1 Koronti 6

Maru keme kemo we

1Ka wuka nii we tibe chi̱n ki̱baddu ka mar keme kekonge, a kabbu chi dibwi yo ni̱bu ti̱ti̱nimu ka kaba ki̱mi̱na? A labi̱ chi ni̱bu bunti̱ki̱m ka kabada? 2Ta yimbu tiko, ni̱bu bunti̱ki̱mu nang bi̱bu ka kaba ti̱ti̱nitu mi̱ndi̱ma? Ka yikonge, nang wu neta medu ta mwata ya̱m ni̱bu bunti̱ki̱ma?

3Ta yimbu tiko, n chi̱ni ni kaba ni̱bu ti̱tumbi̱ri Kwamamu mi̱nda? Yinu ti̱tu a ti̱ti̱nitu nang ti̱tu ka bwa chi̱ni ta? 4Ka n chi̱n ki̱ni beti̱ ya̱miyu ki̱bwa chiniye, amayire ti̱yikan ni̱bu a yimbu ya̱m Kwamame, bi̱bu n ke ti̱kan chi we kakku ni̱bu bunti̱ki̱me? 5N fwa chimi̱n bi̱bu ke ti̱nwe dibwi, yoye ti̱yidu tiko a ne nii kasikasiye we tibe chi̱n wu ka doka ni̱ba?

6Aya n ti ki̱ku yikonngu ki̱la naba bunti̱ke ki̱mar keme keko a kakku ni̱bu a yimbu Kwamam. 7Yinangu ti̱mar keme kebi̱ chimangu, ki̱yung ki̱taku changu, a bunge ta dudu ni̱bu a sul chi̱n. Ta ma bwanu kasi no ni̱bu a dang chi̱n chitu a no dakan ta yaditu. 8Da̱ng, n ti̱n n ti̱fwan ti̱sul yichiyu. Ti̱tau chi nii a no dakan ka yade, ti̱madi ying ta bwinbi̱ kebu chim.

9Yoye ta yimbu tiko ni̱bu a tumbu yilemu a ne le yaa Kwama? Nii a buti̱du chi̱nwe. Ki̱kulbu n ti bi̱bu ki̱sii di̱yor n ti bi̱bu ki̱babba nati̱bu ni̱bi̱mu n ti ti̱bani kwartabitu n ti kwartabu ki̱dadu n ti kwartabi̱mu, 10n ti dabi̱kumu n ti ni̱bu ki̱dwankimu n ti ni̱bu ti̱norani̱mu n ti bi̱bu ki̱tura ni̱bi̱mu n ti bi̱bu ki̱ful ni̱bi̱mi kwang a ne swedu n ti bi̱bu n Kwama ka ma mati̱n chimu.

11Yo ferediye, bi̱kam chimu a no yiko, aya ki̱ka̱ngu n chi a ya nuraki̱ wauwadu, ti̱le fa̱la̱ng Kwamang, ti̱kau bi̱bu a newe ki̱ni ki̱leti we kakku Kwamam we di̱n Tewuduwe Yesu Masiya n ti Fi̱ki̱m Kwamamu.

Ti̱dela Kwama ki̱ni bwiti chiyu

12Bi̱kam chimu ka medu ka yidu ko, “Kwama a du ko m ma kanang ti̱ti̱le chiye,” Aya n ke kanang chiye a da “A kemi ko m ma kanang ti̱ti̱le chiye,” Aya a ne mang kau ka̱be ti̱kan chiye. 13Bi̱kam chimu ka medu ka yidu ko, “Chabti̱tu di̱ne fur, yinu furu di̱ne chabte.” Ki̱kumang n Kwama ka tabi̱du ki̱ni ya̱m chabti̱mu n ti furu yo ka ni chi̱ni bwi yifwi chireye. Bwi chireyu n ke di̱ne ti̱kuliye, aya di̱ne delaku Tewuduwe yinu n Tewuduwe ki̱to bwiyu.

14N Kwama a kuki̱ Tewuduwe n Yesu we kwa̱miyu, we yiko ka kukuti̱ chi̱ni ki̱ni dukan ki̱nu. 15Yoye ta yimbu tiko bwiyu chiyu fanti we bwi Masiya? Ko bayim! A ne mang da̱u bwi Masiyayu manni̱n mang ti̱bani?

16Ta yimbu tiko nii wu a kwarka bwikiyu n ti di̱bane bwi chiyu a kabi wiina? Nangki̱n a fwa ko, “N chi burau aya a kau bwiyi wiin ki̱ka̱ngu.” 17Aya nii wu a di̱ka yikiyu n ti Tewuduwe, a kabi wiin we Fi̱ki̱mu.

18Ti̱wul mi̱n we ti̱kulitu! Kanang wuwule ki̱le nii ki̱made a twaibu bwiyu, aya nii ki̱ma ti̱kuliye ki̱kai bwiki. 19Ka ta yimbu tiko bwi chiyu se Kwama wu a Fi̱ki̱m Kwamame, bi̱bu a be a di̱Kwamama? Ti̱nti̱ne n ti̱n ta swebu dur chi̱n. 20We bwa Bwe ko, a ta̱n chi̱n, di̱ne yiko ti̱dela Kwama ki̱ni bwiti chiyu.

Currently Selected:

1 Koronti 6: Tula

Highlight

Copy

Compare