ᓭᐣᐟ ᓬᐅᐠ 2
KKMS

ᓭᐣᐟ ᓬᐅᐠ 2

2
1ᐁᑯᓯ ᑭ ᐅᑎᐦᒋᐸᔨᐤ ᐁᑯᐢᐱ ᐁ ᑲᑭᓯᑳᐠ ᑭ ᓯᐯᐧᐸᔨᐤ ᐅᔭᓱᐁᐧᐃᐧᐣ ᓯᓴᕒ ᐋᑲᐢᑕᐢ ᐅᐦᒋ, ᑲᐦᑭᔭᐤ ᒥᓯᐁᐧᐢᑲᒥᐠ ᑭᑕ ᒪᓯᓇᐃᑳᓱᒋᐠ. 2ᐁᐊᐧᑯ ᓂᐢᑕᒼ ᒪᓯᓇᐃᑳᓱᐃᐧᐣ ᐁ ᑭ ᑐᒋᑳᑌᐠ ᒣᑳᐧᐨ ᑲᐧᐩᕒᐃᓂᔭᐢ ᐁ ᑎᐯᔨᑕᕽ ᓯᕒᐃᐊ. 3ᐁᑯᓯ ᑲᐦᑭᔭᐤ ᐊᐃᐧᔭᐠ ᑭ ᓇᑕᐃᐧ ᒪᓯᓇᐃᑳᓱ, ᑲᐦᑭᔭᐤ ᐊᐃᐧᔭᐠ ᑎᐱᔭᐁᐧ ᐅᐟ ᐅᑌᓈᕽ. 4ᐁᑯᓯ ᒍᓯᑊ ᐃᐧᐢᑕ ᑭ ᓯᐯᐧᑌᐤ ᑲᓬᐊᓬᐃᕽ ᐅᐦᒋ ᐅᑌᓈᕽ ᓇᓴᕒᐃᑎᕽ ᐅᐦᒋ, ᒍᑎᐊᐃᕽ ᐁ ᐃᑐᐦᑌᐟ, ᐅᐟ ᐅᑌᓇᔨᕽ ᑌᐱᑕ, ᐊᓂᒪ ᐯᐟᓬᐃᐃᒼ ᑳ ᐃᑕᒥᕽ, ᑌᐱᐟ ᒋᑫᒫ ᐅ ᐋᐧᐢᑳᐦᐃᑲᓂᔨᕽ ᒥᓇ ᐅᐟ ᐊᐋᐧᓯᒥᓯᔨᕽ ᐁ ᑭ ᐅᐦᒋᐟ; 5ᑭᑕ ᒪᓯᓇᐃᑳᓱᐟ ᑭᑭ ᒣᕒᐃᐊᐧ ᑳ ᑭ ᐊᓱᑕᒪᐟ ᑭᑕ ᐃᐧᐃᐧᐟ ᐋᓴᐩ ᐁ ᒥᓯᑭᑎᐟ ᐁ ᑭᑭᐢᑲᐋᐧᐟ ᐊᐋᐧᓯᓴ. 6ᐁᑯᓯ ᑭ ᐊᔨᑭᐣ, ᒣᑳᐧᐨ ᐁᑯᑕ ᐁ ᐊᔮᒋᐠ, ᑭ ᑎᐱᐸᔨᔨᐊᐧ ᑭᓯᑳᐊᐧ ᐃᑕ ᐊᓂᒪ ᑭᑕ ᐋᐧᐸᒫᐊᐧᓱᐟ. 7ᑭ ᓂᐦᑖᐃᐧᑭᐦᐁᐤ ᒫᑲ ᐅ ᓂᐢᑕᒧᓴᓇ ᐁᑯᓯ ᐁ ᑭ ᐁᐧᐁᐧᑭᓈᐟ ᑕᑯᐱᑖᐊᓱᐊᔮᓂᕽ, ᐱᓯᐢᑭᐃᐧᔮᑲᓂᕽ ᒫᑲ ᐁ ᑭ ᐱᒥᓯᒫᐟ, ᒋᑫᒫ ᐁᑳ ᐁ ᑭ ᑕᐋᐧᔨᐠ ᒥᒋᓱᐃᐧᑲᒥᑯᕽ.
