John 18
18
Jesu Kiman
1Jesu in thu a nget khit ciangin a nungzuite tawh tua mun nusia in Kidron Kuam a kantan uh hi. Tua kuam galkhatah Olive lo khat a om hi; tua lo sungah amah le a nungzuite a lut uh hi.
2 Jesu le a nungzuite tua lai-ah kituah pahpah uh ahi manin amah lehhekpa Judas in tua mun a thei hi. 3 Tua ahi ciangin Judas in, galkap pawlkhat le siampi makaite le Pharisee-te pana ulian pawlkhat makaih in lo sungah a va pai uh hi. Amaute in meisel, meivak le hiam a keng uh hi.
4 Jesu in ama tunga thu piang ding khempeuh thei khin a, paikhia-in amaute kiangah, "Kua deih na hi uh hiam?" ci-in a dong hi.#Jn 6:64; 13:1,11
5 Amaute in, "Nazareth mi Jesu," ci-in a dawng uh hi.#Mk 1:24
Jesu in, "Kei, amah ka hi hi," a ci hi. (Tua laitakin a lehhekpa Judas zong amaute lakah a ding hi.) 6 Jesu in, "Kei, amah ka hi hi," a cih ciangin amaute nungkin in lei-ah a puk uh hi.
7 Jesu in, "Kua deih na hi uh hiam?" ci-in amaute a dong kik hi.
Amaute in, "Nazareth mi Jesu," a ci uh hi.
8 Jesu in, "Kei, amah ka hi hi, ci-in kong gen zo hi. Kei hong zong na hi uh leh hih mite paisak un," ci-in a dawng hi. 9 "Nong piaksa mi khat beek ka mansuah kei hi," b#18.9 Jn. 6:39 a cih thu a tangtun nadingin hih thu a piang ahi hi.#Jn 6:39; 17:12
10 Tua ciangin namsau khat a nei Simon Peter in a namsau dokin tulpipa nasempa a sat leh a taklam bil a satkhia hi. (Tua nasempa min Malchus ahi hi.)#Mt 26:51
11 Jesu in Peter kiangah, "Na namsau paimang in. Pa hong piaksa hai dawn lo ding ka hi hiam?" ci-in thu a pia hi.#Mt 20:22
Annas kiangah Jesu Kipaipih
12 Tua ciangin galkap pawlkhatte le a makaipa uh tawh Jew-te uliante in Jesu a man uh hi. Amaute in amah hen uh a, 13 tua kuma tulpi a sem Caiaphas sungpa Anna kiangah a puak masa uh hi. 14 Caiaphas pen, mipite tangin mi khat si leh hoih ding hi, ci-a Jew-te tungah thuhilh pa ahi hi.#Mt 26:3
Peter Nial Masakna
15 Simon Peter le nungzui dang khat in Jesu a nungzuih uh hi. Hih nungzuipa pen tulpipa meltheih ahi manin tulpipa huang sung dong Jesu tawh a tonkhawm hi. 16 Ahi zongin Peter in a pualam kongbiang ah a ngak hi. Tulpipa meltheih nungzuipa pai kika, nasem-a om nungak kiangah a gen ciangin huang sungah Peter a lutsak hi.
17 Kongkhak a nungaknu in Peter kiangah, "Nang hih mipa nungzui lakah khat hi lo na hia?" ci-in a dong hi.
Amah in, "Hi keng," ci-in a dawng hi.
18 Khuadam a, nasemte le uliante mei awi-in mei kimkotah a ding uh hi. Peter zong amaute lakah mei awi-in a ding hi.#Mk 14:54,67
Tulpipa in Jesu Thu Dong
19 Tua hun laitak, tulpipa in Jesu, a nungzuite le a hilh thute a dot laitak ahi hi.#Mt 26:59
20 Jesu in, "Leitung kiangah a lang tang in ka gen zo hi. Jew-te kikhopna ahi zongin synagogue-te le biakinnpi ah thu ka hilh tawntung hi. Ka sim gen bangmah a om kei hi. 21 Bang dinga kei hong dong na hi hiam? Ka thugen a zate dong in. Ka gensate thei mahmah uh hi," ci-in a dawng hi.#Mt 4:23
22 Jesu in hih bang a cih ciangin a kianga om uliante laka khat in, "Tulpipa dawn nading hih bang maw?" ci-in a maitang a beng hi.#Mt 16:21
23 Jesu in, "Thu maan lo gen ka hileh ka khialhna hong gen in. Ahi hangin thutak gen ka hileh bang hanga hong beng na hi hiam?" ci-in a dawng hi. 24 Tua ciangin Annas in amah hensa mah in tulpi Caiaphas tungah a puak hi. a#18.24 Ahikeh (Tu-in Annas in hensa-in amah tulpi Caiaphas a puak hi)#Mt 5:39
A Nihveina le a Thumveina Peter in Nial
25 Simon Peter mei awi-a a din laitakin, "Ama nungzui dang khat hi ngel ve teh aw?" ci-in amah kidong hi.#Mt 26:69,71
Amah in, "Hi keng," ci-in a nial hi.
