Hibùlùs 7

Mèlkisedèk ndùku mô ngàŋ à ndâ Fùyèn

1Mèlkisedèk mu wuna ni ndùku mô fə̀n à Salèm fê mô kəbi ngàŋ à ndâ Fùyèn fe a fu ngaŋte kpene. À ndùku mô te Ablàhâm shika tuma woŋi, ghê ghɨt a wuna yə tu fə̂n tu dô kə ni, wù kahi shihi kolô, Mèlkisedèk yen wun wu lum bonhi wûn. 2Ablàhâm chîntì mwə̀ me a wù khɨtè a yi wòŋ jyâtì bâh ìwûm fo bâh à mòk ha Mèlkisedèk. Yet yi wuni yina na Mèlkisedèk ndùku mô na, “Fə̀n à Chilichili.” Wù ndùku mô fə̀n à Salèm, Salèm mô na, “Yutìnì.” Yi chwûtè na wù ndùku mô kəbi Fə̀n à yì yùtì. 3A mô a ŋwàklù Fùyèn teka ghɨ fokti na bè wûn ndùku mô nde agha, nè wûn mô nde agha. Ghɨ tà jis jə nâbi gha kum be wuna, tê jìs yi gha kum tuk we a ghɨ tì bwə wun atɨ̂n nì we a wu tì kpu atɨ̂n. Yi ni chwùtè na wù tì faŋ a ngàŋ à ndâ Fùyèn kə a yû mù jɨ̀m kəbi te Wâ Fùyèn.

4Ghàn tà yen na Mèlkisedèk ndùku mô kə nâ wut wù tâ agha? Nâbi bè yi lak yi Isalì, a mô Ablàhâm we wù tì jyàte mwə̀ me a wù kwote a yi wòŋ bâh ìwûm fo bâh à mòk ha wûn. 5Sak yi Musìs ndùku chwûtè na ngàŋsu ndâ Fùyèn se a su fwo a Lefì yi sah yi ndâ kətalò hi tè fye bâh a shyə̀ à mòk atɨ̂n wu bâh ìwûm ha ghɨt a Isalì, yə. Yi ni chwùtè na ghɨna ndùku kaha fye kəbi mwə̀ muna ha wana ne ghɨna nâbi te ghɨna ndùku mô kəbi wana Ablàhâm. 6Mèlkisedèk ndùku wijə wut a Lefì yi sah yi ndâ biyani wù fyi mwə̀lû ha Ablàhâm fî bonhi Ablàhâm, a mô wun we a Yènfù tì chwùne hi bònhì. 7Yi mô kə nâ hamok na Mèlkisedèk ndùku koknelò chyâ Ablàhâm beka à yè lô kə wut we a wù kokne, bonhe wùlè wù kokne wijə te wûn. 8Ha ngàŋsu ndâ Fùyèn se a su ndùku fye a bâh a shyə̀ à mòk atɨ̂n à wù bàh ìwûm yâ, ghɨna ndùku mô ghɨta mò hi kpû, biyani ha Mèlkisedèk, Ablàhâm ti jyâtì mwə̀lû bâh ìwûm fo à mòk ha wûn, chyàlò ghɨna beka wù wi hi kpû, kə yi ghəl te ghɨ nyaka a ŋwàklù Fùyèn. 9Ghàhnà làhi jìs na Lefì nâ nì ngɨŋ à wûn tî boŋ fo a bâh à mòk atɨ̂n à wu bàh ìwûm ha Mèlkisedèk, a mô ghe Ablàhâm tì fo. 10Yi mô kə nâ ni beka Mèlkisedèk tì yen Ablàhâm, wu baha mô teka wù bwɨ Lefì.

11Yènfù tì fo Sak yi Musìs ha ghɨt a Isalì ghe a wu lum shyəma ghɨt a Lefì a yi sah yi nda hi khə hi nè yi fêt yi ngàŋsu ndâ Fùyèn mi yîn. À ndùku mô na fêt yi ghɨna hi kpenê hi nì na ghɨta hi mô chilichili ma Yènfù tà fî chinhi jə ngàŋ à ndâ Fùyèn yìlè wu mô kəbi ni te Mèlkisedèk, a bu ni te Alòn. 12Yi mô hamok na Yènfù kwunelò ghɨt ghe a ghɨ kəta hi tè mò ngàŋsu ndâ Fùyènsu, fu boŋ kwuna kəbi yi sâk. 13Bâba ghàhnà we a ghɨ jîsà kum wûn ni tì fwo yi sah yi nda yi lô teka wùt timè fwo atɨ̂n ha ngàŋ à ndâ Fùyèn. 14Ghàhnà khə mihèlò na Bâba ghàhnà tì fwo a Judà yi sah yi nda, ma Musìs tì shihi jìs kum ngàŋ à ndâ Fùyèn tê toŋte jə̀ sah yi nda mi yin.

