Mark 2
2
Yěsû a parə̀ ŋònə̀ nɨ taʼà pàa mbɨ̀ŋmə̀ e à kwɨghə̀nə
(Mat 9.1-8; Luk 5.17-26)
1Mɨ̀njyə̂ mɨ̀tse lə̀ kɨ làŋə̀, Yěsû a kẅirə̀ nkwə̂ a Kàpenòmə̀. Ntwuumə̀ lə̀ sìimə̀ lo à kẅirə̀ nkwə̂ mbə amwuə alyiʼə. 2Pànə̀ pɨ̀noʼnə lə̀ zuʼù, ntô nshwatə̀ a ntswùə̀ ndâ gha tɨ ka ɨ̀sàanə̀ ɨ lə̀ pə e ghu a ntswùə̀ ndâ ghu a nɨ làŋə̀ nkwuunə̀ a ndâ. Yěsû a tyiʼə̀ mmə nchwìitə̀ ntwuumə̀ Nẅùə̀ ambo pobə. 3Tsaʼnə à lə̀ mənə nshwəŋnə̀ la, pànə̀ nɨ̀kwàa lə̀ ləŋə̀ a ŋònə̀ nɨ taʼà pàa mbɨ̀ŋmə̀ e à lə̀ kwɨghə̀nə ndòo ntô ambo ze. 4Tsaʼnə pànə̀ lə̀ noʼnə, ka ɨ̀sàanə̀ ɨ pə e ghu a nɨ zùŋə̀ ntô a mbyə̀ Yěsû la, pobə lə̀ koʼò àtwuə̀ ndâ nshwùə̀ nɨ̀fə̀ŋə a ngotə àtwuə̀ alyiʼə nɨ Yěsû à lə̀ pənə ghu. Nkwùə̀ nɨ pobə lə̀ shwùə̀ nɨ̀fə̀ŋə tsɨ̀ghu nɨ kùʼù, pobə lə̀ tyiʼə̀ ntsàa e aŋunə ɨ̀kwùunə ntə̂ e a mbyə̀ Yěsû. 5Nkwùə̀ nɨ Yěsû à lə̀ zəənə̀nə àpyiimə̀ ntɨŋmə̀ nɨ pobə pənə nɨ zèrə, à lə̀ shwəŋə̀ ambo ŋònə̀ nɨ taʼà pàa mbɨ̀ŋmə̀ e à lə̀ kwɨghə̀nə la lo, “Moonə̀ mə̀, pɨ lə̀ənə̀ mə ɨ̀nwùə̀ tɨ̀pòŋə̀ ɨ̀pô.” 6Pɨ̀nèrə̀ mbòomə pɨ̀tse lə̀ nwuunə̀ alyiʼə ghu ntyiʼə̀ nkwàŋə̀ amwuə pobə lo, 7“Ŋònə̀ wə̀ à làŋə̀ lə ɨla nshwəŋnə̀ nɨ ndwuumə̀ wə̀? À wə̀ ndzòomə̀ a Nẅùə̀. Ka ŋònə̀ ɨ̀tse a pə e ghu nɨ à wa ndə̀ənə̀ ɨ̀fànə̀ mɨ̀nwùə̀ pə̀ənə̀ ndàŋə̀ e Nẅùə̀.” 8Yěsû a lə̀ zùŋə̀ nzhyə̂ mɨ̀nwùə̀ ma mɨ̀tsùmə̀ nɨ pobə lə̀ mənə nkwàŋə̀ amwuə pobə la, mbyiitə̀ ambo pobə lo, “Nɨ̀ kwàŋə̀ mbuurə̀ mɨ̀nwùə̀ zə̀ mbə̀ʼə àkə? 9A zàŋə̀ a nɨ shwəŋə̀ ambo ŋònə̀ wə̀ nɨ pàa mbɨ̀ŋmə̀ e a kwɨghə̀nə la lo ‘Pɨ lə̀ənə̀ ɨ̀fànə̀ mɨ̀nwùə̀ ɨ̀pô’, kə̀ ‘Lòo a ɨ̀shyə̂ mbìʼì ɨ̀kwùunə o ndèrə̀ o’? 10Mbɨ ghɨ̀rə̀ nɨ̀ zhyə̂ lo, Moonə̀ Ŋwùə̀ à wa nɨ ɨ̀tɨ̀ŋnə̀ amwuə àtwuə̀ ɨ̀shyə̂ ghə a nɨ lə̀ənə̀ ɨ̀fànə̀ mɨ̀nwùə̀ pə̀ənə̀.” Tsaʼnə à lə̀ shwəŋə̀nə a lenə la, à lə̀ tyiʼə̀ nshwəŋə̀ ambo ŋònə̀ nɨ taʼà pàa mbɨ̀ŋmə̀ e a kwɨghə̀nə la lo, 11“Nshwəŋə̀ ambo ghò lo, lòo a ɨ̀shyə̂ mbìʼì ɨ̀kwùunə o ndèrə̀ o a ndâ ghò.”
