JOHAN 1
1
Heng nai Leu
1Angchei y ly Leu awm i, Leu ly Tameuh teng y awm, naibaly Leu ly Tameuh ne. 2Ni ly angchei y Tameuh teng y awm. 3Ati cheaungkhang bawibawi ai ly mymy i saho y sa nai ne: naibaly atiti sa nai bawibawi ai ly mymy ny y naimy sa nai ha py by y. 4Mymy y ly heng naira awm i, huni heng naira ly khumichi i kangvang ne. 5Naibaly kangvang ly kaveng theung y angvang iy, kaveng my ly huni ai pany y.
6Tameuh i pato nai khumi leaungrei awm, amyn ly Johan ne.#Mt 3.1; Mk 1.4; Lk 3.1–2 7Huni kangvang pany hai iy mymy deaungkho y khumi bawibawichi my ym thai ai nai, mymy ly pany hai ai nai ang jeu. 8Ni ly huni kangvang ny y leang, huni kangvang pany hai ai nai ang jeu nai teu. 9Khumi bawibawi angvang hai nai kangvang tatang ly khaileaung pri y ang jeu bo. 10Ni ly khaileaung pri y awm i, khaileaung pri ly mymy i sa nai ne, na i py khaileaung pri ly mymy ai pany y. 11Mymy i khumichi teng y ang jeu i, mymy i khumichi ly ni ai kawn y. 12Na i py mymy ai kawn iy, mymy i amyn y ym nai ngiereichi ai ly Tameuh i chanau lawn thai ai nai ang pei; 13nichi ly thi i tapen nai py ny y, tlang i kangai y tapen nai py ny y, khumi i kangai y tapen nai py ny y, Tameuh i tapen nai teu.
14Naibaly Leu ly ngan lawn i, pahen naira hawi leu meitang hawi kawi iy, achi teng y awm bo: Ampo i Chapo leaungrei awm khyh nai nang parai nai sai kamta, achi ly mymy i nang parai nai sai niu bo. 15Johan ly ni i satang pany hai i, “Kai bo y tym nai ly kai ai katlen veng bo, ni ly kai i mo y awm angchi nai deaungkho y na a,’ nanai ni i satang kai thui nai ly mymy ne he,” nanai aeu. 16Mymy i angym naira ly achi ly nga bawibawi i, pahen nai tleaung y pahenra nga pateang bi bo. 17Ati mana nai mo nabaly Mosi i saho y Reita ang pei bo; na i py pahenra hawi leu meitang py Isu Krista i saho y tym. 18Ami py mana khala y py Tameuh ai niu vai y; Chapo leaungrei awm khyh nai, Ampo teng y awm khyp nai my ly ni i satang thai hai bo.
Baptis sa nai Johan i leu thui nai
(Mt 3.1–12; Mk 1.1–8; Lk 3.1–18)
19Naibaly Judachi ly, “Nang ly ami mo?” nanai deng ai nai Jerusalem avang i dengdairei ni teng y pathyp pi nai keungchi hawi Levi chengchi ai pato khala y Johan i pany hai nai leu ly hini ne he.
20Mymy ly apha y i, “Kai ly Krista ny y leang,” nanai thai hai.
21Naibaly nichi ly mymy teng y, “Ami naibaly? Elija a?” nanai deng bi.#Leu 18.15, 18; Mal 4.5
Naibaly ni my ly, “Ny y leang,” nanai pathang bi. Nichi my teang, “Huni amo a?” nanai deng taleang bi.
Ni my ly, “Ny y leang,” nanai pathang taleang bi.
22Hunaibaly nichi ly mymy teng y “Nang ly ami mo? Kaichi ai pato nai keungchi teng y pathang thai ai nai thui pi bei. Nang ly nangmy ai ami napi mo?” napi.
23Naibaly ni my ly, “Amo Isaia i thui pi nai kamta,
‘Areng i lam pataw u,’ nanai daichi ka-vym y aeu nai keung i raawi ne kai ly,” napi.#Is 40.3 24Khumi pato naichi ly Pharisaichi teng i nai ne. 25Naibaly nichi my ly ni teng y, “Nang ly Krista khy ny y, Elija kyh ny y, Amo kyh ny y bi baly, ati mana nai baptis sa lawh be?” nanai deng bi.
26Naibaly Johan my nichi teng y, “Kai ly tui y baptis sa nai teu; nangchi i pany y nai khumi leaungrei ly nangchi theung y angdo nai ne; 27ni ly kai bo y tym nai keung ne, kai ly ni i phainai vui su ai nai py ataing y leang,” nanai pathang.
28Huni atitichi ly Johan i baptis sa naira y Jordan vai Bethani avang y amcheang nai ne.
