ལེ་ཝིའི་ཚུལ་ཁྲིམས་ཀྱི་མདོ་ཞེས་བྱ་བའི་ངོ་སྤྲོད་མདོར་བསྡུས།
ཁ་བྱང་དང་ལོ་རྒྱུས་རྒྱབ་ལྗོངས།
ལེ་ཝིའི་ཚུལ་ཁྲིམས་ཀྱི་གཞུང་འདིའི་ཁ་བྱང་ནི་གྷི་རིག་གི་སྐད་དུ་བསྒྱུར་བའི་ཞལ་ཆད་རྙིང་པ་སྟེ་སིབ་ཐུ་ཨ་ཀྱན་ཏི་༼Septuagint༽ཞེས་པ་ལས་བྱུང་བ་ཡིན། དེ་ནི་ལེ་ཝི་པ་དང་འབྲེལ་བ་ཞེས་པའི་དོན་ལ་འཇུག ལེ་ཝིའི་ཚུལ་ཁྲིམས་ཀྱི་གཞུང་འདིར་ལེ་ཝི་པ་འབའ་ཞིག་གི་ལས་འགན་ཁོ་ན་བཀོད་ཡོད་པ་ཞིག་མིན་ཡང་། གུར་མཆོག་ལ་བསྙེན་བཀུར་ཞུ་བ་དང་ཞབས་ཕྱི་སྒྲུབ་པ་གཞིར་བཞག་ནས་མིང་དེ་ལྟར་བཏགས་པ་རེད། ཨེ་ཅིབ་ནས་ཐོན་པའི་མདོ་ལས་གུར་མཆོག་ཅི་ལྟར་བཞེངས་པའི་སྐོར་བསྟན་ཡོད་པ་དང་། ལེ་ཝིའི་ཚུལ་ཁྲིམས་ལས་གུར་མཆོག་ལ་བསྙེན་བཀུར་ཞུ་བའི་བཀའ་ཁྲིམས་དང་ལུགས་སྲོལ། ཡང་དག་པའི་མཛད་སྒོ་དང་ཀུན་སྤྱོད་ཕྱོགས་ཀྱི་བཀའ་ཁྲིམས། ཉིན་དམ་པ། ངལ་གསོ་ཡོངས་སུ་རྫོགས་པའི་ལོ་དང་དགའ་སྟོན་གྱི་ལོ་བཅས་ལ་ལམ་སྟོན་གནང་ཡོད་པ་རེད།
ཡི་གེར་འགོད་མཁན་དང་འགོད་དུས།
ལེ་ཝིའི་ཚུལ་ཁྲིམས་ཀྱི་ལེའུ་དང་པོའི་ཚིག་རྐང་དང་པོ་ནས་བཟུང་ལེ་ཝིའི་ཚུལ་ཁྲིམས་ཀྱི་གཞུང་འདི་ནི་དཀོན་མཆོག་གིས་མོ་ཤེ་ལ་ཐད་ཀར་གནང་བའི་བཀའ་ཡིན་ཞེས་གསུངས་ཡོད། གཞུང་འདི་ལས་དཀོན་མཆོག་ཡ་ཝཱེས་༼དཀོན་མཆོག་ཡ་ཝཱེ་ཞེས་པ་དཀོན་མཆོག་གི་མཚན་ཡིན།༽མོ་ཤེ་ལ་བཀའ་གནང་བའི་སྐོར་ཐེངས་ལྔ་བཅུ་ལྷག་ལ་བརྗོད་ཡོད། མོ་ཤེ་ཡིས་གཞུང་འདི་ཡི་གེར་བཀོད་པའི་ལོ་ཚིགས་ནི་སྤྱི་ལོ་སྔོན་གྱི་1446ནས་1406བར་ཡིན་པར་གསུངས།
བརྗོད་སྙིང་དང་གསུང་འཕྲིན།
ལེ་ཝིའི་ཚུལ་ཁྲིམས་ཀྱི་བརྗོད་བྱ་གཙོ་བོ་ནི་དམ་པ་ཡིན་ཏེ། དཀོན་མཆོག་གི་དམ་པ་དང་མིའི་རིགས་ཀྱི་དམ་པ་ཡིན། ལེའུ་བཅུ་གཅིག་པའི་ཚིག་རྐང་བཞི་བཅུ་ཞེ་ལྔ་ལས་དམ་པའི་སྐོར་གྱི་བཀའ་འདི་ལྟར་གསུངས་ཡོད་དེ། བདག་ནི་དམ་པ་ཡིན་པའི་ཕྱིར་ཁྱོད་ཀྱང་དམ་པ་ཡིན་དགོས་ཞེས་པའོ། །གཞུང་འདིའི་ནང་གི་བཀའ་དང་ཁྲིམས་རྣམས་ཡེས་ར་ཨེལ་པ་རྣམས་ཀྱིས་དཀོན་མཆོག་ལ་བསྙེན་བཀུར་ཞུ་བ་དང་དཀོན་མཆོག་གི་འབངས་མི་དམ་པ་བཞིན་འཚོ་བ་རོལ་བའི་ཆེད་དུ་གནང་བ་ཡིན། གཞུང་འདིའི་ནང་གི་བཀའ་ཁྲིམས་ལ་ལ་མཆོད་པ་འབུལ་བའི་སྐོར་དང་། ལ་ལ་ཉིན་རྒྱུན་གཙང་མ་བྱེད་པའི་ལས་དོན་གྱི་སྐོར། ཡང་ལ་ལ་ཁྱད་པར་ཅན་གྱི་ཉིན་མོ་བརྩི་སྲུང་བྱེད་དགོས་པ་སོགས་ཀྱི་སྐོར་ཡིན། དེ་ལས་གཞན་དཀོན་མཆོག་གིས་ལེ་ཝི་པའི་མཆོད་དཔོན་རྣམས་ལ་མཆོད་པ་འབུལ་ཚུལ་དང་ཁོང་གི་བཀའ་ཅི་ལྟར་ལག་བསྟར་བྱེད་སྟངས་སྐོར་དམིགས་བསལ་གྱིས་གསུངས་ཡོད།
འཆར་ཟིན།
1. མཆོད་པ་འབུལ་བའི་བཀའ་དང་ཁྲིམས་ཀྱི་སྐོར། ༼ 1:1-7:38 ༽
2. ཨ་རོན་དང་ཁོང་གི་བུ་རྒྱུད་རྣམས་དཀོན་མཆོག་གི་མཆོད་དཔོན་ལ་བསྐོས་པའི་སྐོར། ༼ 8:1-10:20 ༽
3. ཅི་ལྟར་དམ་པར་སྤྱོད་པའི་སྒྲིག་ཁྲིམས་ཀྱི་སྐོར། ༼ 11:1-15:33 ༽
4. སྡིག་པ་བཤགས་པའི་ཉིན་མོ། ༼ 16:1-34 ༽
5. ཁ་ཡོད་ལག་ཡོད་ཀྱིས་དམ་པར་སྤྱོད་དགོས་པའི་སྐོར། ༼17:1-22:23 ༽
6. ངལ་གསོ་བའི་ཉིན་མོ་དང་གསོལ་སྟོན། དུས་ཚིགས་བཅས་དང་འབྲེལ་བའི་ཁྲིམས་ཁ་ཤས། ༼ 23:1-25:55 ༽
7. དཀོན་མཆོག་གི་བྱིན་རླབས་འཐོབ་པའི་ཆ་རྐྱེན་སྐོར། ༼ 26:1-27:34 ༽
