Roman 9
9
Nẅùə̀ pobə pə̀ənə̀ ɨ̀pe nɨ à tsoʼnə
1Ngwə̀ nshwəŋə̀ lə a nkǔŋə nkuŋə ntiinə m̀bənə ŋwùə̀ Kristù ka mə nyìi mə̀ a chwìrə̀. Ntɨŋmə̀ mə̀ nɨ Àzhwùə̀ Nẅùə̀ a puʼtə̀nə ɨ zhyə̂ lo ka ǹnyìi mə̀ lə a chwìrə̀, 2lo ngwə̀ nsòmnə̀ tɨsɨŋnə nkɨ mbə nɨ àndzaŋə tɨ myə̀ amwuə ntɨŋmə̀ mə̀. 3Ntii pɨlyimə ɨ̀pâ pobə ngẅàrə̀ mə̀, nkòŋə̀ lo mbə̀ʼə pɨ chyâ ndòonə̀ aŋunə mɨ̀ŋə̀ ngàpə̀ a wəə pɨ Kristù ntii ghobə. 4Pobə la pànə̀ pɨ Israel nɨ Nẅùə̀ a lə̀ lòonə aŋunə ɨ̀poonə̀ ɨ̀pe, nnèrə̀ ɨ̀pòŋə̀ e ambo pobə, ngwàrə̀ ɨ̀kàanə̀ pobə pɨ pobə, ŋŋâ pɨ̀mbòomə ambo pobə, ngɨ̀rə̀ pobə pə nɨ àlàŋə a nɨ ghuʼtə̀ a Nẅùə̀ nɨ a kùʼnə̀nə nkɨ mbə nɨ mɨ̀nkàʼnə mɨ Nẅùə̀. 5Pobə lə̀ furə̀ la amwuə ngẅàrə̀ pɨ̀tǎ pɨ̀tǎ ɨ̀pə̀ənə̀, Kristù a tyiʼə̀ nfurə̀ amwuə ngẅàrə̀ ghu tsaʼa ŋwùə̀ mɨsoŋə. Pə̀ənə̀ tə nguʼtə̀ a Nẅùə̀ wa nɨ à pənə Nẅùə̀ wa nɨ à puʼtə̀nə pànə̀ pɨ̀tsùmə̀ nɨ nkuŋə̀. Amen.
6La ka m̀mə nshwəŋə̀ mə̀ pə lo àshwəŋnə̀ Nẅùə̀ a làŋə̀ àfǐfǐ, ntiinə ka a pə e ŋwùə̀ ntsùmə̀ nɨ pɨ pyə̂nə amwuə ngẅàrə̀ Israel nɨ à pənə ŋwùə̀ Israel. 7Ka à kɨ mbə e ngẅàrə̀ Abràhamə̀ ntsùmə̀ nɨ ɨ̀ pənə ɨ̀poonə̀ pɨ Nẅùə̀. La Nẅùə̀ à lə̀ shwəŋə̀ ambo Abràhamə̀ lo, “Pɨ ghǎ làŋə̀ a ndzùmə̀ Isàkə̀ fuŋə̀ nɨ̀linə̀ nɨ ngẅàrə̀ o.” 8Zèrə zə a nèrə̀ la lo ka à pə e ɨ̀poonə̀ pɨ̀tsùmə̀ nɨ pɨ pyə̂nə amwuə ndwuumə̀ nɨ ŋwùə̀ mɨsoŋə à wa mbyə̂ a moonə̀ nɨ Nẅùə̀ à lòonə aŋunə ɨ̀poonə̀ ɨ̀pe, a lòo e la pyə̀ pa nɨ à lə̀ kàʼà mə mbə̀ʼə ghobə la aŋunə ɨ̀poonə̀ ɨ̀pe. 9Mbə̀ʼnə Nẅùə̀ à lə̀ kàʼà la lo, “Ngǎ kẅirə̀ tô amwuə nkwùə̀ nɨ ɨ̀ kùʼnə̀nə, Sarah â pyə̂ a mômbyàŋnə̀.”