Tameuh i Beram cho
29Naibaly mymy ly khawn mang y Isu ai ni teng y jeu ai tau nai niu i, “Khen cham, Tameuh i Beram Cho, khaileaung pri i kamngo la pi veng nai keung ho! 30Khumi leaungrei kai bo y tym nai ly, kai i mo y awm angchi nai deaungkho y kai ai katlen veng bo,’ nanai kai i thui nai ly huni ne ho. 31Kai ly mymy ai pany y lawh, na i py mymy ai ly Israelachi teng y amteng hai thai ai nai tui y baptis sa naimy kang jeu,” napi. 32Naibaly Johan my leu pany hai i, “Phailo ly buhu ka-tawm kani pri mang i dengdairei kathiu iy, ni i tlang tleaung y chym nai kaniu. 33Kai ly mymy ai pany y, na i py tui y baptis sa ai nai kai ai pato nai keung ly kai teng y, ‘Phailo ly ami i tlang tleaung y kathiu iy chym nai nang niu nai ngierei ly, mymy kypkyp ly Phailo Kachai y baptis sa ai nai keung ne ai,’ ang napi. 34Kai ly niu bo, naibaly hini ly Tameuh i Chapo ne, nanai kapany hai bo,” napi.
Isu teng y abang angchei naichi
35Naibaly pa-nyh kani ly Johan hawi ni teng y abang nai leaung nyhrei ly angdo nai ne. 36Naibaly mymy ly Isu aleaung nai thym khala y khen i, “Khen cham, Tameuh i Beram Cho ho! napi. 37Naibaly abang nai leaung nyhrei ly ni i leu thui nai thai i, Isu teng y abang hawi. 38Isu ly hi iy nini abang hawi nai niu i nini teng y, “Ati hau hawi?” napi. Naibaly nini my ly, “Rabbi (huni ly Sara nanai sai ne,) nang ly manira y awm mo?” napi. 39Mymy ly nini teng y, “Jeu hawi, niu namang,” napi. Hunaibaly nini ly chei hawi i ni i awm naira niu hawi iy, dym biu theaung neng awm i huni kani ly ni teng y awm. 40Johan i leu thui nai thai iy Isu teng y abang nai leaung nyhrei theung i leaungrei ly Andria, Simon Petera i amnau ne. 41Ni my ly ni i amjo Simon ai hau manme i ni teng y “Kaini ly Messia ai niu bo,” napi; (huni ly Krista nanai sai ne.) 42Mymy ly ni ai Isu teng y hawi i, Isu my ni ai khen iy, “Nang ly Johan i chapo Simon ne; Kipha ang pathi ai,” napi; (huni ly Petera nanai sai ne.)
Isu my Philipa hawi Nathanaela ai palau nai
43Naibaly khawn mang y Isu ly Kalili pri y chei ai nai tau iy, Philipa ai niu i ni teng y, “Kai teng y abang,” napi. 44Philipa ly Bethsaida avang i khumi ne, huni ly Andria nini Petera i awm nai avang teang. 45Philipa ly Nathanaela ai hau i ni teng y, “Ni i satang Mosi my Reita cha-iu y hawi, amochi my tajiu nai py kaichi niu bo, Nazaret Isu, Josepha i chapo ai ly,” napi. 46Naibaly Nathanaela my ni teng y, “Nazaret avang i dengdairei atiti kahawi theu thai a?” napi. Philipa my ni teng y, “Jeu ly, khen cham,” napi. 47Isu ly Nathanaela ni teng y jeu ai tau nai niu i, “Khen cham, Israela khumi meitang, tapawp nai paleung den py by y nai ho,” nanai ni i satang thui pi. 48Nathanela my ly ni teng y, “Nang ly kai ai mana pany mo?” napi. Isu my ni teng y, “Philipa ly nang ai palau y rai kha y nang thaidu keung anui y awm khala kang niu bo,” nanai pathang. 49Nathanaela my ni teng y, “Rabbi, nang ly Tameuh i Chapo ne, nang ly Israelachi i Samrang ne,” nanai pathang. 50Isu my ni teng y, Thaidu keung anui y kang niu bo, kang napi nai deaungkho y ym nai teu lo-oh? Hini tleaung y atiti aly len keh nai nang niu ai mang,” nanai pathang. 51Naibaly Isu my ni teng y, “Meitang khypkhyp kang thui pi, kani am-eaung iy Tameuh i kani pri i amtaw thau naichi Khumi i Chapo i tlang tleaung y kathui kalau nai py niu u ai,” napi.#AA 28.12
Currently Selected:
JOHAN 1: KCL02
Highlight
Share
Copy
Want to have your highlights saved across all your devices? Sign up or sign in
Khumi Common Language Bible © Bible Society of Myanmar, 2005.