Phatna-late 34
34
David phuah. Amah a hawlkhia Abimelech mai-ah mihai a kineih a a paisan hun lai.
1 Hun khempeuh ah TOPA ka tawisang dinga;#Ph 71:6
amah phatna ka mukte tawh a kitalawi kei ding hi.
2 Ka hinna TOPA sungah kisathei ding hi;#Ph 44:8
gim thuakte in za uh henla kipak uh hen.#Ph 69:32
3 Kei tawh TOPA’ min thangsak khawm un;
ama min tawisang khawm ni.#Pk 15:2
4 TOPA ka zonga aman kei hong dawngin;#Ph 77:2
ka launa khempeuh panin hong hukhia hi.#Ph 18:43
5 Amah mitsuante maitaang uh a;#Pk 34:29
amau maitangte zumna in a khuh ngei kei hi.
6 Hih mizawngpa in sam a, TOPA in a za hi;
ama lungkhamna khempeuh panin a honkhia hi.#Ph 25:17
7 TOPA a kihtate kimkot ah vansawltak in giahphual sat-a,
amaute hukhia hi.#Pc 32:1
8 TOPA hoih hi, ciam unla mu dih un;#Heb 6:5
amah beel mi thupha ngah ahi hi.
9 Amah kihtate bangmah kisam lo ahi manin#Ph 23:1
no ama misiangte aw, TOPA kihta un.#Tp 6:13
10 Humpinelkaite thanemin gilkial thei uh hi;
ahi hangin TOPA a zongte na hoih bangmah a tasam kei uh hi.#Ph 23:1
11 Ka tate aw, hong pai-in ka thu ngai un;#Ph 66:16
TOPA kihtakzia note kong hilh ding hi.#Ph 32:8
12 A nuntakna it a
ni hoih tampi a mu nuam peuhmah in,#Thn 3:13
13 gitlohna panin na leii uh kem unla,
zuau genna panin na muk uh kem un.#1Pe 2:23
14 Gitlohna kiheisan unla na hoih sem un;
kilemna zong unla delh un.
15 TOPA’ mitte, a thumaante tung tu-a,#JOb 23:10
ama bilte in a kikona uh ngai gige hi;#Mal 3:16
16 siatna bawlte, amaute kiciamtehna leitang pan a phiatkhia dingin#Sp 17:10
TOPA in maingatin a sal gige hi.
17 A thumaante kiko peuh leh TOPA in za a;
amau lungkhamna khempeuh panin amah in hukhia hi.#Ph 145:19
18 Lungtang kitamkhamte kiangah TOPA nai a,#Ph 51:1
a lungsim kitamzante honkhia hi.
19 A thumaan mi in lungkhamna tampi nei thei hi,#Ph 25:17
ahi hangin TOPA in tuate khempeuh panin a hukhia hi;#Job 5:19
20 ama guhte khempeuh hutsak a,
tuate khat beek a kitan kei ding hi.#Jn 19:36
21 Siatna in migilote that dinga;
a thumaan mi’ galte a kimawhpaih ding hi.#Ph 7:9
22 TOPA in ama nasemte tankhia a;#Pk 6:6
amah a beelte khat beek a kimawhpaih kei ding hi.
Currently Selected:
Phatna-late 34: ZIV
Highlight
Share
Copy
Want to have your highlights saved across all your devices? Sign up or sign in
Copyright 1994 Myanmar Center for World Mission