Luke 6
6
Sabbath’ Topa
1Sabbath ni khat Jesu buhlei tawnin a pai hi. Nungzuite in buhvui zutin a khut sunguah nuai-in a takte a ne uh hi. 2 Pharisee-te pawlkhat in, "Bang hangin Sabbath ni-in thukham tawh kituak lo hih na hi uh hiam?" ci-in a dong uh hi.#Mt 12:2
3 Jesu in amaute kiangah, "David le a pawlte a gilkial laitakun bang hih uh cih sim ngei lo na hi uh hiam? 4 Pasian inn sungah lutin siampite bek nek dinga kiphal a ki-apsa anlum ne in, a pawlte zong a pia hi," ci-in a dawng hi. 5 Tua ciangin Jesu in amaute kiangah, "Mihing Tapa, Sabbath’ Topa ahi hi," a ci hi.#Sp 24:5,9; 1Sa 21:6
6 Sabbath ni dang khat synagogue sungah pai-a thu a hilh laitakin a khut taklam a teem mi khat a om hi. 7 Pharisee-te le thukham siate in Jesu a mawhmat nop manun Sabbath ni-in cina a damsak kha hiam, ci-in a vil gige uh hi. 8 Ahi hangin Jesu in amaute ngaihsutna thei ahi manin khutteempa kiangah, "Tho inla mi khempeuh mai ah ding dih in," ci-in a sawl hi. Tua ciangin amah thoin tua lai-ah a ding hi.#Mt 9:4; 12:10
9 Tua ciangin Jesu in amaute kiangah, "Sabbath ni-in a sia hih ding le a pha hih ding, nuntakna hot khiat ding le nuntakna suksiat ding koi pen thukham tawh kituak zaw ahi hiam, cih kong dong hi," a ci hi.
10 Amah in amaute khempeuh en kawikawi a, tua ciangin tuapa kiangah, "Na khut zan in," ci-in a sawl hi. Amah in a khut a zan leh a khutsa a dim kik phitphet hi. 11 Ahi hangin amaute lungham uh a, Jesu bangci hih ding cih thu khat le khat a .kikum uh hi.#Jn 5:18
Sawltakpi Sawm-le-nihte
12 Tua hunlai ni khat, thungen dingin Jesu mualtungah kahto a, zan khuavakin Pasian kiangah thu a ngen hi. 13 Zingsang ciangin ama kiangah a nungzuite sama, sawm le nih telkhia-in sawltakpi, ci-in a min vawh hi. 14 Tuate in: Simon (Peter min a phuah) le a sanggampa Andrew, James, John, Philip, Bartholomew, 15 Matthew, Thomas, Alphaeus tapa James, Zealot kici Simon, 16 James tapa Judas le lehhekpa Judas Iscariot te ahi uh hi.
Thuphate le Gimnate
17 Amaute tawh amah tonkhawm sukin munzang khatah a ding hi. Ama nungzui mihon tampi le Judea gam khempeuh pan ahi zongin, Jerusalem le Tyre le Sidon le tuipi dung pan ahi zongin mi tampitak, 18 ama thu a ngai ding le a cinate uh a damsak nading deihin tua lai-ah a na om uh hi. Kha gilo a#6.18 Greek ah nin in a thuaksiatsakte kidamsakin, 19 ama tung panin vang paikhia a, cinate khempeuh dam siangsak ahi manin mi khempeuh in amah lawn a sawm uh hi.#Mt 4:25; 9:20
20 Amah in a nungzuite en a:
"A zawng note thupha ngah na hi uh hi,
ahang in, Pasian gam nomau aa ahi hi
21 Tu laitaka gilkial note thupha ngah na hi uh hi,
ahang in, hong kivak kham ding hi.
Tu laitaka kap note thupha ngah na hi uh hi,
ahang in, na nui ding uh hi.#Isa 61:2,3
22 Mite in note hong mudah uh a,
Mihing Tapa hangin amaute in note hong puaseh in, hong engko in#Isa 51:7
na min uh siasak a, hong nolh uh ciangin thupha ngah na hi uh hi.
23 "Vantungah no ading pahtakman lian ahi manin, tua ni-in kipakin lungdamin diang un. Ahang in, tua mah bangin a pu a pa-te un kamsangte na bawl zo uh hi.#Mt 5:12
24 "Ahi hangin a hau note, gimna na thuak ding uh hi,#Jas 5:1
ahang in, na nuamsa khin zo uh hi.
25 Tu laitaka an kham note, gimna na thuak ding uh hi,
ahang in, na gilkial ding uh hi.
Tu laitaka nui note, gimna na thuak ding uh hi,
ahang in, dahin na kap ding uh hi.#Pn 14:13
26 Mi khempeuh in note hong phatgen uh ciangin gimna na thuak ding uh hi, ahang in,
na pu na pa-te un kamsangzuaute tua bangin a hih uh hi.