8ᐁᑯᑕ ᒫᑲ ᐁ ᑭ ᐊᔮᒋᐠ ᐅᑲᓇᐃᐧᒫᔭᑎᐦᑫᐧᐊᐧᐠ ᐊᐧᔭᐃᐧᑎᒥᕽ ᐁ ᐊᔮᒋᐠ, ᐁ ᓂᐹ ᑲᓇᐁᐧᔨᒫᒋᐠ ᐅ ᒫᔭᑎᐦᑯᒥᐊᐧᐊᐧ. 9ᐅᑭᓯᑯᒪ ᒫᑲ ᑳ ᑎᐯᔨᐦᒋᑫᐟ ᑭ ᐃᐧᒋᑲᐸᐃᐧᐢᑕᑲᐧᐠ, ᐅ ᒪᓂᑐᐋᐧᐢᑌᐃᐧᓂᔨᐤ ᑳ ᑎᐯᔨᐦᒋᑫᔨᐟ ᑭ ᐊᐧᓭᐢᑲᒪᑲᐧᐠ ᐁᑯᓯ ᓇᐢᐱᐨ ᑭ ᓭᑭᓯᐊᐧᐠ. 10ᐁᑯᓯ ᐅᑭᓯᑯᐊᐧ ᑭ ᐃᑎᑲᐧᐠ, ᐁᑳᐃᐧᔭ ᓭᑭᓯᐠ, ᒋᑫᒫ ᒋᐢᐟ ᑭ ᐯᑕᒪᑎᓈᐋᐧᐤ ᐁᓯ ᒥᔮᐧᑐᑖᑲᐧᕽ ᑭᐦᒋ ᒥᔭᐋᐧᑕᒧᐃᐧᐣ ᐊᓂᒪ ᑫ ᐊᔮᒋᐠ ᑲᐦᑭᔭᐤ ᐊᔨᓯᔨᓂᐊᐧᐠ: 11ᒋᑫᒫ ᐊᓄᐦᐨ ᑳ ᑭᓯᑳᐠ ᑭᔭᐋᐧᐤ ᐅᐦᒋ ᓂᐦᑖᐃᐧᑭᐤ ᐅᐟ ᐅᑌᓈᕽ ᑌᐱᐟ, ᐅᐱᒪᒋᐃᐁᐧᐤ, ᐁᐊᐧᑯ ᙭ ᑳ ᑎᐯᔨᐦᒋᑫᐟ. 12ᐅᒪ ᒫᑲ ᑭ ᑲ ᐅᑭᐢᑭᓇᐊᐧᒋᒋᑲᓂᓈᐋᐧᐤ, ᑭ ᑲ ᒥᐢᑲᐋᐧᐋᐧᐤ ᐅᐢᑲᐋᐧᓯᐢ ᐁ ᐁᐧᐁᐧᑭᓂᐟ ᑕᑯᐱᑖᐊᐧᓱᐊᔮᓂᕽ, ᒥᓇ ᐁ ᐱᒥᓯᕽ ᐃᑕ ᐱᓯᐢᑭᐊᐧᐠ ᐁ ᐊᓴᒥᐦᒋᐠ. 13ᐁᑯᓯ ᓯᓯᑯᐨ ᑭ ᐃᐧᒉᐁᐧᐊᐧᐠ ᐅᑭᓯᑯᐊᐧ ᐁ ᒥᐦᒉᑎᒋᐠ ᑭᓯᑯᕽ ᐁ ᐅᐦᒋᒋᐠ ᐁ ᒪᒥᒋᒫᒋᐠ ᑭᓭᒪᓂᑐᐊᐧ ᐅᒥᓯ ᐁ ᐃᑌᐧᒋᐠ,
14ᑭᐢᑌᔨᑖᑯᓯᐃᐧᐣ ᑭᑕ ᐊᔮᐤ ᑭᓭᒪᓂᑐ ᒫᐊᐧᒋ ᐃᐢᐱᒥᕽ ᑳ ᐊᔭᐟ, ᐊᐢᑭᕽ ᐯᔭᑕᑫᔨᒧᐃᐧᐣ ᐊᔮᐊᐧᐠ ᐊᔨᓯᔨᓂᐊᐧᐠ ᐊᓂᐦᐃ ᑲ ᒥᔪᔭᐁᐧᐦᐃᑯᐟ.
