Kwɑn 2
2
Pyëli Ji Gɑ Wɑ̈thi Kɑ̈llì kì Kɑɑl-ɑ nyi Gur
1Cigg møg-ɑ bï ek ɑ́mëgg-ɑ Mosɑ̀ geki Aɑron yi Jwøng-ɑ Ácwɑ̈ɑ̈j. 2Kinni kenyi gud Isrɑil ki kɑɑl, nyi guddi ngɑn byëëg gøl gen, kì buti beer gen. Gur kɑɑl Isrɑil e wen-ɑ Kemi Kwër dyëre kì wɑ̈thi tùng bënn.
3-9Guddi byëëg Yeudɑ̀ piny ki kemme e lwøøb-ɑ ri döng kì wɑɑng cyɑ̈ɑ̈ng mwøl. Pyëël gen ni men:
| Kɑl | Jɑgø | Kwɑn |
|---|---|---|
| Yeudɑ̀ | Nɑkcön wɑ̈d Aminɑdɑb | 74,600 |
| Isɑkɑr | Nethɑnel wɑ̈d Dhuɑr | 54,400 |
| Dhebulun | Eliɑb wɑ̈d Kelön | 57,400 |
| Ge bënn | 186,400 |
Byëëg Yeudɑ̀ nyi kwönge ki wɑ̈ddi yöö.
10-16Kɑ byëëg Ruben gudde wɑɑng wurlwɑl, kì bɑng jɑgge geki bere, ni men:
| Kɑl | Jɑgø | Kwɑn |
|---|---|---|
| Ruben | Elidhur wɑ̈d Cedeur | 46,500 |
| Cimeøn | Celumeil wɑ̈d Dhuricɑdɑy | 59,300 |
| Gɑd | Eliɑsɑp wɑ̈d Deuel | 45,650 |
| Ge bënn | 151,450 |
Byëëg Ruben nyi wɑ̈dde yöö kì bɑng byëëg Yeudɑ̀.
17Bɑng byëggɑni ryeet løg-ɑ yi gøl Leebì e kɑ̈ll-ɑ Kemi Kwër. Lwøøb wɑ̈dh ceth, ni guddi piny, men kì keje ki bere kì bøle.
18-24Kɑ byëëg Eprɑim gudde wɑɑng cyɑ̈ɑ̈ng böörø, ki bere geki jɑgge kì bøle, ni men:
| Kɑl | Jɑgø | Kwɑn |
|---|---|---|
| Eprɑim | Elicɑmɑ̀ wɑ̈d Amiud | 40,500 |
| Mɑnɑsè | Gɑmɑliel wɑ̈d Pedɑdhur | 32,200 |
| Ben Yɑmïn | Abidɑn wɑ̈d Gideonì | 35,400 |
| Ge bënn | 108,100 |
Byëëg Eprɑim ɑ bɑ dɑ̈ɑ̈g byëgg. Gen ɑ wɑ̈ddi yöö kì bɑng gøl Leebì.
25-31Kɑ byëëg Dɑn gudde wɑɑng wuudø, ki bere geki jɑgge kì bøle, ni men:
| Kɑl | Jɑgø | Kwɑn |
|---|---|---|
| Dɑn | Akiedher wɑ̈d Amicɑdɑy | 62,700 |
| Aceer | Pɑgiel wɑ̈d Okrɑn | 41,500 |
| Nɑptɑlì | Akirɑ̀ wɑ̈d Enɑn | 53,400 |
| Ge bënn | 157,600 |
Byëëg Dɑn ɑ dhwödh kì cyɑ̈n.
32Kɑ ɑ́gweed gen gɑ byëgg ge ɑ́bëëd gɑ 603,350. 33De Mosɑ̀ ɑ́kyëddi yi Jwøng-ɑ Ácwɑ̈ɑ̈j kinni i gøl Leebì ko gwed, ni kɑ̈lli Isrɑil møg-ɑ kyeelø.
34Codhe, kɑ gïg-ɑ ɑ́cïgi Mosɑ̀ yi Jwøng-ɑ Ácwɑ̈ɑ̈j gwøg ceth yi tyëng Isrɑil. Ge ɑ́gud, byëëng ki bere kì bøle. Kenyi wɑ̈ddi gen yöö, men cyɑ̈dhi kɑ gøl gen.
Currently Selected:
Kwɑn 2: shkDCB
Highlight
Copy
Compare
Share
Want to have your highlights saved across all your devices? Sign up or sign in
Shilluk DC Bible © Bible Society in South Sudan, 2011.