Roman 10
10
1Pɨlyimə ɨ̀pâ, ngwə̀ ngyìi nɨ ntɨŋmə̀ mə̀ ɨ̀tsùmə̀, nkɨ mmə nchàʼtə̀ a Nẅùə̀ lo mbə̀ʼə pə̀ənə̀ ɨ̀pâ pànə̀ pɨ Israel chwarə̀, 2nshwəŋə̀ mbə̀ʼə pobə lo pobə pa nɨ ntɨŋmə̀ aŋunə Nẅùə̀, la ka zhyə̂ a ghobə a nkǔŋə nkuŋə. 3Tsaʼnə ka pobə zhyə̂ a ghobə ndwuumə̀ nɨ Nẅùə̀ à wa ngɨ̀rə̀ mɨ̀nwùə̀ mɨ pànə̀ təəmə̀ la, pobə tàʼà àzobə àlàŋə a nɨ ghɨ̀rə̀ mɨ̀nwùə̀ ɨ̀mobə təəmə̀ a mbyə̀ Nẅùə̀, ka shwuʼkə̀ a ghobə mbɨ̀ŋmə̀ ɨ̀zobə ŋŋâ ambo Nẅùə̀ mbə̀ʼə a ghɨ̀rə̀ mɨ̀nwùə̀ ɨ̀mobə təəmə̀. 4Mbə̀ʼnə Kristù la ndẅùutə mbòomə, njiilo Nẅùə̀ ǎ ghɨ̀rə̀ mɨ̀nwùə̀ mɨ ŋònə̀ wa ntsùmə̀ nɨ a nùŋə̀nə ntɨŋmə̀ e aŋunə la mɨ təəmə̀.
Nɨ̀chwarə̀ a chyə̂ ambo ŋwùə̀ ntsùmə̀
5Lə̌ ànwùə̀ nɨ Mǔsî à lə̀ ŋwàʼnə̀nə a nɨ nèrə̀ tsaʼnə ŋònə̀ wa nɨ mɨ̀nwùə̀ ɨ̀me təəmə̀nə a mbyə̂ Nẅùə̀ ntii mbòomə à chyə̂ a nɨ pə: “Ŋònə̀ wa ntsùmə̀ nɨ à nùŋə̀nə a mbòomə ǎ chyə̂ aŋunə mbòomə yɨ̀ghu.” 6La nɨ̀pə ŋònə̀ nɨ mɨ̀nwùə̀ ɨ̀me təəmə̀nə ntiinə à nùŋə̀nə ntɨŋmə̀ e aŋunə Nẅùə̀ a chyə̂ lo: Kò wə̀ shwəŋə̀ o lo, “Ɨ̀wə̌ ǎ koʼò a nɨ̀pwuurə̀ a nɨ lòo a Kristù shwuʼə̀ nɨ ẅèrə a ɨ̀shyə̂ ghə̀?” 7Kə̀ lo, “Ɨ̀wə̌ ǎ shwuʼə̀ lèrə̀ amwuə àlaʼà pɨ̀kwuə̀ a nɨ lòo a Kristù koʼò nɨ ẅèrə?”
8Ànwùə̀ nɨ àŋwàʼnə̀ Nẅùə̀ a shwəŋə̀nə a chyə̂ lo: “Àshwəŋnə̀ Nẅùə̀ a paatə̀ o, nkɨ mbə aŋunə ɨ̀kòbə̀ ntswùə̀ ɨ̀pô farə amwuə ntɨŋmə̀ o.” La àshwəŋnə̀ nɨ a ghɨ̀rə̀nə pànə̀ nùŋə̀ mɨ̀ntɨŋmə̀ ɨ̀mobə aŋunə Nẅùə̀ tsaʼnə pə̀ənə̀ chwìitə̀nə lo, 9Wə̀ tə shwəŋə̀ nɨ ntswùə̀ lo, “Yěsû a Ndòʼnə̀mbyə̂,” nkɨ mbyiimə̀ amwuə ntɨŋmə̀ o lo Nẅùə̀ à lə̀ zhwuumə̀ e aŋunə nɨ̀wɨghə̀, yi wə̌ chwarə̀. 10Mbə̀ʼnə ŋwùə̀ a pyiimə̀ la nɨ ntɨŋmə̀ e, Nẅùə̀ a ghɨ̀rə̀ mɨ̀nwùə̀ ɨ̀me təəmə̀. Ŋwùə̀ à tə nshwəŋə̀ nɨ ntswùə̀ e lo à nùŋə̀ ntɨŋmə̀ e aŋunə Kristù, Nẅùə̀ a kɨ nchwarə̀ e. 11Tsaʼnə àŋwàʼnə̀ Nẅùə̀ a shwəŋə̀ lo, mbə̀ʼə ka Nẅùə̀ a chyâ e ɨ̀sɨŋnə̀ àtwuə̀ ŋònə̀ nɨ a nùŋə̀nə ntɨŋmə̀ e aŋunə ze, 12ntiinə ka tə̀chwìi pə e ghu a tɨ̀tɨ̀rə̀ pɨ̀Jew pobə pɨ pànə̀ nɨ ka pobə pə ghobə pɨ̀Jew. Ndòʼnə̀mbyə̂ a Ndòʼnə̀mbyə̂ ambo ŋwùə̀ ntsùmə̀ mmə ŋŋâ ɨ̀pwuumə̀ pɨ ɨ̀shìʼnə̀ pɨ̀noʼnə ambo ŋwùə̀ ntsùmə̀ nɨ a fuŋə̀nə nɨ̀linə̀ ɨ̀tse, 13mbə̀ʼnə àŋwàʼnə̀ Nẅùə̀ a shwəŋə̀ lo, “Ŋwùə̀ wa ntsùmə̀ nɨ à fuŋə̀nə nɨ̀linə̀ nɨ Ndòʼnə̀mbyə̂ la, à ghǎ chwarə̀.”