15ᐁᑯᓯ ᑭ ᐊᑎ ᐃᐢᐸᔨᐤ ᐃᐢᐱ ᐅᑭᓯᑯᐊᐧ ᐁ ᑭ ᓇᑲᑎᑯᒋᐠ ᑭᐦᒋ ᑭᓯᑯᕽ ᐃᓯ ᐅᑲᓇᐃᐧᒫᔭᑎᐦᑫᐧᐊᐧᐠ ᑭ ᐃᑎᑐᐊᐧᐠ, ᐁᑲᐧ ᐯᐟᓬᐃᐊᒥᕽ ᐃᑐᑌᑖᐠ ᒥᓇ ᐋᐧᐸᐦᑕᑖᐠ ᐅᒪ ᑳ ᐃᑭᕽ, ᑳ ᑎᐯᔨᐦᒋᑫᐟ ᑳ ᑭ ᑭᐢᑫᔨᑕᒧᐃᑯᔭᕽ 16ᐁᑯᓯ ᑭ ᐯ ᐃᑐᐦᑌᐊᐧᐠ ᐁ ᑲᑫᐧᔮᐅᒋᐠ, ᑭ ᒥᐢᑲᐁᐧᐊᐧᐠ ᒫᑲ ᒣᕒᐃᐊᐧ ᒥᓇ ᒍᓯᐸ, ᐊᓯᒋ ᐊᓂᐦᐃ ᐅᐢᑲᐋᐧᓯᓴ ᐁ ᐱᒥᓯᓂᔨᐟ ᐃᑕ ᐱᓯᐢᑭᐊᐧ ᑳ ᒥᒋᓱᔨᐟ. 17ᒥᓇ ᐃᐢᐱ ᑳ ᐋᐧᐸᐦᑕᐦᑭᐠ ᑭ ᑭᐢᑫᔨᑕᒧᐃᐁᐧᐊᐧᐠ ᐊᓂᒪ ᐱᑭᐢᑫᐧᐃᐧᐣ ᑳ ᑭ ᐃᓯ ᐃᐧᐦᑕᒫᒋᐠ ᐅᐦᐃ ᐅᐦᒋ ᐊᐋᐧᓯᓴ. 18ᑲᐦᑭᔭᐤ ᒫᑲ ᑳ ᑭ ᐯᐦᑕᐦᑭᐠ ᑭ ᒫᒪᐢᑳᑕᒪᐧᐠ ᐊᓂᐦᐃ ᑫᑲᐧᔭ ᑳ ᑭ ᐃᐧᐦᑕᒪᑯᒋᐠ ᐅᑲᓇᐃᐧ ᒪᔭᑎᑫᐧᐊᐧ. 19ᒣᕒᐃ ᒫᑲ ᑭ ᑲᓇᐁᐧᔨᑕᒼ ᑲᐦᑭᔭᐤ ᐅᐦᐃ ᐊᔭᒥᐃᐧᓇ, ᐁ ᒪᒥᑐᓀᔨᑕᕽ ᐅᑌᐦᐃᕽ. 20ᐁᑯᓯ ᐅᑲᓇᐃᐧᒫᔭᑎᐦᑫᐧᐊᐧᐠ ᑭ ᑭᐁᐧᐊᐧᐠ ᐁ ᒪᒥᒋᒫᒋᐠ ᒥᓇ ᐁ ᓂᑲᒧᐢᑕᐋᐧᒋᐠ ᑭᓭᒪᓂᑐᐊᐧ, ᑲᐦᑭᔭᐤ ᐊᓂᐦᐃ ᐅᐦᒋ ᑳ ᑭ ᐯᐦᑕᐦᑭᐠ ᒥᓇ ᑳ ᑭ ᐋᐧᐸᐦᑕᐦᑭᐠ, ᒣᐧᐦᒋ ᑳ ᑭ ᐃᓯ ᐃᐧᐦᑕᒪᒋᐠ.
