Hibùlùs 5

1Nâbi yìni ngàŋ à ndâ Fùyèn yì ngaŋtena te ghɨ chwoka a ghɨta fùtɨ̂n lyè luk wu ghɨ̂tù a Yènfù ashyə̂, fo fotu, fê se nyamsu kum besu ghɨna su. 2Ngàŋ à ndâ Fùyèn yina nè yi hi bone ha ghɨt ghe a ghɨ khə wi gha, fê nê tu jâh beka nâbi wûn a wun a ngɨŋ mò kəbi wut boŋa botâ. 3A ni gha ye a wù kəta hi tè fo tu fo kum besu wunsu kəbi yi ghəl te wù fo kum besu ghɨ̂tsù. 4Gha yile fê mô kəbi na wùt wi hi chwoka ngɨŋ à wûn a ngàŋ à ndâ Fùyèn yì ngaŋtena hi tè fye wu kum atɨ̂n. A chwoka kə Fùyèn kə yi ghəl te fu tì chwoka Alòn.

5Yi ni mò kəbi yi ghəl te Yènfù tì chwoka Klistù a ngàŋ à ndâ Fùyèn yì ngaŋtena. À tà tì chwok jə Klistù ngɨŋ à wûn hi tè fye wu kum atɨ̂n. Yènfù jis ha wun na,

“Wò mò Wâ mù;

hi yìmì lân, mu mô Bì ha wò.”

6Fu tì jis kəbi wu lùk wule na,

“Wò ti faŋ a ngàŋ à ndâ Fùyèn kə a yû mù jɨ̀m,

kəbi wu lum afa a Mèlkisedèk ndùku mô atɨ̂n.”

7À ndùku mô te Jisòs baha chyə̂ a mbye afân, wù ni hi jə̂mà ha Yènfù, bwata jyê. Wù ndùku jə̂mà ni beka wù ndùku khəlò na Yènfù kətalò jyaka hi bònhè wûn a yi kpû. Yènfù tì yu wûn beka wù ndùku chyə chyənà, yì ngumlena. 8Jisòs ndùku mô kə nâ Wâ Fùyèn biyani fê yiki hi tè nè gha ye Yènfù khɨŋa atɨ̂n à sù ngə̂k. 9À ndùku mô te wù kpene mihe te Yènfù ndùku khɨŋa na wù hi mô, fu lem wûn ha Bònhì ha ghɨt ghe a ghɨ ywo wun, na wù hi mô Bònhì a ghɨna kə hamok. 10Yènfù fî lem wun na wù hi mô ngàŋ à ndâ Fùyèn yì ngaŋtena kəbi wu lum afa Mèlkisedèk ndùku mô atɨ̂n.

Kə wùt bè mâkà bimî yi wuni

11Gha mò dô kə ni hi jìs ha ghàn kum gha mi yîn biyani yi bona wi hi jìs beka ghàn nyàŋhè ywo khɨle wi gha. 12Ghàn yê hì mô hi tè mô chîn, yike ghɨta nì gha Fùyènì biyani ghàn baha mô na ghɨ hi fê yike ghàn nì gha ashyə ghe a ghàn tì ywo kum yi gha yi Fùyènì. Ghàn baha kəta kə hi tè nyoŋ a ghɨni ni te mwəlà mù bot. Ghàn baha mô teka ghɨ kpen hi tè yə mwə̀ mù yə̂mù mù tâ. 13Nâbi nde we a wù baha nyoŋa kə ghɨni mò wan wù bot, khə wi hi yen a khɨle gha ye a yi mô chilichili a Yènfù ashyə̂. 14Biyani, wùt we a wù yə mwə̀ mù yə̂mù mù tâ mò wut ma wù ti fati yikî hì khə gha a jûŋà, khə ghɨ be.

Currently Selected:

Hibùlùs 5: bmv

Highlight

Copy

Compare