Roman 13

Nɨ̀shwuʼkə̀ mbɨ̀ŋmə̀ ambo pɨ̀saʼà pɨ àlaʼà

1Ŋwùə̀ ntsùmə̀ à chyə̂ a nɨ zuʼnə̀ ɨ̀twuə̀ àlaʼà nɨ pèrə pa nsaʼà a ghobə ntiinə ka àtwuə̀ àlaʼà àtse a pə e ghu nɨ ka à tə̂ e Nẅùə̀. Ɨ̀twuə̀ pyə̀ nɨ pənə ghu tɨ̀tsòŋə̀ la à tə̂ e Nẅùə̀ ntə̂ a ghobə aŋunə aləŋə. 2Lenəla, ŋònə̀ wa ntsùmə̀ nɨ à wa ndzòŋnə̀ pobə pɨ ɨ̀twuə̀ àlaʼà la à wa ndzòŋnə̀ la Nẅùə̀. Ŋònə̀ wa ntsùmə̀ nɨ à kɨnə mmə ndzòŋnə̀ a ghobə la, à wə̀ nkɨ mmə nchyâ la ɨ̀sàʼa aŋunə ze. 3Mbə̀ʼnə ɨ̀twuə̀ àlaʼà la à wa mbô e pànə̀ nɨ pɨ mənə ngɨ̀rə̀ a tɨ̀pòŋə̀ ka pə e pànə̀ nɨ pɨ mənə ngɨ̀rə̀ ɨ̀shìʼnə̀. Ka nɨ̀ mə nkòŋə̀ a wɨghə a nɨ pô ɨ̀twuə̀ àlaʼà? Nɨ̀ tə mmə ngɨ̀rə̀ mɨ̀nwùə̀ mɨ ɨ̀shìʼnə̀ yi à pɨ pyiimə̀ a wɨghə. 4Ŋònə̀ wa nɨ à wa nsaʼà àlaʼà la à chyə̂ mbə la ngàŋə̀ àfàʼà Nẅùə̀ nɨ à wa ngɨ̀rə̀ mɨ̀nwùə̀ mɨ̀shìʼnə̀ a nɨ yèmpə̀ a wɨghə. La nɨ̀ tə mə ngɨ̀rə̀ a tɨ̀pòŋə̀, nɨ̀ pô e ntiinə ɨ̀tɨ̀ŋnə̀ nɨ à pənə nɨ ẅèrə ka ɨ̀ pə e la àfǐfǐ. À chyə̂ mbə la ngàŋə̀ àfàʼà Nẅùə̀ nɨ mbə̀ʼə a chyâ ɨ̀sàʼa aŋunə pànə̀ pɨ̀tsùmə̀ nɨ pɨ ghɨ̀rə̀nə a tɨ̀pòŋə̀. 5Njiilo a pòŋə̀ lo nɨ̀ tə ndzuʼnə ɨ̀twuə̀ àlaʼà, ka pə e pə ndàʼà a nɨ pô àtsə̂ ntɨŋmə̀ Nẅùə̀. Nɨ̌ kɨ ghɨ̀rə̀ farə lo kò ntɨŋmə̀ ɨ̀wɨghə tə nsaʼà a wɨghə.

6Lə kɨ mbə ɨ̀sùmə nɨ nɨ̀ wa ntwuə̀ pɨ̀taghə̀ la. Ntiinə ɨ̀twuə̀ àlaʼà pɨ̀ghu la ngàŋə àfàʼà Nẅùə̀ nɨ pobə ŋânə nkwùə̀ ɨzobə a nɨ fàʼà àfàʼà za nɨ pɨ tə̂nə a ghobə aŋunə la. 7Nɨ̀ tə ntwuə̀ àzwuumə̀ àtsùmə̀ nɨ nɨ̀ ẅìimə̀nə a ghobə nɨ̀ zèrə. Nɨ̀ twuə̀ a taghə̀ ambo ŋònə̀ nɨ nɨ̀ pənə twuə̀, ŋŋâ nkabə̀ ɨ̀pwuumə̀ ɨ̀pô ambo ŋònə̀ nɨ nɨ̀ pənə ŋâ, ŋŋâ àghuʼtə̀ ambo ŋònə̀ nɨ nɨ̀ pənə ŋâ, nkɨ səəkə̀ a ŋònə̀ nɨ nɨ̀ pənə səəkə̀.