21 # ᓬᐃᐱᑎᑲᐢ 12:3; ᓬᐅᐠ 1:31 ᐁᑯᓯ ᐃᐢᐱ ᐊᔨᓈᓀᐤ ᑭᓯᑳᐊᐧ ᐁ ᑭ ᑎᐱᐸᔨᑭ, ᑭᑕ ᑭᐢᑭᓇᐊᐧᒋᓴᐊᐧᑎᐟ, ᒋᓴᐢ ᑭ ᐃᓯᔨᐦᑳᑕᐤ, ᐊᓂᒪ ᑳ ᑭ ᐃᓯᔨᐦᑳᑎᑯᐟ ᐅᑭᓯᑯᐊᐧ ᐁ ᒪᐧᔦ ᑭᑭᐢᑳᑯᐟ ᐅᑳᐃᐧᔭ.
22ᐁᑯᓯ ᐃᐢᐱ ᐅ ᐯᑭᐃᓱᐃᐧ ᑭᓯᑲᒪ ᑳ ᑎᐱᐸᔨᓂᔨᑭ ᑳ ᑭ ᐃᑕᓱᐁᐧᐟ ᒧᓯᐢ, ᒉᕒᐅᓴᓬᐊᒥᕽ ᑭ ᐯ ᐃᑐᐦᑕᐦᐁᐊᐧᐠ ᑭᑕ ᐸᑭᑎᓇᒪᐋᐧᒋᐠ ᑳ ᑎᐯᔨᐦᒋᑫᔨᐟ. 23#ᐁᐠᓴᑕᐢ 13:2,12ᑳ ᐃᑕᓯᓇᐦᐃᑳᑌᔨᐠ ᐅᔭᓱᐁᐧᐃᐧᓂᕽ ᑳ ᑎᐯᔨᐦᒋᑫᐟ, ᑕᐦᑐ ᓇᐯᐊᔭ ᓂᐢᑕᒼ ᑳ ᓂᐦᑖᐃᐧᑭᐟ ᑭᑕ ᑲᓇᑌᔨᑕᒪᐋᐧᐤ ᑳ ᑎᐯᔨᐦᒋᑫᐟ, 24#ᓬᐃᐱᑎᑲᐢ 12:6-8ᒥᓇ ᑭᑕ ᐸᑭᑎᓇᒥᕽ ᐸᑭᑎᓇᓱᐃᐧᐣ ᑳ ᑭ ᐃᓯ ᐃᑌᐧᕽ ᐅᔭᓱᐁᐧᐃᐧᓂᕽ ᑳ ᑎᐯᔨᐦᒋᑫᐟ, ᐯᔭᑫᐧᐊᐧᐣ ᐅᒥᒥᐊᐧᐠ, ᐊᐁᐧᑳ ᓂᓱ ᐅᒥᒥᓯᓴᐠ.
25ᒋᐢᐟ ᒫᑲ ᑭ ᐊᔮᐤ ᐁᑯᑕ ᐯᔭᐠ ᐊᔨᓯᔨᓂᐤ ᒉᕒᐅᓴᓬᐊᒥᕽ ᓯᒥᐊᐣ ᐁ ᐃᓯᔨᐦᑳᓱᐟ ᐁᑯᓯ ᐊᐊᐧ ᓈᐯᐤ ᑭ ᑲᐧᔭᐢᑳᐧᑎᓯᐤ ᒥᓇ ᑭ ᐊᔭᒥᐁᐊᐧᑎᓯᐤ ᐁ ᑭ ᐯᐦᑖᐟ ᐅ ᒥᔪᑌᐁᐃᑯᐃᐧᓂᔨᐤ ᐃᐢᕒᐁᐃᓬᐊ, ᑲᓇᒋ ᐊᐦᒑᐦᑲᐧ ᒫᑲ ᑭ ᑭᑭᐢᑳᐠ. 26ᐅ ᑭ ᑭᐢᑫᔨᑕᒧᐃᑯ ᒫᑲ ᑳ ᑲᓈᑎᓯᐟ ᐊᒑᕽ ᐁᑳ ᓂᐳᐃᐧᐣ ᑭᑕ ᐋᐧᐸᐦᑕᕽ ᒪᐧᔦᐢ ᑭ ᐋᐧᐸᒫᐟ ᑳ ᑎᐯᔨᐦᒋᑫᔨᐟ ᐅ ᙭ᐃᒥᔨᐊᐧ. 