Roman 16

Pàolò a chàʼtə̀ pànə̀ pɨ̀noʼnə a Romə̀

1Ntàʼà lo nɨ̀ zhyə̀ lo ndyimə ɨ̀wə̀ənə̀ Fèebè nɨ à pənə ngàŋə̀ àyèmpə̀ amwuə àshwatə̀ ɨ̀poonə̀ pɨ Kristù a Sènkreyà, a ŋònə̀ ɨ̀shìʼnə̀. 2Ǹtàʼà lo nɨ̀ kẅiirə̀ e aŋunə nɨ̀linə̀ nɨ Ndòʼnə̀mbyə̂ tyìʼə̀ tsaʼnə pànə̀ pɨ Nẅùə̀ pa nkẅiirə̀ a ŋònə̀ la, nkɨ ŋŋâ e nɨ àyèmpə̀ àtsùmə̀ nɨ à tàʼnə ambo pɨghə, ntiinə à yèmpə̀ mə pànə̀ pɨ̀noʼnə farə mə̀.

3Nɨ̀ chàʼtə̀ a Prìsilà pobə Aquila, la pànə̀ nɨ pəə pɨ pobə fàʼnə àpô moʼo ambo Kristù Yěsû. 4Pobə lə̀ tàʼà lo kwɨghə̀ àtwuə̀ nɨ mɨ̀ŋə̀. Ngwə̀ ngaʼà aŋunə pobə, ka pə e pə mɨ̀ŋə̀ nɨ mɨ̀ŋə̀, pɨ̀tsooshyə̀ pɨ pànə̀ nɨ ka pobə pə ghobə pɨ̀Jew pə̀ nkɨ mmə ngaʼà àzobə. 5Nɨ̀ kɨ nchàʼtə̀ ɨ̀poonə̀ pɨ Kristù pa nɨ pobə pa nkwuunə̀ a ndâ pobə la.

Ngwə̀ nkɨ mmə nchàʼtə̀ a mbòŋə̀ ɨ̀swùə mə̀ Epaenetus, nɨ à lə̀ pənə ntsàambyə̀ ŋwùə̀ a nɨ nùŋə̀ ntɨŋmə̀ e aŋunə Kristù a pàa àlaʼà Asia. 6Nkɨ mmə nchàʼtə̀ a Màriyà nɨ à fàʼnə nɨ ntɨŋmə̀ e ɨ̀tsùmə̀ ambo pɨghə. 7Nɨ̀ chàʼtə̀ Àndronikòsə̀ pobə Junyàsə̀, ngàŋə̀ ngẅàrə̀ ɨ̀zâ nɨ pəə pɨ pobə lə̀ pənə a ndâ ɨ̀tsaŋə̀. Pobə lə̀ pə pànə̀ pɨ̀tɨ̀ŋnə̀ a tɨ̀tɨ̀rə̀ ngàŋə ntwuumə̀ Kristù, ndə̀ kɨ nùŋə̀ ntɨŋmə̀ ɨ̀ghobə aŋunə Kristù zaʼà m̀bòŋə̀ nùŋə̀ àzâ.

8Nɨ̀ chàʼtə̀ a Ampliatus, mbòŋə̀ ɨ̀swùə mə̀ a ndzùmə̀ Ndòʼnə̀mbyə̂. 9Nchàʼtə̀ a Ùbanùsə̀ nɨ pəə pɨ pobə lə̀ mənə nfàʼà àfàʼà Kristù àpô moʼo, nɨ mbòŋə̀ ɨ̀swùə mə̀ Stakìsə̀. 10Nɨ̀ chàʼtə̀ a Apelles, nɨ à nèrə̀nə lo à pyiimə̀ a Kristù. Nkɨ nchàʼtə̀ pànə̀ nɨ pɨ pənə ngẅàrə̀ Àristobulùsə̀. 11Nɨ̀ chàʼtə̀ a ŋwùə̀ ngẅàrə̀ mə̀ Herodyònə̀, nɨ ɨ̀poonə̀ pɨ Kristù nɨ pɨ pənə amwuə ngẅàrə̀ Nasisùsə̀.

