Roman 11
11
Mɨ̀lɨŋə̀ mɨ Nẅùə̀ aŋunə Israel
1Ǹtyiʼə̀ mbyiitə̀ lo, “Ka zhyə̂ lo Nẅùə̀ à lə̀ twuunə̀ ɨ̀pe pə̀ənə̀?” Ka a pə e a lenə! Mɨ̀ŋə̀ àtwuə̀ ɨ̀pɨ̀ŋmə̀ mə̀ a ŋwùə̀ Israel, mbə ŋwùə̀ ngẅàrə̀ Abràhamə̀, nfurə̀ amwuə àlaʼà Benjàminə̀. 2Ka Nẅùə̀ a twuunə̀ e pə̀ənə̀ ɨ̀pe nɨ a lə̀ pyə̀ mə ntsoʼò. Nɨ̀ zhyə̂ ànwùə̀ nɨ àŋwàʼnə̀ Nẅùə̀ a zə nshwəŋə̀ aŋunə alyiʼə za nɨ Elijah à lə̀ pənə mbuʼù mbô lo Nẅùə̀ a chyâ ɨ̀sàʼa àtwuə̀ pànə̀ pɨ Israel ntii mbòomə tɨ̀pòŋə̀ ɨghobə. 3À lə̀ yìi nshwəŋə̀ lo, “Ndòʼnə̀mbyə̂, pɨ zhwuutə̀ mə ngàŋə ntwuumə̀ ɨ̀zô ɨ̀tsùmə̀, nshàʼtə̀ ɨlyiʼə mɨ̀shwàʼà ɨ̀pô ɨ̀tsùmə̀, a tyiʼə̀ ngoŋə̀ mɨ̀ŋə̀ nɨ mɨ̀ŋə̀ nɨ pobə pə nkɨ mmə ntàʼà zhwuutə̀.” 4La Nẅùə̀ à lə̀ kẅùə̀ ambo ze lo àkə? À lə shwəŋə̀ ambo ze lo, “Ǹnùŋə̀ mə pə̀ənə̀ nkaamə̀ sàmbaa nɨ pɨ pirə̀ mə a ghobə tɨ kẅiʼtə̀ a mbyə̀ Baalə̀.” 5A kɨ mbə tyìʼə̀ ndəŋə ndəŋə amwuə nkwùə̀ tɨ̀tsòŋə̀ nɨ àpwùʼə̀ pə̀ənə̀ a zə ghu, mbə zhyə̀ nɨ Nẅùə̀ a lə̀ tsoʼnə ndàŋə̀ a ndzùmə̀ àpòŋə̀ ntɨŋmə̀ e. 6Nɨ̀tsoʼò pə̀ənə̀ ɨ̀pe a chyə̂ pə aŋunə àpòŋə̀ ntɨŋmə̀ e ka pə e pə aŋunə ɨ̀fàʼà ɨ̀pobə. Ntiinə nɨ̀tsoʼò pə̀ənə̀ a lə̀ pəla mmə ndzùŋə̀ la ɨ̀fàʼà ɨ̀pobə, yi ka a chyə̂ mbə e la àpòŋə̀ ntɨŋmə̀. 7A nèrə̀ lə lo ka pànə̀ pɨ Israel lə̀ zəənə̀ a ghobə àzwuumə̀ nɨ pobə lə̀ pənə ntàʼà? A tyìʼə̀ nkǔŋə nkuŋə, à lə̀ zəənə̀ tyìʼə̀ pɨ̀mɨlyiʼə pɨ pə̀ənə̀ ndzəənə̀ àzwuumə̀ a ghu, àpwùʼə̀ pə̀ənə̀ a nàanə̀ mɨ̀ntɨŋmə̀ ɨ̀mobə. 8Tsaʼnə pɨ lə̀ ŋwàʼnə̀nə lo,
“Nẅùə̀ à ŋâ ghobə nɨ Àzhwùə̀ nɨ a ghɨ̀rə̀nə pobə fompə̀ nnwuunə̀ tsaʼa pɨ̀pəŋə
Ŋŋâ ghobə nɨ ɨ̀myə̂ nɨ ka mɨ mə ndzəənə̀ e,
nɨ mɨtugrə nɨ ka mɨ mə ndzuʼù e
tə mbyàa sìnə̀ wə̀.” 9Dàfirə̀ a kɨ nshwəŋə̀ lo,
“Ɨlyiʼə mɨ̀zɨghə̀ ɨ̀pobə pə̀ŋə̀ ntyiʼə̀ ɨ̀zə̀ʼə̀ nɨ pɨ lə̀ʼnə lo pobə̂ kwuunə̀ amwuə,
pobə̂ kunə̀ pɨ̀ chyâ ɨ̀sàʼa aŋunə pobə.