27ᐊᒑᐦᑯᕽ ᒫᑲ ᑭ ᐯ ᐅᐦᒋ ᐱᐦᑐᑫᐤ ᑭᐦᒋ ᐊᔭᒥᐦᐁᐃᐧᑲᒥᑯᕽ: ᐃᐢᐱ ᒫᑲ ᐅᓂᑭᐃᑯᔨᐊᐧ ᐁ ᑭ ᐱᑐᑲᐊᔨᐟ ᐊᐊᐧᓯᓴ ᒋᓴᓴ ᑭᑕ ᑐᑕᒪᐋᐧᔨᐟ ᐊᓂᒪ ᑳ ᐃᑕᐢᑌᐠ ᐅᔭᓱᐁᐧᐃᐧᓂᕽ 28ᑭ ᐅᑎᓀᐤ ᐅᐢᐱᑐᓂᕽ, ᐁ ᑭ ᓇᓇᐢᑯᒫᐟ ᑭᓭᒪᓂᑐᐊᐧ, ᒥᓇ ᐁ ᑭ ᐃᑌᐧᐟ.
29ᐁᑲᐧ ᑭᔮᒼ, ᑳ ᑎᐯᔨᐦᒋᑫᔭᐣ, ᐸᐦᑭᐦᑎᐣ ᑭᐟ ᐊᑐᐢᑫᔮᑲᐣ ᑭᑕ ᓯᐯᐧᑌᐟ, ᐯᔭᑕᑫᔨᒧᐃᐧᓂᕽ, ᑳ ᑭ ᐃᓯ ᐃᐧᐦᑕᒪᐃᐧᔭᐣ;
30ᒋᑫᒫ ᓂᐢᑭᓯᑲᐧ ᑭ ᐋᐧᐸᐦᑕᒧᒪᑲᓇᐧ ᑭ ᐱᒫᒋᐦᐃᐁᐧᐃᐧᐣ,
31ᐊᓂᒪ ᑳ ᑭ ᑲᐧᔮᒋᐦᑕᒪᐊᐧᒋᐠ ᑲᐦᑭᔭᐤ ᐊᔨᓯᔨᓂᐊᐧᐠ;
32 # ᐊᐩᓵᔭ 42:6; 49:6; 52:10 ᐋᐧᐢᑌᐤ ᑭᑕ ᐊᐧᐢᑌᓇᒫᑯᒋᐠ ᒉᐣᑕᐃᓬᐊᐠ ᒥᓇ ᐅ ᒪᒪᐦᑖᑯᓯᐃᐧᓂᐋᐧᐤ ᑭᐟ ᐊᔨᓯᔨᓂᒪᐠ ᐃᐢᕒᐁᐃᓬ.
33ᐁᑯᓯ ᐅᑖᐃᐧᔭ ᒥᓇ ᐅᑳᐃᐧᔭ ᑭ ᒪᒪᐢᑳᑕᒥᔨᐊᐧ ᐊᓂᐦᐃ ᑫᑲᐧᔭ ᑳ ᑭ ᑕᓯᑕᒧᐟ ᐃᐧᔭ ᐅᐦᒋ. 34ᐁᑯᓯ ᓯᒥᐊᐣ ᑭ ᒥᔪ ᑭᐢᐋᐧᑌᐤ ᒥᓇ ᑭ ᐃᑌᐤ ᒣᕒᐃᐊᐧ ᐅᑲᐃᐧᔨᐊᐧ, ᒋᐢᐟ ᐊᐊᐧ ᐊᐊᐧᓯᐢ ᐃᑕᔭᐤ ᑭᑕ ᐸᐦᑭᓯᐦᑭᐠ ᒥᓇ ᑭᑕ ᐊᐧᓂᐢᑳᒋᐠ ᒥᐦᒉᐟ ᐃᐢᕒᐁᐃᓬᐃᕽ ᒥᓇ ᑭᐢᑭᓇᐊᐧᒋᒋᑫᐃᐧᐣ, ᑳ ᐊᑕᐁᐧᔨᑕᒧᐃᐧ ᑭᐢᐊᐧᑕᒥᕽ; 35ᐁᐦᐋ, ᐃᓴᐁᐧᐢᐠ ᑭ ᑲ ᓵᐳᐢᑕᐅᑯᐣ ᑭᔭ ᑭᐟ ᐊᒑᐦᑯᕽ, ᒪᒥᑐᓀᔨᒋᑲᓇ ᒥᐦᒉᐟ ᒥᑌᐃᕽ ᑭᑕ ᐅᐦᒋ ᑭᐢᑫᔨᑕᑯᑕᕽ.
