Lumàns 5

1Te Yènfù ti lyi ghàhnà ha ghɨt a chilichili kum yi bimî yi ghàhnà, ghàhnà nì wûn hì chyə kə nâ nì yutìnì chîn atɨ̂n à jyak afa a Bâba ghàhnà Jisòs Klistù fo. 2À ni wûn na ghàhnà khɨti təm a jûŋà nì Yènfù kum yi bimî yi ghàhnà. Ghàhnà mò kə a tô təm a jûŋà mɨ ghɨ̂n fê jala khə hamok na Yènfù bè boŋa folò ghàhnà nì ban ye a fu kəta. 3Ghàhnà saŋle atɨ̂n à ngə̂k afa a ghàhnà yena beka ghàhnà khə na wùt shìki yen a ngə̂k, wu khɨli hi tè wunhî. 4Wunhînì nê na ghàhnà ghəkna, ma ghəknâ tɨni gamti ghàhnà ma ghɨ hi ke yênà kə ashyə̂, khə hamok na ghɨ bè kwotelò shyə ghe a ghɨ khɨŋa. 5Ghàhnà wi hi bè gha a shyə ghe a ghɨ ke yênà nì ghɨna ni beka Yènfù ti fo Yohnà Yulena, ghe ghɨ chwûtè kôŋ yi wuni ha ghàhnà.

6Ghàn khə na à ndùku mô te ghàhnà baha nê gha a be, lumu gha yile fê bana wi ha ghàhnà, Klistù ben kpu hi bònhè ghàhnà. Wù tì ben kə wu yu afa a Yènfù tì lèma. 7Yi ta nâ haŋaŋ shyəma wùt bimi hi kpu nâbi wu lùk wu wùt à chilichili nâbi te à mò kə wu lùk wu wùt wù jùŋ te wùt làhi kòŋ hi kpû. 8Biyani Yènfù chwûtì banhi kôŋ yi wuni ha ghàhnà a wu lum na à ndùku mô te ghàhnà baha mô kə nâ ghɨt a gha a be, Klistù ben kpu hi bònhè ghàhnà. 9Chin te luŋ mù wûn ti nî ghàhnà na ghɨ hi mô chilichili a Yènfù ashyə̂, yi ni chwùtè na wù bè bònhè lò ghàhnà a ngək afa a Yènfù ndùku mô hi bè fo ha ghàhnà. 10Yi mô ni beka a ndùku mô te ghàhnà baha mô bànàsu Fùyènsu, Wâ Fùyèn ben kpu hi nì na ghàhnà nì wûn kahà bakti chyəna. Yi ni chwùtè na chin te ghàhnà hì mô ma ghɨ ti kaha bakti chyəna ghàhnà nì Yènfù, Klistù bè nêlò ma ghàhnà fate bon à mihi hamok beka wù chyə. 11Hi kpenhî, ghàhnà hi boŋa saŋle kum wùt we Yènfù ndùku mô wûn, ma à ni Bâba ghàhnà Jisòs Klistù na ghàhnà kahà hi mô sunsu ha Yènfù.

Hanɨ̂ŋ nì Adàm ghê Klistù

12Yi ni mô yê wu lum afân ni, wùt wù mòk ti ni be, yì ben nì kpu a mbyî. Yi ni chwùtè na kpu ti yen kə ha ghɨt à jɨ̀m beka ghɨt à jɨ̀m ti ni be. 13Be ndùku lâwû a mbyî shyəma Yènfù bè fo Saki biyani fu wi hi tè jìs na wùt ti ni be teka ghɨ fo saki ha wûn. 14Yi ni mò kəbi ni, kpu hì mô a mbyî, kə hi yìmì a Adàm mu tuk hi kwok a tàn a Musìs a mu tuk, nâbi te ghɨt ale ndùku mô teka ghɨ ni nki yi be yì Adàm hi tunhe Fùyèn. Adàm ndùku mô kəbi te wut we a wù ndùku mô hi bè bèn yi bàm, a mô a Klistù. 15Biyani hanɨ̂ŋ mô. Yi fo yi Fùyènì ti chya gha ye a wùt tì ne jaha nâ haŋaŋ a wu lum na ghɨta tî kputî, dô kə ni kum be wùt wù mòk, a mô be à Adàm, biyani wùt wù mòk, a mô Jisòs Klistù nî Yènfù chwûtì təm a jûŋà ha ghɨta, ghɨ dô nâ haŋaŋ. 16Fo yi Fùyènì wijə te be ye a Adàm tì ne. Be àtɨ̂n ni nè kə na Yènfù sak à bobhi ghɨta, biyani fo yi Fùyènì nê na ghàhnà hi mô chilichili a Yènfù ashyə̂ nâbi te ghàhnà ndùku nê gha a be nâ haŋaŋ. 17Yi mô hamok na kpu ti nyɨŋ tohna a mbyî yì jɨ̀m njwo be wùt wù mòk, biyani ghɨt ghe a Yènfù chwùtè təm a jûŋà ha ghɨna lyi ha ghɨt a chilichili na ghɨ hi saka te tu fə̂n, khɨti chyəna ghe a ghɨ bè mê wi tohne a wùt wù mòk, a mô Jisòs Klistù.

18Wùt wù mòk tì nî be, ghɨt à jɨ̀m bêf, yi ni mò kəbi yi ghəl te wùt wù mòk tì ne gha yi jûŋì, Yènfù lyi ghɨt à jɨ̀m ha ghɨt a chilichili tè sak a jə̀ ghɨna ni ghɨna hì chyə̂. 19Wùt wù mòk tì ta nì to ha Yènfù, yi nî, ghɨt à jɨ̀m ghɨ hì mô ghɨt a be, wùt wù mòk yu Yènfù, ni Yènfù hì mô hi bè lyè ghɨt a dona ha ghɨt a chilichili.

20Yènfù tì fo Saki shyəma ghɨ yen à mihi jyak a be, biyani be shihi dù, təm a jûŋà Yènfù boŋ dû yen kə ashyə̂. 21Be ndùku chwûtè jyak ghe a yì kəta tohne a yi kpû biyani Yènfù chwûtè na təm a jûŋà wuna kətalò jyaka, lyi ghàhnà ha ghɨt a chilichili hi fo chyənà ye a yì bè mê wi ha ghàhnà tohne a Bâba ghàhnà Jisòs Klistù.

Currently Selected:

Lumàns 5: bmv

Highlight

Copy

Compare