Lumàns 11

Kwohi seni Fùyènì ha ghɨt a Isalì

1Mu bufa kəbi nâ, yi ni mò ni chwûtè na Yènfù ti mâkà ghɨt a wuna ma? Fu tà mâkà jə ghɨna nâ hakoh! Nâ mu a mu ngɨŋ boŋa mò kəbi wut à Isalì ma mu fwo a Benjamìn yi sah yi nda, mô wut a Ablàhâm yi tê biyani teka fu maka mu. 2Yènfù tà mâkà jə ghɨt a wuna ghe fu tì lèma na fu bè bônhèlò ghɨna shyəma fu fati mbyî. Ba ghàn khəlò gha ye a ŋwàklù Fùyèn jìsà kum Ìlajà te wu ndùku chyate Yènfù na fu chwuti gha ye ghɨt a Isalì ne bobhe. Wù ndùku chyate jîsà na, 3“Ghɨt ghɨ̂n ti ywiti fòktì sasu a Bâba. Ghɨna ti bobhi baŋ wa wu yi fo. À faŋ kə mu, ghɨna wu hì khɨŋa kəbi hi ywe mu.” 4Wù jis ni, Yènfù jis ha wun na, “À tà faŋ jə kə wò. Mu baha kətalò kəbi ghɨt ale kamsu sàmba, ghɨ ywo ha mu, ma ghɨna ti tunhi na ghɨna kokhe wi Bâl.” 5Yi ni mò kəbi yi ghəl ha ghàhnà chîn. Yènfù ti chwûtì təm a wuna ghɨ jûŋà chwok fihi ghɨt ale nâbi te ghɨna tobte. 6Yènfù shìki mô ma fu ti chwok ghɨt mɨ ghɨ̂n wu lum afân, ma yi nê hi bu na fu chwok kum yi fêt yile te ghɨna ne bu ya ma ghɨ hi fê jîsà wi na à ni təm a jûŋà ghɨ Fùyènà.

7Yi ni chwùtè na ghɨt a Isalì ghɨ dona ti gha shyə ghe a ghɨna à jɨ̀m ndùku khɨŋa nâ haŋaŋ hi khɨtî, à khɨti kə se ghɨ̂tà ni te Yènfù chwokte. Ghɨt a dona ti tahi təma hi yu ha Yènfù. 8Yi gan kə te ghɨ nyak a ŋwàklù Fùyèn na, “Yènfù ti ni ghɨna ywo khɨle wi gha, yena khɨle wi gha, nâbi hi tàn lân.” 9Defìt tì jis na yi jə̂mà na,

“Mwə̀ mù yə̂mù ghɨna kahi ha lef

ma mù ni ma ghɨna fen, Yènfù fê fo ngə̂k ha ghɨna.”

10Wù tì jis kpenhi na yi khɨŋa na, “Yènfù tum fèfà a ghɨna sê, ma ghɨna hi fê yena wi luktu,

ma fu lem ghɨna a ngə̂k, ma ghɨna jɨŋ à ləha kə atɨ̂n à sù ngə̂k.”

11Mu bufa kəbi nâ, ghɨt a Jûs tì damta fen mihì kə yi mihì ma? Yi wijə ni nâ hakoh! À ndùku mô te ghɨna ne be, Yènfù kwâktì tumu fo yi bôn ha ghɨna. Fu tì ni ni shyəma ghɨt a Jûs hi səmte tumu. 12À ndùku mô te ghɨt a Jûs ne be, Yènfù fo ghaki ha ghɨt a mbye ale. Yi ni chwùtè na Yènfù tì fo ghaki ha tumu njwo ghɨt a Jûs fena. Fu shìki mô hi fo ghak mi yina ha tumu kum yi fe yi ghɨt a Jûs, fu bê fo nâ yàni ghak yi tɨni ha ghɨta wu yu afa ghɨt a Jûs kaha bena ha wûn agha?

Yènfù bônhì tumu

13Mu hì jîsà ha ghàn tumu chîn. Ghàn khəlò na mu mò wut wù tum te Yènfù chwoka na mu hi fôktè gha yi wuni ha ghàn, mu mô hi tè jala kə yi jâl kum yi fèt mi yîn. 14Mu khɨŋa na ghɨt ghaha, a mô ghɨt a Jûs, yen fêt mi yina ma shihi səmte ghàn, ma Yènfù bonhi ghɨna ale. 15À ndùku mô te Yènfù màka ghɨna, fu bakti chyəna ghê ghɨt a mbye ale. Fu ki kaha lyè ghɨna chîn, ma yi hi mô nâ yàni agha, ma yi hi kə̂kà na fu ti lôhì ghɨta a yi kpû. 16Ghɨ ki bek a bân ki yità fo ha Yènfù, ma yi hi chwùtè na nâ tuk a ban mi ye yì jɨ̀m à kəta kə Yènfù, ma ghaŋtu fùkàk tu shìki mô a chyə̂, a kəta Fùyèn, ma yi hi chwûtè na a kəta kəbi wûn kpoŋtu tɨntu. 17Ghàn tumu ni mò ni te kpoŋtu fùkàk tù a fu chehì kwoka kə yi kwôk, ghɨ fâtì ben yuŋlò, tu hì ləma a fùkàk te ghɨ yome. Ghàn hì mô chin, yə kəbi mwə̀ mù yə̂mù me a kâk fu yome fîn yə, boŋa kəta kə ghaŋtu te fu kəta. 18Yi ni chwùtè na ghàn kəta wi hi tè ghaŋhe wu wun ha ghɨt ghe a ghɨna mò ni te tu kpoŋ te a ghɨ tì khɨmte maka shyəma ghàn khɨti luku. Ghàn hi khə na ghàn mò kə tu kpôŋ, a bɨlà lo tu ghaŋ khɨte ghàn.

