Kwɑn 1
1
Kwɑn-ɑ Ákwøøng Isrɑil ki Kwɑnø
1 #
Kwɑn 26.1-51
Jwøng-ɑ Ácwɑ̈ɑ̈j ɑ́kööb geki Mosɑ̀ kì yij Kemi Kwër kì yij pɑ̈ɑ̈l Sinɑy, kì kyeel cyɑ̈nggi ryeew dwɑ̈tt, kì ryeew runni bɑng bëëni gen wɑ̈g kì piny Rïp. Jwøng-ɑ Ácwɑ̈ɑ̈j Mosɑ̀ ɑ́köbbe kinni, 2“Kwɑnu tyëng Isrɑil wuki Aɑron, kwɑn gɑ wɑ̈thi ud, kí wɑ̈thi kɑ̈llì, gwedu jøg-ɑ cwøw bënn, 3Cɑg kì ri ngɑn runne bɑ pyɑ̈r ɑ́ryew gïti mɑl, ɑ́ ngɑn cuggi kedhi be liny. 4Kɑ̈bbí ki jøgdøngø, ɑ́kyel kì wïj kɑl, gɑ møg køny wun, o bëëde ɑ́ jɑngi gøl gen.” 5-16Møg bene gen jøg-ɑ ɑ́kwɑny kì kelli teedø gɑ jɑggi wɑ̈thi kɑ̈llì kipe gwøngɑni.
| Kɑl | Jɑngi Kɑl |
|---|---|
| Ruben | Elidhur wɑ̈d Cedeur |
| Cimeøn | Celumeil wɑ̈d Dhuricɑdɑy |
| Yeudɑ̀ | Nɑkcön wɑ̈d Aminɑdɑb |
| Isɑkɑr | Nethɑnel wɑ̈d Dhuɑr |
| Dhebulun | Eliɑb wɑ̈d Kelön |
| Eprɑim | Elicɑmɑ̀ wɑ̈d Amiud |
| Mɑnɑsè | Gɑmɑliel wɑ̈d Pedɑdhur |
| Ben Yɑmïn | Abidɑn wɑ̈d Gideonì |
| Dɑn | Akiedher wɑ̈d Amicɑdɑy |
| Aceer | Pɑgiel wɑ̈d Okrɑn |
| Gɑd | Eliɑsɑp wɑ̈d Deuel |
| Nɑptɑlì | Akirɑ̀ wɑ̈d Enɑn |
17Kɑ jøgɑni gɑ pyɑ̈rø wïdɑ́ryew cwøl yi Mosɑ̀ geki Aɑron. 18Kɑ pödhø bëne cwøl yi gen kì kyeel cyɑ̈nggi ryeew dwɑ̈tt, kɑ ji gwed gɑ wɑ̈thi ud, kí wɑ̈thi kɑ̈llì. Jøg-ɑ cwøw ɑ́gwed bënn, cɑg kì ri ngɑn runne bɑ pyɑ̈r ɑ́ryew gïti mɑl, 19ni kɑ ɑ́köbbi Mosɑ̀ yi Jwøng-ɑ Ácwɑ̈ɑ̈j. Nyingi ji ɑ́gwed-ɑ yij Ryɑɑng Sinɑy yi Mosɑ̀. 20-46Jøg-ɑ cwøw cɑg kì ri ngɑn runne bɑ pyɑ̈r ɑ́ryew gïti mɑl, gen ɑ ji-ɑ cuggi kedhi be liny, men kì wïj ød wïye, kì wïj gøl gen, cɑg kì ri gøl Ruben, wɑ̈d Yɑgob nyel-ɑ kɑyø. Kwɑnni gen bënn ɑ́bëëd gɑ.
| Wïj Kɑl | Kwɑn |
|---|---|
| Ruben | 46,500 |
| Cimeøn | 59,300 |
| Gɑd | 45,650 |
| Yeudɑ̀ | 74,600 |
| Isɑkɑr | 54,400 |
| Dhebulun | 57,400 |
| Eprɑim | 40,500 |
| Mɑnɑsè | 32,200 |
| Ben Yɑmïn | 35,400 |
| Dɑn | 62,700 |
| Aceer | 41,500 |
| Nɑptɑlì | 53,400 |
| Ge bënn | 603,550 |
47Kwɑrri Leebì nuti gwedø ni kɑ̈ll-ɑ kyeelø, 48kipe kɑ ɑ́köbbi Mosɑ̀ yi Jwøng-ɑ Ácwɑ̈ɑ̈j kinni, 49“Keny-ɑ ógweed jøg-ɑ kedhi be liny, Kwɑrri Leebì ko gwed. 50Cïb gøl Leebì ɑ́ en ɑ korri Kemi Kwër, o ge nyi byelli gen kemɑni ki jɑmme bënn, nenni ge gïn ceth. Kɑ kemmi gen nyi geer gen bɑdhhe. 51Kenyi dɑ̈ɑ̈g ji, Kemi Kwër nyi pɑ̈d-ɑ yi Kwɑrri Leebì, o kenyi gurii piny, bɑ gen ɑ gurii piny ceth. Nɑ̈ɑ̈g ngɑnpɑth ki Kwɑɑr Leebì men-ɑ ókedhi buti gøn. 52Kɑ tyëng Isrɑil møg-ɑ kyeelø guddi gen piny, gɑ byëgg, ngɑn kì byëëg gen kì buti bere. 53De Kwɑrri Leebì guddi gen bɑdhhi Kemi Kwër, o gø kor gen, o bëëd e bong ngɑn kedhi bute kɑ pyëwɑ órënyø ki tyëng Isrɑil, kɑ ge ryɑ̈gɑ.” 54Codhe, kɑ møg-ɑ ɑ́köbbi Mosɑ̀ yi Jwøng-ɑ Ácwɑ̈ɑ̈j, gwøg ceth yi tyëng Isrɑil.
Currently Selected:
Kwɑn 1: shkDCB
Highlight
Copy
Compare
Share
Want to have your highlights saved across all your devices? Sign up or sign in
Shilluk DC Bible © Bible Society in South Sudan, 2011.