36ᐁᑯᑕ ᒫᑲ ᑭ ᐊᔮᐤ ᐯᔭᐠ ᐋᓇ ᐁ ᐃᓯᔨᐦᑳᓱᐟ ᐅᑭᐢᑭᐁᐧᐦᐃᑫᐃᐧᐢᑫᐧᐤ, ᐅᑖᓂᓴ ᐸᓄᐃᓬ ᐋᐢᐊᕒ ᐁ ᐅᐦᑕᐢᑲᓀᓯᐟ (ᑭ ᑭᐦᒋ ᑲᔭᑌᔮᑎᓯᐤ ᒥᓇ ᑌᐸᑯᑊ ᐊᐢᑭ ᐁ ᑭ ᐃᐧᑭᒪᐟ ᐅᓇᐯᒪ ᐁ ᐅᐢᑭᓂᑭᐢᑫᐧᐃᐧᐟ ᐅᐦᒋ, 37ᐁ ᑭ ᓯᑳᐃᐧᐢᑫᐧᐃᐧᐟ ᒫᑲ ᐁᑲᐧ ᐊᔨᓈᓀᒥᑕᓇᐤ ᓀᐅᓴᑊ ᐊᐢᑭ) ᐁᑳ ᐁ ᓇᑲᑕᕽ ᑭᐦᒋ ᐊᔭᒥᐦᐁᐃᐧᑲᒥᐠ, ᐁ ᐊᔭᒥᐦᐋᐟ, ᐁ ᐃᔨᐊᐧᓂᓯᐃᓱᐟ, ᒥᓇ ᐁ ᒪᐃᐧᒧᐢᒋᑫᐟ ᐁ ᑎᐱᐢᑳᔨᐠ ᒥᓇ ᐁ ᑭᓯᑳᔨᐠ. 38ᐃᐧᔭ ᒫᑲ ᐁ ᐯ ᐱᑐᑫᐟ ᐁᑯᐢᐱ ᒣᐧᐦᒋ, ᑭ ᓇᓈᐢᑯᒣᐤ ᑭᓭᒪᓂᑐᐊᐧ, ᐁ ᐋᔨᒧᑕᒪᐋᐧᐟ ᑲᐦᑭᔭᐤ ᐊᓂᐦᐃ ᑳ ᐊᓴᐊᐧᐸᑕᒥᔨᐟ ᑭᑕ ᐃᓯ ᐱᒪᒋᑖᐃᐧᐦᐟ ᒉᕒᐅᓴᓬᐊᒼ. 39#ᒫᐟᔪ 2:23ᐃᐢᐱ ᒫᑲ ᑳ ᑭᓯᑖᒋᐠ ᑲᐦᑭᔭᐤ ᑫᑲᐧᔭ ᑳ ᑭ ᐃᑕᐢᑌᔨᐠ ᐅᔭᓱᐁᐧᐃᐧᓂᕽ ᑳ ᑎᐯᔨᐦᒋᑫᔨᐟ, ᑲᓬᐊᓬᐃᕽ ᑭ ᐃᓯ ᑭᐁᐧᐊᐧᐠ, ᑎᐱᔭᐁᐧ ᐅᐟ ᐅᑌᓇᐃᐧᐊᐧᕽ ᓇᓴᕒᐃᑎᕽ.
