùyèn, biyani mu mô kə wut te ghɨ bəkli ha kwòs ha be. 15Mu fate khə wi gha ghe a mu nè beka mu faŋa wi hi nè yi gha a bɨlà mô kə ye a mu bànà. 16Chin ni te mu nè gha, a mô kə ghe mu kòŋà wi, a ni mò na mu bimelò na Saki mò a jûŋ. 17Yi ni chwùtè na, à laha nê wi mu gha mɨ ghɨ̂n. À bɨlà nê be ye a yì mò a mu wu wùn. 18Mu khəlò na gha jûŋì wijə a mu wu wùn. Mu jìsà a mu njyàsu wùnsu afân a su kôŋà be ni. Mu jìsà ni beka mu kòŋàlò kə nâ hi tè nè gha a jûŋà biyani yi bona wi. 19Mu nè wi gha a jûŋà ghe a mu kòŋà hi tè nì. Mu bɨlà nê kə a gha a be ghe a mu kòŋà wi hi tè nì. 20Mu shìki nê gha ye a mu kòŋà wi hi nì, ma yi hi chwùtè na à fè nê wijə mu gha tɨni, à nè be ye a yì mò a mu wu wùn.

21Yi mô ha mu ni te a nè yi sak na mu hi nê, shihi khɨŋ hi nè yi gha yi jûŋì, mu bɨlì ni kə gha yi be. 22A mu atɨ̂n à təm mu kôŋà hi tè lèmà sak yi Fùyènì, 23biyani yena na à bɨlà fêtà kə yi sak yilô a mu wu wùn, fêtà ni, nô yi sak ye a yi mô a mu yi təm. Yi nê mu, mu mô ni te mu mò à ndâ chyâk ha be. A mô yi sak yi be mi yina a yi fêtà a mu wu wùn. 24Mu mò kə nâ a ngə̂k! A nè gâmtè fihe nde mu a wu wùn afân a wu bênà nì kpu ha mu ni agha? 25Mu fo àyòŋnà ha Yènfù te fu fihe mu atɨ̂n tohne a Bâba ghàhnà Jisòs Klistù!

Mu ti yen na mu kòŋàlò kə nâ a mu a təm hi tè lèm a sak yi Fùyènì biyani a mô a mu wùn wu wûtù, mu fêtà kə a kwôs ha be.

Currently Selected:

Lumàns 7: bmv

Highlight

Copy

Compare