Ɣöth 22

Yäri duŋä ran

1“Mi ci raan thäk kual kiɛ dɛl, kä bɛ jɛ luc kiɛ bɛ kɔak ni jɛ, bɛ thäk col kɛ thääk dhieec, kä mi ɛ dɛl, bɛ jɛ col kɛ det ŋuaan. Bɛ col, kä mi thilɛ jɛ duɔ̱ɔ̱r, ba raamɔ kɔak kɛ ɣöö cɛ kual. 2-4Mi wa le̱y in ca kual je̱k te̱tädɛ a tëk, mi ɛ thäk kiɛ muul kiɛ dɛl, bɛ jɛ col kɛ rɛw. Mi wa wään wä je̱k to̱lɛ ti̱c, kä ba yɔ̱t a bɛ li̱w, thilɛ cut. Kä mi lätdɛ jɛ a ci cäŋ käny, /ca ram in näk jɛ bi päl, bɛ jɛ col.

5“Mi bi raan kak bɛɛlkɛ kiɛ kak jiɛnkɛ luɔ̱ny le̱y, kä bi le̱ykɛ räth kakä raadɔ̱diɛn, bɛ kak ɛmɔ col kɛ bɛl kakädɛ kiɛ jiɛn kakädɛ tin gɔw ni kɛn pa̱ny.

6“Mi wa waŋ cua̱th, kä bɛ pal a bɛ ji̱th bɛɛl kɛnɛ mi kɛ rɔny bɛɛl, kiɛ bi kak waaŋ kɛɛliw, ram ɔ cuäth mac ɔ bɛ cuɔ̱t amäni pe̱kdɛ.

7“Mi wä raan gua̱n thie̱e̱kädɛ wä tɔ̱a̱w yio̱w kiɛ kuak, kä ba kɛ kual due̱e̱lɛ, mi ca wään je̱k, bɛ cuɔ̱t ni kä rɛɛw. 8Mi /ka̱n wään je̱k, bi gua̱n duëël ben guäth palä, kɛ ɣöö bɛ jɛ ben lar mi cɛ tetdɛ kuëŋ nyinä määthdɛ kiɛ /kenɛ jɛ kuëŋ thi̱n. 9Kä mi gäk naath ni thäk ikä, kiɛ muul kiɛ dɛl, kiɛ bi̱i̱, kiɛ kɛl ɔ ci bath ɔ rɛy nyinäkɛ, kä bɛ wee i̱, ‘Duŋdä jɛ mɛn,’ kɛn da̱ŋ rɛw bikɛ ben guäth palä. Ram mi wa kuɛth ɛ Kuoth bɛ määthdɛ culikä ni kä rɛɛw.

10“Mi bi raan gua̱n thie̱e̱kädɛ yien muulɛ kiɛ thääkdɛ kiɛ dɛlɛ kiɛ le̱ykɛ tin kɔ̱kiɛn, mi ci le̱y li̱w kiɛ ca moc buɔ̱t kiɛ ca kɛl cuac dɔɔr a thilɛ ram mi ci jɛ nɛn, 11bikɛ rɔ̱ yac nhiam Kuɔth Nhial, bɛ cu jɔɔc kamädiɛn, ba cu ŋa̱c mi /ken raamɔ tetdɛ kuëŋ kä duŋ gua̱n thie̱e̱kädɛ, kä jɛn gua̱n kä duɔ̱ɔ̱r bɛ ya̱c nhɔk, /ci raamɔ bi cuɔ̱t. 12Kä mi kualkɛ jɛ kä jɛ, bɛ gua̱n kä duɔ̱ɔ̱r culikä. 13Mi camɛ le̱y a jɛ no̱o̱ŋɛ ba ben nɛn. Kä /cɛ mi cam le̱y bi col.

14“Mi wä raan le̱y yiɛn kä gua̱n thie̱e̱kädɛ, kä ba le̱y ɛmɔ moc gua̱r, kiɛ bɛ li̱w a te gua̱ndɛ jɔ̱ɔ̱r, bɛ pe̱k cuɔ̱t kɛɛliw thöp. 15Kä mi te gua̱ndɛ thi̱n, /cɛ jɛ bi col, kä mi ɛ duɔ̱ɔ̱r mi thöpkɛ gua̱ndɛ yio̱w thi̱n, bi pe̱k in la thöpkɛ cu ro̱ŋ kɛ cut kɛ ɣöö nyuakɛ jɛ kɛɛl.

