1 TESALONIKA 4

Amanya onno Omuno Hollum

1Illarak iko haniyarak hohoi, etisidok ni jio, iyiyenuna jihohoi oŋida imanyati aŋai itamunoyere Hollum. Inyi ania luŋa ekoi enne imanyatti itai. Ihuania, ettana hohoi buo fe eramak itai ta afure Yesu, Lamonye hohoi jio oduloro ehanio onno oyyu agalik ania. 2Nyio, imijana itai ettiyenita hunyia eramak hohoi jihatai te elohittok ono Yesu, Lamonye. 3Awak Hollum itai oŋida iliboroto buo fe luŋa ilamajata jio erre somon. 4Ijiara luŋa itai 'daŋ ababo imijana itoŋoti iko aŋoruo hatai#4:4 itoŋoti iko aŋoruo hatai : kuyya ihumata ittoŋotio ahuattek jio erre somon. ta alibori iko ta ayiji; 5buo obiaŋara ta amuno hirre somon, ihuo aati hullo obeŋi 'to omijani Hollum. 6Jio erre hunia, hèlaha obo alatai ihanio onno orroho jio Kristiani ihuo inyi, kuyya imumunio isi. Eramak nyia hohoi jihatai erre hunia berien. Ehum nyia hohoi isar itai jio, ittigemio adi Lamonye hia hulle ihanie 'to ihuo nyia. 7Obeŋ nyia Hollum iloŋu hohoi imanyari asomok, ati imanyari amanya elibo. 8Tania, hia hulle ihari 'to ettiyenita hunia, obeŋ isi ihari atulo; ati ihari isi Hollum elle isio 'to jihatai Loholio Olibo honyi.

9Obeŋ osiru egiorok ni jihatai eram ono etabuorio tajia jio aati hullomuk. Ittiyanak nyia Hollum jihatai aŋai oremik abuaran taji iwanan ihiji hatai. 10Hode, ihaniete itai ihuo nyia jio eruhok 'daŋ hutto Masedonia. Tania, ettana hohoi itai illarak iko haniyarak hohoi jio, ihaniete ihuo nyia agalik ania. 11Ijiara awahan manya dee owon itajia hatai, ihaniete egemita hatai, igemuna amat hatai ta ahas hatai, ihuo eramak nyia hohoi itai berien. 12Elle ihaniete itai ihuo nyia, abaŋi adi aati hullo obeŋi 'to arai aheruhok itai. Ibiaŋata adi buo fe itai ittifiati obo ariŋ jio obo atulo.

Attuna ono Lamonye

13Illarak iko haniyarak hohoi, ewak hohoi oŋida itai imijana ahode hode hiram hayaak, nyio, ŋadi itai ijiriŋati ihuo aati hullo obeŋi 'to owoni iko eyihina. 14Eruk jio oye nyia Yesu ette buo fe ibuhuna. Tania, eruk buo fe jio, to Yesu, itubuhu adi Hollum hia hinyia oye 'to buo iruhi jio Yesu.

15 # 1Kor 15:51-52 Erre hunne ettiyenio hohoi jihatai huna, arai isi ettiyenita huno Lamonye jio: ebeŋ adi hohoi hulle esu 'to jio oloŋ onno ottuniere Lamonye, ekiomoro jihonyi buo ediaharu ayaak. 16Ottu adi ekiana tedou, etuk ono ajilo elle ittokon, afuruju Hollum, buo fe Lamonye ta ahuan honyi ette ittuna tedou. Teyya, ibuhuni adi ahosiere hia hinyia oye 'to buo iruhi jio Kristo. 17Attati hohoi, hulle hésu 'to jio oŋitek hua, ittubanio arabotie ikosi itua idohuo irraŋuniere Lamonye tehiji dou iko afau. Tania, edulo adi awanan iko Lamonye. 18Tania, itagoloto atajia hatai te ekenita hunia.

Currently Selected:

1 TESALONIKA 4: EA2003

Highlight

Copy

Compare