Паччагьлугъар-1 23

Давудди Кеила шагьур уьбхюру

1Давуддиз филистимар Кеила шагьриин алархьнайиваликан ва раццарихъан рузи тӀараш апӀурайиваликан хабар дебккнийи. 2Давудди РАББИЙИХЬАН гьерху:

– Узу душну ккундун, узу филистимар дагъитмиш апӀидин?

РАББИЙИ Давуддиз жаваб туву:

– Гъарах, уву филистимар дагъитмиш ва Кеила къутармиш апӀидива.

3Амма Давуддин адмийири дугъаз наразивал улупу:

– Гьамушваъ, Ягьудайиъра кмиди, учуз гучӀурчуз. Эгер ухьу Кеилайиина филистимарин кьушмиз къаршуди гъушиш, фици хьибдийкӀан?

4Думуган Давудди цӀийикӀултӀан РАББИЙИХЬАН гьерху, ва Дугъу жаваб туву:

– Ав, Кеилайиз кудучӀв: Узу филистимар яв хилариз тувдиза.

5Давуд чан адмийирихъди Кеилайихъна гъушу ва филистимариин алархьу. Дугъу дурарин лижар чпиз хъау, филистимар дагъитмиш ва Кеилайин агьалйир къутармиш гъапӀу.

6Давуддихьна Кеилайиз гьергруган, Авиатари, Ахимелехдин бали, чахьди улгьани#23:6 Улгьани: Заанурин гъуллугъчийи алабхьрударикан саб. Заанурин аьхюну гъуллугъчийин улгьанийиъ кьюб гирами гъван ади гъахьну. Давуддиз, РАББИЙИН амур аьгъю апӀбан бадали, думу гъванарихъди тупут гьипуз ккундийи. гъабхнийи.

7Давуд Кеилайиз гъюваликан Саулиз хабар дебккнийи, ва Саули гъапнийи:

– Заанури думу йиз хилариз тувну: урнар али ва ачрар алахьнайи шагьриъ учӀвбиинди дугъу чав чаз рякъяр хъяркъну.

8Саули халкьдиз, Кеилайиина гъягъбан ва Давудна дугъан адмийир кьялаъ аъбан бадали, дявдиз дих гъапӀу.

9Саули пис ляхин апӀуз кьаст дапӀнайиваликан аьгъю дубхьну, Давудди Заанурин гъуллугъчи Авиатариз, РАББИЙИН амур аьгъю апӀбан бадали, улгьани хуз амур гъапӀу. 10Давудди гъапи:

– РАББИ, Израилин Заанур! Яв лукӀраз Саулиз Кеилайиина, узхъантина шагьур рабгъбан бадали, гъюз ккуниваликан гъеебхьну. 11Узуз, Саул гъюру кӀури, гъеебхьунзуз. Думу дугъридан гъидин? Кеилайин агьалйири узу дугъан хилариз тувуйкӀан? РАББИ, Израилин Заанур, яв лукӀраз жаваб тув.

РАББИЙИ жаваб туву:

– Гъиди.

12Давудди гьерху:

– Кеилайин агьалйири узу ва йиз адмийир Саулин хилариз тувдин?

РАББИЙИ гъапи:

– Тувди.

13Думуган Давуд ва дугъан десте, йирхьудварждихьна кас, Кеилайиан удучӀвну гъушу ва алабхъу йишваъ лицури гъахьи. Саули, Давуд Кеилайиан гъючвюхну гъягъювал аьгъю дубхьну, чан дявдиз удучӀвувал батӀул гъапӀу.

Давуд дагълариъ жин шулу

14Давуддиз ичӀи чюлиъ жин хьуз йишв гъибихъу. Дугъу дагълу Ягьудайиъ, Зифдин багахь ичӀи чюлиъ бина гъиву. Гьадму вари вахтна Саул думу агуз чалишмиш гъахьну, амма Заанури Давуд Саулин хилариз тувундар.

15Давуддиз Саули учв йивну йикӀбан бадали агурайиваликан аьгъю гъабхьи. Давуд Зифдин багахь хьайи ичӀи чюлиъ, Хорешдиъ айиган, 16Юнатан, Саулин бай, дугъахьна Хорешдиз гъафнийи, ва дугъу Давуддиъ Заанурик умуд кивувал гужал гъапӀу. 17Дугъу гъапну:

– ГучӀ мапӀан. Йиз адаш Саулихьан уву ккагъуз хьибдар. Уву Израилиин паччагьвал апӀидива, хъа узу яв паччагьлугъдиъ увухъна вуйи кьюрпи адми хьидиза. Йиз адаш Саулра дидин гъавриъ а.

18Дурари РАББИЙИН улихь сари сарихъди йикьрар гъийитӀу, ва Давуд Хорешдиъ гъузу, хъа Юнатан хулаз кьяляхъ хътарку.

19Зифдин агьалйир Саулихьна Гивайиз гъафи, ва дурари гъапи:

– Давуд учухь жин духьна. Дугъаз Хорешдиъ, Ешимондихьан кьиблайиъ айи Хахила тепейиин, учв жин хьуз йишв гъибихъну. 20Гьаддиз паччагь чаз ккуниган гъюри, хъа учу Давуд паччагьдин хилариз тувдича.

21Саули гъапи:

– Учву йиз гъайгъушнаъ хьпан РАББИЙИ учвуз ужувлар апӀри. 22Гъарахай ва сабсана ражну вари ахтармиш апӀинай. Думу наан аш ва душваъ думу шлиз гъяркънуш, агай. Думу гизаф аьмалдар ву, кӀуру. 23Думу наан жин духьнаш, якьинди аьгъю апӀинай ва узухьна ихтибарлу мялуматар хьади гъачай. Думуган узу учвухъди гъидиза, ва, думу гьаму уьлкейиъ аш, Ягьудайин фуну юрднаъ ашра, узу думу агидиза!

24Ва дурар Зифдиз СаултӀан улихьди гъушу. Гьадму вахтна Давуд чан адмийирихъди Маон кӀуру ичӀи чюлиъ, Арава къуру чюлин Ешимондихьан кьиблайизди вуйи пайнаъ айи. 25Саул чан адмийирихъди думу агуз гъушу. Давуддиз дидкан хабар дебккнийи, ва думу Маон ичӀи чюлин тек гъарзухьна исина ктучӀву. Дидкан аьгъю гъабхьи Саули, Давуддихъ хъачӀарккну, Маон ичӀи чюлиз гъягъюз гьяракат гъапӀу. 26Саул дагъдин саб терефнахъанди гъягъюрайи, хъа Давуд чан адмийирихъди – дидин тмуну терефнахъанди. Давуд хъергнайидарихьан гьергуз чан вари кьувватариинди чалишмиш шулайи, амма Саул ва дугъан адмийир, Давуд ва дугъан адмийир кьялаъ аъбан ва бисбан бадали, дагъдин кьюбиб терефарихъанди гъюз хъюгъю. 27Ва гьадмуган Саулихьна «Кьан дарапӀди кьяляхъ гъач: филистимар ихь уьлкейиин алархьну» гафар хьади чархачи гъафи.

28Саул Давуддихъ хъчӀарккувал дебккуз ва филистимариз къаршуди удучӀвуз мажбур гъахьи. Гьаддиз думу йишвʼин Махлекот (Гьергбан Тепе) тик гъарз ччвур иливну.

Currently Selected:

Паччагьлугъар-1 23: ТабГК

Highlight

Copy