Lumàns 10

1Mu kòŋà nâ haŋaŋ fê jə̂mà kə nâ yi jə̂m ha wana noma na Yènfù bonhi ghɨt a Jûs. 2Mu khəlò na ghɨna laha kôŋà kə nâ yi kôŋ hi tè kokhe Fùyèn biyani kokhe wi a wu lum wu tofanu. 3Ghɨna khə wi lum we a Yènfù lyè ghɨta ha ghɨt a chilichili atɨ̂n. A ni gha ye a ghɨna tunhe lum mu wûn bɨlà fate wu ghɨna. 4Yi mô ni beka Klistù hì mô ma wù ti bên ni na Saki hi fê kəta wi jyaka. Wù ni ni shyəma nâbi nde we a wù bime ha wûn hi mô chilichili a Yènfù ashyə̂.

Yènfù làhi bònhè nâbi nde

5Musìs tî nyak na wùt hì khɨŋa hi tè mò chilichili kum yi sâk, ma wù hi kəta hi tè fate lèm kə yi sak yì jɨ̀m hi tè chyə̂. 6Biyani, lum we a ghɨta mò chilichili atɨ̂n kum yi bimî wijə te yi sâk. Ghɨ nyak a ŋwàklù Fùyèn na, “Kə wò buf nâ, à nè kwoka nde a nyə̂?” Ma wò nè bufa nâ, à nè kwoka nde hi lyè chwo nì Klistù agha? 7“Kə wò buf nâ, a nè chwo nde a yi lak yi ghɨt a chyə agha?” Ma wò nè bufa na, à nè chwo nde hi lòhè Klistù a yi kpû agha? 8Ghɨ ti nyak na, “Gha Fùyènì bakhe kə ni ha ghàn. Yi mô a ghàn a jwô fê mô a ghàn a təm.” A mô yì yîn ye a ghàh fòktè na ghàn yu ma ghɨ bimi. 9Ghàh ni jìsà na nâbi nde ki jîs nì jwo yi wuni na Jisòs mò Bâba bime a wun a yi təm na Yènfù tî lôhì wûn a yi kpû, ma wù bê bon. 10Yi mô ni beka wùt bime a wun a yi təm, Yènfù lyi wûn ha wùt wù chilichili, wù jis nì jwo yi wuni na Klistù mò Bâba, wu bonlò. 11Yi mô kə yi ghəl te ghɨ nyàka a ŋwàklù Fùyèn na, “À bimi nâbi nde ha wûn, ma wù bê tè wumî.” 12Bâba mò Bâba kə ha ghɨt à jɨ̀m. Hanɨ̂ŋ bu ha wùt à Jûs nì ha tumu. Wù fo yi yutì nâbi ha nde we a wù lona a gâmtìnì ha wûn. 13Yi mô kə te ghɨ nyaka a ŋwàklù Fùyèn na, “Bâba bè bônhèlò nâbi nde we a wù toŋte yet yi wuni hi lon a yi gâmtì.”

14Biyani ghɨta shìki mô teka ghɨ bimi ha wùt, ghɨ ne lon yàni gâmtìnì ha wun agha? Ghɨ ni mò hi bimi yàni ha wûn teka ghɨ yu tum kum wun agha? Ghɨ ni mò hi yu yàni tum kum wûn teka wùt fokti agha? 15Wùt ni mò hi fòktè tum mi yina yàni ha ghɨta teka ghɨ tum wun agha? Ghɨ ti nyak a ŋwàklù Fùyèn na, “Ghàn yen te ghɨta bènà nì tum yì jùŋ hi fòktì, bên yi ghɨna jwôfà yi jwôf yi kanani!” 16Biyani, à wijə ghɨt à jɨ̀m te ghɨ ywo tum yì jùŋ mi yìna ghɨ lem a to atɨ̂n. Yi mô kə yi ghəl te fòkti Ìsayà tì jìsa buf na, “Ghɨt ghe a ghɨ ywo tum ye a ghàh fòktè bimelò mò nâ nde ghɨ̂n a Bâba?” 17Yi ni chwùtè hamok na wùt ni bime kə wu yu afa wù ywo tum à Fùyèn, wùt ywo kə wu yu afa ghɨ fôktè tum kum Klistù ha wûn.

18Mu wu hì bufa nâ, yi ni mò na ghɨt a Jûs tà yu jə gha yi Fùyènì ma? Ghɨna ti yû, kə yi ghəl te ghɨ tì nyàka a ŋwàklù Fùyèn na:

“Ghɨ ti yu jyesu fòktìsù kə tu lùk tù jɨ̀m a mbyî.

Ghɨna ti fôktì gha, ghɨ ti yû kə taŋ tù a mbyî tù jɨ̀m.”

19Mu bufa kəbi nâ, yi ni mò na ghɨt a Isalì tà che yu khɨli jə gha ye a ghɨ fôktè ma? Musìs nâ nì ngɨŋ à wûn tî jis kum gha mi yina jis na Yènfù jis na:

“Mu nè nêlò ghàn, ma ghàn hi kəta ghə̀k

kum ghɨt ghe a ghɨ kpene wi hi tè kəta yi lak yi ghɨna yi ngɨŋi.

Mu nè nêlò, ma ghàn hi bâŋhè lâ

kum à ghɨ̂t yi lak yile, ghɨna kəta wi tofu.”

20Ìsayà tî jîs kə nâ a ndan tê fàn na, Yènfù jis na:

“Ghɨta ti yen mu, ma ghɨ chehì khɨŋa wijə mu.

Mu ti chwûtì ngɨŋ à mì ha ghɨta, ma ghɨna chehì bufa wijə mu.”

21Biyani ha ghɨt a Isalì, Yènfù jis na, “Mu ti nâhì wo mu ha wu tuk wu fublùnù toŋa à ghɨ̂t na ghɨna ben, ghɨna ti tunhi hi ywo mu. Ghɨna ti ta nì to kahi a mu yi bàm.”

Currently Selected:

Lumàns 10: bmv

Highlight

Copy

Compare