Roman 14

Kò wə̀ kɨ tsoʼtə̀ ɨ̀sàʼa ndyimə o

1Nɨ̀ kẅiirə̀ pànə̀ nɨ àpyiimə̀ ntɨŋmə̀ àzobə a porə̀nə ɨ̀shìʼnə̀, la kò nɨ̀ kɨ ntànkə̀ pɨghə pɨ pobə aŋunə ànwùə̀ nɨ nɨ̀ pyiimə̀nə. 2Àpyiimə̀ ntɨŋmə̀ ŋònə̀ ɨ̀tse a chyə̂ ghɨ̀rə̀ â zɨghə àzwuumə̀ àtsùmə̀ la àpyiimə̀ ntɨŋmə̀ ghùtse ŋwùə̀ a ghɨ̀rə̀ pə lo a kwurə̀ ndàʼà ndzaa. 3Pànə̀ pa nɨ pɨ pa ndzɨghə̀ àzwuumə̀ àtsùmə̀ la kò pobə wâ a ghobə pànə̀ nɨ pɨ kwurə̀nə pə ndzaa kò pànə̀ nɨ pɨ pa nkwurə̀ pə ndzaa kɨ ntsoʼtə̀ e ɨ̀sàʼa ŋwùə̀ nɨ a kwurə̀nə àzwuumə̀ àtsùmə̀ ntiinə Nẅùə̀ a kẅiirə̀ mə e. 4Ghǒ ɨ̀wə̌ a nɨ saʼà ɨ̀sàʼa ngàŋə̀ àfàʼà ŋònə̀ nyàanə? A ye tǎ pɨ àfàʼà ŋònə̀ ghu nɨ mbə̀ʼə a shwəŋə̀ lo à fàʼà ɨ̀shìʼnə̀ kə̀ tɨ̀pòŋə̀. Ǎ fàʼà ɨ̀shìʼnə̀ ntiinə Ndòʼnə̀mbyə̂ a chyə̂ nɨ ɨ̀tɨ̀ŋnə̀ a nɨ yèmpə̀ e ghu.

5Pànə̀ pɨ̀tse pa ndòo lo ɨ̀tse njyə̂ ɨ təəmə̀ ntsàarə̀ yɨ̀tse njyə̂, pɨ̀tse pànə̀ kɨ ndòo lo njyə̂ ɨ̀tsùmə̀ təəmə̀. Ŋwùə̀ ntsùmə̀ â ghɨ̀rə̀ ànwùə̀ nɨ à wa ngɨ̀rə̀ a laanə̀ a ntɨŋmə̀ ze. 6Pànə̀ pa nɨ pɨ nùŋə̀nə njyə̂ ɨ̀tse la, pobə nùŋə̀ la ambo Nẅùə̀. Pànə̀ pa nɨ pobə pa ntyiitə̀ ɨ̀pwuumə̀ a nɨ zɨghə̀, pobə pa ntyiitə̀ la a nɨ ghuʼtə̀ a Nẅùə̀ ntiinə pobə pə ŋŋâ a mɨyàa ambo Nẅùə̀. Ẅùə̀ wa nɨ à zɨghə̀nə ɨ̀pwuumə̀ ɨ̀tsùmə̀ à zɨghə̀ la a nɨ ghuʼtə̀ a Nẅùə̀ ntiinə à wə̀ kɨ mmə ŋŋâ a mɨyàa ambo Nẅùə̀. 7Ka ŋwùə̀ wə̀ənə̀ ɨ̀tse a chyə̂ pə àtwuə̀ nɨ ze kə̀ mə nkwɨghə̀ pə àtwuə̀ nɨ ze. 8Pə̀ənə̀ tə mbə pɨ̀tɨ̀ŋnə̀ yi pə̀ənə̀ pə pə mbə̀ʼə Ndòʼnə̀mbyə̂. Pə̀ənə̀ kɨ nkwɨghə̀ yi pə̀ənə̀ kwɨghə̀ pə ntii Ndòʼnə̀mbyə̂. Tsaʼnə a pənə a lenə la, pə̀ənə̀ tə kwɨghə̀ kə̀ nchyə̂ yi pə̀ənə̀ la pànə̀ pɨ Ndòʼnə̀mbyə̂. 9La ɨ̀sùmə nɨ Kristù à lə̀ kwɨghə̀nə nkẅirə̀ nzhwuumə̀ aŋunə nɨ̀wɨghə̀ mbə̀ʼə pə Ndòʼnə̀mbyə̂ ɨ̀kwuə̀ pə̀ənə̀ pobə pɨ pànə̀ nɨ pɨ pənə pɨ̀tɨ̀ŋnə̀.

10Wə̀ tyiʼə̀ mbyə̀ mbə lə̀ ɨ̀wə̌ a nɨ chyâ ɨ̀sàʼa aŋunə ndyimə o? Kə̀ wə̀ tyiʼə̀ ngwâ a ndyimə o lə ntii àkə? Ntiinə pə̀ənə̀ pɨ̀tsùmə̀ ghǎ nwuunə̀ aŋunə nɨ̀ghòorə nɨ korə̀ nɨ Nẅùə̀. 11Mbə̀ʼnə pɨ ŋwàʼnə̀ amwuə àŋwàʼnə̀ Nẅùə̀ lo,

“Ndòʼnə̀mbyə̂ à shwəŋə̀ lo, tsaʼnə m̀bənə ghù ntɨ̀ŋnə̀ la, ŋwùə̀ ntsùmə̀ à ghǎ kẅiʼtə̀ a mbyə̀ mɨ̀ŋə̀,

pànə̀ pɨ̀tsùmə̀ shwəŋə̀ a sàŋə̀ sàŋə̀ lo ǹchyə̂ mbə la Nẅùə̀.” 12La a laanə̀ ambo pə̀ənə̀ moʼo moʼo lo ŋwùə̀ ɨ̀tsùmə̀ à ghǎ shankə̀ ànwùə̀ mbə̀ʼə e a mbyə̀ Nẅùə̀.