10Ka lə pə e ànwùə̀ ghu àtsùmə̀, ɨ̀poonə̀ pɨ Rèbekà pa pɨpaa lə̀ kɨ mbə la taʼà tǎ, a pə tǎ pɨ tǎ ɨ̀wə̀ənə̀ Isàkə̀. 11Mbaa pə tsaʼnə pɨ lə̀ pirə̀nə e ɨ̀poonə̀ pə̀ tɨ pyə̂, pobə kɨ mbirə̀ ghobə ànwùə̀ yè ɨ̀shìʼnə̀ kə̀ yè tɨ̀pòŋə̀ tɨ ghɨ̀rə̀, nɨ̀ghɨ̀rə̀ lo nɨ̀tsoʼò a taʼà mômbyàŋnə̀ a lanə mbə amwuə ndwuumə̀ nɨ Nẅùə̀ a lə̀ nùŋə̀nə amwuə ntɨŋmə̀ e, ka pə e pə tsaʼnə pànə̀ ghɨ̀rə̀nə mɨ̀nwùə̀, mbə pə tsaʼnə Nẅùə̀ a tsoʼnə, 12Nẅùə̀ a lə̀ shwəŋə̀ ambo Rèbekà lo, “Ghù ntsàambyə̀ a ghǎ fàʼà ambo àzùŋə̀.” 13Tsaʼnə àŋwàʼnə̀ Nẅùə̀ a shwəŋə̀nə lo, “Ndə̀ kòŋə̀ a Yàkobə̀, la mbàanə̀ a Esau.”
14Mbə̀ʼə pə̀ənə̀ tyiʼə̀ nshwəŋə̀ lə lo àkə? Lo ka Nẅùə̀ a saʼà e ɨ̀sàʼa ɨ̀shìʼnə̀? Ka a pə e a lenə! 15Mbə̀ʼnə a lə̀ shwəŋə̀ ambo Mǔsî lo,
“Mbɨ koorə̀ mɨ̀lɨŋə̀ mɨ ŋònə̀ nɨ ǹkòŋə̀nə a nɨ koorə̀,
kɨ sòmnə̀ aŋunə ŋònə̀ nɨ ǹkòŋə̀nə a nɨ sòmnə̀ aŋunə ze.”
16Njiilo, ka mɨ̀nwùə̀ mèrə mə làŋə̀ e pə a ndzùmə̀ àfàʼà nɨ ŋwùə̀ mɨsoŋə a fàʼnə kə̀ nkòŋə̀. Mɨ làŋə̀ pə a ndzùmə̀ àkoorə̀ mɨ̀lɨŋə̀ Nẅùə̀. 17Mbə̀ʼnə àŋwàʼnə̀ Nẅùə̀ a shwəŋə̀ ambo Ferò lo, “Ndə̀ ghɨ̀rə̀ wə̀ pə ɨ̀fò la mbə̀ʼə làŋə̀ aŋunə ghò nèrə̀ ɨ̀tɨ̀ŋnə̀ mə̀, kɨ ghɨ̀rə̀ pɨ̀ zhyə̂ nɨ̀linə̀ ɨ̀tsâ amwuə àtwuə̀ ɨ̀shyə̂ àtsùmə̀.” 18Lenəla Nẅùə̀ à koorə̀ mɨ̀lɨŋə̀ mɨ ŋònə̀ nɨ à kòŋə̀nə a nɨ koorə̀ mɨ̀lɨŋə̀ ɨ̀me, nkɨ nkwùukə̀ ntɨŋmə̀ ŋònə̀ nɨ à kòŋə̀nə a nɨ kwùukə̀.
19Nɨ̀ pɨ pyiitə̀ ambo mɨ̀ŋə̀ lo, “A tə pəla a lenə, Nẅùə̀ a chi nfèrə̀ a wə̀ənə̀ lə lo àkə? Ɨ̀wə̌ a twuunə̀ ànwùə̀ nɨ Nẅùə̀ a kòŋə̀nə?” 20Ghò ŋwùə̀ mɨsoŋə lə ɨ̀wə̌ a nɨ pyiitə̀ ɨ̀pyiitə̀ ɨ̀shwəŋnə̀ ambo Nẅùə̀? Mbə̀ʼə nɨkɨŋə nɨ àtɨ̀tsaʼa pyiitə̀ ambo ɨ̀mboomə̀ nɨkɨŋə lo, “Wə̀ poomə̀ mə̀ pə lə ntii àkə?” 21Ka ɨ̀mboomə̀ mɨkɨŋə wa a pə e nɨ ɨ̀tɨ̀ŋnə̀ a nɨ lòo taʼà ntsɨŋə̀ àpòomə mboomə̀ mɨkɨŋə ghu mɨmbaa, taʼà a pə nɨkɨŋə nɨ tə̀chwìi; chyə̀ pə a nɨ laamə̀ àzwuumə̀ amwuə.
