1 Kor 9

Yic ku Luɔi de Tuuc

1Cä ye tuc? Cä ye cath ë këde yenhdï? Kɛ̈n Yecu Kërtho Bɛ̈nydïïtda tïŋ? Week, cäkï ë luɔidï ë Bɛ̈nydïtic? 2Acakaa yɛn ë cie tuc tëde kɔc kɔ̈k, ku tëde week yɛn dhil aa tuc: kë ë ŋiëc yen nɔn a yɛn tuc ee täu täu wek ë Bɛ̈nydïtic.

3Bëër bän e pɔ̈k nɔm kɔc thiëc ɛn, kï an: 4Cuku nïïm de riɛl bï wok cam ku dëk wok? 5Cuku nïïm de riɛl bï wok cath në tik, nyankënëda, acït man ë tuuc kɔ̈k aya, ayï wɛ̈ɛ̈tamäthken ë Bɛ̈nydït, ayï Kepath? 6Ku wo wapäc, wook wokë Baranaba, cuku nïïm de riɛl bï wo luɔi pɔ̈l? 7Alathkërou ee lɔ tɔŋ, ku jɔ aa cam ë wëu ke yenguöp? Eeŋa ee dom com ë tiim, ku cie cam ë ka cï luɔk? Ku eeŋa ye thök tiit ku cie cam ë ciɛk ke thök?

8Luɛɛl kake cït man ë raan tei? Ku cïï löŋ kakë lueel ayadäŋ? 9#Nyöŋ 25:4; 1 Tim 5:18. Acï gɔ̈ɔ̈r ë löŋ de Mothe, an, “Du awalɔ ee tääu ë thɔn thok thɔn ee rap kɔ̈ɔ̈m.” Ee thön kek ee Nhialic diɛɛr? 10Ku cie baŋda wook en ë lueel en en? Yeka, ee baŋda wook en aa gɛ̈ɛ̈rë ye: ke raan pur ke bï pur ë ŋäth ŋɛ̈ɛ̈th en käŋ, ayï raan käm, ke ŋäth käŋ, ka bï këdɛn ë ŋɛ̈ɛ̈th yök. 11#Rom 15:27. Të cï wok ka ke wëi cuöm week, duɛ̈ɛ̈rkï tɔ ye këdït, të tem wok kakuön ë piny nɔm? 12Na cath kɔc kɔ̈k në riɛl bï we cieŋ aya, ke wook, cuku ke wär? Ku riɛlë aa cukë ye kɔɔr, wok ee këriëëc guum, ke wo cïï wëlpiɛth ke Kërtho bï aa pɛ̈n cäthden. 13#Nyöŋ 18:1. Kuöckï kɔc ë ka ke Luaŋdït looi, nɔn ciëm kek ë ka ke Luaŋdït? Ayï kɔc ë këde yïïŋ ee läm looi, kuöckï nɔn ye kek ka ke yïïŋ de läm rɔm? 14#Math 10:10; Luk 10:7. Yen acït luɛl cï Bɛ̈nydït e lueel an, bï kɔc ë wëlpiɛth guiir aa pïïr ë wëlpiɛth.

15Ku yɛn, yɛn kɛ̈n kakë kɔɔr anandï: ku yɛn kën kakë gɔ̈ɔ̈r ë luɔi bï e luöi yɛn aya: luɔi bän thou en aŋuän në luɔi bï raan lɛc lɛɛc ɛn rɔt tɔ ye ɣɔ̈ric. 16Na ya cak wëlpiɛth aa guiir, ke yɛn cïn nɔm ke bän rɔt leec, yɛn cï mac thok, an, bä wëlpiɛth dhil aa guiir, yeka, amawoou në yɛn, të cän wëlpiɛth ee guiir. 17Ku të luɔɔi ɛn ee kënë në piɔ̈n mit, ke yɛn cath wo ariöpdï: ku të luɔɔi ɛn en ke ya diu piɔ̈u, ke yɛn cï gäm thön bä döt thön ë wëlpiɛth. 18Ariöpdï jɔ aa ŋö? Ariöpdï kï, an, “Tën aa yɛn wëlpiɛth guiir, ke yɛn bï wëlpiɛth ke Kërtho aa guiir youyou tei, ke yɛn cïï bɛ̈ɛ̈nydï bï kuöc muk, bɛ̈ɛ̈ny cï gäm ɛn ë wëlpiɛth yiic.

19Acakaa yɛn ë cath ë këde yenhdï ë kɔc yiic kedhie, ke yɛn cï rɔt tɔ ye lïm de kɔc kedhie, luɔi bän kɔc juëc dɔm. 20Tëde Judai yɛn cï rɔt tɔ ye Judai, luɔi bän Judai dɔm: ku tëde kɔc rɛ̈ɛ̈r ë löŋic, aguɔ rɔt tɔ ye raan rɛ̈ɛ̈r ë löŋic, luɔi bän kɔc rɛ̈ɛ̈r ë löŋic dɔm, 21tëde kɔc cïn löŋ, yɛn cï rɔt tɔ ye raan cït kë cïn löŋ, luɔi bän kɔc cïn löŋ dɔm, ku yɛn cïï tɔ̈u ke ya cïn löŋ tëde Nhialic, yɛn nu ë löŋic tëde Kërtho. 22Tëde kɔc kɔ̈c, yɛn ë cï ciët raan kɔ̈c, luɔi bän kɔc kɔ̈c dɔm: yɛn cï tɔ ye käŋ kedhie tëde kɔc kedhie, luɔi bän kɔc kɔ̈k kony në këriëëc cä looi.

23Ku yɛn ee kënë looi në baŋ de wëlpiɛth, ke yɛn bï dɛ këdï thïn. 24Ku na kɔc ë wöör, kuöckï keek nɔn wɛ̈ɛ̈r kek kedhie, ku raan tök en aye miɔɔc ë këdäŋ? Yen aa wek wöör wäkya, ke we bï miɔɔc. 25Ku raan ëbɛ̈n raan ee rɔt tiit ë luɔi bï en kɔc wöör, ee rɔt ŋiëc muk ë këriëëc ëbɛ̈n. Ku keek ayek luui aya ke ke bï göl bï riääk yök, ku wo bï göl cïï bï riääk yök. 26Yen aya yɛn riŋ aya, ku acïï cït ke cïn naamde, ku yɛn ee biök aya, ku acït nɔn aa yɛn pëëric biɔ̈ɔ̈k tei: 27ku yɛn ee yaguöp dui, ku ta ye lïmdï, ke ya cïï bï cuat wei, ya ka ye raan ë wël kɔn guiëër kɔc kɔ̈kkë.

Currently Selected:

1 Kor 9: dip-JPB

Highlight

Copy