1 TESALONIKA 5
5
Arrati ta Attuna onno Lamonye
1Illarak iko haniyarak hoŋ, obeŋ osiru igioroniere jihatai iduoŋi adi erre hunia jio anani holoŋ. 2#Mat 24:43; Luk 12:39; 2Pet 3:10Nyio, ihumata itai imijana, ta ahuattek hatai jio, iduoŋ adi oloŋ ono Lamonye ihuo attuna lohoho ta arue. 3Alla ajiori aati jio, “Owon elik fau, obeŋ obo abaŋi,” attati arrohoji iduoŋ jihosi turunyaŋ ihuo ahuanya ŋotte onno ojio 'to esio; obeŋ adi tulo iris. 4Ati jihatai illarak iko haniyarak hoŋ, ibiaŋata itai iwanata idumele. Hèlaha Oloŋ ania oburak itai ihuo olohoho. 5Nyio, irata itai 'daŋ awaati hulo afaŋan iko oloŋ. Ebeŋ era a hulo narue kuyya a hulo edumele. 6Tania, hèlaha ejotoro ihuo aati hullomuk; ati, oŋida emijio buo fe ewon iko ossi huna afaŋi. 7Hullo ojotoi 'to, ojotoi ta arue; buo arumak, orumai ta arue. 8#Efe 6:13-17Ati era a hulo afanni, ijiara ossi hohoi afaŋi. Ijiara luŋa ewon iko neruk buo abuaran taji oŋida arai egerita hutto suhiara hohoi. Ijiara eyihina jio etalahuno ara olohuluk hohoi. 9Obeŋ nyia Hollum onyimu hohoi ittigemiere. Ati, onyimu nyia inyi hohoi irumaniere etalahuno to Yesu Kristo, Lamonye hohoi; 10linyia oye 'to to hohoi, jio oŋida bati emanya ikenyi duadi bu esu kuyya eye, alla attu inyi. 11Tania, itagoliete buo fe iluahiete ahuattek ihuo enne ihaniette itai ihuania.
Ettiyenita iko Efonyita Esidita
12Illarak iko haniyarak hohoi, ettana hohoi itai jio, abaŋata hia hulle igiamai 'to ihiji hatai; hia hulle iyyahatie 'to itai buo fe ittiyenie itai emanyiti Kristiani. 13Nyio, te egiama enne ihanie isi, abaŋata buo fe itabuarata atajia jihosi bebe bebe. Itoŋoti te elik tajia.
14Illarak iko haniyarak, ettana hohoi itai jio, isiŋiete aboyojok, itagoloto atajia baŋak, oluahiete elihak buo fe odihata isi 'daŋ. 15Ijiara obo jihatai obeŋ inienu epali te epali, ati oduloro ehanio erre ayijok jio ahuattek hatai iko jio aati 'daŋ.
16Oduloro amuno. 17Oduloro amojo. 18Isiatta ahumo te erre 'daŋ; nyio, ariŋ ania anna awak Hollum jihatai ta amanya hatai iko Kristo Yesu.
19Hètihoto Loholio Olibo. 20Hèyyasata ekenita huno ekianak Hollum, 21ati, okiamata erre 'daŋ; ogottiette hunno oyiji 'to, 22ihara erre 'daŋ hunno orrohoji 'to.
23Ijiara Hollum elle isio 'to jihohoi nelik tajia italibo ahuattek hatai 'daŋ. Ijiara inyi ogottiere onno oyyu oloyirihien hatai, oloholioo hatai, iko ahuattek hatai oŋida obo epali obeŋ jihatai jio oloŋ onno ottuniere Yesu Kristo, Lamonye hohoi. 24Lia elle iloŋu 'to itai, ihan adi inyi erre hunia; nyio, ogottiere inyi ecoriti honyi.
25Illarak iko haniyarak hohoi, omojoti buo fe to hohoi.
26Itifonyana eruhok 'daŋ ta ahucio 'yaha ono nelik tajia.
27Ta afure ono Lamonye, attana ni itai, ihianana awaraga ana jio eruhok 'daŋ.
28Ijiara ayiji taji ono Yesu Kristo, Lamonye hohoi hatawana jihatai.
Currently Selected:
1 TESALONIKA 5: EA2003
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in South Sudan 2003
