1 Kor 7

Thiëc në biäk de Thiëëk

1Ku në këde ka cäk gäär ɛn an:

Apiɛth tëde moc të cïï en tik jak. 2Ku në biäk de bal, ë moc ëbɛ̈n ë ye dɛ tiiŋ de yenguöp. 3Ku moc ë ye tiiŋde luööi apiɛth, ku ye tik monyde luööi apiɛth aya. 4Tik acïn nɔm riɛl ë yenguöp, ee moc en ade nɔm riɛl: ayï moc aya, acïn nɔm riɛl ë yeguöp, ee tik en ade nɔm riɛl. 5Ë ŋɛk cïï rɔt ee pɛ̈n ŋɛk, ë röm bä wek thook röm tei bäk röt pɔ̈l ë aköölkë, ke we bï cök ë läŋ läŋ wek Nhialic, ku jakï röt bɛ mat ëtök, ke we cïï Catan bï them, në kuny kuöc wek röt muk.

6Ku kënë a luɛɛl në päl ë pɛ̈lë yɛn luɛɛl, acïn liem cï yiɛ̈n ɛn. Ë yapiɔ̈u tei adï tɔ̈u kɔc kedhie cït man ë yɛn. 7Ku raan ëbɛ̈n acath ke kë cï Nhialic gäm en, ŋɛk ke këde, ku ŋɛk ke këde.

8Ku yɛn yöök kɔc kën thiëëk, ayï diëër cïn nïïm röör an, Apiɛth tëde keek të rëër kek cït man ë yɛn. 9Ku na dhɛl keek në muŋ bï kek röt muk, ë ke thiëk: thiëëk aŋuän në luɔi bï ŋɔ̈ɔ̈ŋ ke nɔ̈k.

10 # Math 5:32; 19:9; Mak 10:11,12; Luk 16:18. Ku kɔc cï thiëëk kek ayɔ̈ɔ̈k, ku acie yɛn, ee Bɛ̈nydït en a yöök keek, an, ë tik cïï pɔ̈k kekë monyde, 11(ku të pɔ̈k kek, tɔ rɛ̈ɛ̈r ke cïn nɔm moc, ku na cïn piɔ̈u ee kënë, ke tɔ mät kekë monyde), ku moc, ë cïï tiiŋde ciec.

12Ku kɔc kɔ̈k kek a yɔ̈ɔ̈k, acie Bɛ̈nydït, ee yɛn ë yöök keek an: Na de mɛnhkënëda, raan de nɔm tiiŋ kën gam, ku tik agam rëër kekë yen, ke du tɔ cieec. 13Ayï tiiŋ de monydɛn kën gam, ku gɛm rëër kekë yen, ke du tɔ jël ë yelɔ̈ɔ̈m. 14Mony kën gam aye tɔ ɣeric në tik, ku tiiŋ kën gam aye tɔ ɣeric në moc: tëë cie yen, ke mïthkun adï kënkï yiic ɣɛɛr, ku acïk yiic ɣɛɛr ënɔɔnë. 15Ku raan kën gam, të jël en, ke lɔ: na loi yen aya, ke raan cï gam, nɔn ee yen moc ku nɔn ee yen tik, acïn kë cï e mac, cït man ë lïm: ku Nhialic acï wo cɔɔl në këde mät. 16Ku ŋic wudï, yïn tik, nɔn bï yïn monydu kony? Ayï yïn, yïn moc, ŋic wudï nɔn bï yïn tiiŋdu kony?

Rɛ̈ɛ̈rë cït Man cï Nhialic yï Cɔɔl

17Ë ŋɛk ë rɛ̈ɛ̈r tei, cït man cï Nhialic käŋ tɛ̈k raan ëbɛ̈n, ku cït cɔ̈t cï Bɛ̈nydït raan cɔɔl ëbɛ̈n. Ku yen a yɔ̈ɔ̈k ɛn kɔc ë ɣööt ke Nhialic yiic ëbɛ̈n. 18De raan cï cɔɔl ke ye aŋuɛl? Ë cïï rɔt tɔ ye raan cie aŋuɛl. Ee raan cï cɔɔl ke cie aŋuɛl? Ë cïï rɔt tɔ ye aŋuɛl. 19Cuɛ̈l acïn naamde, ku luɔi kënë raan cueel acïn nɔm, ee muŋ ë raan lööŋ ke Nhialic muk, en ade naamde. 20Ë raan ëbɛ̈n ë tɔ̈u ë täudɛn ë tɔ̈u en të wään cɔɔlë ye. 21Ë yï cɔl, ke yï ë lïm? Du diɛɛr ë yïpiɔ̈u: ku na de tën an, lony yï, ke yï tɔ rɔt lony tei. 22Ku raan cï cɔɔl ë Bɛ̈nydïtic, ke ye lïm, yen aye raanden ë Bɛ̈nydït raan ee cath ë këde yenhde: ayï raan cï cɔɔl ke ye raan ee cath ë këde yenhde, yen aye lïm de Kërtho. 23We cï ɣɔɔc ë ɣööc tuc, duökï röt bï tɔ ye lïïm ke kɔc. 24Wek mïthëkɔckuɔ, ë ŋɛk ë tɔ̈u kekë Nhialic ë täudɛn ë yen tɔ̈u të wään cɔɔlë ye.