12Nɨ̀ chàʼtə̀ a Tèrèfinà pobə Tèrèfosà nɨ pobə pənə pə̀ngyə̌ nɨ pobə pa nfàʼà ambo Ndòʼnə̀mbyə̂ nɨ ntɨŋmə̀ ɨ̀ghobə ɨ̀tsùmə̀, nkɨ nchàʼtə̀ a mbòŋə̀ ɨ̀swùə mə̀ Pesìsə̀ nɨ à kɨnə mbə taʼà mə̀ngyə̌ nɨ à lə̀ fàʼnə tɨsɨŋnə ambo Ndòʼnə̀mbyə̂. 13Nɨ̀ chàʼtə̀ a Rufùsə̀ nɨ à pənə ngàŋə̀ àfàʼà Ndòʼnə̀mbyə̂ ghù ntɨ̀ŋnə̀ pobə mǎ e nɨ à lə̀ kɨnə mbə tsaʼa mǎ ambo mɨ̀ŋə̀. 14Nɨ̀ chàʼtə̀ a Àsinkritùsə̀, nɨ Flegònə̀, nɨ Hemèsə̀, nɨ Patrobàsə̀, nɨ Hemàsə̀ pobə pɨlyimə ɨ̀pə̀ənə̀ nɨ pɨ pənə pobə pɨ pobə. 15Nchàʼtə̀ a Filologùsə̀, nɨ Julyà, nɨ Neryùsə̀ pobə ndyimə e yɨ̀ mə̀ngyə̌. Nɨ̀ kɨ nchàʼtə̀ farə Òlimpàsə̀ pobə pɨ pànə̀ pɨ Nẅùə̀ pɨ̀tsùmə̀ nɨ pɨ pənə pobə pɨ pobə.

16Ŋwùə̀ â chàʼtə̀ a momaa e nɨ ɨ̀kòŋnə̀ Kristù, nkampə̀ mbɨ̀ŋmə̀ ɨ̀zɨghə pɨghə nɨ pɨghə. Ɨ̀shwatə̀ ɨ̀poonə̀ pɨ Kristù ɨ̀tsùmə̀ pə nchàʼtə̀ a wɨghə.

Ndẅùə̀ndzùmə̀ àtəətə̀ Pàolò

17M̀buʼù mbô ambo pɨghə pɨlyimə ɨ̀pâ, nɨ̀ zhìʼtə̀ a wɨghə aŋunə pànə̀ nɨ pobə pa ntô nɨ àghàpə̀ amwuə pɨghə ntsə̀ŋə̀ mɨ̀ntɨŋmə̀ pànə̀ nɨ pobə nùŋə̀nə ntɨŋmə̀ ɨ̀ghobə aŋunə Nẅùə̀. Pobə pa ngɨ̀rə̀ mɨ̀nwùə̀ nɨ ka mɨ pə e myə̀ nɨ pɨ lə̀ nèrə̀nə a wɨghə. Njiilo nɨ̀ ləʼə̀ mbuurə̀ pànə̀ zə̀, 18ntiinə ka mbuurə̀ pànə̀ zèrə zə̀ mə nfàʼà e la ambo Ndòʼnə̀mbyə̂ Kristù ɨ̀wə̀ənə̀. Pobə pa nfàʼà pə ntii mɨ̀pùmə̀ ɨ̀mobə. Pobə pa ndàŋə̀ la a ndzùmə̀ àləbə̀ pobə ɨ̀shwəŋnə̀ pɨ̀shìʼnə̀ nfɨ̀kə̀ pə̀ənə̀ nɨ pɨ pirə̀nə a ghobə a tɨ̀pòŋə̀ tɨ zhyə̂. 19Mbə̀ʼnə, ŋwùə̀ ntsùmə̀ à zuʼù mə tsaʼnə nɨ zuʼnə̀nə ntwuumə̀ ghù ɨ̀shìʼnə̀ wa nkɨ mbə nɨ nɨ̀ghaʼà mbə̀ʼə wɨghə la mmə nkòŋə̀ lo nɨ̀ pə ngàŋə àzhìʼtə̀ aŋunə ànwùə̀ yi ɨ̀shìʼnə̀, ntyiʼə̀ mbə pɨ̀tɨ̀zhyə̂ aŋunə ànwùə̀ tɨ̀pòŋə̀. 20Nẅùə̀ àporə̀porə̀ à pɨ ghòʼò Satàanə̀ a ɨ̀sùmə mɨ̀kwùə̀ pɨghə.

