1 Koronti 9

Nangang fanduwangu n ti chi a no dakanitu

1Mi̱n n newe ki̱ni da yinang kawurenga? M mi̱n n ke fanduwa? Mang kubu Yesu Tewuduwa? Nangang mangu n ke chi a yo chi̱n ta yim Tewuduwenga? 2Ka we bi̱kamu m mi̱n n ke fandu Yesuwe, we di̱ chi̱ne m mi̱n fandu ko di̱ne n ti̱n ta medu ta ma di̱mwaru tiko m mi̱n naba di̱mware Tewuduwe. 3Wu nang soku durang mangu, we bi̱bu ki̱fwa bwila we du mi̱ni̱mu. 4Yoye a ne dawe nang chadu, nang nodu we loni chiya?

5Yo bi̱kamu fandubu n ti kebu bi̱wuwiye Tewuduwe mu n ti Kefas (Biti̱r)#9:5 Biti̱r: M Biti̱r nang Kefas ki̱ni yii Aramaya, aya m Biti̱r a yi ni̱bu Yelenamu. Yii Yelename a la chi ki̱ni dukanu we ki̱dang kangu. a yikan ki̱ni nati̱bu chime, a dabu m ni̱n nang yika ti̱ni ki̱na? 6Ka a mwintuwe m mi̱n n ti Barnaba nang bau wa̱re nang makan yiniya?

7N wure ka ma nangang ni̱bu ki̱rangmu yinu ka fe dutu chiye? N wure ka su ku yinabe, a ne chau ti̱kulankite? N wure ki̱ni ki̱ran tanti̱kaiyin a ne no ya̱me? 8Mi̱n fwadu ki̱ni kamaku niyanga? Yilangu a fwabi yikonga? 9Di̱ne a mwal we yilang Musangu ko, “Bwadu tangka nanga mi̱nu sumbi̱ru we ki̱danguki̱ma nangangu.” N Kwama ki̱to ka tanti̱kaiya? 10N ki̱n a fwabu n ti chi̱ni ti̱nti̱na? Ki̱kumang ni̱bu a mwal di̱ne chi̱ni. Di̱ne a dakan nii ki̱su ti̱me n ti wu ki̱kade, ka chadu we nangang kuwangu. 11Yo kwer nang fwa ya̱m bi̱li̱mu a le ni̱tu chinte, ka kaddu ki̱ni ki̱kwi ka ni̱n yiu chabti̱tu ka maka ni̱nu a bwite. 12Ka bi̱kam ni̱bu ki̱ni da ka madi ye, n ni̱n fal nang labu chi ki̱ni da wu nang mandi yikonga?

Ki̱ni yiko, nang mabu nangangu ki̱ni wu da ko a mwintuwe ta ni ni̱n chi, ni̱n mu ni̱ru ki̱ni ka ti̱ti̱le chiye n ti ki̱ku nang bedu ki̱ni chi ka yo nangang Masiyangu ka ki̱ladi kutenge. 13Yoye ta yimbu tiko, ni̱bu ki̱ma nangang a kan Kwamani̱mu, nang fi ka chan chabtu chiya? Yinu bi̱bu ki̱ma nangang a se Kwamamu, nangti̱ fi n chi ki̱yaan ki̱ti̱me, 14We yiko, n Tewuduwe a ni da ko ni̱bu ki̱ma di̱mwar ya̱m bi̱li̱mi̱mu a chau we chi ni̱bu a mur di̱ne nangang Kwamange.

15Aya mang bunti̱bu wuka da we dati yiyu, ti̱nti̱ne mang mwalbu di̱ne ke ni̱bu a mami yiko, bunge bwa, mang babu wuka ni ka yodu ne mang ngau kwiye ki̱ni di̱mwar ya̱m bi̱li̱mi̱nu. 16A ne mang ngau kwiye we ti̱tu di̱ne mi̱n ma di̱mwar ya̱m bi̱li̱mi̱ne, aya a dakan mang ma nangangu. A noi ka n ko mi ne mang ma nangang Kwamange.

17Ka no n kur a ni̱r mi̱n mi mang ma nangang ki̱ke, a no a da ni̱bu ka feyu. Aya n Kwama a suti we ki̱ke ko a yo mi̱n ma nangangu. 18Yoye ki̱ti̱me mi wure ni? Ki̱ti̱me mi ka mang ma di̱mwar ya̱m bi̱li̱mi̱ne, m ma li̱mang. Mang mabu nangangu ki̱ni dami kwang we nangang di̱mwar ya̱m bi̱li̱mi̱nu.

19Kasi ki̱ku m mi̱n n ke ka̱be wuka niyangu, m mar dur mi̱nu ka̱be we ni̱bi kwang. M ma ying ke n wuwe ni̱bu, m be ki̱ni chi a di̱Yesuwe. 20Yo m mi̱n n ti ni̱bu Yafudam, mi̱n mar yimiyu yinang Yafuda ke n wuwe chi nabwen. We bi̱bu ki̱yadu we yili̱n Musati̱mu, mi̱n ma ti̱ni yiko kasi ki̱ku mi̱n n newe wume yilangengu aya ke n wuwe chi bi̱bu ki̱yadu we wume yilangemu. 21We bi̱bu a yabu we wume yili̱nemu, n kau yinang chi ti̱n, ma mati̱bi yiko. Kasi ki̱ku n yim yilang Kwamangu we dur mi̱nangu, we mi̱n bunti̱ chi m Masiya a fwaatu ke n wuwe bi̱bu a bunti̱bu yili̱ni̱mu.

22We bi̱bu keku bi̱yili̱mang chiyangu a ki̱tani̱mu, mi̱n ma ti̱nu yinangu m mi̱n we ti chiyang ke wuwe chi. M mi̱n yinang ki̱di̱ke we ti̱be kwa̱li ti̱te di̱ne ke n chi a ya yuku ka no we fwede. 23Mi̱n ma di̱mwar di̱di kwang di̱ne ke ni̱bu nabwen a ke bi̱yili̱mu we ya̱m Masiyamu. Ke n yati̱ ki̱ti̱me delake we di swan kute.

24Yoye ta kubu yo ni̱bu ki̱swa̱ka̱ bananiya? N kawure ki̱funti̱bwi ka su keko, nii wiin beka ya ki̱ti̱me werke. A le n kawure a nang wulu ke a be, a ya ki̱ti̱me werke.

25Ni̱bu ti̱ka̱limu ki̱miyadu yinang. N chi ki̱madi ying ko ke chi ya ki̱ti̱me werke wu ka kaiyadu kayane, Aya n chi̱ni ni madu ke ni ya ki̱ti̱me werke wu a ne kaiyadu kaiyane. 26Di̱ne yiko, banang mangu n ke ki̱kusan, di̱kulan mi̱nu n ke di̱kusi̱n. 27Aya mi̱n ni bwi miyu riye yinang ka̱be ke a ma chi mi̱n badde, di̱ne ke ki̱la n fi̱tan a kuteng ki̱ku ni̱bu bi̱bu a swi a di̱ne di̱mwar mi̱ni̱mu.

Currently Selected:

1 Koronti 9: Tula

Highlight

Copy

Compare