Thiëc në Biäk de Kɔc kën Thiëëk ku Thuööm

25Ku na këde dhueec, acïn liem cïï Bɛ̈nydït yiɛ̈n ɛn: ku löŋdï yen a luɛɛl tei, ke ya ye raan cï kokëpiɔ̈u yök tëde Bɛ̈nydït, bän aa raan adöt.

26Aluɛɛl ë yapiɔ̈u, në baŋ de riääk de piny ënɔɔnë an: Apiɛth të de raan të tɔ̈u en aya. 27Cï yï duööt ë tik kɔ̈u? Du luny ee kɔɔr. Cï yï lony ë tik kɔ̈u? Du tik ee kɔɔr. 28Ku të thiëëk yïn, acïn kërɛɛc cï wööc, ayï dhuec, të thiɛɛkë ye, acïn kërɛɛc cï wööc. Ku kɔckë abïk kë dhal keek yök ë kegup: ku yɛn de piɔ̈u luɔi päl ɛn week.

29Ku aluɛɛl alëyɔ̈ɔ̈, wek mïthëkɔckuɔ an, piny athiɔ̈k, ku ë akööl cï döŋ, ke kɔc de diëërken ë ke tɔ̈u cït man ë ka cïn nïïm diäär, 30ayï kɔc ë dhiau, ë ke tɔ̈u cït man ë ka cïï dhiau, ayï kɔc ë piɔ̈ɔ̈th miɛt, ë ke tɔ̈u cït man ë ka cïï piɔ̈ɔ̈th mit, ayï kɔc ë ɣööc, cït man ë ka cïn nïïm käŋ, 31ayï kɔc ë ka ke pinyë nɔm looi, ë ke ye käŋ looi ku cïkï kepiɔ̈ɔ̈th tum keek: täu de piny nɔm ënɔɔnë akɔɔr luɔi bï en jäl.

32Ku yɛn de piɔ̈u nɔn bä wek tɔ̈u ke we cie diɛɛr. Raan kën thiëëk ee diɛɛr ë ka ke Bɛ̈nydït, luɔi bï en Bɛ̈nydït tɔ mit piɔ̈u: 33ku raan cï thiëëk ee diɛɛr ë ka ke piny nɔm, luɔi bï en tiiŋde tɔ mit piɔ̈u. 34Ayï tik ku dhuec acïk keyiic tek. Nyan kënë thiaak ee diɛɛr ë ka ke Bɛ̈nydït, luɔi bï en yic ɣɛɛr ayï yepiɔ̈u ayï wëike: ku nyan cï thiaak ee diɛɛr ë ka ke piny nɔm, luɔi bï en monyde tɔ mit piɔ̈u.

35Ku kënë aluɛɛl në këde piathdun, acie pɛ̈n pɛ̈n ɛn week käŋ, ee këpiɛth en kaar, ke we bï Bɛ̈nydït aa luööi apiɛth, ke cïn kë bï week gɔ̈ɔ̈u.

36Ku na de raan luel en an: cï nyan bï thiaak wäc këdäŋ, në nyɔk cï en nyɔk, ku na ŋuän thiëëk, ke tɔ loi kë nu ë yepiɔ̈u, acïn kërɛɛc cï wööc, tɔ ke thiak röt. 37Ku raan ë ye piɔ̈nde kɔ̈ɔ̈c aril, acïn kë dhal en, ku ee raan ë rɔt ŋiëc muk, ku cï löŋ teem ë yepiɔ̈u, an, bï nyan bï thiaak tɔ̈u aya, yen aye këpiɛth looi. 38Yen aye tëde, raan ë tiiŋde thiaak acï këpiɛth looi, ku raan cïï thiëk, ka cï këpiɛth looi arëët.

39Tik aye mac ë löŋ anande të pïïrë monyde, ku të thouwë monyde, ka cï lony, aduëërë raan thiaak raan nu ë yepiɔ̈u, të ee yen raan cï Bɛ̈nydït gam tei. 40Ku në löŋdï, të tɔ̈u en aya, yen aduëër en athiɛɛi dït yök: ku aluɛɛl, an, cuk piɔ̈ɔ̈th rɔ̈m wokë Wëi ke Nhialic aya.

Currently Selected:

1 Kor 7: dip-JPB

Highlight

Copy