Ngàŋ à ndâ Fùyèn ye a yì mò kəbi te Mèlkisedèk

15Gha tɨni ti fî tôk bân njwo ngàŋ à ndâ Fùyèn yìlè ti bên, mô kəbi te Mèlkisedèk. 16Ghɨ tà lem jə wûn a ngàŋ à ndâ Fùyèn yi ngaŋtena a yi sak yì ghɨ̂tì makə kum sah yi wuni yi nda. Ghɨ tì lem njwo wù mò kə a yu mù jɨ̀m, chyəna wuna kəta a jyak. 17Ghɨ nyak kum wûn a ŋwàklù Fùyèn na:

“Wò ti faŋ ha ngàŋ à ndâ Fùyèn kə a yu mù jɨ̀m,

kəbi ni te Mèlkisedèk.”

18Yi ni chwùtè na Yènfù ti mâkà sak yi mwu njwo yi kəta wi jyaka bu hi gàmtè wût. 19Sak yi Musìs ndùku kəta wijə jyaka hi nì na wùt hi mô chilichili a Yènfù ashyə̂. Biyani Yènfù chwùnà yi gha ha ghàhnà chin, yi kokne chyâ yi Sâk, a mô yi gha tɨni a yi chwûtè lumu na ghàhnà hi khɨŋte bakhe yênà ha Yènfù.

20Yènfù tì shihi chwùnà yi gha mi yina, jis fah lò. Fu tà tì shihi lèm a ghɨt ale a ngàŋsu ndâ Fùyènsu fah yi ghâ, 21biyani wù shihi lèm à wùna jis na:

“Bâba ti fah na, Wò ti faŋ a ngàŋ à ndâ Fùyèn kə a yu mù jɨ̀m.

Wù tì fah ni bu hi bè fè kwuna yi gha ye a wù jìsa.”

22Te Yènfù tì faha ni, yi ni chwùtè na Jisòs mò chwena hi chwùtì na kàn me a wù yə nì ghàhnà chin jwòfà chyâlò mù shyə̂.

23Chichàsu ndâ Fùyènsu ndùku dô lò ashyə̂ beka ghɨ ndùku lêmà a wut a ngàŋ à ndâ Fùyèn, wù ben kpû wu de fêt yi wuni, wùt wù lò hi kəta hi lyè luk wu tɨnu. 24Biyani ha Jisòs, wù mò ma wù ti faŋ a ngàŋ à ndâ Fùyèn kə a yu mù jɨ̀m beka wù bè hi yusa mô kə yi mô. 25A ni yi gha ye a wù mò nâbi wùni yu mô hi bònhè ghɨt ghe a ghɨ bênà ha Yènfù ma ghɨ tohne chya ha wûn beka wù mò, jə̂mà kə yi jə̂m, chyate Fùyèn kum ghɨna.

26A mô kə Jisòs a ngàŋ à ndâ Fùyèn yi ngaŋtena ye a yì kpene hi gàmtè ghàhnà. Wù yule kpenê, kəta wi njahi teka wù timè ni be, ma Yènfù ti fihi wun a ghɨt a be fùtɨ̂n kokhi lem wûn a nyə̂. 27Wu bu ni te ngàŋsu ndâ Fùyènsu le se su ndùku kəta hi tè fo tu fô kum besu ghɨna su kə mu tuk mù jɨ̀m, shyəma su fê fo kum besu ghɨ̂tsù. Wù mò ma wù tì fo ngɨŋ à wûn a yi fô ha Yènfù, fo kə wu yu wù mòk, yi mi kə yâ. 28Ghɨt ghe a Sak yi Musìs tì bime na ghɨ lem ha ngàŋsu ndâ Fùyènsu ngaŋtesu ndùku mô kə à ghɨ̂t te ghɨt ale, nê kəbi be. Biyani à hì mô chwunu we Yènfù tì chwùne fah lò, a yi bàm te fu fo Saki ma fu ti chwok Wâ wûn te wù hì mô ma wù ti kpenâ mîhìlò te wù khɨŋa, lem na wù hi mô ngàŋ à ndâ Fùyèn yì ngaŋtena kə a yû mù jɨ̀m.

Currently Selected:

Hibùlùs 7: bmv

Highlight

Copy

Compare