40ᐁᑯᓯ ᐊᐋᐧᓯᐢ ᑭ ᐅᐱᑭᐤ, ᒥᓇ ᑭ ᐊᑎ ᒪᐢᑲᐃᐧᓯᐤ, ᐁ ᑭ ᓴᑲᐢᑭᓀᐢᑲᑯᐟ ᐃᔨᓂᓯᐃᐧᐣ: ᒥᓇ ᐅ ᑭᓭᐋᐧᑐᑖᑫᐃᐧᓂᔨᐤ ᑭᓭᒪᓂᑐᐊᐧ ᑭ ᐃᐧᒉᐃᐧᐠ.
41 # ᐁᐠᓴᑕᐢ 12:1-27; ᑎᔪᑕᕒᐊᓇᒥ 16:1-8 ᐅᓂᑭᐃᑲᐧ ᒫᑲ ᑭ ᐃᑐᐦᑌᔨᐊᐧ ᑕᐦᑐ ᐊᐢᑭ ᒉᕒᐅᓴᓬᐊᒥᕽ ᒪᔮᐢᑲᑖᑐ ᐃᐧᐦᑯᐦᑐᐃᐧᓂᕽ. 42ᐁᑯᓯ ᐃᐢᐱ ᒥᑖᑕᐦᐟ ᓂᓱᓵᑊ ᐁ ᑕᐦᑐ ᐱᐳᓀᐧᐟ ᑭ ᐅᐦᑐᐦᑌᐊᐧᐠ ᐃᐧᐦᑯᐦᑐᐃᐧᓂᕽ ᐁ ᑭ ᒫᓇ ᐃᓯᐦᒋᑫᕽ. 43ᐁᑯᓯ ᐃᐢᐱ ᑳ ᑎᐱᐸᔨᑕᒋᐠ ᑭᓯᑳᐊᐧ ᒣᑳᐧᐨ ᐁ ᐊᑎ ᑭᐁᐧᒋᐠ ᓇᐯᓯᐢ ᒋᓴᐢ ᐅᑕᓇᕽ ᑭ ᐊᔮᐤ ᒉᕒᐅᓴᓬᐊᒥᕽ; ᐁᑯᓯ ᓇᒪᐃᐧᔭ ᐅᓂᑭᐃᑲᐧ ᑭ ᑭᐢᑫᔨᑕᒥᔨᐊᐧ; 44ᒫᑲ ᐁ ᐊᔭᔨᐟ ᐃᑕ ᑳ ᒫᒪᐁᐧᔭᑎᐃᐧᐟ ᐁ ᐃᑌᔨᒫᒋᐠ, ᐯᔭᐠ ᑭᓯᑳᐤ ᑭ ᐱᒧᐦᑌᐊᐧᐠ ᐁᑯᓯ ᑭ ᓇᓈᑐᓇᐁᐧᐊᐧᐠ ᒣᑳᐧᐨ ᐃᑕ ᐁ ᐊᔭᔨᐟ ᐅ ᐊᐧᑯᒫᑲᓂᐋᐧᐊᐧ ᒥᓇ ᐅ ᑐᑌᒥᐊᐧᐊᐧ; 45ᐁᑯᓯ ᐃᐢᐱ ᐁᑳ ᐁ ᒥᐢᑲᐊᐧᒋᐠ, ᑭ ᑭᐁᐧᐊᐧᐠ ᒉᕒᐅᓴᓬᐊᒥᕽ ᐃᓯ ᐁ ᓇᓈᑐᓇᐋᐧᒋᐠ.
