Lumàns 6

Ghàhnà chyə kum Klistù

1Ghàhnà mò hi jìs na ghə, na ghɨ faŋ ma ghɨ hi nê kə be shyəma Yènfù faŋ à hi chwûtè kə təm a jûŋà ha ghàhnà ma? 2Yi wi hi tè mò ni nâ hakoh! Be fè kəta wi gha kum ghàhnà nâ hakoh. Ghàhnà hì mô ma ghɨ tî kpû ha be ma ghɨ wi hi tè fè chyə atɨ̂n à be. 3Ba ghàn khəlò na ghàhnà ghe a ghɨ tì fye mòlû chîntì ghàhnà Klistù Jisòs hì mô ni te ghɨ ti boŋ kpu kəbi te wûn? 4Yi ni chwùtè na ghàhnà tì shihi fye mòlû à hì mô ni te ghɨ kpu yi kpû, ghɨ gûmà ghàhnà bakhi nì wûn. Yi ndùku mô ni shyəma Bì ni ma ghàhnà hi chyə chyənà yì fê kəbi yi ghəl te wù tì ne Klistù kahi lôtì a yi kpû. Wù tì ni, nì jyak a kanana.

5Yi mô ni wu lum na te ghàhnà hì mô ma ghɨ ti lyi bâhà a Klistù atɨ̂n à kpû, ghàhnà bè boŋa lyê lò bâhà a wun atɨ̂n a yi lòtì kpu. 6Ghàhnà khə na ghɨ tì shihi bante Klistù a kàkfùtàfù ghɨ banti bakhi nì chyəna ghàhnà ghɨ mwo shyəma jyak a be ghe a ghɨ ndùku mô wu wùn wu mwu afân mi, ma ghàhnà hi fê bu wu kwôs ha be. 7Wùt kpolò, be hi fê kəta wijə jyaka ha wûn. 8Te ghàhnà hì mô ma ghɨ ti kpu ghàhnà Klistù, ghàhnà khəlò hamok na ghàhnà nì wûn bè chyəlò. 9Ghàhnà khə na kpu fè kəta wi jyaka a Klistù a tû. Wù ti kpû, Yènfù lôhè wûn a yi kpû, wù fê bu hi bè kpû. 10Wu hì mô ma wù ti kpû, yi kpu yi wuni bobhi jyak a be kə hamok, wù ti hì chyə chîn, chyə yi wuni nê na ghɨ hi kokhe Yènfù. 11Yi ni mò na ghàn kəta hi lyì na ghàn ti boŋ kpû ha be, be fê kəta wi gha yile hi nì kum ghàn, ghàn à Klistù Jisòs te hì chyə̂ chîn kə hi tè fo kokhînì ha Yènfù.

12Kə ghàn fê de be na yì hi saka wun wanu yi mô hi bè kpu ni, nê na ghàn hi nê gha ghe a yi khɨŋa. 13Kə ghàn hi de bâh à wùna ghana nâ à mòk na ghɨ hi nê be. Kə ghàn de bâh ale na ghɨ hi mô a shyə a fètà ha gha a be. Ghàn bɨlà fo mihi ngɨŋ sanisu ha Yènfù te ghɨt ghe a ghɨ tì lòhe a yi kpû, ghɨ hì chyə̂. Ghàn fo mihi kə yi mihì wun wanu ha funfu, ghàn hi mô mwə̀ mù yì fèt mù chilichili. 14Ghàn nè ni shyəma be hi fê kəta wi jyaka a ghàn a tû beka Yènfù hì mô ma fu ti chwûtì təm a jûŋà ha ghàn, ghàn tê hì fê chyə wi a sah à yi sak.

Kwôsù kəta hi tè yû

15Ghàhnà mò hi jìs na ghə chin agha? A jis na ghàhnà faŋ ma ghɨ hi nê yênà kə nì be beka ghàhnà fè chyə̂ wi a yi sah à yi sak, chyə̂ kə kum təm a jûŋà a Fùyènà agha? Yi wi hi tè mò ni nâ hakoh! 16Ba ghàn khə na ghàn ki fo ngɨŋ sanisu ha wu kwòs ha wùt, ma ghàn hi kəta hi tè yû wùt àtɨ̂n? Ghàn ki fo ngɨŋ sanisu ha wu kwòs ha be, ma ghàn hi ywo ha be, gokhini tɨni mô a yi kpû. Ma ghàn ki fo ngɨŋ sanisu hi tè yu ha Yènfù ma ghɨ hi mô wu kwôs ha wûn, ma gokhini tɨna hi mô na fu lyi ghàn ha ghɨt a chilichili. 17Ghàhnà kəta hi tè fo àyòŋnà ha Yènfù beka à ndùku mô wu tuk wule, ghàn mô wu kwôs ha be biyani ghàn yu yi yikî ye a ghɨ yike ha ghàn, ghàn bimî nì təm a ghana à jɨ̀m. 18Yènfù ti bônhì ghàn, ghàn tê hì fê bu wu kwôs ha be. Ghàn hi bɨlà mô wu kwôs ha Yènfù shyəma ghàn hi gbê a lum tu chilichili tu. 19Mu jìsà fəknà nì gha ghɨ mô kə nâ a ghàn a fùtɨ̂n, njwo tof yani baha lantelò a gha yòhnà. À ndùku mô wu tuk wule, ma ghàn ti fo ngɨŋ sanisu a wu kwòs ha be, hì nê yênà kə nì gha liŋa fê tòkà nê yênà kə nì gha a be ale. Mu wu hì jîsà chin na ghàn fo ngɨŋ sanisu ha wu kwòs hi tè tòkà nê yênà nì gha a chilichili shyəma chyənà sanisu hi yule a Yènfù ashyə̂.

20À ndùku mô te ghàn baha mô wu kwôs ha be, khə wi gha kum lum tu chilichili tu. 21Yi mô hamok na ghàn tà tì khɨti mbì yi gha yile atɨ̂n à gha afa a ghàn ndùku nê. Ghàn hì wume kum a gha tɨna chin. Gokhi gha mɨ ghɨ̂n mô kə yi kpû. 22À mò chin ma ghɨ ti bônhì ghàn a be, ghàn hi bɨlà mô wu kwôs ha Yènfù, mbì àtɨ̂n mò na ghàn hì chyə chyənà su yulesu, mô hi bè khɨte chyənà ye a yì bè mê wi. 23Ghàn khə na maktu be mò kə yi kpû biyani Yènfù fo chyənà ye yì bè mê wi tohne a Klistù Jisòs Bâba ghàhnà kə halô.

Currently Selected:

Lumàns 6: bmv

Highlight

Copy

Compare

Want to have your highlights saved across all your devices? Sign up or sign in

Learn More About Ŋwàklù Fùyèn Kàn Mù Fê (Cameron)