Kò wə̀ ghɨ̀rə̀ lo ndyimə o â kunə̀

13Lenəla, kò pə̀ənə̀ chi ntsoʼtə̀ a wə̀ənə̀ mbɨ̀ŋmə̀ ɨ̀zəənə̀. Pə̀ənə̀ nùŋə̀ pə lo mbə̀ʼə pə̀ənə̀ twaanə̀ a wəənə̀ àtɨ̀ghə àlàŋə lo ndyimə ɨ̀wə̀ənə̀ a kunə̀ aŋunə apə̀ kə̀ nkɨ ngɨ̀rə̀ a wəənə̀ lo ndyimə ɨ̀wə̀ənə̀ â kunə̀ amwuə tɨ̀pòŋə̀ apə̀. 14Tsaʼa ngàŋə̀ àfàʼà Ndòʼnə̀mbyə̂ Yěsû, ǹzhyə̂ lo ka mɨ̀zɨghə̀ mɨ̀tse pə e ghu nɨ ka mɨ laanə̀ e a nɨ zùŋə̀ a mbòomə. La ŋònə̀ ɨ̀tse à tə pəla ndòo lo ka mɨ̀zɨghə̀ mɨ̀tse laanə̀ e yi ka mɨ kɨ ndaanə̀ e ambo ze. 15Wə̀ tə mbəla mmə ndzɨghə̀ àzwuumə̀ nɨ a za ŋŋâ ngəʼə̀ ambo ndyimə o, wə̀ zhyə̂ lo ka wə̀ pirə̀ o la amwuə àkwùə̀ nɨ̀yìinə̀ ɨ̀kòŋnə̀. Kò wə̀ ghɨ̀rə̀ lo àzwuumə̀ nɨ wə̀ mənə ndzɨghə̀ a ŋâ ngəʼə̀ ambo ŋònə̀ nɨ Kristù à lə̀ kwɨghə̀nə ntii e. 16Kò wə̀ myàʼtə̀ lo pɨ̀ fuŋə̀ ànwùə̀ nɨ wə̀ kwàŋə̀nə lo ànwùə̀ ɨ̀shìʼnə̀ nɨ ànwùə̀ tɨ̀pòŋə̀. 17Mbə̀ʼnə ànwùə̀ Nɨ̀fò Nẅùə̀ ka a pə e la a nɨ zɨghə̀ nkɨ nô, a chyə̂ mbə la a nɨ ghɨ̀rə̀ mɨ̀nwùə̀ mɨ təəmə̀nə, ànwùə̀ àporə̀porə̀ pobə ànwùə̀ nɨ̀ghaʼà amwuə Àzhwùə̀ Nẅùə̀. 18Ŋònə̀ nɨ à wa nfàʼà ambo Kristù amwuə ndwuumə̀ wə̀, à kùʼnə̀ ambo Nẅùə̀, pànə̀ kɨ mbyiimə̀ e.

19Pə̀ənə̀ tə nkyiitə̀ amwuə ɨ̀làŋə ɨ̀tsùmə̀ a nɨ ghɨ̀rə̀ pə mɨ̀nwùə̀ nɨ mèrə ma ndòo àporə̀porə̀ ntô nkɨ mmə ngyèmpə̀ a wəənə̀ moʼo moʼo a nɨ kẅuə̀. 20Kò wə̀ tsə̀ŋə̀ àfàʼà Nẅùə̀ ntii mɨ̀zɨghə̀. Ɨ̀pwuumə̀ ɨ̀tsùmə̀ ɨ laanə̀, la a pə pə ànwùə̀ tɨ̀pòŋə̀ ambo ŋwùə̀ a nɨ ghɨ̀rə̀ lo pànə̀ pɨ̀tse pɨ kunə̀ amwuə tɨ̀pòŋə̀ ntii àzwuumə̀ yè zɨghə̀nə. 21A kùʼnə̀ lo kò ŋwùə̀ a kwurə̀ mbòbə̀ kə̀ nnô mɨ̀lùʼù kə̀ ngɨ̀rə̀ ànwùə̀ àtse nɨ mbə̀ʼə ndyimə e a kòntə̀ aŋunə. 22Nùŋə̀ ànwùə̀ nɨ wə̀ pyiimə̀ mbə̀ʼə ànwùə̀ zèrə zə̀ a tɨ̀tɨ̀rə̀ pɨghə Nẅùə̀. Nɨ̀ghaʼà a chyə̂ ambo ŋònə̀ nɨ à wa ngɨ̀rə̀ ànwùə̀ nɨ ka ntɨŋmə̀ e ɨ mə nsaʼà e a ye aŋunə ànwùə̀ nɨ à kwàŋə̀nə lo a kùʼnə̀. 23La ŋònə̀ nɨ à pənə nɨ ànǎ aŋunə àzwuumə̀ nɨ à wa ndzɨghə̀, Nẅùə̀ à pɨ chyâ ɨ̀sàʼa aŋunə ze ntii àzwuumə̀ nɨ à zɨghə̀nə, ntiinə ànwùə̀ nɨ a ghɨ̀rə̀nə ka a furə̀ amwuə àpyiimə̀ ntɨŋmə̀. Ànwùə̀ àtsùmə̀ nɨ ka a furə̀ e amwuə àpyiimə̀ ntɨŋmə̀ la ànwùə̀ tɨ̀pòŋə̀.

Currently Selected:

Roman 14: pny

Highlight

Copy

Compare