Rimliklar 8

8–BOB

Muqaddas Ruhning yetakchiligida yashash

1Iso Masihga tegishli boʻlganlar#8:1 Iso Masihga tegishli boʻlganlar — yunoncha matndan. Baʼzi yunon qoʻlyozmalarida Iso Masihga tegishli boʻlganlar, yaʼni bashariy tabiatning emas, balki Ruhning yetakchiligida yashayotganlar. endi hukm qilinmaydilar. 2Hayot ato etuvchi Ruhning qonun–qoidasi Iso Masih orqali bizni#8:2 biz — baʼzi yunon qoʻlyozmalaridan. Yunoncha matnda sen. Bu oʻrinda qaysi olmosh ishlatilganidan qatʼi nazar, Pavlus Iso Masihga imon keltirgan har bir insonni nazarda tutadi. gunohdan va oʻlimga yetaklaydigan qonundan ozod qildi. 3Inson Xudoning qonunini bajara olmagani uchun qonun taʼsirsiz boʻlib qoldi. Qonun insonni gunohdan qutqara olmagani uchun Xudoning Oʻzi odamlarni qutqardi. U Oʻz Oʻgʻlini gunohkor insonga oʻxshatib, bu dunyoga yubordi va gunohning qudratini yoʻq qildi#8:3 …gunohning qudratini yoʻq qildi — yoki …gunoh uchun Uni qurbonlikka bagʻishladi.. Shu yoʻsin Xudo inson orqali gunohni mahkum qildi. 4Biz — bashariy tabiatning emas, balki Ruhning yetakchiligida yashayotganlar — qonun talab qilgan solihlikka erishishimiz uchun Xudo shunday qildi.

5Bashariy tabiat yetakchiligida yashaydiganlar bashariy fikr qiladilar. Ruhning yetakchiligida yashaydiganlar esa Ruhni mamnun qiladigan narsalar haqida fikr qiladilar. 6Bashariy tabiat yetakchiligida fikr qilish oʻlimga yetaklaydi, Ruh yetakchiligida fikr qiladiganlar esa hayot va tinchlikka ega boʻladilar. 7Bashariy tabiat yetakchiligida fikr qilish Xudoga dushmanlikdir, chunki bunday tabiat Xudoning qonuniga itoat qilmaydi, darhaqiqat, itoat qila olmaydi ham. 8Bashariy tabiat yetakchiligida yashaydiganlar Xudoni mamnun qila olmaydi.

9Agar Xudoning Ruhi haqiqatan ham sizlarning qalbingizda makon qilgan boʻlsa, sizlar endi bashariy tabiat amri bilan emas, balki Ruh amri bilan yashayapsizlar. Kimki Masihning Ruhiga ega boʻlmasa, u Masihga tegishli emas. 10Ammo Masih sizning qalbingizda makon qilgan. Toʻgʻri, gunoh tufayli tanangiz oʻlimga mahkum qilingan, lekin endi Xudoning Ruhi sizlar uchun hayot manbaidir#8:10 …Xudoning Ruhi sizlar uchun hayot manbaidir… — yoki …ruhingiz tirikdir…., chunki sizlar oqlangansiz. 11Isoni oʻlikdan tiriltirgan Xudoning Ruhi qalbingizda yashayapti. Iso Masihni oʻlikdan tiriltirgan Xudo yuragingizda yashayotgan Oʻz Ruhi orqali sizlarning foniy tanangizni ham oʻlikdan tiriltiradi.

12Shunday qilib, ey birodarlar, endi biz bashariy tabiatimizning amri bilan yashashga majbur emasmiz. 13Axir, bashariy tabiat yetakchiligida yashasangiz, oʻlasizlar, ammo Ruh orqali oʻsha tabiatning qilmishlariga chek qoʻysangiz, yashaysizlar.

14Xudo Ruhining yetakchiligida yashaydiganlarning hammasi Xudoning farzandlaridir. 15Xudo bizga Oʻz Ruhini berdi. Buni yana qul boʻlib, qoʻrquvda yashashimiz uchun emas, balki Uning farzandi boʻlib, Ruh orqali Xudoni “Otajon”#8:15 “Otajon” — yunoncha matnda “Abba, Ota”. Abba soʻzi oramiychada ota deganidir. Xudo imonlilar bilan nihoyatda yaqin munosabatda boʻlgani uchun, ular Xudoga “Ota” deb murojaat qiladilar. Toʻliqroq maʼlumotga ega boʻlish uchun lugʻatdagi XUDONING NOMLARI iborasi ostida berilgan OTA soʻziga qarang. deb chaqirishimiz uchun qildi. 16Xudoning Ruhi bizning ruhimizga qoʻshilib, biz Xudo farzandlari ekanligimiz haqida guvohlik berib turadi. 17Biz Xudoning farzandlari ekanmiz, demak, farzandlarday Uning vaʼda qilgan barakalariga ega boʻlamiz, Masih bilan birga bu barakalarni baham koʻramiz. Biz Masihning azob–uqubatlariga sherik ekanmiz, albatta, Uning ulugʻvorligiga ham sherik boʻlamiz.