14La mbə̀ʼə pobə tyiʼə̀ nfuŋə̀ nɨ̀linə̀ ɨ̀tse lə la tɨghu pobə nùŋə̀ ntɨŋmə̀ aŋunə ze? Kə̀ mbə̀ʼə pobə nùŋə̀ ntɨŋmə̀ aŋunə ze lə la tɨghu pobə zuʼù mə ànwùə̀ àtse mbə̀ʼə e? Kə̀ mbə̀ʼə pobə zuʼù àshwəŋnə̀ e lə la tɨghu ŋònə̀ ɨ̀tse a pyə̀ nshwəŋnə̀ mbə̀ʼə e ambo pobə? 15Pobə kɨ ntyiʼə̀ nshwəŋnə̀ àzobə lə ɨla tɨghu pɨ pyə̀ ntwuumə̀ a ghobə? Tsaʼnə pɨ ŋwàʼnə̀nə amwuə àŋwàʼnə̀ Nẅùə̀ lo, “Zəənə̀ tsaʼnə nɨ̀tô pànə̀ nɨ pobə chwìitə̀nə ntwuumə̀ ghù ɨ̀shìʼnə̀ a pòŋə̀nə.”
16La ka a lə̀ pyiimə̀ e pànə̀ pɨ Israel pɨ̀tsùmə̀ mbyiimə̀ ntwuumə̀ ghu. Mbə̀ʼnə Ìsayà àtwuə̀ ɨ̀pɨ̀ŋmə̀ e à lə̀ shwəŋə̀ lo, “Ndòʼnə̀mbyə̂, à pyiimə̀ ɨ̀wə̌ mbyiimə̀ ntwuumə̀ ɨ̀wəə?” 17Lenəla, ŋwùə̀ à nùŋə̀ ntɨŋmə̀ e aŋunə Kristù la nkwùə̀ nɨ a zuʼnə ntwuumə̀ ghu. Pànə̀ kɨ mmə ndzuʼù ntwuumə̀ ghu la nkwùə̀ nɨ pɨ chwìitə̀nə ntwuumə̀ mbə̀ʼə Kristù ambo pobə. 18La ngwə̀ mbyiitə̀ lo, ka pobə lə̀ zuʼù a ghobə ntwuumə̀ ghu? A nkǔŋə nkuŋə lo pobə lə̀ zuʼù, tsaʼnə a àŋwàʼnə̀ Nẅùə̀ a zə nshwəŋə̀ lo:
“Ngyə̀ ɨzobə ɨ̀ lə̀ lèrə̀ amwuə pɨ̀pàa pɨ àtwuə̀ ɨ̀shyə̂ pɨ̀tsùmə̀,
ntwuumə̀ ɨ̀ghobə ɨ ghə̀ mbyàa a alyiʼə nɨ àtwuə̀ ɨ̀shyə̂ a lẅùutə̀nə.”
19Ǹchi mbyiitə̀ lo, ka pànə̀ pɨ Israel lə̀ zuʼù a ghobə? Lə̌ tsaʼnə Mǔsî àtwuə̀ ɨ̀pɨ̀ŋmə̀ e a zàamə̀nə nkẅùə̀,
“Mbɨ ghɨ̀rə̀ nɨ̀ pə nɨ àghə̀ʼnə̀ aŋunə pànə̀ nɨ ka pobə pə ghobə ngotə àlaʼà,
Mbɨ ghɨ̀rə̀ àlaʼà za nɨ ka a pə e nɨ àzhìʼtə̀ la a ghɨ̀rə̀ nɨ̀ zaŋə̀ a loŋə.” 20Ìsayà a lə̀ pə nɨ ntɨŋmə̀ a nɨ shwəŋə̀ lo:
“Pànə̀ pa nɨ ka pobə lə̀ mə ntàʼà a ghobə a gha la lə̀ zəənə̀ mə̀;
Nnèrə̀ ɨ̀pɨ̀ŋmə̀ mə̀ ambo pànə̀ pa nɨ ka pobə lə̀ tàʼà a ghobə a nɨ zəənə̀ mə̀.”
21La ngə̀ aŋunə pànə̀ pɨ Israel Nẅùə̀ a shwəŋə̀ lo;
“Ndə̀ shànkə̀ mbô ɨ̀mâ njyə̂ ɨ̀tsùmə̀ njyə̂ ɨ̀tsùmə̀ ndoonə̀ lo pobə̂ tô.”
Currently Selected:
Roman 10: pny
Highlight
Copy
Compare
Share
Want to have your highlights saved across all your devices? Sign up or sign in
© 2017, Cameroon Association for Bible Translation and Literacy