22A kɨ mbə la ndəŋə ndəŋə tsaʼnə Nẅùə̀ à lə̀ tàʼnə nnèrə̀ àtsə̂ ntɨŋmə̀ e, nkɨ ngɨ̀rə̀ pànə̀ zhyə̂ ɨ̀tɨ̀ŋnə̀ e, la ngẅìimə̀ ntɨŋmə̀ aŋunə pànə̀ nɨ à pənə nɨ àtsə̂ ntɨŋmə̀ aŋunə pobə, pobə kɨ nchwuʼtə̀ mbɨ̀ŋmə̀ ɨzobə a nɨ kwɨghə̀. 23À lə̀ kɨ ntàʼà nèrə̀ a nɨ̀ghaʼà ghù noʼnə wa nɨ à lə̀ kẅiirə̀nə aŋunə pànə̀ pa nɨ lə̀ nùŋə̀nə lo pobə ghǎ kẅiirə̀ a ẅèrə la, 24mbə̀ʼnə pə̀ənə̀ pa nɨ à lə̀ fuŋə̀nə, ka lə̀ furə̀ e la amwuə ndàʼà pànə̀ nɨ pobə pənə pɨ̀Jew, pɨ lə̀ kɨ furə̀ amwuə pànə̀ nɨ ka pobə pə ghobə pɨ̀Jew. 25Lə̌ tsaʼnə Nẅùə̀ à shwəŋə̀nə amwuə àŋwàʼnə̀ Hosyà lo:
“Mbɨ fuŋə̀ pànə̀ pa nɨ ka pobə lə̀ pə ghobə ɨ̀pâ la
nɨ ‘pə̀ənə̀ ɨ̀pâ.’
Mbɨ kɨ fuŋə̀ pànə̀ pa nɨ ka ndə̀ kòŋə̀ la
nɨ ‘pə̀ənə̀ ɨ̀pâ nɨ ǹkòŋə̀nə.’
26Tyìʼə̀ amwuə alyiʼə nɨ pɨ lə̀ shwəŋə̀nə ambo pobə lo,
‘Ka nɨ̀ pə wɨghə pə̀ənə̀ ɨ̀pâ,’
pɨ ghǎ kɨ fuŋə̀ a ghobə nɨ ɨ̀poonə̀ pɨ Nẅùə̀ ghù ntɨ̀ŋnə̀.”
27Ìsayà a kɨ ngyìi mbə̀ʼə pànə̀ pɨ Israel nshwəŋə̀ lo, “Mbaa pə tsaʼnə pànə̀ pɨ Israel noʼnə tsaʼa waakə a nɨ̀pwùnə nchyə la, a ghǎ chwarə̀ e la ndàʼà ghobə pɨ̀kɨ̂. 28Ntiinə Ndòʼnə̀mbyə̂ à ghǎ zàŋə̀ lə̂ ɨ̀sàʼa e nɨ mɨ̀tɨ̀ŋnə̀ pobə pɨ pànə̀ pɨ àtwuə̀ ɨ̀shyə̂ tɨghu a waʼà ànwùə̀ àtse.” 29A kɨ mbə la tsaʼnə Ìsayà à lə̀ pyə̀ mə nshwəŋə̀ lo,
“Mbuʼtə̀ mbyə̂ Ndòʼnə̀mbyə̂ à lə̀ pəla ka waʼà e a wə̀ənə̀ nɨ ngẅàrə̀ ɨ̀tse,
yi pə̀ənə̀ pə mə la tsaʼa Sodòmə̀ ghobə Gomorrah.”
