Паччагьлугъар-3 5

Заанурин Хал тикмиш апӀуз гьязурлугъ

1Тирин паччагь Хирамдиз Сулейман чан адашдин кьяляхъ паччагь хьуваликан гъеебхьиган, дугъу Сулеймандихьна юлчйир гьаънийи, гьаз гъапиш Хирам гьарган Давуддин дуст вуйи. 2Хъа Сулейманди Хирамдиз гьамци пуз юлчйир гьаънийи:

3«Увуз аьгъявуз, йиз адаш Давуддиз къаршуди вари терефарихъан дявйир гъахьнийи. Гьаддиз, РАББИЙИ дугъан душмнар адашдин ликарикк дирчайиз, дугъхьан РАББИЙИН, чан Заанурин, Хал тикмиш апӀуз гъабхьундар. 4Амма гьамус РАББИЙИ, йиз Заанури, вари терефариан узуз архаинвал тувну. Мидиз къаршу вуйидарра, бедбахтваларра адар. 5РАББИЙИ йиз адаш Давуддиз гъапну: „Узу тахтниин яв йишвʼин дитру яв бали Йиз ччвурнахъ вуйи Хал тикмиш апӀиди“. Гьаддиз узуз РАББИЙИН, йиз Заанурин, ччвурнахъ вуйи Хал тикмиш апӀуз ккундузуз. 6Гьаци вуйиган, узуз Ливандин кедрйир алдатӀуз амур апӀин. Йиз адмийир яв адмийирихъди сатӀиди лихиди, ва узу увуз, уву фукьан гъапишра, гьадмукьан яв адмийирихъанди гьякъи тувидиза. Гьаз гъапиш, Сидон шагьриан вуйи яв адмийиризси гьарар алдатӀуз аьгъюр учухь фужкӀа адар».

7Сулеймандин гафарихъ хъебехъну, Хирам шад гъахьнийи, ва дугъу гъапнийи:

– Гъит, шюкюр ибшри РАББИЙИЗ, гьаму машгьур халкьдиин паччагьвал апӀуз Дугъу Давуддиз аьяндар бай тувну аьхир!

8Ва Хирамди Сулеймандиз гьамци пуз юлчйир гьаънийи:

«Уву узухьна хътау гафарихъ хъпехъунза, ва кедрйин ва кипарисдин гакӀвлин гьякьнаан увуз ккуниб вари апӀидиза. 9Йиз адмийири хамхрар Ливандиан гьюлихъна хиди. Хъасин хамхрар ертӀиди, ва узу дурар уву улупу йишвахьна гьюлʼинди хътаидиза. Душвахь узу дурар дурчидиза, ва увхьан дурар гъахуз хьидивухьан. Хъа уву йиз суфрайихъна итӀру-ухру сурсатар хътаъбиинди йиз метлеб тамам апӀидива».

10Гьаци Хирамди Сулеймандиз ккунибкьан кедрйин ва кипарисдин хамхрар хътауйи. 11Хъа Сулейманди къад агъзур табут дяхин Хирам паччагьдин суфрайихъна хътапӀуйи, къад агъзур бети зейтундин ччим ктарди. Сулейманди дурар Хирамдиз йисан-йисан хътауйи. 12РАББИЙИ, Чав дугъаз гаф тувганси, Сулеймандиз аьяндарвал тувнийи. Сулеймандин ва Хирамдин арайиъ мясляаьт айи, ва дурари чпин арайиъ йикьрар гъийитӀнийи.

13Сулейман паччагьди вари Израилиъ мажбур вуди лихуз адмийир уч гъапӀнийи – сумчӀур агъзур адми. 14Дурар дугъу Ливандиз нубатнахъди гьауйи – вазли йицӀуд агъзур адми. Саб вазли дурар Ливандиъ шуйи, хъа кьюб вазли хулаъ. Дурарин аьхюр Адунирам вуйи. 15Сулеймандин ургуцӀур агъзур гьамбал ва миржцӀур агъзур дагълариъ гъван гьязур апӀрудар, 16хъа гьацира тикилишдиин ва душвахъ лихурайидариин гюзчивал гъабхру шубуд агъзурна шубудварж аьхюр айи. 17РАББИЙИН Хулан шибритӀ ипбан бадали, дурари паччагьдин амриинди аьхю ва багьайин гъванар гьязур апӀуйи. 18Сулеймандин ва Хирамдин устйири ва Гевал шагьриан вуйи адмийири РАББИЙИН Хал тикмиш апӀуз гьарар алдатӀуйи ва тартиб апӀуйи, гъванар гьязур апӀуйи.

Currently Selected:

Паччагьлугъар-3 5: ТабГК

Highlight

Copy