12Ŋònə̀ ghu a lə̀ lòo a ɨ̀shyə̂ ndzùŋə̀ mbìʼì ɨ̀kwùunə e nfurə̀ a ɨ̀myə̂ pànə̀ pɨ̀tsùmə̀. A lə̀ pə ànwùə̀ yerə̀nə yerə̀nə ambo pobə, pobə tyiʼə̀ nguʼtə̀ Nẅùə̀ nshwəŋə̀ lo, “Pəə laʼa mə mbirə̀ a wəə tɨ zəənə̀ mbuurə̀ ànwùə̀ tsaʼa zə̀!”
Yěsû a fuŋə̀ a Levì lo â pə àzùŋə̀ ndzùmə̀ e
(Mat 9.9-13; Luk 5.27-32)
13Yěsû a lə̀ kẅirə̀ ndèrə̀ a nɨ̀pwùnə atəŋə Galìlyə̂. Àpùŋə̀ pə̀ənə̀ a lə̀ kamnə̀ e, a tyiʼə̀ mbìʼnə̀ a nɨ nèrə̀ a ghobə nɨ mɨ̀nwùə̀. 14Nkwùə̀ nɨ à lə̀ myàanə̀nə, à lə̀ mə ngyìinə̀ a nɨ̀pwùnə atəŋə za, ndzəənə̀ a ɨ̀nkẅiirə̀ pɨ̀taghə̀, Levì moonə̀ Àlfeyùsə̀ a nwuunə̀ a ndâ ɨ̀nkẅiirə̀ pɨ̀taghə̀. Yěsû a shwəŋə̀ ambo ze lo, “Tô ndzùŋə̀ mə̀.” Lenəla, Levì a lòo a ɨ̀shyə̂ mbìʼnə̀ a nɨ zùŋə̀ a Yěsû.
15Nkwùə̀ ɨ̀tse ɨ lə̀ làŋə̀ Yěsû pobə ɨ̀zùŋə̀ ndzùmə̀ ɨ̀pe mə ndzɨghə̀ a ndâ Levì. Pɨ̀nkẅiirə̀ pɨ̀taghə̀ pɨ̀noʼnə pobə ngàŋə ngɨ̀rə̀ ɨ̀nwùə̀ tɨ̀pòŋə̀ pɨ̀noʼnə lə̀ pwuutə̀ a Yěsû alyiʼə mɨ̀zɨghə̀ gha, ntiinə pànə̀ pɨ̀noʼnə lə̀ pə ndzùŋə̀ a Yěsû nkwùə̀ ghu. 16Pɨ̀nèrə̀ mbòomə pɨ̀tse nɨ pobə lə̀ pənə pɨ̀Farìsî lə̀ zəənə̀ ndwuumə̀ nɨ Yěsû a lə̀ mənə ndzɨghə̀ pobə ngàŋə ngɨ̀rə̀ ɨ̀nwùə̀ tɨ̀pòŋə̀ nɨ pɨ̀nkẅiirə̀ pɨ̀taghə̀, mbyiitə̀ ambo ɨ̀zùŋə̀ ndzùmə̀ ɨ̀pe lo, “A ghɨ̀rə̀ àkə lo, tǎ ɨwɨghə a tyiʼə̀ ndzɨghə̀ pobə pɨ̀nkẅiirə̀ pɨ̀taghə̀ nɨ ngàŋə ngɨ̀rə̀ ɨ̀nwùə̀ tɨ̀pòŋə̀?”
17Yěsû a zuʼù ànwùə̀ nɨ pobə mənə nshwəŋnə̀ nshwəŋə̀ ambo pobə lo, “Ka pànə̀ pa nɨ ka pobə mə ngòonə̀ a ghobə la tàʼà a ghobə a mbarə̀ pə̀ənə̀. A mbarə̀ pə̀ənə̀ la a tàʼà pɨghoonə, ka ndə̀ tô mə̀ la a nɨ fuŋə̀ pànə̀ nɨ mɨ̀nwùə̀ ɨ̀mobə təəmə̀nə, ndə̀ tô la a nɨ fuŋə̀ ngàŋə ngɨ̀rə̀ ɨ̀nwùə̀ tɨ̀pòŋə̀.”
Àpyiitə̀ mbə̀ʼə nɨ̀nwuunə̀ tɨ zɨghə̀ amwuə àchàʼtə̀ Nẅùə̀
(Mat 9.14-17; Luk 5.33-39)
18A lə̀ pə nkwùə̀ ghu, ɨ̀zùŋə̀ ndzùmə̀ Jònə ngàŋə̀ àŋâ àkẅiirə̀ nchyə pobə ɨ̀zùŋə̀ ndzùmə̀ pɨ̀Farìsî lə̀ mə ndzwuə̀ tɨ zɨghə̀ amwuə àchàʼtə̀ Nẅùə̀, pànə̀ pɨ̀tse tô ambo Yěsû mbyiitə̀ e lo, “A ghɨ̀rə̀ àkə lo ɨ̀zùŋə̀ ndzùmə̀ Jònə pobə ɨ̀zùŋə̀ ndzùmə̀ pɨ̀Farìsî mə ndzwuə̀ tɨ zɨghə̀ amwuə àchàʼtə̀ Nẅùə̀ la ka ɨ̀pô mə ngɨ̀rə̀ e a lenə?”