Àpòŋə̀ ntɨŋmə̀ Ndòʼnə̀mbyə̂ Yěsû Kristù â pə ambo pɨghə.

21Timotì, ŋwùə̀ nɨ pəə ze pə nfàʼà àpô moʼo à wə̀ nchàʼtə̀ a wɨghə. Lusyòsə̀ pobə Jasònə̀ nɨ Sòsipatà nɨ pobə pənə ngàŋə ngẅàrə̀ ɨ̀zâ kɨ nchàʼtə̀ a wɨghə.

22Mɨ̀ŋə̀ Tertius, ŋònə̀ nɨ à yèmpə̀nə a nɨ ŋwàʼnə̀ ànwùə̀ nɨ Pàolò à shwəŋə̀nə, ngwə̀ nchàʼtə̀ a wɨghə aŋunə nɨ̀linə̀ nɨ Ndòʼnə̀mbyə̂.

23Gayòsə̀, ŋònə̀ nɨ ngwa mbə a ndâ ze pəə pɨ ɨ̀poonə̀ pɨ Kristù pə nchàʼtə̀ a wɨghə.

Erastus nɨ à pənə ɨ̀nùŋə̀ nkabə̀ mbòmpə àlaʼà ɨwɨghə nɨ ndyimə ɨ̀wə̀ənə̀ Kwatùsə̀ pə nkɨ mmə ntsàa àchàʼtə̀ ambo pɨghə. [ 24Àpòŋə̀ ntɨŋmə̀ Ndòʼnə̀mbyə̂ Yěsû Kristù â pə ambo pɨghə pɨ̀tsùmə̀. Amen.]

Pàolò a lẅùutə̀ nchàʼtə̀ a Nẅùə̀

25Pə̀ənə̀ tə nguʼtə̀ a Nẅùə̀ nɨ mbə̀ʼə a ŋâ ɨ̀tɨ̀ŋnə̀ ambo pɨghə ndzùŋə̀ a ndzùmə̀ ntwuumə̀ ghù ɨ̀shìʼnə̀ wa nɨ ngwa nchwìitə̀ mbə̀ʼə Kristù la. Zèrə zə ànwùə̀ a pə ànwùə̀ yè lə̀əmə̀nə za nɨ a lə̀ pənə a nɨ̀lə̀əmə̀ aŋunə mɨnguʼu mɨnguʼu la. 26Tsaʼnə pɨ fuukə̀ mə a furə̀ ndaanə̀, a nɨ làŋə̀ a ndzùmə̀ àŋwàʼnə̀ ngàŋə ntwuumə̀ Nẅùə̀; pɨ tyiʼə̀ ngɨ̀rə̀ ɨ̀laʼà ɨ̀tsùmə̀ zhyə̂ ndzùŋə̀ aŋunə ntə̌ Nẅùə̀ wa nɨ ɨ ghoŋə̀nə nɨ nkuŋə̀ la, ntyiʼə̀ mbyiimə̀ nkɨ ndzuʼnə.

27Ambo ndàʼà Nẅùə̀ ẅèrə wə̀ nɨ à pənə àzhyə̂ma, àghuʼtə̀ tɨmyə̀ â pə ambo ze ndàŋə̀ a ndzùmə̀ Yěsû Kristù.

Currently Selected:

Roman 16: pny

Highlight

Copy

Compare