Pànə̀ pɨ Israel pobə ntwuumə̀ ghù ɨ̀shìʼnə̀
30Pə̀ənə̀ tyiʼə̀ nshwəŋə̀ lə lo àkə? Lo pànə̀ nɨ ka pobə lə̀ pə ghobə pɨ̀Jew nɨ ka pobə lə̀ mə nkyiitə̀ a ghobə a nɨ ghɨ̀rə̀ mɨ̀nwùə̀ mɨ təəmə̀nə a mbyə̀ Nẅùə̀, pɨ tyiʼə̀ ngɨ̀rə̀ mɨ̀nwùə̀ ɨ̀mobə təəmə̀ ndàŋə̀ a ndzùmə̀ àpyiimə̀ ntɨŋmə̀ àzobə. 31La pànə̀ pɨ Israel nɨ pobə lə̀ pənə nkyiitə̀ a nɨ zùŋə̀ a mbòomə lo mɨ̀nwùə̀ ɨ̀mobə təəmə̀ a mbyə̀ Nẅùə̀, ka mèrə lə̀ təəmə̀ e. 32A ghɨ̀rə̀ àkə lo kò mɨ̀nwùə̀ ɨ̀mobə təəmə̀? A lə̀ pə ntiinə ka pobə lə̀ nùŋə̀ a ghobə mɨ̀ntɨŋmə̀ ɨ̀mobə aŋunə Nẅùə̀, mmə naŋə̀ pə ngɨ̀rə̀ mɨ̀nwùə̀ ɨ̀zobə. Lenəla, nkòntə̀ aŋunə nɨ̀ghòorə nkunə̀ a ɨ̀shyə̂, 33Tsaʼnə pɨ ŋwàʼnə̀ amwuə àŋwàʼnə̀ Nẅùə̀ lo,
“Nɨ̀ naŋə̀! Ǹnùŋə̀ nɨ̀ghòorə a Zayònə̀
nɨ pànə̀ ghǎ kòntə̀ aŋunə,
a pə nɨ̀ghòorə nɨ tsèrə pɨ ghɨ̀rə̀ pobə̂ kẅìntə̀ a ɨ̀shyə̂.
La ka pɨ pə ghǎ chyâ e ɨ̀sɨŋnə̀ àtwuə̀ ŋònə̀ wa ntsùmə̀ nɨ à nùŋə̀nə ntɨŋmə̀ e aŋunə ze la.”
Currently Selected:
Roman 9: pny
Highlight
Copy
Compare
Share
Want to have your highlights saved across all your devices? Sign up or sign in
© 2017, Cameroon Association for Bible Translation and Literacy
Roman 9
9
Nẅùə̀ pobə pə̀ənə̀ ɨ̀pe nɨ à tsoʼnə
1Ngwə̀ nshwəŋə̀ lə a nkǔŋə nkuŋə ntiinə m̀bənə ŋwùə̀ Kristù ka mə nyìi mə̀ a chwìrə̀. Ntɨŋmə̀ mə̀ nɨ Àzhwùə̀ Nẅùə̀ a puʼtə̀nə ɨ zhyə̂ lo ka ǹnyìi mə̀ lə a chwìrə̀, 2lo ngwə̀ nsòmnə̀ tɨsɨŋnə nkɨ mbə nɨ àndzaŋə tɨ myə̀ amwuə ntɨŋmə̀ mə̀. 3Ntii pɨlyimə ɨ̀pâ pobə ngẅàrə̀ mə̀, nkòŋə̀ lo mbə̀ʼə pɨ chyâ ndòonə̀ aŋunə mɨ̀ŋə̀ ngàpə̀ a wəə pɨ Kristù ntii ghobə. 4Pobə la pànə̀ pɨ Israel nɨ Nẅùə̀ a lə̀ lòonə aŋunə ɨ̀poonə̀ ɨ̀pe, nnèrə̀ ɨ̀pòŋə̀ e ambo pobə, ngwàrə̀ ɨ̀kàanə̀ pobə pɨ pobə, ŋŋâ pɨ̀mbòomə ambo pobə, ngɨ̀rə̀ pobə pə nɨ àlàŋə a nɨ ghuʼtə̀ a Nẅùə̀ nɨ a kùʼnə̀nə nkɨ mbə nɨ mɨ̀nkàʼnə mɨ Nẅùə̀. 5Pobə lə̀ furə̀ la amwuə ngẅàrə̀ pɨ̀tǎ pɨ̀tǎ ɨ̀pə̀ənə̀, Kristù a tyiʼə̀ nfurə̀ amwuə ngẅàrə̀ ghu tsaʼa ŋwùə̀ mɨsoŋə. Pə̀ənə̀ tə nguʼtə̀ a Nẅùə̀ wa nɨ à pənə Nẅùə̀ wa nɨ à puʼtə̀nə pànə̀ pɨ̀tsùmə̀ nɨ nkuŋə̀. Amen.
