Hibùlùs 8
8
Jisòs mò ngàŋ à ndâ Fùyèn yì ngaŋtena hanɨ̂ŋ
1Gha ye a ghàh jìsà mò na ghàhnà khəlò ngàŋ à ndâ Fùyèn yì ngaŋtena ni te wun mu wuna, wu mô a Fə̀n wù chìk a ngwùŋ a nyə̂, saka kə mwə̀ mù jɨ̀m. 2Wù fètà wu lùk, wu yule kpenê, a mô kə nâ ndâ Fùyèn a nyə̂ te Bâba ba teka à ba à ghɨ̂t.
3Ghɨ chwoka nâbi yìni ngàŋ à ndâ Fùyèn yì ngaŋtena, à hi mô na ghɨ chwok na yì hi fo fotu ghɨ̂tù ha Yènfù, se sù nyâm hi fo ha Yènfù. Ngàŋ à ndâ Fùyèn yi ngaŋtena yì ghàhnà boŋa kətalò hi tè kəta a shyə hi fo ha Yènfù. 4À ndùku mô na Jisòs hi mô a chyə̂, ma wù bê hi bu ngàŋ à ndâ Fùyèn nâ hakoh beka ngàŋsu ndâ Fùyènsu le se su mô a chyə̂, fo tu fô te Sak yi Musìs khɨŋa. 5Fêt ye a ghɨna nè te ngàŋsu ndâ Fùyènsu mô kə te a lɨ̂ŋhà yi gha ye a yi mô a nyə̂. A ni gha ye a Yènfù tobhe Musìs wu tuk afa wù ndùku khɨŋa hi ba ndalà fe ha Yènfù. Wù jis ha wun na, “Tòkna hi fate nâbi ghə kə yi ghəl wu lum afa a mu tì chwute ha wò a tô kùn.” 6Hi jìs yi gha kum yi fêt ye a Jisòs nè, yi kokne chyâlò fêt yi ngàŋsu ndâ Fùyèn mu sîn. Kàn me a wù yə ghê Yènfù yə̂ ghê ghɨta kokne chyâlò kàn mù mwu beka Yènfù tî chwûnà shyə tɨna ghɨ chyâ mwə̀ me a fu tì fo ha ghɨta ashyə̂.
7À ndùku mô na kàn mù shyə̂ hi mô kə a jûŋ, ma Yènfù ndùku fê khɨŋ wi hi yə kàn mù fê ghê ghɨta. 8Biyani Yènfù hì ngane ghɨt a wuna jîsà na:
“Yu bènàlò,
shyəma mu yə kànû mù fê ghàh à ghɨta a yi lak yi Isalì nì ghɨta a yi lak yi Judà.
9Kàn muna bè hì fê wijə te a me a mu tì yə ghàh à be ghɨna
wu tuk afa mu ndùku lyê hi fwu nì ghɨna a yi lak yi Ijìb.
Ghɨna tê gbì wu lum afa a kàn mu muna ndùku khɨŋa
kum ni, mu nyaŋ ghɨna. À jis mu Bâba.
10Kàn me a mu nè yə
ghàh à ghɨt a Isalì chin mò na:
Mu nè lêmàlò sak tamtu a ghɨna a təm
ma mu fê nyak sak tu tɨntu a ghɨna tu kwàk.
Ma mu nê hì mô Yènfù ghɨna fu,
ghɨna mô ghɨt a ma.
11Wùt bè hì fê yike wijə yi yikî wùt wùlè
makə wù yike wâ nì na
wù khɨli Bâba,
njwo ghɨt à jɨ̀m bè khɨlelò mu,
hi yìmi kə ha wùt wù tetana hi tàn ha we a wù ngaŋte chyâ nâbi nde.
12Mu bè lêhèfo lò besu ghɨnasu
ma mu hi fê kwàktè wijə gha ghe a ghɨna ne bobhe.”
13Yènfù jis kum kàn mù fê hi chwùtì na mù shyə̂ hì mô ma mù ti mwuhî. Ghàhnà khəlò na shyə mwuhe ghɨ chyəte kə ni, ghɨ mâkàlò.
Currently Selected:
Hibùlùs 8: bmv
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc.