10Ndzùmə ɨ̂ nàanə ɨ̀myə̂ ɨ̀mobə mbə̀ʼə pobə kaŋə zəənə̀ ɨlyiʼə,
ngəʼə̀ ɨ̂ ghɨ̀rə̀ mɨnkunə furə̀ a nkàʼtə̀ pobə.”
11Ǹchi mbyiitə̀ lo, pobə kòntə̀ nkunə̀ lə mbə chi pə̀ʼkə̀ a ghobə apə̀? Ngaŋə! Ka a pə e a lenə. La tsaʼnə pobə fàntə̀nə la, a ghɨ̀rə̀ lo Nẅùə̀ à chwarə̀ pànə̀ nɨ ka pobə pə ghobə pɨ̀Jew mbə̀ʼə pànə̀ pɨ Israel pə nɨ àghə̀ʼnə̀. 12A tə pə lo àfàntə̀ ànwùə̀ àzobə a tô nɨ àfùʼù ambo àtwuə̀ ɨ̀shyə̂; alyiʼə nɨ pobə kunə̀nə ghu a pə àfùʼù ambo pànə̀ nɨ ka pobə pə ghobə pɨ̀Jew. Ǎ ka tyiʼə̀ pə e lə ànwùə̀ yè ẅùunə mbə̀ʼə pɨ̀Jew pɨ̀tsùmə̀ chi nkẅìʼnə̀?
Nẅùə̀ a fuukə̀ pànə̀ nɨ ka pobə pə ghobə pɨ̀Jew amwuə ngəʼə̀
13Ǹtyiʼə̀ nshwəŋə̀ lə ambo pɨghə pànə̀ pa nɨ ka nɨ̀ pə wɨghə pɨ̀Jew. Tyìʼə̀ tsaʼnə m̀bənə ngàŋə̀ ntwuumə̀ Kristù ambo pànə̀ nɨ ka pobə pə ghobə pɨ̀Jew la, mbɨ ŋaŋə̀ a àfàʼà mə̀ a àtɨ̀ghə, 14mbə̀ʼə pɨlyimə ɨ̀pâ pɨ̀Jew tə ngə̀ʼnə̀ njiilo nchwarə̀ a ghobə pɨ̀tse. 15A tə pə lo nɨ̀twuunə̀ a ghobə a lə̀ kẅirə̀ mbwuutə̀ a Nẅùə̀ pobə pɨ àtwuə̀ ɨ̀shyə̂, Nẅùə̀ a nɨ chi nkẅiirə̀ a ghobə a ka tyiʼə̀ pə e tsaʼa à chwarə̀ a ghobə aŋunə nɨ̀wɨghə̀? 16Pɨ tə ŋâ a ntsàambyə̀ àtùmə àpaanə̀ ambo Nẅùə̀, yi àpaanə̀ yèghu àtsùmə̀ a yè Nẅùə̀. Pɨ kɨ ŋŋâ mɨŋaŋə mɨ àtɨ̀ghə ambo Nẅùə̀, yi mɨ̀fàa a kɨ mbə ɨ̀me. 17Pɨ tsoʼò mɨ̀fàa mɨ àtɨ̀ghə mɨ olìvə̀ àtse nɨ a pənə amwuə ɨ̀swùumə, Nẅùə̀ a tyiʼə̀ mbarəkə̀ a wɨghə pànə̀ nɨ ka nɨ̀ pə a wɨghə pɨ̀Jew nɨ nɨ̀ pənə mɨ̀fàa mɨ àtɨ̀ghə mɨ olìvə̀ za nɨ a pənə a mbyiinə̀ aŋunə zhyə̀ nɨ a pənə amwuə ɨ̀swùumə la nkorə̀, mbə̀ʼə nɨ̀ pə nɨ ɨ̀sàanə̀ a nɨ zɨghə̀ mɨ̀zɨghə̀ mɨ̀shìʼnə̀ nɨ mɨ pənə aŋunə àtɨ̀ghə za nɨ a pənə amwuə ɨ̀swùumə la. 18Lenəla, kò nɨ̀ tə ntsòo pɨ̀ghàŋə̀ pɨghə ambo pànə̀ nɨ pobə pənə mɨ̀fàa ma nɨ pɨ tsoʼnə a ghobə mbarəkə̀ a wɨghə la. Nɨ̀ tə mbəla mmə ntsòo a ghàŋə̀, nɨ̀zhyə̂ lo ka la toomə̀ e pɨghə ntoomə̀ mɨŋaŋə; la toomə̀ mɨŋaŋə ntoomə̀ a wɨghə. 