Filipi 4

Pɔlu la malasenu

1N nɛɛnɛdɔndɛ kanunteŋɛnu, wo yen sɔgɛ be n na han. N be sɛɛwaren wo la, wole le la ko ɲan be a mala n ni kunnawule sɔtɔ. Awa, wolo mu, n kanunteŋɛnu, n ni a fɔ wo ye: wo ni sɔ Marige kɔma.

2Ewodiye nun Sintise, yandi, Marige la ko la, wo ni bɛn, wo ni to mira dɔndɔ tɔ. 3Ile n dɛmanná ɲinma, n bata ile tugun madiya, i ni kɛ musu fila dɛman, Ewodiye nun Sintise. Bayi ande tugun katata n kɛnna Ala la kibare la ko tɔ. Kilemanti tugun bata n dɛman, iko n waliɲɔgɛ gbɛtɛnu. Wonu bɛ tɔgɛ be sɛbɛren bukke tɔ, mɔgɛnu tɔgɛnu be min tɔ, minnu si abada kise sɔtɔ.

4Wo ni sɛɛwa Marige la ko la wagati bɛ. N mɛn ni a fɔ wo ye, wo sɛɛwa! 5Wo la jusu sɛɛya ni makɛnɛn mɔgɛ bɛ ye. Marige Isa bele mɛla tanala dunuya bitugun. 6Wo kana hanmɛ fenfen na. Kɔnɔ koe bɛ butɔ, wo ni Ala mataran ka a madiya. Wo butɔ, fenfen min sɔgɔ be wo la, wo be wolo dantɛgɛla a ye ka a tantu. 7Wo butɔ, Ala si a jususa dii wo ma. Mɔgɛ si a hakkile sigi fenfen ma, wo jususa fisa a ko pon! A si wo jusu butɔ koe nun wo la mira bɛ makanta, anu ni to Ala la mɔgɔ masubɛreŋɛ Isa le ma.

8N nɛɛnɛdɔndɛnu, n na kuma tɔɛ le ka. Wo ni wo hakkile to kɛ koenu ma: koe min yo mu tɔɲa la, min yo mu sɔɔbɛ la, min yo be telenden, koe min yo saniyanta, min yo diyata Ala ye, min yo kaɲin, biliya nun mamatɔgɛ be sɔtɔla min bɛ ma koe tɔ. Wo ni wo hakkile sigi wo koenu le bɛ ma. 9Wo ni koenu ma, n ka wo degen minnu la, anun wo ka minnu sɔtɔ n na. Wo mɛn ka minnu mɔɛ n na, wo ka a yen n na misale tɔ, wo ni sɔ wo kɔma. Wo butɔ, jususa tige Ala si to wo fɛ.

Kɔɔre talɔn koe

10N bata sɛɛwa Marige la koola, bayi a tɔɛ la wo mɛn bata fɛrɛ sɔtɔ a yita koe la, wo hakkile be n ma. Tɔɲa le, fɔlɔ nun wo bata di n dɛmanna, kɔnɔ Ala ma a lagiri. 11N bele kɛ fɔren de bayi n hajue to be fondo do ma nun. Kɔnɔ koe min be n bolo, nde bata n madegen n ni n wasadon wo ma. 12Ka fondo bele n bolo ba, ka fondo siyama be n bolo ba, a bɛ ka n masɔtɔ. Wolo mu, ka kɔnkɛ be n na ba, ka n be faren ba, n bata n wasadon a bɛ la. Ka n mu banná la ba, ka n be tɔɔrɔren ba, n be sɛɛwaren a bɛ la. 13N si nɔ koe bɛ la ⸂Ala la mɔgɔ masubɛreŋɛ⸃ sabu la, min be sɛnbɛ diila n ma. 14Kɔnɔ wo bɛ butɔ, wo be ko ɲinma le maren n ɲɛ, wo to ka n dɛman n na ɲagankata butɔ. 15Wole Filipi kaanu, wole yɛtɛ ka a lɔn, bɔɔla n fɔlɔta Ala la kibaru ɲinma la ko fɔla, n to bɔɔta Masedoni duge tɔ, Isayanka kuruŋɛ yo ma n dɛman n ni nafule sɔtɔ, fɔ wole dɔrɔn. 16Iyon, n ɲan be Tesaloniki saa tɔ wagate min tɔ, n hajue be min ma nun, wo ka wo do lasanba n ma han kunɲama fila. 17N ma a fɔ n be wo kɔɔrenu ɲinila n yɛtɛ ye. Kɔnɔ a sɔgɔ be n na wole le ni barajue sɔtɔ han a ni tanbi a tɔ. 18Awa, nde hajue be min ma, n bata wo bɛ sɔtɔ. Wo be min nasanbaren n ma Epaforodite sabu la, a bata n wasa han a tanbita a tɔ. A bata ma sarika la Ala ye, a kuɲɛ di a ye, a ka a hɛnɛ. 19N Marige Ala la fonisireya nun a la mansabaya to kolo, wo hajue be min bɛ ma, a si naa wo kɔ a bɛ la, a la mɔgɔ masubɛreŋɛ Isa sabu la. 20Ala mu a mala tantue ni to wo mɔ Baaba Ala ye abada. Amina.

Sara kuma

21Wo ni Ala la mɔgɔ masubɛreŋɛ Isa la saniyanbaga bɛ kɔntɔn. N nɛɛnɛdɔndɛnu minnu be n kɛnna, wonu be wo kɔntɔnna. 22Saniyanbaga bɛ, sɔkkɔfɛrɛ nɔn minnu be walila Rɔmu mansa banba bata, anu be wo kɔntɔnna. 23Awa, ⸂wo mɔ⸃ Marige Isa, Ala la mɔgɔ masubɛreŋɛ mu hinnɛla wo bɛ la. ⸂Amina.⸃

Currently Selected:

Filipi 4: MOG

Highlight

Copy