Filipi 4

Ettiyenita

1Tania, illarak iko haniyarak hoŋ, obuor ataji hoŋ itai bebe; ettoho ani amolie hatai bebe! Amuno ni buo fe etadara te itai! Oduloro amanya te enoso iko Lamonye.

2Attana ani itai, Yodia iko Sintike, itoŋoti ta ataji abotie ta aniŋio hatai Lamonye. 3Buo fe jihoi illaŋ oloyijio, elle egiama 'to ikoŋ, awak ni oluaha aniyarak hunia. Nyio, igiamai nyia isi ikoŋ ono ogol itisarrahiniere asayyo ayijok, isi arabotie iko Klemente buo egiamak hullomuk, hulle igioroni afureta hosi ibuk ono nesu.

4Oduloro amuno te enoso hatai iko Lamonye; enyiak fe ni idas jio, omunoti!

5Ijiara aati 'daŋ omijani anyalami hatai; nyio, iliaha attuna ono Lamonye. 6Hètattohoro ahuattek ehawwa; ati, jio emojiti hatai 'daŋ, omojoti jio Hollum erre 'daŋ hunne iwahata itai. Oduloro esiorio ahumo jihonyi elle imojoti itai. 7Tania, te enoso hatai iko Kristo Yesu, irumana adi itai nelik taji Hollum, anna agalik 'to ofioro waati 'daŋ. Ogottiere adi inyi atajia hatai iko egigilita hatai onno oyyu.

8Illarak iko haniyarak hoŋ, etisidok ni ta ajiaran jio, ijiara erre hunno oyiji 'to, hunne iyaŋunie 'to olohuo, ifuti jio egigilita hatai; erre hunna arai 'to hode, hunne ilamani 'to ta amijio, hunno obisi, hunno olibori, hunne iyaŋunie 'to abuaran taji, iko hunno oyiji 'to te etayirio. 9Amanyati te erre hunyia iyiyenuna itai buo fe ifuotuna jihoŋ; erre hunyia ekiana ni iko hunyia ehanio ni. Tania, owon adi Hollum ikatai; Hollum elle isiarak 'to jihohoi nelik tajia.

Humo te Esiorio

10Te enoso hoŋ iko Lamonye, amuno ni bebe nyio, ihalu aŋasi arriai, inyiahata itai itahutana egigilo hatai toni. Hode, iduloro nyia itai egigilo bebe toni, ati obiaŋarak nyia itai ekoi itahutaniere inyi jihoŋ. 11Abeŋ ni ekiana erre hunia jio, aŋaramahi obo ariŋ jihoŋ, nyio, ettiyenu ni itoŋori te elik tua ta ariŋ onno owon 'to jihoŋ. 12Amijak ni ara elociaŋ kuyya asaman aŋai. Ettiyenu ni imanyari te elik tua imasik 'daŋ, oloŋi 'daŋ; duadi bu aniama ni kuyya efoŋ ni, ifuroi erre jihoŋ kuyya aŋaramahini. 13Aremik ni iwojuna erre 'daŋ, ta agolon enne isiarak Kristo jihoŋ.

14Ati ibisata nyia itai bebe iluahiere ani jio ettigemita hoŋ. 15#2Kor 11:9Itai aati Filipi, imijana itai owon nyia inyi aŋai jio oŋitek etterita hunyia ettiyeniere ni Asayyo Ayijok ifau Masedonia. Ninyia alo ni addi teya, obeŋ nyia obo eluluŋ heruhok oluak ani, arari fe itai hama. Itai nyia hama isiatta jihoŋ arobiyaa esiorita. 16#Ehanita 17:1Duadi bu ninyia awanari ni Tesalonika, isulana nyia itai jihoŋ aluahio enyiahita arriai. 17Obiaŋara jio awak ni ifuotutta esiorita, ati awak ni oŋida ayiji ofuananio jihatai. 18Ihuania, omijana jio, efuotu ni erre 'daŋ hunyia ifahuna itai jihoŋ; allaŋi luŋa hunna awak ni. Aremehini esiorita hatai 'daŋ hunyia iyaŋuno Epafroditos jihoŋ. Arai isi ihuo ehumi onno oŋuo 'to gir gir, anna awak Hollum buo fe omuno. 19Ta awanan Hollum hoŋ iko esamiti 'daŋ, isiarak adi inyi jihatai, to Kristo Yesu, erre 'daŋ hunne iwahata itai. 20Hatawana, 'tulaŋ 'tulaŋ, akuatan jio Hollum, Monye hohoi! Amen.

Efonyita Etisidita

21Itifonyana aati Hollum 'daŋ, hulla arai 'to a hulo Kristo Yesu. Itifonya itai, eluluŋ heruhok onno owon 'to ana dini. 22Itifonyai aati Hollum 'daŋ itai, agalik ti egiamak hutta haŋ Hobu elle ittokon.

23Ijiara ayiji taji ono Yesu Kristo, Lamonye hatawana jihatai 'daŋ.

Currently Selected:

Filipi 4: EA2003

Highlight

Copy

Compare