6La ka m̀mə nshwəŋə̀ mə̀ pə lo àshwəŋnə̀ Nẅùə̀ a làŋə̀ àfǐfǐ, ntiinə ka a pə e ŋwùə̀ ntsùmə̀ nɨ pɨ pyə̂nə amwuə ngẅàrə̀ Israel nɨ à pənə ŋwùə̀ Israel. 7Ka à kɨ mbə e ngẅàrə̀ Abràhamə̀ ntsùmə̀ nɨ ɨ̀ pənə ɨ̀poonə̀ pɨ Nẅùə̀. La Nẅùə̀ à lə̀ shwəŋə̀ ambo Abràhamə̀ lo, “Pɨ ghǎ làŋə̀ a ndzùmə̀ Isàkə̀ fuŋə̀ nɨ̀linə̀ nɨ ngẅàrə̀ o.” 8Zèrə zə a nèrə̀ la lo ka à pə e ɨ̀poonə̀ pɨ̀tsùmə̀ nɨ pɨ pyə̂nə amwuə ndwuumə̀ nɨ ŋwùə̀ mɨsoŋə à wa mbyə̂ a moonə̀ nɨ Nẅùə̀ à lòonə aŋunə ɨ̀poonə̀ ɨ̀pe, a lòo e la pyə̀ pa nɨ à lə̀ kàʼà mə mbə̀ʼə ghobə la aŋunə ɨ̀poonə̀ ɨ̀pe. 9Mbə̀ʼnə Nẅùə̀ à lə̀ kàʼà la lo, “Ngǎ kẅirə̀ tô amwuə nkwùə̀ nɨ ɨ̀ kùʼnə̀nə, Sarah â pyə̂ a mômbyàŋnə̀.”
10Ka lə pə e ànwùə̀ ghu àtsùmə̀, ɨ̀poonə̀ pɨ Rèbekà pa pɨpaa lə̀ kɨ mbə la taʼà tǎ, a pə tǎ pɨ tǎ ɨ̀wə̀ənə̀ Isàkə̀. 11Mbaa pə tsaʼnə pɨ lə̀ pirə̀nə e ɨ̀poonə̀ pə̀ tɨ pyə̂, pobə kɨ mbirə̀ ghobə ànwùə̀ yè ɨ̀shìʼnə̀ kə̀ yè tɨ̀pòŋə̀ tɨ ghɨ̀rə̀, nɨ̀ghɨ̀rə̀ lo nɨ̀tsoʼò a taʼà mômbyàŋnə̀ a lanə mbə amwuə ndwuumə̀ nɨ Nẅùə̀ a lə̀ nùŋə̀nə amwuə ntɨŋmə̀ e, ka pə e pə tsaʼnə pànə̀ ghɨ̀rə̀nə mɨ̀nwùə̀, mbə pə tsaʼnə Nẅùə̀ a tsoʼnə, 12Nẅùə̀ a lə̀ shwəŋə̀ ambo Rèbekà lo, “Ghù ntsàambyə̀ a ghǎ fàʼà ambo àzùŋə̀.” 13Tsaʼnə àŋwàʼnə̀ Nẅùə̀ a shwəŋə̀nə lo, “Ndə̀ kòŋə̀ a Yàkobə̀, la mbàanə̀ a Esau.”
14Mbə̀ʼə pə̀ənə̀ tyiʼə̀ nshwəŋə̀ lə lo àkə? Lo ka Nẅùə̀ a saʼà e ɨ̀sàʼa ɨ̀shìʼnə̀? Ka a pə e a lenə! 15Mbə̀ʼnə a lə̀ shwəŋə̀ ambo Mǔsî lo,
“Mbɨ koorə̀ mɨ̀lɨŋə̀ mɨ ŋònə̀ nɨ ǹkòŋə̀nə a nɨ koorə̀,
kɨ sòmnə̀ aŋunə ŋònə̀ nɨ ǹkòŋə̀nə a nɨ sòmnə̀ aŋunə ze.”