19La nɨ̀ tyiʼə̀ nshwəŋə̀ lo, “Pɨ lə̀ tsoʼtə̀ mɨ̀fàa ma ngwaʼà la mbə̀ʼə ŋŋâ ɨ̀sàanə̀ ambo pəə.” 20A tyìʼə̀ nkǔŋə nkuŋə pɨ lə̀ tsoʼò a ghobə ngwaʼà ntiinə ka pobə lə̀ pə ghobə nɨ àpyiimə̀ ntɨŋmə̀, la nɨ̀ tyiʼə̀ ntɨ̀ŋnə̀ ntii àpyiimə̀ ntɨŋmə̀ njiilo, kò nɨ̀ kɨ ntsòo a wɨghə a ghàŋə̀ ntii ànwùə̀ ghu, nɨ̀ yìinə̀ mbə nɨ àkẅàrə̀. 21Nẅùə̀ à tə pəla ndə̀ ka yìʼtə̀ e pɨ̀Jew nɨ à pənə ngotə mɨ̀fàa mɨ̀ghu, a tyiʼə̀ ngyìʼtə̀ pə a wɨghə? 22Nɨ̀ naŋə̀ ndzəənə̀ tsaʼnə àpòŋə̀ ntɨŋmə̀ Nẅùə̀ pobə nɨ̀tsə̂ e pənə. À wa ntsə̂ aŋunə pànə̀ nɨ pɨ ghɨ̀rə̀nə a tɨ̀pòŋə̀, la mbə nɨ àpòŋə̀ ntɨŋmə̀ aŋunə pɨghə pa nɨ nɨ̀ lèrə̀nə nɨ mbyə̀ amwuə àpòŋə̀ ntɨŋmə̀ e. La àpòŋə̀ ntɨŋmə̀ zə̀ a ka pə e ghu, a kɨ ntsoʼò a wɨghə ngwaʼà. 23La ngə̀ aŋunə pɨ̀Jew, pobə tə myàʼtə̀ ànwùə̀ nɨ ka nùŋə̀ a ghobə ntɨŋmə̀ aŋunə Nẅùə̀, yi pɨ kẅirə̀ lòo a ghobə parəkə̀ aŋunə alyiʼə nɨ pobə lə̀ pənə ghu, ntiinə Nẅùə̀ a chyə̂ nɨ ɨ̀tɨ̀ŋnə̀ a nɨ kẅirə̀ mbarəkə̀ a ghobə. 24Pɨghə pànə̀ nɨ ka nɨ̀ pə a wɨghə pɨ̀Jew, nɨ̀ chyə̂ mbə la tsaʼa nɨ̀fàa nɨ àtɨ̀ghə nɨ olìvə̀ nɨ pɨ tsoʼnə amwuə mbyiinə̀. Nẅùə̀ à tə pəla ndòo a wɨghə ntô mbarəkə̀ aŋunə àtɨ̀ghə olìvə̀ nɨ a pənə amwuə ɨ̀swùumə, zhyə̀ nɨ a pənə alyiʼə nɨ ka nɨ̀ pyə̀ mbə pə a wɨghə ghu, ǎ ka tyiʼə̀ pə e mɨlyiʼə ànwùə̀ ambo Nẅùə̀ a nɨ kẅirə̀ mbarəkə̀ mɨ̀fàa ma nɨ mɨ lə̀ furə̀nə aŋunə àtɨ̀ghə olìvə̀ yèghu nɨ a pənə amwuə ɨ̀swùumə, nɨ a pənə alyiʼə nɨ mèrə tənə mbə pə ghu?
Àkoorə̀ mɨ̀liŋə̀ Nẅùə̀ aŋunə ŋwùə̀ ntsùmə̀
25Nkǔŋə nkuŋə ànwùə̀ yè lə̀əmə̀nə àtse a zə̀ ghu nɨ ǹtàʼnə lo nɨ zhyə̂ mbǎ pɨlyimə ɨ̀pâ; zhyə̂nə a pə yèmpə̀ a wɨghə a nɨ ghɨ̀rə̀ lo kò nɨ̀ kwàŋə̀ lo nɨ̀ zhìʼtə̀ tɨsɨŋnə. Ànwùə̀ ghu a pə lo àtɨ̀ŋnə̀ àtwuə̀ pànə̀ pɨ Israel a ghǎ myə̀ amwuə nkwùə̀ za nɨ ndùnə̀ pànə̀ nɨ̀ ka pobə pə ghobə pɨ̀Jew pɨ tônə ambo Nẅùə̀ ndùnə̀ ɨ̀ghobə ɨ kùʼù. 26Amwuə nkwùə̀ ghu, Nẅùə̀ à ghǎ chwarə̀ pànə̀ pɨ Israel pɨ̀tsùmə̀ tsaʼnə pɨ ŋwàʼnə̀nə amwuə àŋwàʼnə̀ Nẅùə̀ lo,
“Ngàŋə̀ nchwarə̀ pə̀ənə̀ à ghǎ furə̀ a mbarə̀ Zayònə̀ tô
fuukə̀ àtɨ̀ŋnə̀ àtwuə̀ amwuə ngẅàrə̀ Yàkobə̀.