Galte It Nading
27 "Ahi hangin ka thugen a za mite tungah kong hilh hi: Na galte na it in, hong mudahte tungah a hoih na bawl in; 28 nang hong samsiate thupha na pia inla, hong bawlsiate ading thu na ngetsak in. 29 Mi khatpeuh in na pang hong bet leh a lang lam zong na dawh in. Mi khatpeuh in na puantualpi hong laksak leh na puantungsilh a lak ding kham kei in. 30 Hong ngente khempeuh na pia inla, na neihsa hong laksak peuhpeuh kiangah bangmah na ngen kik kei in. 31 Nang tunga hong kibawl ding na deih bangin midangte tungah na bawl in.#Mt 5:44; Ro 12:20
32 "No hong itte bek na it uh leh bang lawhtak ding na hi uh hiam? ‘Mawhneite’ nangawn in amau a itte it uh hi. 33 No tunga a hoih hong bawlte tung bekah a hoih na bawl uh leh bang lawhtak ding na hi uh hiam? ‘Mawhneite’ nangawn in tua bangin hih uh hi. 34 Hong loh kik dinga na lamette bek uh na leitawisak uh leh tua in nang bang hong lawhtaksak tuan ding ahi hiam? ‘Mawhneite’ nangawn in a cinga loh kik ding a lamet uh ‘mawhneite’ leitawisak uh hi. 35 Ahi hangin note na hi uh leh na galte uh itin, amaute tungah a hoih bawl unla ngah kik ding khat beek lamen loin na leitawisak un. Tua ciangin na pahtakman uh lian dinga, Sang Penpa tate na hi ding uh hi. Ahang in, amah nuamna mel a thei lote le a tatsiate tungah a migi hi. 36 Na Pa un a lainat theih bangin no zong na lainat thei un.#Mt 5:46; Jas 2:13
Midangte tunga Thukhenna
37 Thu na khen kei un, no tungah zong hong kikhen kei ding hi. Na mawhpaih kei un, no zong hong kimawhpaih lo ding hi. Na maisak un, no zong hong kimaisak ding hi. 38 Pia un, no zong hong kipia ding hi. No tehna dimvum tham lo kinengcipin kitattat-a, a dimletin na anguah hong kisung ding hi. Ahang in, note zat tehna tawh no ading hong kitehsak ding hi," a ci hi.#Mt 7:1,2
39 Amah in amaute kiangah hih gentehna gen a: "Mittaw khat in mittaw dang khat bangci lamhilh thei ding ahi hiam? A nih un leihawm ah kia lo ding uh ahi hiam? 40 A sin mi in a siapa sangin theizaw lo hi, ahi hangin cingtaaktaka a kisinsak peuhmah a siapa mah tawh kibang ding hi.#Mt 15:14
41 "Nang mittang-a singpek phawkkha loin na sanggampa mittang a singvui them bang dinga en na hi hiam? 42 Nang mahmah in na mittang a singpek mu thei lo napi na sanggampa kiangah, ‘Sanggam aw, na mit-a ninthem hong lakkhiatsak ning,’ bangci cih theih na hi hiam? Kineihsiampa aw, na mit-a singpek lakhia phot lecin tua ciangin na sanggampa mit-a lakkhiat ding singvui them na telmuh thei pan ding hi.
Singkung le A Gah
43 Singkung hoih, a gah hoih lo gah om lo a, singkung hoih lo a gah hoih gah a om kei hi. 44 Singkung khempeuh a gah in kikhentel thei ciat hi. Mite in thangling kung panin thei gah lo lo uh a, sialtalling kung panin lenggah a lo thei kei uh hi. 45 Mi hoih in a lungtanga a koihcing a hoihte panin na hoih pusuahkhia hi. Ahang in, lungtang sung a dimlet ciangin kamin kipaukhia hi.#Mt 12:33
Mipil le Mihai Innlamte
46 "Bang hangin "Topa, Topa hong ci napi, ka gen bangin hih lo na hi uh hiam? 47 Ka kiangah hong pai-in ka thu za-a, a zuipahte bang tawh kibang hiam, cih kong lak ding hi, 48 Thukpi a tawh khit ciangin suangpi tungah bulkip a phut innlampa tawh kibang hi. Tui khanga, tua inn a nawk hangin kiptaka kilam ahi manin tua inn a lok zo kei hi. 49 Ahi hangin ka thute za napi a zui lote, bulpi a nei lo leituala inn lam pa tawh kibang hi. Tui khanga tua inn a nawk phetin puka, a kisia ngi-ingei hi," a ci hi.
Currently Selected:
Luke 6: ZIV
Highlight
Share
Copy
Want to have your highlights saved across all your devices? Sign up or sign in
Copyright 1994 Myanmar Center for World Mission