19Yěsû a kẅùə̀ ambo pobə lo, “Mbə̀ʼə pànə̀ nɨ pɨ fuŋə̀nə a ghobə a alyiʼə nɨ̀zoʼò nwuunə̀ tɨ zɨghə̀ amwuə àchàʼtə̀ Nẅùə̀ nɨ ndwuumə̀ ngɨ̀ɨnə̀ alyiʼə ghu lə ɨla? Ngaŋə, mbə̀ʼə a yìinə̀ e apə̀.” 20La, nkwùə̀ ɨ zə ntô nɨ pɨ lòo a ndwuumə̀ ngɨ̀ɨnə̀ lèrə̀ nɨ ẅèrə. Amwuə nkwùə̀ ghu, pobə nwuunə̀ tɨ zɨghə̀ amwuə àchàʼtə̀ Nẅùə̀.
21“Mbə̀ʼə ŋwùə̀ a lòo e àpàa atsəʼə yè shwuə̀ nnàanə̀ nɨ̀fə̀ŋə aŋunə atsəʼə yè lwùnə̀ apə̀. Ntiinə a tə ghɨ̀rə̀ a lenə, yi àpàa atsəʼə yè shwuə̀ za a kẅìʼnə̀ sìitə̀ atsəʼə yè lwùnə̀ za alyiʼə nɨ pɨ tânə ghu. 22A kɨ mbə tyìʼə̀ ndəŋə ndəŋə lo mbə̀ʼə ŋwùə̀ a lòo e mɨ̀lùʼù mɨ shwuə̀ nchyâ amwuə ngòbə̀ mɨ̀lùʼù yɨ̀ ndwùnə̀ apə̀. À tə ghɨ̀rə̀ a lenə, yi mɨ̀lùʼù ma saanə̀ ngòbə̀ za kẅìnə̀ e, ngòbə̀ za ɨ̂ kɨ mbɨ̂. Pɨ chyâ mɨ̀lùʼù mɨ shwuə̀ la amwuə ngòbə̀ mɨ̀lùʼù yɨ̀ shwuə̀.”
Àpyiitə̀ mbə̀ʼə njyə̂ àlaʼà pɨ̀Jew
(Mat 12.1-2; Luk 6.1-5)
23Yěsû pobə ɨ̀zùŋə̀ ndzùmə̀ ɨ̀pe lə̀ mə ndàŋə̀ amwuə ɨ̀swùumə mɨ̀sàŋə aŋunə njyə̂ àlaʼà. Tsaʼnə pobə lə̀ mənə ndàŋə̀ la, ɨ̀zùŋə̀ ndzùmə̀ ɨ̀pe lə̀ mə ngyìinə̀ ndiitə̀ mɨ̀sàŋə ma mɨ̀tse. 24Pɨ̀Farìsî pɨ̀tse lə̀ pyiitə̀ lo, “Naŋə̀! A ghɨ̀rə̀ àkə lo ɨ̀zùŋə̀ ndzùmə̀ ɨ̀pô ghɨ̀rə̀ ànwùə̀ nɨ ka mbòomə a pyiimə̀ e lo pobə ghɨ̀rə̀ amwuə njyə̂ àlaʼà?”
25Yěsû a kẅùə̀ ambo pobə lo, “Ka nɨ̀ lə̀ fuŋə̀ a wɨghə ànwùə̀ za nɨ Dàfirə̀ pobə pə̀ənə̀ ɨ̀pe lə̀ ghɨ̀rə̀nə amwuə nkwùə̀ za nɨ njyə̀ ɨ̀ lə̀ mənə ndzaŋə̀ a ghobə la? 26A lə̀ pə nkwùə̀ nɨ Àbyatà à lə̀ pənə àtwuə̀ pɨ̀fò màʼà Nẅùə̀ la, Dàfirə̀ a lə̀ kwuunə̀ a Ndâ Mɨ̀shwàʼà Nẅùə̀ nkwurə̀ àpaanə̀ Nẅùə̀ nkɨ ŋŋâ yètse ambo pə̀ənə̀ ɨ̀pe. A nɨ zùŋə̀ a mbòomə ɨ̀wəənə̀, à lə̀ pə àpaanə̀ nɨ mbə̀ʼə a lə̀ kwurə̀ ngàŋə̀ màʼà Nẅùə̀.”
27Yěsû a lə̀ lẅùutə̀ nshwəŋə̀ ambo pobə lo, “Njyə̂ àlaʼà ɨ̀ chyə̂ la ambo ŋwùə̀, ka ŋwùə̀ a pə e ambo njyə̂ àlaʼà. 28Lenəla, Moonə̀ Ŋwùə̀ a Ndòʼnə̀mbyə̂ mmə mbuʼtə̀ njyə̂ àlaʼà.”
Currently Selected:
Mark 2: pny
Highlight
Share
Copy
Want to have your highlights saved across all your devices? Sign up or sign in
© 2017, Cameroon Association for Bible Translation and Literacy