27Ànwùə̀ zèrə zə̀ a pə ɨ̀kàanə̀ nɨ mbɨ wàrə̀ pəə pɨ pobə nkwùə̀ nɨ ǹfuukə̀nə àtɨ̀ŋnə̀ àtwuə̀ àzobə.”
28Pɨ̀Jew pə̀ lə̀ twuunə̀ ntwuumə̀ ghù ɨ̀shìʼnə̀ wa ntyiʼə̀ ngàŋə mbwùunə̀ Nẅùə̀, ntii wɨghə pànə̀ nɨ ka nɨ̀ pə wɨghə pɨ̀Jew. La tsaʼnə Nẅùə̀ à lə̀ tsoʼò mə a ghobə pobə tyiʼə̀ pɨ̀swùə ɨ̀pe ntiinə à lə̀ kàʼà mə nnùŋə̀ ghobə pɨ̀tǎ pɨ̀tǎ ɨ̀pobə. 29Ka Nẅùə̀ â kẅebə̀ e ntɨŋmə̀ e aŋunə ŋònə̀ nɨ à tsoʼò mə nchyâ mborə̀ e aŋunə ze. 30Ngə̀ aŋunə pɨghə pànə̀ nɨ ka nɨ̀ pə wɨghə pɨ̀Jew, nɨ̀ lə̀ tɨ̀ŋnə̀ àtwuə̀ ambo Nẅùə̀ nkwùə̀ ntsàambyə̀, la tɨ̀tsòŋə̀ wə̀ Nẅùə̀ a koorə̀ mɨ̀liŋə̀ ɨ̀mɨghə ntiinə pɨ̀Jew ntɨ̀ŋnə̀ àtwuə̀. 31A ndəŋə ndəŋə, pɨ̀Jew lə̀ kɨ ntɨ̀ŋnə̀ àtwuə̀ ambo Nẅùə̀ lo mbə̀ʼə Nẅùə̀ a kɨ koorə̀ mɨ̀liŋə̀ ɨ̀mobə tsaʼnə a lə̀ kɨnə nkoorə̀ ɨ̀mɨghə. 32Nẅùə̀ a lə̀ ghɨ̀rə̀ lo pànə̀ pɨ̀tsùmə̀ pə ɨ̀pùʼù ambo àtɨ̀ŋnə̀ àtwuə̀ mbə̀ʼə a furə̀ aŋunə nkoorə̀ mɨ̀liŋə̀ mɨ ŋwùə̀ ntsùmə̀. 33Ɨ̀pwuumə̀ Nẅùə̀ nɨ àzhìʼtə̀ e pobə àzhyə̂ ànwùə̀ e noʼò pə la ghu? Mbə̀ʼə ɨ̀wə̌ a tiitə̀ ndwuumə̀ nɨ Nẅùə̀ à wa ngɨ̀rə̀ mɨ̀nwùə̀ ɨ̀me, kə̀ mbə̀ʼə ɨ̀wə̌ a kɨ nzhyə̂ ɨ̀làŋə nɨ à wa ngɨ̀rə̀ mɨ̀nwùə̀ ɨ̀me? 34Tsaʼnə àŋwàʼnə̀ Nẅùə̀ a shwəŋə̀nə lo:
“A zhyə̂ ɨ̀wə̌ nzhyə̂ àkwàŋə̀ Nẅùə̀?
Àtəətə̀ ambo ze a ŋâ ɨ̀wə̌?
35A lə̀ pyə̀ mə ŋŋâ ɨ̀wə̌ ŋŋâ àzwuumə̀ ambo Nẅùə̀,
nɨ a wə̀ naŋə̀ lo a tô nkẅùə̀ ambo ze?”
36Mbə̀ʼnə àzwuumə̀ àtsùmə̀ la a tsùŋə̀ ze, àzwuumə̀ àtsùmə̀ a furə̀ ambo ze nkɨ mbə ambo ze. Àghuʼtə̀ a pə ambo ze, ngoŋə̀ nɨ nkuŋə̀! Amen.
Currently Selected:
Roman 11: pny
Highlight
Copy
Compare
Share
Want to have your highlights saved across all your devices? Sign up or sign in
© 2017, Cameroon Association for Bible Translation and Literacy