16Njiilo, ka mɨ̀nwùə̀ mèrə mə làŋə̀ e pə a ndzùmə̀ àfàʼà nɨ ŋwùə̀ mɨsoŋə a fàʼnə kə̀ nkòŋə̀. Mɨ làŋə̀ pə a ndzùmə̀ àkoorə̀ mɨ̀lɨŋə̀ Nẅùə̀. 17Mbə̀ʼnə àŋwàʼnə̀ Nẅùə̀ a shwəŋə̀ ambo Ferò lo, “Ndə̀ ghɨ̀rə̀ wə̀ pə ɨ̀fò la mbə̀ʼə làŋə̀ aŋunə ghò nèrə̀ ɨ̀tɨ̀ŋnə̀ mə̀, kɨ ghɨ̀rə̀ pɨ̀ zhyə̂ nɨ̀linə̀ ɨ̀tsâ amwuə àtwuə̀ ɨ̀shyə̂ àtsùmə̀.” 18Lenəla Nẅùə̀ à koorə̀ mɨ̀lɨŋə̀ mɨ ŋònə̀ nɨ à kòŋə̀nə a nɨ koorə̀ mɨ̀lɨŋə̀ ɨ̀me, nkɨ nkwùukə̀ ntɨŋmə̀ ŋònə̀ nɨ à kòŋə̀nə a nɨ kwùukə̀.
19Nɨ̀ pɨ pyiitə̀ ambo mɨ̀ŋə̀ lo, “A tə pəla a lenə, Nẅùə̀ a chi nfèrə̀ a wə̀ənə̀ lə lo àkə? Ɨ̀wə̌ a twuunə̀ ànwùə̀ nɨ Nẅùə̀ a kòŋə̀nə?” 20Ghò ŋwùə̀ mɨsoŋə lə ɨ̀wə̌ a nɨ pyiitə̀ ɨ̀pyiitə̀ ɨ̀shwəŋnə̀ ambo Nẅùə̀? Mbə̀ʼə nɨkɨŋə nɨ àtɨ̀tsaʼa pyiitə̀ ambo ɨ̀mboomə̀ nɨkɨŋə lo, “Wə̀ poomə̀ mə̀ pə lə ntii àkə?” 21Ka ɨ̀mboomə̀ mɨkɨŋə wa a pə e nɨ ɨ̀tɨ̀ŋnə̀ a nɨ lòo taʼà ntsɨŋə̀ àpòomə mboomə̀ mɨkɨŋə ghu mɨmbaa, taʼà a pə nɨkɨŋə nɨ tə̀chwìi; chyə̀ pə a nɨ laamə̀ àzwuumə̀ amwuə.
22A kɨ mbə la ndəŋə ndəŋə tsaʼnə Nẅùə̀ à lə̀ tàʼnə nnèrə̀ àtsə̂ ntɨŋmə̀ e, nkɨ ngɨ̀rə̀ pànə̀ zhyə̂ ɨ̀tɨ̀ŋnə̀ e, la ngẅìimə̀ ntɨŋmə̀ aŋunə pànə̀ nɨ à pənə nɨ àtsə̂ ntɨŋmə̀ aŋunə pobə, pobə kɨ nchwuʼtə̀ mbɨ̀ŋmə̀ ɨzobə a nɨ kwɨghə̀. 23À lə̀ kɨ ntàʼà nèrə̀ a nɨ̀ghaʼà ghù noʼnə wa nɨ à lə̀ kẅiirə̀nə aŋunə pànə̀ pa nɨ lə̀ nùŋə̀nə lo pobə ghǎ kẅiirə̀ a ẅèrə la, 24mbə̀ʼnə pə̀ənə̀ pa nɨ à lə̀ fuŋə̀nə, ka lə̀ furə̀ e la amwuə ndàʼà pànə̀ nɨ pobə pənə pɨ̀Jew, pɨ lə̀ kɨ furə̀ amwuə pànə̀ nɨ ka pobə pə ghobə pɨ̀Jew. 25Lə̌ tsaʼnə Nẅùə̀ à shwəŋə̀nə amwuə àŋwàʼnə̀ Hosyà lo:
“Mbɨ fuŋə̀ pànə̀ pa nɨ ka pobə lə̀ pə ghobə ɨ̀pâ la
nɨ ‘pə̀ənə̀ ɨ̀pâ.’