19Wùt wùlè a ghàn a fùtɨ̂n làhi jìs na Yènfù tì khɨmti mâkà kpoŋ mu tɨ̂n hi fo luku ha ghàn. 20Yi mô kə nâ hamok na ghɨ tì khɨmti mâkà ghɨna, a mô kum te ghɨna faŋa hi bimî, de ghàn, a mô beka ghàn bime biyani, ghàn kəta wi hi tè ghaŋhe wu wun. Ghàn hi tôknè, 21beka fu shìki mô ma fu ti mâkà ghɨt a Jûs, ghɨna mô ni te kàntè tu kpoŋtu fùkàk mu fûn, ma fu nê tè boŋa dè jə̀ ghàn. 22Ghàn hi khə na Yènfù tòknè nì ghɨta biyani, sak yi wuni ta kəbi yâ. Sak yi wuni ta ha ghɨt ghe a ghɨ de lum wu chilichili, biyani wu tôknè nì ghàn kə wu yu afa ghàn ywo kə ha wûn, bu ni, ma wù maka ghàn. 23À mò ha ghɨt a Jûs ma ghɨna ki kwunâ bimi ha Jisòs ma Yènfù kahà lyi ghɨna wu lùk afa a ghɨna ndùku mô atɨ̂n. Fu kəta a jyak hi nì ni. 24Nâbi ha nkàn, Yènfù shìki mô ma fu ti lye ghàn, tumu, ghàn mô ni te kpoŋtu fùkàk tù chìnà kwoka kə yi kwôk, fu nê ma yàni hi kaha lyè kpoŋtu ma tu fwo a fùkàk ma ghɨ yomi yi yomî agha?

Yènfù kwohe lò seni kə ha ghɨt à jɨ̀m

25Gha yi leteni yile làwû a mu khɨŋa na ghàn hi khə a wana noma shyəma ghàn nê hi fè ghaŋhe wi wunu. Gha tɨni mô na ghɨt a Isalì ale mò chin, ta nì tû biyani mò hi bê kwunâ hi bimî wu yu afa tum we a Yènfù chwokte ti bimi mihì. 26Yi ni chwùtè na Yènfù bê bônhè ghɨt a Isalì kə à jɨ̀m kə yi ghəl te ghɨ nyaka a ŋwàklù Fùyèn na:

“Bònhì bè fwolò a yi tèk yi Sayòn.

Wù bê so chyakhi besu ghɨta a yi sah yi nda Jakòb.”

27Yènfù tì jis na, “Mu ti chwûnà na

mu bè nêlò gha yina ha ghɨna wu tuk afa a mu lehifo besu ghɨna su atɨ̂n.”

28Ghɨt a Jûs ti tunhi hi ywo tum yì jùŋ, yìna ni ghɨna, ghɨna hi mô bànàsu Fùyènsu. Gha mi yina ti ni Yènfù bônhì ghàn tumu, biyani lem na fu nè baha kôŋà kə yi kôŋ ghɨt a Jûs kum be be ghɨna. 29Yi mô ni beka Yènfù chìnà chwoka wùt bônhì wûn, fu tà fî kwuna jə kwâktì yi wuni. 30Ha ghàn tumu, ghàn ndùku ywo wi ha Yènfù, biyani chin hì mô ma fu ti kwohi seni ha ghàn njwo ghɨt a Jûs ti tunhi hi yu ha wûn. 31Yi mô kəbi ni ha ghɨt a Jûs. Yènfù kwohi seni ha ghàn a ghɨna wu lùk shyəma ghɨna yen ma ghɨ kahi təm a ghɨna, ma ghɨ fê boŋà kwohi seni ha ghɨna. 32Yènfù ti kwut ghɨta nâ à jɨ̀m nî na ghɨ hi tâ nì tû shyəma fu chwûtè seni kwolani ye a fu kəta ha ghɨna.

Ghàhnà kəta hi tè kokhe Fùyèn

33Yi mô kə nâ hamok na Yènfù kətalò ghak yi kanani hi fo ha ghɨta, kəta kə tof wù jɨ̀m, khə a gha à jɨ̀m! Wùt bu hi fòktè gha ghe a fu kwâktè. Wùt bu hi khɨle lum we a fu nê gha atɨ̂n. 34Yi mô kə yi ghəl te ghɨ nyaka a ŋwàklù Fùyèn na:

“Wùt khə wi gha ye a Bâba kwàktè,

wùt kpene wi hi tobhi wûn.

35Wùt tà timi fo jə shyə ale ha Yènfù

hi tè ki na fu kahà lak.”

36A fate Fùyèn mwə̀ mù jɨ̀m, mwə̀ mù tɨn mô kə kum te fu kôŋà na mù hi mô, bê nì kokhînì ha wûn. Kokhînì yen ha Yènfù a yu mù jɨ̀m. Àmèn.

Currently Selected:

Lumàns 11: bmv

Highlight

Copy

Compare

Want to have your highlights saved across all your devices? Sign up or sign in

Learn More About Ŋwàklù Fùyèn Kàn Mù Fê (Cameron)