Ànwùə̀ nɨ nɨ̀ chyə̂nə a nɨ ghɨ̀rə̀ a tɨ̀tɨ̀rə̀ pɨghə

8Kò nɨ̀ ẅìimə̀ a wɨghə a ŋònə̀ ɨ̀tse nɨ àzwuumə̀ àtse ndàŋə̀ e a nɨ kòŋə̀ mbɨ̀ŋmə̀ ɨ̀zɨghə ntiinə ŋònə̀ nɨ à kòŋə̀nə a ndyimə e à ghɨ̀rə̀ la ànwùə̀ nɨ mbòomə à tàʼnə. 9Mɨ̀ntə̌ ma lo, “Kò wə̀ ghɨ̀rə̀ àfànə̀, kò wə̀ zhwuutə̀, kò wə̀ zə̀ərə̀, kò wə̀ ghə̀ʼnə̀,” pobə mɨ̀tse mɨ̀ntə̌ nɨ mɨ pənə ghu, pɨ pwuutə̀ a mèrə amwuə àshwəŋnə̀ zə̀ lo, “Mə nkòŋə̀ a ndyimə o tyìʼə̀ tsaʼnə wə̀ kòŋə̀nə mbɨ̀ŋmə̀ o la.” 10Ka ŋònə̀ nɨ à kòŋə̀nə a ndyimə e a ghɨ̀rə̀ e tɨ̀pòŋə̀ aŋunə ze. Nɨ̀pə nɨ ɨ̀kòŋnə̀ a nɨ zuʼnə̀ a mbòomə ntsùmə̀.

11La a nɨ kẅìʼnə̀ aŋunə zə̀, nɨ̀ zhyə̂ nkwùə̀ zə tɨ̀tsòŋə̀. Nkwùə̀ ɨ̀ lanə nkùʼù ambo pɨghə tɨ̀tsòŋə̀ a nɨ zhwemnə̀ a pɨlô ntiinə nkwùə̀ nɨ pə̀ənə̀ ghǎ chwarə̀ ɨ̀ paatə̀ tɨ̀tsòŋə̀ ntsàarə̀ tsaʼnə pə̀ənə̀ lə̀ pyə̀nə mbyiimə̀ la. 12Ɨ̀twuʼə̀ ɨ wə̀ ntyiʼə̀ mmə ndàŋə̀, njyə̂ ɨ̀ tyiʼə̀ mmə ndaanə̀. Pə̀ənə̀ myàʼtə̀ ɨ̀fàʼà ɨ̀twuʼə̀ ɨ̀tsùmə̀ ngẅî ɨ̀pwuumə̀ ntsòo nkàʼà. 13Pə̀ənə̀ tə nshìitə̀ àkwùə̀ nɨ̀yìinə̀ àzəənə̀ a pə yè ɨ̀shìʼnə̀ ka pə e nɨ̀zɨghə̀ tɨsɨŋnə kə̀ nɨ̀nô mbaarə̀; ka pə e a nɨ ghɨ̀rə̀ àfànə̀ kə̀ ɨ̀nwùə̀ ntsɨ̀ŋnə. Ka pə e a nɨ zòŋnə̀ mɨ̀làʼà kə̀ a nɨ ghə̀ʼnə̀.

14Nɨ̀ ẅî a Ndòʼnə̀mbyə̂ Yěsû Kristù. Kò nɨ ŋâ a wɨghə ɨ̀sàanə̀ ambo mbòbə̀ mbɨ̀ŋmə̀ ɨ̂ tə ngɨ̀rə̀ pə mɨ̀nwùə̀ nɨ zèrə ɨ̀ tàʼnə.

Currently Selected:

Roman 13: pny

Highlight

Copy

Compare