26 Tulpipa nasemte laka Peter in a bil a satkhiatsak pa tanaute khat in, "Olive lo sungah amah le nang hong mu khawm hi lo ka hia?" ci-in a to hi. 27 Peter in nial kik leuleu a, tua hun laitakin ak a khuang hi.#Jn 13:38
Pilate Mai-ah Jesu
28 Tua ciangin Jew-te in Caiaphas inn panin Rome-te ukpipa innpi ah Jesu a paipih uh hi. Tua hun zingsang tung ahi hi. Jew-te in Paisan Pawi ne thei nuam uh a, biakna ngeina palsat a, a nit loh nadingun kumpipa inn sungah a lut kei uh hi. 29 Tua ahi ciangin amaute kiangah Pilate paikhia a, "Hih mipa na mawh matna uh bang ahi hiam?" ci-in a dong hi.#Mt 27:2
30 Amaute in, "Amah in tatkhialh na lian nei kei leh nang khut sungah kong tun kei ding uh hi," ci-in a dawng uh hi.
31 Pilate in, "Note mah in amah pai-pih unla, nomau thukham bangin thu khen un," a ci hi.
Jew-te in, "Ahi hangin mi khatpeuh tungah thu khena thah theih nading thu ka nei kei uh hi," ci-in a nial uh hi. 32 Bangci banga sihna thuak ding cih, Jesu in ama sih nading thu a genkholhna, a tangtun nadingin hih thu a piang ahi hi.#Mt 20:19; Jn 3:14
33 Tua ciangin innpi sungah Pilate lut kik a, Jesu samin thu donga, "Nang, Jew-te kumpipa na hi hiam?" a ci hi.
34 Jesu in, "Tua pen nang ngaihsut mah ahi hiam, ahikeh kei thu midang khatpeuh hong gen ahi hiam?" ci-in a dong hi.
35 Pilate in, "Kei Jew mi ka hi hiam? Nang, kei khut sung hong tun na mipihte le na siampi makaite ahi hi. Nang bang hih na hi hiam?" ci-in a dong hi.
36 Jesu in, "Kei kumpi gam hih leitung hi lo hi. Hi hileh, Jew-te hong matin ka nasemte in kei hong hutna un a do ding uh hi. Ahi hangin kei kumpi-gam mundang pan ahi hi," a ci hi.#Mt 26:53; Jn 6:15
37 Pilate in, "Nang, kumpi khat na hi maw leh!" a ci hi.
Jesu in, "Kei kumpi nong cih na maan hi. A taktakin, hih thu hangin ka suaka, hih thu hang mahin leitung ah kong pai-a thutak ah teci ka pang hi. Thutak lama pang peuhmah in ka thu a ngai uh hi," ci-in a dawng hi.#Jn 3:32
38 Pilate in, "Thutak bang ahi hiam?" ci-in a dong hi. Tua a cih kawmin Jew-te kiangah paikhia kik a, "Amah mawhsak nading thukho bangmah ka mu kei hi. 39 Ahi hangin Paisan-pawi hun ciangin note kiangah thongkia khat ka khah ding na ngeina uh ahi hi. ‘Jew-te kumpipa’ kong khah ding na deih uh hiam?" ci-in a dong hi.#Lk 23:4
40 Amaute in, "Hi lo, amah hi lo! Barabbas hong pia ou," ci-in a kiko kik uh hi. Barabbas ahileh kumpi langdona-a kihel khat ahi hi.#Lk 23:19; Ns 3:14
Currently Selected:
John 18: ZIV
Highlight
Share
Copy
Want to have your highlights saved across all your devices? Sign up or sign in
Copyright 1994 Myanmar Center for World Mission