Miga 6
6
Die Here sê sy volk het verkeerd gedoen
1Luister wat sê die Here.
Julle moet praat met die berge
en die heuwels.
2Berge, julle is die fondamente
van die aarde,
julle moet luister na wat die Here sê,
want die Here sê sy volk
het verkeerd gedoen.
Hy vra:
3“My volk, wat het Ek
aan julle gedoen wat verkeerd is?
Hoe het Ek julle moeg gemaak?
Antwoord My!
4Ek het julle uit Egipte gebring,
Ek het julle vrygemaak uit die plek
waar julle slawe was.
Ek het gesê Moses en Aäron
en Mirjam moet julle lei.
5“My volk, julle moet onthou
wat koning Balak van Moab
met julle wou doen
en wat Bileam seun van Beor
vir hom gesê het.
Julle moet alles onthou
wat gebeur het
tussen die stede Sittim en Gilgal
sodat julle kan weet
wat die Here gedoen het
om julle te red.”
Waarmee sal ek die Here dien?
6Julle vra:
“Wat moet ek saamneem
as ek na die Here
se tempel gaan?
Waarmee sal ek die Here dien?
Die Here is groot.
Moet ek brand-offers
vir Hom bring?
Moet ek vir Hom kalwers offer?
7Sal die Here hou
van 1 000 skaap-ramme,
en van 10 000 riviere
vol olyf-olie?
Moet ek my oudste seun offer
omdat ek sonde gedoen het?”
Julle moet gehoorsaam wees aan julle God
8Die Here het vir julle gesê
wat reg is.
Hy wil net hê julle moet doen
wat reg is.
Julle moet Hom altyd dien.
Julle moet gehoorsaam wees aan julle God.
9Die Here roep die mense
van Jerusalem.
Elke mens wat weet wat reg is,
moet bang wees vir sy God.
Julle is 'n klomp slegte mense
Die Here sê:
“Luister, koning en almal
wat in die stad bymekaar is,
10julle is 'n klomp slegte mense.
Ek hou nie daarvan
dat julle skelm is
wanneer julle iets meet en weeg nie.
11Ek sien wanneer julle iets weeg
met 'n weegskaal wat nie reg weeg nie.
12Die ryk mense doen slegte dinge
aan die arm mense,
en almal in die stad lieg
en bedrieg.
13“Daarom het Ek klaar begin
om julle te straf
omdat julle sonde gedoen het.
14Julle sal eet, maar julle
sal nie vol word nie,
julle sal honger bly.
Julle sal julle goed bêre,
maar Ek sal dit gee
vir die mense wat teen julle
oorlog maak.
15Julle sal koring saai,
maar julle sal nie koring afsny nie.
Julle sal olie druk uit die olywe,
maar julle sal nie olie kry
om aan julleself te smeer nie.
Julle sal sap uit die druiwe druk,
maar julle sal nie wyn kry
om te drink nie.
16Julle het gelewe
soos die slegte konings
Omri en Agab.
Daarom sal Ek vyande laat kom,
en hulle sal julle stad verwoes.
Hulle sal baie slegte dinge doen aan julle
en hulle sal julle spot.”
Currently Selected:
Miga 6: ABA
Highlight
Share
Copy
Want to have your highlights saved across all your devices? Sign up or sign in
© Bybelgenootskap van Suid-Afrika 2007. Gebruik met toestemming. Alle regte voorbehou.