Sawmus 90
90
Usuh ka ayivwi amadga inin
(Moís gavan)
1Kiyavwiye Uhokri, pisnewa umaptenten ku samah akavuska hiyeg humaw.
2Avit waxribdi humaw, avit pis humawasa inin hawkri ayipa pis kuwis ay. Pis ay adahan avanenekwa akiwka akiwnek. Pis yuma pikavuska, yumahwata pimaksemni.
3 Usuhme hiyeg amedgenevwi inin usuh he wayknenwa. Pis diyuhkis hiyeg aterewata akiw, pis keh igkis wageswa waykwata akiw.
4 Heneme pis dehewnene adahan avanenekwa. Hawkri ka ayivwi ta pit ku samah in ayivwad wotuh. Pit, miw (1000) kamukri in ke wotbe pahaywowatbe hawkri. In ke pahavwi hiyegbe avuriwne ku aysaw pahavwime himekne. Git ner avuriwne, mitipka ka ayivwisima mpiya. Gitme ner ku pariye himekne, mitipka mpiye kibehtenwa, ka ayivwadima ig himak.
5 Usuh amedgenevwi inin ka ayivwi kema pisma. Usuh miyarap kibehtenwa. Pis ahiw hiyegviyenevwi gaymahwankis ka araptisima arimkat miyaka, kewa pahatra parewnibe kane amiyanisima. Usuh ka dahwa mpiynema ariw pahat arisunti. Usuh kewa pamatkabe. In pamatka hiyan barewye hawkanawa,
6Heneme avit aygete in kuwis hururup, aravwip.
7Ku samah pahavwi bukehpiye ini pamatka in madik kibehtenwa, hawata in pidagoni keh usuh madik kibehtenwa, in keh usuh avis ka aynsima.
8Mmanawa pis kahayaksa madikte uvathawni ta pivetunat. Wotuh in uvathawni ayamaw, heneme ta abetit ini pibutni in kahayak huwewe pit.
9Ayge nikwe uhawkan amadga inin mpiya kibehtenwa, awaku pis kayehe utaraksan kane kabay. Usuh miyarap kibehtenwa ke puhkabe.
10Usuh aymuhwa amadga inin aynesa kamukri, ntewnehker madikwa (70) akebi, waytakuh danuh madikawku arawna (80) avitmin. Heneme madikte akak mbeyne. Ayteke usuh menwe kibehtenwa, yuma akiw.
11Pariye kuwis kayah ini pidagoni kane ahawnasima? Pariye ahiyekten ku pariye pamiyhan hiyapkis wot? Pis kis adahan hiyeg kiyathap kiyesad, hiyaksa igkisme ka kiyathap aynesnima.
12 Kiyavwiye, kannuhnaba usuh kawih kabayntiwa ini wayivwi amadga inin pidahan, kahadbe usuh humaw kibeyne hiyeg hawata hiyekemniye piwtrik.
13Kiyavwiye, ivegnaba womkanit akiw. Aysawhki ayivwi ini pidagoni dahwanek arit utaraksan? Amnihnaba usuh pihiyegavu. Bayahminaba usuh ariw utaraksan.
14Kehnaba nukune hawkri humaw udahan akiw. Kehnaba usuh bateke uminuh akiw akak pabay ukakuh. Ayge nikwe usuhme paknek akak batekka takunipti adahan avanenenkwa.
15Uya hiyapkis wotuh kuri ka aynsima kabayka hawata ku samah pis kuwis hiyapkise wotuh ka aynsima mbayka. Mmanawa kuwis ka aynsima kamukri usuh hiyepne ka aynsima mbeyne.
16Usuh pihiyegavu hiyepkere ini pannu ku samah pis kehe minikwak. Usuh hawata muwaka uhiwhivwi hiyap ku samah pis ka pidatnisima, pis ka pikiytanisima.
17Kiyavwiye uwohkiga, usuh muwaka pabay misakwa ukakuh usuh pihiyegavu. Uya iki wotuh wawaygi adahan usuh wewkis waymuhwan ka waditnevyenenma.
Currently Selected:
Sawmus 90: pluPB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