Mbɨ kɨ fuŋə̀ pànə̀ pa nɨ ka ndə̀ kòŋə̀ la
nɨ ‘pə̀ənə̀ ɨ̀pâ nɨ ǹkòŋə̀nə.’
26Tyìʼə̀ amwuə alyiʼə nɨ pɨ lə̀ shwəŋə̀nə ambo pobə lo,
‘Ka nɨ̀ pə wɨghə pə̀ənə̀ ɨ̀pâ,’
pɨ ghǎ kɨ fuŋə̀ a ghobə nɨ ɨ̀poonə̀ pɨ Nẅùə̀ ghù ntɨ̀ŋnə̀.”
27Ìsayà a kɨ ngyìi mbə̀ʼə pànə̀ pɨ Israel nshwəŋə̀ lo, “Mbaa pə tsaʼnə pànə̀ pɨ Israel noʼnə tsaʼa waakə a nɨ̀pwùnə nchyə la, a ghǎ chwarə̀ e la ndàʼà ghobə pɨ̀kɨ̂. 28Ntiinə Ndòʼnə̀mbyə̂ à ghǎ zàŋə̀ lə̂ ɨ̀sàʼa e nɨ mɨ̀tɨ̀ŋnə̀ pobə pɨ pànə̀ pɨ àtwuə̀ ɨ̀shyə̂ tɨghu a waʼà ànwùə̀ àtse.” 29A kɨ mbə la tsaʼnə Ìsayà à lə̀ pyə̀ mə nshwəŋə̀ lo,
“Mbuʼtə̀ mbyə̂ Ndòʼnə̀mbyə̂ à lə̀ pəla ka waʼà e a wə̀ənə̀ nɨ ngẅàrə̀ ɨ̀tse,
yi pə̀ənə̀ pə mə la tsaʼa Sodòmə̀ ghobə Gomorrah.”
Pànə̀ pɨ Israel pobə ntwuumə̀ ghù ɨ̀shìʼnə̀
30Pə̀ənə̀ tyiʼə̀ nshwəŋə̀ lə lo àkə? Lo pànə̀ nɨ ka pobə lə̀ pə ghobə pɨ̀Jew nɨ ka pobə lə̀ mə nkyiitə̀ a ghobə a nɨ ghɨ̀rə̀ mɨ̀nwùə̀ mɨ təəmə̀nə a mbyə̀ Nẅùə̀, pɨ tyiʼə̀ ngɨ̀rə̀ mɨ̀nwùə̀ ɨ̀mobə təəmə̀ ndàŋə̀ a ndzùmə̀ àpyiimə̀ ntɨŋmə̀ àzobə. 31La pànə̀ pɨ Israel nɨ pobə lə̀ pənə nkyiitə̀ a nɨ zùŋə̀ a mbòomə lo mɨ̀nwùə̀ ɨ̀mobə təəmə̀ a mbyə̀ Nẅùə̀, ka mèrə lə̀ təəmə̀ e. 32A ghɨ̀rə̀ àkə lo kò mɨ̀nwùə̀ ɨ̀mobə təəmə̀? A lə̀ pə ntiinə ka pobə lə̀ nùŋə̀ a ghobə mɨ̀ntɨŋmə̀ ɨ̀mobə aŋunə Nẅùə̀, mmə naŋə̀ pə ngɨ̀rə̀ mɨ̀nwùə̀ ɨ̀zobə. Lenəla, nkòntə̀ aŋunə nɨ̀ghòorə nkunə̀ a ɨ̀shyə̂, 33Tsaʼnə pɨ ŋwàʼnə̀ amwuə àŋwàʼnə̀ Nẅùə̀ lo,
“Nɨ̀ naŋə̀! Ǹnùŋə̀ nɨ̀ghòorə a Zayònə̀
nɨ pànə̀ ghǎ kòntə̀ aŋunə,
a pə nɨ̀ghòorə nɨ tsèrə pɨ ghɨ̀rə̀ pobə̂ kẅìntə̀ a ɨ̀shyə̂.
La ka pɨ pə ghǎ chyâ e ɨ̀sɨŋnə̀ àtwuə̀ ŋònə̀ wa ntsùmə̀ nɨ à nùŋə̀nə ntɨŋmə̀ e aŋunə ze la.”
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
© 2017, Cameroon Association for Bible Translation and Literacy