Lumàns 3

1A ni jis na mbì yìlè làhi tè mò hi tè mò wùt à Jûs agha? Ghɨ se nam a wûtà, ma mbì atɨ̂n hi mô nâ ghə chyâ hi tè mô wut à tum agha? 2Mbì mô kə nâ hi tè mò wùt à Jûs kə tu lum hidù. Gha yi shyə mô na Yènfù tî fo gha yi wuni ha ghɨt a Jûs. 3Biyani yi ni mò yàni ha ghɨt a Jûs ale ghe a ghɨ faŋa hi bime agha? Yi mô na Yènfù lèmà wi chwùna wunu ha ghɨna ma? 4Yi wi hi tè mò ni! Yènfù yè jîsà kə hamok nâbi wu yu afa ghɨta chìnte kə mbyî yì jɨ̀m hi wama yi fə̂m, kə yi ghəl te ghɨ nyàka a ŋwàklù Fùyèn na:

“Gha yi Fùyènì yè mô kə hamok,

Yènfù yê saka yə kə yi yə̂ sak à wûn ghê ghɨta.”

5Ghɨt ale làhi jìs na chyənà ghàhnà yì be ni bɨlà gâmtè kə hi nì na ghɨta hi tôkà yena lumtu chilichili tu Fùyèn tù. Yi shìki tè mò ni, ma yi hi chwùtè na Yènfù nè wi a jûŋ te fu bâŋhè lâ ha ghàhnà ma? Wùt à mùsòŋ làhi tè kwàktè yê kə a wu lûm afân. 6Biyani, yi wi hi tè mò ni nâ hakoh! Yènfù shìki bu chilichili, ma fu bê sak yàni ghɨta a mbyî?

7Wùt lè làhi buf na, “Chyənà mì yì fə̂m shìki tè chwûtè banhi lumtu chilichili tu Yènfù, nê na ghɨ hi kokhe funfu, fu hi fê khɨte yàni mu ha gha a be?” 8Ghɨt mɨ ghɨ̂n ki jîs ni, ma yi hi chwûtè na ghɨna jìsà na yi jwôfàlò na ghàhnà hi nê kə gha a be shyəma jùŋ hi fwo atɨ̂n. Ghɨt ale bobhi yet ghaha jîsà na a mò gha ghe a ghàh gbè yike. Ghɨna hi khə na Yènfù kəta kə hi bè sak hi bobhi ghɨna.

Wùt à chilichili wijə nâ wù mòk

9Ghɨ ni mò hi jìs à gòkhì na ghə, na ghàhnà ghɨt a Jûs chyàlò ghɨt ale ma? Yi wijə ni nâ hakoh. Yi mô kə te mu hì mô ma mu ti chwûtì banhi na ghɨt a Jûs nì tumu chìntè mô ghɨt a gha a be à jɨ̀m. 10Yi ni mò kəbi yi ghəl te ghɨ nyaka a ŋwàklù Fùyèn na:

“Nâ wùt wù mòk wijə chilichili.

11Nâ wùt wù mòk wijə a wù chwùtè na yi ti yu khɨle gha Fùyènì,

nâ wùt wù mòk khɨŋa wi hi tè khə wûn.

12Ghɨta ti mana Yènfù kə à jɨ̀m.

Ghɨna ti jah nâ à jɨ̀m;

wùt wijə a wù mòk à wù nè gha yi jûŋì nâbi wù mòk.

13Jwo a ghɨna lìmà kə te yi sî a wu yu afa ghɨ faŋa hi chîn.

Jwo a ghɨna mô ma ghɨ ti lun nì gha fəma.

Jîs yi ghɨna kəta lef, yi ywê kə te yi soŋ yi ywô

14A lun kə sù ndi, nì jîs yi be a ghɨna yi jwô.

15Ghɨna lûmà hi ywe a wût.

16Ghɨna chyâ nâbi afa, ghɨ bobhi yi ghâ, nê na ghɨta hi yena ngə̂k.

17Ghɨna tà timi hì mômhè hi nì na ghɨta hi chyə nì yutìnì.

18Ghɨna fànà wi Yènfù nâ hakoh.”

19Ghàhnà khə na nâbi ghə ghe a ghɨ nyaka a Yènfù yi Sak mò ha ghɨt a ghe a ghɨ chyə yi dèt yi sak. Ghàn hi mô a wu lum afân shyəma nâ wùt wù mòk hi fê kəta wi gha yile hi jìs. Yènfù ti baŋ kə jwo a ghɨt à jɨ̀m. Fu bè saka kə ghɨt à jɨ̀m a mbyî. 20Yi ni chwùtè na Yènfù bè jîsà wi na wùt mò chilichili beka wù lèmà Saki. Saki gàmtè kə hi nì na ghàhnà hi khə gha ye a be mò yini.

Lum we a Yènfù lyè ghɨta ha ghɨt a chilichili atɨ̂n

21Yènfù hì mô ma fu ti chwûtì lum we a fu lyê ghɨta ha ghɨt a chilichili atɨ̂n, wu kəta wi gha hi nì nì saki. Ŋwàklù su Sak se Musìs tì nyàka nì su fòkti su chiksu tì chîntì chwûtì kə lum mu wûn. 22Yènfù ni lyè nâbi nde ha wùt à chilichili tohne kə a wun a yi bimî ha Jisòs Klistù, hanɨ̂ŋ fê bu ha wùt wùlè, 23Beka ghɨt à jɨ̀m hì mô ma ghɨ ti ni be, ban yi Fùyènì fê bu ha ghɨna. 24Biyani Yènfù kəta təm a jûŋà lyê ghɨt ha ghɨt a chilichili tohne yi fèt yi Klistù Jisòs te wù ne hi bònhè ghɨna. 25Yènfù tì fo wun na wù bê kpu shyəma luŋ mù wûn ni ma fu lèhèfo besu ghɨ̂t sù tohne a ghɨna yi bimî. Yìna ni mò hi chwûtè lum wu Fùyènù chilichili. Fu tà tì fo jə ngə̂k ha ghɨta ha ashyə̂ kum besu ghɨna su. Fu tî wunhî wu tuk afû, 26biyani hì chwûtè chîn na fu mô chilichili, lyê nâbi nde we a wù bime ha Jisòs ha a wùt à chilichili.

27Yi ni chwùtè na wùt mò hi fè ghaŋhe wu wun chin kum ghə? Ghaŋhi wùni fè kəta wi luku. Yi ni fè kəta wi luku yàni agha? Yi fè kəta wi luku beka wùt tà bon jə kum yi fêt yi wuni. Wù bon kə kum yi bimî. 28Ghàhnà khə hamok na wùt mò chilichili a Yènfù ashyə̂ kə kum yi bimî yi wuni ha Klistù, a bu kum te wù lèmà Saki. 29Yènfù mò Fùyèn ha ghɨt a Jûs, mô kəbi Fùyèn ha tumu. 30Fu mô kə fù mòk, a lyê kə wun wùt ha wùt à chilichili makə a mô wùt à Jûs, makə a mò wu tûm. Fu nê ni tohne kə yi bimî afa a ghɨta kəta ha Klistù. 31Yi chwùtè wi na ghàhnà maka Saki chin kum yi bimî yi ghàhnà. Ghàhnà ni bɨlà kəta hi fate khɨte Saki chin te ghàhnà bime.

Currently Selected:

Lumàns 3: bmv

Highlight

Copy

Compare