Le 24
24
Đei iŏk tơdrong pơgơ̆p
1Kră Yang khan kơ Môis thoi âu: Ih, Arôn, Nađap, Abihu păng tơpơh-jĭt 'nu lu kră wei-lăng bơngai Isơrael, iĕm athei tŏk tơ anih Kră Yang dơ̆ng tơ ataih na drap kơkuh. 2Hơdrô̆ Môis đĕch gơh năm jê̆ Kră Yang, mă-lei lu bơngai nai ưh kơ gơh năm jê̆ păng kon pơlei pơla kư̆m ưh kơ gơh tŏk hơdai ih.
3Môis năm roi hloi kơ kon pơlei pơla dôm nơ̆r Kră Yang tơtă păng khôi juăt, na lu sư tơl thoi âu: Lu nhôn gô pơm kiơ̆ dôm nơ̆r Kră Yang bơtho akhan. 4Môis chih iŏk đĭ dôm nơ̆r Kră Yang bơtho akhan pơgê đơ̆ng rŏng sư iung đơ̆ng hrôih, pơdơ̆ng minh pôm chơnang soi 'bơ̆t jơ̆ng kông păng pơtăm mơjĭt-'bar tŏ gơ̆ng pơtih kơ mơjĭt-'bar adrĕch adrung Isơrael. 5Sư wơh lu tơdăm Isơrael năm pơyơ̆r tơmam soi 'buh păng tơmam soi 'blŏk bơnê kơ Kră Yang hăm rơmo dăm. 6Môis iŏk minh puăt pham mong lăm kơthao păng minh puăt nai dơ̆ng tuh tơ kơpal chơnang soi, 7klaih kơ noh sư iŏk minh Sơ̆p hla bơar tơdrong pơgơ̆p Kră Yang 'Bok Kei-Dei, đŏk ăn kơ kon pơlei pơla mơ̆ng, na kon pơlei pơla khan thoi âu, lu nhôn gô mơ̆ng păng pơm kiơ̆ nơ̆r Kră Yang bơtho tơ'bôh. 8Na Môis iŏk pham săi tơ akâu kon pơlei pơla na khan: 'Nâu boih pham pơgơ̆p hăm Kră Yang pơsĭt boih hăm lu iĕm kiơ̆ thoi nơ̆r pơkă pơkăm.
9Klaih kơ noh Môis Arôn, Nađap, Abihu hơdai păng tơpơh-jĭt 'nu kră wei-lăng bơngai Isơrael đĭ-đăng lu sư tŏk tơ kông. 10Tơmang 'bôh Kră Yang 'Bok Kei-Dei Isơrael tơ ala jơ̆ng Sư đei minh pôm tơmam thoi trong lơ̆k tơmo gĭt rang, nhen thoi hơdah plĕnh. 11Kră Yang ưh kơ đei hiŏng ti pơrăm lu kră wei-lăng bơngai Isơrael; lu sư 'bôh ră mă-lei oei sŏng sa hiôk đĕch.
12Kră Yang khan kơ Môis: Tŏk bĕ tơ Inh tơ kơpal kông păng gô tơ noh; Inh gô ăn kơ ih tơmo lat, chih răk khôi juăt păng nơ̆r tơtă wă bơtho kon pơlei pơla, 13Môis iung hơdai hăm Jôsuê, bơngai jang kơ sư, na Môis năm tŏk hloi tơ kơpal kông Kră Yang 'Bok Kei-Dei. 14Na sư khan hloi kơ lu kră wei-lăng: Athei gô tơ âu dĭng truh nhôn hơlơ̆k tơ lu iĕm dơ̆ng. 'Nâu Arôn păng Hur oei hơdai hăm lu iĕm, bu đei tơdrong kiơ athei apinh bre sư 'noh.
15Thoi noh, Môis tŏk tơ kơpal kông, hơmơ̆l gom lê̆ kông. 16Tơdrong rang hơdah 'lơ̆ng Kră Yang tơ kơpal kông Sinai; lăm tơdrâu năr hơmơ̆l gom kông, truh năr mă tơpơh Kră Yang đơ̆ng lăm hơmơ̆l krao Môis. 17Tơdrong rang hơdah 'lơ̆ng Kră Yang tơ kơpal wĕch kông 'bơ̆t anăp lu bơngai Isơrael, thoi hơdah ŭnh sa kơdrơ̆ng.
18Môis mơ̆t tơ tŏk-bŏk hơmơ̆l, tŏk tơ kơpal kông, oei tơ noh lăm puăn-jĭt năr păng puăn-jĭt măng.
Currently Selected:
Le 24: bdq
Highlight
Copy
Compare
Share
Want to have your highlights saved across all your devices? Sign up or sign in
©Bahnar Bible Association. All rights reserved.
