Le 33
33
Kră Yang athei lu sư năm
1Kră Yang khan kơ Môis: Năm bĕ đơ̆ng âu, ih hăm lu kon pơlei pơla ih đei chông lĕch đơ̆ng char Êyiptơ, năm bĕ tơ char Inh đei pơkă pơkăm boih kơ Abraham, Isăk, Jakôp: Inh gô ăn char noh kơ kon sâu ih. 2Inh gô wơh minh 'nu linh jang 'lơ̆ng Inh năm adrol kơ ih, na Inh gô puh tơweh lu bơngai Kanaan, Amôrit, Hêtit, Pêrisit, Hêwit, hăm lu bơngai Jêbus, 3năm bĕ iĕm tơ char đei đak toh, hăm đak sut; mă-lei Inh ưh kơ đei năm hơdai ih ôh, yua kơ iĕm adrĕch arăng kơ̆l kơnh hli kơ Inh pơrăm lê̆ lu iĕm rok trong. 4Kơplah kon pơlei pơla kơtơ̆ng tơdrong kơnê̆ noh, lu sư sơ'ngon kơdih kơdih, ưh kơ đei bơngai bu 'bot dah đoh tơmam pơhrôp. 5Yua kơ Kră Yang khan bơih kơ Môis, khan bĕ lu kon pơlei pơla Isơrael, lu iĕm jing kon pơlei pơla arăng kơ̆l, dah Inh năm hơdai iĕm 'nao lăp hrei hrei đĕch, Inh gô pơrăm iĕm! Thoi noh dang ei plôh bĕ tơmam pơhrôp iĕm, wă kơ Inh băt gô pơm kiơ kơ iĕm. 6Lei na iŏk đơ̆ng kông Hôrêp kon pơlei pơla Isơrael plôh lê̆ đĭ tơmam pơhrôp lu sư.
Bơsŭn Krao Apinh
7Kơplah noh Môis chĕp ba bơsŭn năm pơdơ̆ng tơ 'nguaih ataih 'biơ̆ đơ̆ng anih kon pơlei oei, sư anăn bơsŭn 'noh “Bơsŭn Krao Apinh.” Dah bơngai bu 'maih wă krao apinh chă Kră Yang sư năm tơ bơsŭn noh tơ 'nguaih kơ anih kon pơlei oei. 8Rim wơ̆t mưh Môis lĕch năm tơ bơsŭn noh đĭ-đăng kon pơlei pơla iung dang dơ̆ng, rim 'nu dơ̆ng 'bơ̆t 'măng bơsŭn sư, kiơ̆ hnhoi lăng Môis dĭng sư mơ̆t lăm bơsŭn anih krao apinh. 9Kơplah Môis mơ̆t boih lăm bơsŭn, anih krao apinh đei hơmơ̆l thoi jrăng jur gom 'bơ̆t 'măng bơsŭn, noh na Kră Yang pơma dơnuh hăm sư. 10Kơplah đĭ-đăng kon pơlei pơla 'bôh hơmơ̆l thoi jrăng dơ̆ng 'bơ̆t 'măng bơsŭn, đĭ-đăng kon pơlei dơ̆ng 'bơ̆t 'măng bơsŭn lu sư drap kơkuh. 11Kră Yang juăt pơma dơnuh hăm Môis tơm măt thoi noh nhen thoi minh 'nu bơngai pơma dơnuh hăm buăl juăt sư. Đơ̆ng noh Môis wơ̆t brŏk tơ anih kon pơlei, mă-lei Jôsuê bơngai tơdăm tơgŭm sư kon drŏ-nglo Nun, ưh kơ đei lĕch đơ̆ng bơsŭn krao apinh noh ôh.
Môis Păng Tơdrong ư-ang Kră Yang
12Môis khan kơ Kră Yang: Ih đei khan bơih kơ inh thoi âu: Ih athei chông ba lu kon pơlei pơla âu năm, mă-lei Ih ưh kơ ăn inh băt ôh bơngai bu Ih wơh năm hơdai păng inh. Ih khan: Inh băt kơ ih, băt anăn ih păng ih đei tơdrong mơnat boih 'bơ̆t anăp Inh! 13Thoi noh dang ei inh krao apinh Ih, tơdah inh đei bơih pŭn hiôk 'bơ̆t anăp Ih, lei inh apinh Ih tơ'bôh ăn kơ inh bĕ trong Ih, wă kơ inh băt kơnăl kơ Ih păng inh đei tơdrong mơnat 'bơ̆t anăp Ih, apinh Ih kư̆m 'blŏk kơ lu adrĕch adrung âu kon pơlei pơla Ih mơ̆n! 14Kră Yang khan: Inha gô năm hơdai hăm Ih păng Inh gô ăn kơ ih jơhngơ̆m hơđơ̆ng hiôk. 15Môis tơl khan: Mưh Ih ưh kơ đei năm hơdai hăm inh, lei 'nĕ ăn kơ lu nhôn weh đơ̆ng anih âu. 16Lei liơ đe gơh băt kơnăl kơ inh hăm lu kon pơlei pơla Ih? Đei tơdrong mơnat 'bơ̆t anăp Ih, Dah Ih ưh kơ năm hơdai hăm nhôn? Mưh Ih năm hơdai inh hăm kon pơlei pơla Ih âu phara kơ kon pơlei pơla nai oei lăm teh đak âu?
17Kră Yang khan kơ Môis: Inh gô pơm thoi ih đei apinh Inh noh, yua kơ ih đei tơdrong mơnat bơih 'bơ̆t anăp Inh, Inh băt kơ ih; păng băt kơ anăn ih. 18Môis khan: Inh apinh Ih, tơ'bôh bĕ kơ inh tơdrong ư-ang 'lơ̆ng rŏ Ih. 19Kră Yang khan: Inh gô pơdah tơdrong 'lơ̆ng Inh 'bơ̆t anăp ih, klaih kơ noh Inh gô roi anăn Inh Kră Yang 'bơ̆t anăp ih, Inh gô mơnat kơ bơngai bu mă Inh 'maih mơnat, hăm Inh gô pơm 'lơ̆ng kơ bơngai bu mă inh 'maih pơm 'lơ̆ng. 20Kră Yang Sư khan dơ̆ng: Mă-lei ih ưh kơ đei 'bôh muh măt Inh ôh; yua kơ kon bơngai ưh kơ gơh 'bôh Inh na mă oei arih. 21Kră Yang khan dơ̆ng đei minh pôm anih tơmo jê̆ Inh, ih gô dơ̆ng kơpal tơmo 'noh.
22Mưh tơdrong ư-ang 'lơ̆ng rŏ Inh năm brih, Inh gô dan ih tơ lăm trôm tơmo păng Inh gô pĕng ih hăm ti Inh, dĭng mă Inh năm hlôi 'mơ̆i. 23Inh gô dui lê̆ ti Inh đơ̆ng noh ih 'bôh gah rŏng Inh đĕch mă-lei ih ưh kơ gơh 'bôh muh măt Inh ôh.
Currently Selected:
Le 33: bdq
Highlight
Copy
Compare
Share
Want to have your highlights saved across all your devices? Sign up or sign in
©Bahnar Bible Association. All rights reserved.