Hozirgi azob–uqubatlar va kelajakdagi ulugʻvorlik

18Ishonchim komilki, hozirgi azob–uqubatlarimiz bizga zohir qilinadigan ulugʻvorlik oldida hech narsa emas. 19Axir, Xudoning farzandlari kim ekanligining ayon qilinishini butun mavjudot intizorlik bilan kutyapti. 20-21Chunki mavjudot behudalikka mubtalo boʻlgan#8:20-21 …mavjudot behudalikka mubtalo boʻlgan — bu oʻrinda Pavlus Ibtido 3:17-19 ni nazarda tutgan.. Bu — mavjudotning ixtiyori bilan emas, balki Xudoning ixtiyori bilan boʻldi. Shunday boʻlsa–da, mavjudot chirib–bitish qulligidan ozod etilib, Xudoning farzandlari bilan birga ulugʻvor erkinlikdan bahramand boʻlishiga umid bor#8:20-21 Shunday boʻlsa–da…umid bor — bu oʻrinda Pavlus Ibtido 3:15 da aytib oʻtilgan vaʼdani nazarda tutgan boʻlishi mumkin..

22Axir, butun mavjudot goʻyo toʻlgʻoq azobida, hozirga qadar oh–nola qilayotganini bilamiz. 23Nafaqat mavjudot, balki biz oʻzimiz — Xudoning Ruhi bilan yashash qanday ekanligini tatib koʻrganlar ham — ich–ichimizdan oh–nola qilyapmiz. Xudoning farzandlari qilib asrab olinganimizning toʻliq roʻyobga chiqishini hamda oʻladigan badanimizning chirib–bitishdan ozod boʻlishini intizorlik bilan kutyapmiz. 24Umidimizning roʻyobga chiqishini kutib, najot topganmiz. Koʻzga koʻrinib turgan narsa umid emas. Axir, kim koʻrib turgan narsani umid qiladi?! 25Agarda biz koʻrmaganimizni umid qilayotgan boʻlsak, buni sabr bilan kutsak boʻladi.

26Buning ustiga, ojizligimizda Ruh bizga madad beradi. Chunki biz qanday ibodat qilishni bilmaymiz, ammo Ruhning Oʻzi ifoda qilib boʻlmas oh–nolalar bilan biz uchun Xudo oldida shafoat qiladi. 27Insonlarning yuragini sinovchi Xudo Ruhning fikri nimada ekanligini biladi, chunki Ruh Xudoning irodasiga koʻra, Uning azizlari uchun shafoat qiladi.

28Biz bilamizki, Xudoni yaxshi koʻrganlarga hamma narsa yaxshilikka xizmat qiladi, chunki Xudo ularni Oʻzining maqsadiga koʻra, daʼvat etgan. 29Xudo ularni azaldan tanlab olgan edi va “Mening Oʻgʻlimga oʻxshagan boʻlsinlar”, deb oldindan belgilab qoʻygan edi, toki Oʻgʻil koʻp birodarlar orasida toʻngʻich boʻlsin#8:29 …Oʻgʻil koʻp birodarlar orasida toʻngʻich boʻlsin — Iso Masih oʻlikdan tirilib, Xudoning ulugʻvorligidan bahramand boʻlgan birinchi odam edi. Shunga oʻxshab, Masihga ishonganlar ham oʻlikdan tiriladilar va Uning ulugʻvorligidan bahramand boʻladilar (shu bobning 11–oyatiga va Filippiliklar 3:21, 1 Korinfliklar 15:20, 49 ga qarang).. 30Xudo oldindan belgilab qoʻyganlarni daʼvat etdi, daʼvat etganlarni oqladi, oqlaganlarni Oʻzining ulugʻvorligidan bahramand qildi.

Xudoning mehr–muhabbati

31Endi bunga nima deymiz? Xudo biz tomonda ekan, hech kim bizga qarshi tura olmaydi! 32Xudo Oʻz Oʻgʻlini ayamay, hammamiz uchun Uni fido qilgan boʻlsa, Unga qoʻshib, qolgan hamma narsani ham bizga ato qilmasmikan?! 33Xudoning tanlaganlarini kim ayblay olardi?! Xudoning Oʻzi ularni oqlaydi–ku! 34Bizni kim mahkum qilar ekan?! Axir, oʻlib, tirilgan, Xudoning oʻng tomonida#8:34 Xudoning oʻng tomoni — Zabur 109:1 ga qarang. Oʻng tomon muruvvat va baraka oʻrni deb hisoblangan. oʻtirgan Iso Masihning Oʻzi biz uchun shafoat qilmoqda–ku! 35Kim bizni Masihning#8:35 Masih — yunoncha matndan. Baʼzi yunon qoʻlyozmalarida Xudo. mehr–muhabbatidan ajrata oladi? Azob–uqubatmi, iztirobmi, quvgʻinmi, ochlikmi, yalangʻochlikmi, xavf–xatarmi yoki qilichmi? 36Muqaddas bitiklarda yozilgan–ku:

“Sen tufayli har kuni oʻlimga duch kelamiz,

Boʻgʻizlanadigan qoʻyday boʻlib qolganmiz.”#8:36 Zabur 43:23 ga qarang.

37Axir, bizni yaxshi koʻradigan Masih orqali hamma qiyinchiliklar ustidan butunlay gʻalaba qozonamiz. 38Men aminmanki, oʻlim ham, hayot ham, farishtalaru jinlar ham, hech qanday gʻayritabiiy kuchlar ham, hozirgiyu kelgusi hodisalar ham, 39balandliklaru chuqurliklar ham, yaratilgan bironta mavjudot ham bizni Rabbimiz Iso Masih shaxsidagi Xudoning mehr–muhabbatidan judo qilishga qodir emas.

Currently Selected:

Rimliklar 8: O‘zbMK

Highlight

Copy