Ŋuɔ̱t kɛ kui̱ ciɛŋni ti gɔw

16“Mi bi raan nya thör mi /ka̱n gueer ɛ wut pɛl a bɛ tɔ̱ɔ̱c kɛ jɛ, a jɛ ku nyin kuën thöp, bɛ cu kuɛn ala ciekdɛ. 17Kä mi wä gua̱n nyaal ɛ lo̱k i̱ kämɛ jɛ nyaadɛ, bɛ pe̱k yio̱o̱ni ti päär kɛ nyin kuën thöp kɛ kui̱ nya thör mi /ka̱n kɔŋ gueer ɛ wut.

18“/Cuɔrɛ ti̱et nho̱k tëk.

19“Ram mi bi ni̱n le̱y ikä, ba näk.

20“Ram mi bi kuth kɔ̱kiɛn pal a /cɛ bi pal ni ɣän Kuoth Nhial kärɔa, ba däk.

21“/Cia ja̱l bi la̱t jiäk, kä /cia jɛ bi ciɛŋ ɛ yak yak, kɛ ɣöö cia kɔŋ ɛ ja̱a̱l ti rööl mëëdan muun I-jëp.

22“/Cia ciek jɔkä bi la̱t jiäk, kä /cia gat mi rɛɛt bi moc kɛ mi bɛc. 23Mi bia kɛ lät kä mi bɛc cäŋɛ ni gue̱e̱riɛn, kä bikɛ ɣä cɔl, ɣän bä wieediɛn liŋ a thil diw. 24Kä bi waŋ lɔaacdä di̱t ɛlɔ̱ŋ kɛ yɛ, kä bä yɛ näk kɛ mut. Bi mänkun a män jɔɔkni, kä bi gaatkun duɔth rɛɛtdä.

25“Mi wä ram mi can kä nɛɛkä yio̱w wä dɛn kä raan, /cu rɔ ciɛŋ ce̱tkɛ gua̱n ŋua̱l kä jɛ, /cu jɛ thieec ni rep yio̱o̱ni ti bɛ mat wi̱i̱ nyinäku. 26Mi wi̱i̱ bi̱i̱ gua̱n thie̱e̱kädu wä ka̱p guäth kä duɔ̱ɔ̱r mi bɛ ŋun, biɛ luɔ̱c bi̱i̱ ɛmɔ a /ken cäŋ ni kony, 27kɛ ɣöö nɔmɔ ɛ jɛn kuumdɛ min kɛl kärɔa, kä ɛ jɛn duŋ pua̱a̱nydɛ. Der ku lɛ niɛn kɛ ŋu? Kä mi wëë röt, a ro̱lɛ ɣä, ɣän bä lulɛ liŋ, kɛ ɣöö ɣän lapä ram mi kɔ̱c lɔc.

28“/Cuɔrɛ ɣä yɔ̱r kä /cuɔrɛ rui̱i̱c mi ruaac nɛɛkun lam.

29“Bia ɣä luɔr nhial kɛ ŋɛ̈ɛ̈r ka̱a̱knikun kɛ baapdiɛn, amäni pi̱ dɛɛni wal tin la nhiackɛ.

“Kä bia ɣä ka̱m key gankun tin dhɔɔl. 30Bia la̱t ni nɔ kɛ thääkun kɛ de̱tkun. Bɛ la tëë kɛɛl kɛ man kɛ ni̱n bärɔw, kɛ bädäkdiɛn bia jɛ ben buɔ̱k ɣä. 31Bia la nɛy ti ca buɔ̱k ɣä, kɛ kui̱c ɛmɔ, /cia ri̱ŋ mi ci le̱y ɛ cam dɔɔr bi cam, bia jɛ yuɔ̱r jio̱o̱k.”

Currently Selected:

Ɣöth 22: nusNHB

Highlight

Copy

Compare