46ᐁᑯᓯ ᑭ ᐊᑎ ᐃᐢᐸᔨᐤ ᒫᑲ ᐁ ᓂᐢᑐ ᑭᓯᑳᔨᐠ ᐃᔨᑯᕽ ᐁ ᑭ ᒥᐢᑲᐋᐧᒋᐠ ᑭᐦᒋ ᐊᔭᒥᐦᐁᐃᐧᑲᒥᑯᕽ, ᐁ ᐊᐱᔨᐟ ᒣᑳᐧᐨ ᐃᑕ ᐁ ᐊᔮᔨᐟ ᐅᑭᐢᑭᓄᐦᐊᒫᑫᐃᐧᔨᓂᐊᐧ ᐁ ᓇᑐᑕᐋᐧᐟ, ᒥᓇ ᐁ ᑲᑫᐧᒋᒪᐟ ᑲᑫᐧᒋᑫᒧᐃᐧᓇ: 47ᑲᐦᑭᔭᐤ ᒫᑲ ᑕᐦᑐ ᑳ ᐯᐦᑖᑯᐟ, ᑭ ᒪᒪᐢᑳᑕᒪᐧᐠ ᐅ ᓂᓯᑐᐦᑕᒧᐃᐧᓂᔨᐤ ᒥᓇ ᐊᓂᒪ ᐁ ᐃᓯ ᓇᐢᑫᐧᐊᐧᓯᐃᐁᐧᔨᐟ. 48ᐁᑯᓯ ᐃᐢᐱ ᐁ ᐋᐧᐸᒪᒋᐠ ᑭ ᒪᒪᐢᑲᑌᔨᑕᒪᐧᐠ, ᐁᑯᓯ ᐅᑳᐃᐧᔭ ᑭ ᐃᑎᐠ, ᓂᑯᓯᐢ, ᑕᓀᐦᑭ ᑳ ᐅᐦᒋ ᑐᑕᐃᐧᔮᕽ! ᒋᐢᐟ, ᑯᑕᐃᐧ ᒥᓇ ᓂᔭ ᑭ ᑭ ᓇᑐᓈᑎᓈᐣ ᐁ ᑭᓯᓈᑌᔨᑕᒫᕽ. 49ᐁᑯᓯ ᑭ ᐃᑌᐤ, ᑖᓀᑭ ᑳ ᓇᓈᑐᓇᐃᐧᔦᐠ? ᓇᒪ ᒋ ᑭ ᑭᐢᑫᔨᑌᓈᐋᐧᐤ ᐁ ᐃᑕᐢᑌᐠ ᓄᑖᐃᐧ ᐅ ᐋᐧᐢᑳᐦᐃᑲᓂᕽ ᑭᑕ ᐊᔮᔮᐣ? 50ᒫᑲ ᓇᒪᐃᐧᔭ ᑭ ᓂᓯᑐᐦᑕᒪᐧᐠ ᐊᓂᒪ ᑳ ᑭ ᐃᓯ ᓇᐢᑫᐧᐊᐧᓯᒥᑯᒋᐠ. 51ᑭ ᑭᐁᐧ ᐃᐧᒉᐁᐧᐤ ᒫᑲ, ᐁᑯᓯ ᐁ ᑭ ᐯ ᐃᑐᐦᑌᒋᐠ ᓈᓴᕒᐃᑎᕽ; ᐁᑯᓯ ᐁ ᑭ ᓇᓇᐃᑕᐋᐧᐟ: ᐅᑳᐃᐧᔭ ᒫᑲ ᑭ ᑲᓇᐁᐧᔨᑕᒥᔨᐊᐧ ᑲᐦᑭᔭᐤ ᐅᐦᐃ ᐱᑭᐢᑫᐧᐃᐧᓇ ᐅᑌᐦᐃᕽ.
52 # 1 ᓵᒼᔪᐃᓬ 2:26; ᑲᑫᐦᑖᐁᐧᐃᐧᓇ 3:4 ᐁᑯᓯ ᒋᓴᐢ ᑭ ᐊᑎ ᔭᑯᑌᐤ ᐃᔨᓂᓯᐃᐧᓂᕽ ᒥᓇ ᐁ ᑭ ᐊᑎ ᑭᓄᑳᐸᐃᐧᐟ, ᐁ ᑭ ᒥᔪᑳᓇᐊᐧᐸᒥᑯᐟ ᑭᓭᒪᓂᑐᐊᐧ ᒥᓇ ᐊᔨᓯᓂᐊᐧ.

This Bible text is a corrected edition of the 1908 Western Cree Bible; it is in the public domain.


Learn More About ᑲᓈᒋ ᑭᐦᒋ ᒪᓯᓈᐦᐃᑲᐣ

Encouraging and challenging you to seek intimacy with God every day.


YouVersion uses cookies to personalize your experience. By using our website, you accept our use of cookies as described in our Privacy Policy.