1 Koronti 12

Ki̱ti̱nti yiyu a Fi̱ki̱mi

1Ki̱ka̱ngu kebu mi̱m, mang mwal chimi̱n ki̱ti̱ntiyu Fi̱ki̱m Kwamam ki̱nikadiyu. Mang babu ta kadu ki̱ni kwalan swaanke. 2Ti̱yim we ki̱dangu n ti̱n no a yikai kuuti n ti̱n n ke ni̱bu bunti̱ki̱mangu, ni̱bu a butu chi̱n, ti̱le ti̱sii ti̱yobi ti̱tu a ne ti̱kuri we. 3Di̱ne yiko mi̱n baddu ta swaanu tiko ni wu Fi̱ki̱m Kwamam ki̱bunti̱ne a ne fwadu ko, “N Yesu a bwilan!” Ti̱nti̱ne a ne nii wu ka medu ka yidu ko, “N Yesu Tewuduwe we,” Ka n ke wu Fi̱ki̱m ki̱ti ki̱mi̱n kake.

4Ki̱kumang, ki̱ti̱ntiyu Fi̱ki̱m Kwamam ki̱nikadiyu we dangtidangti. Aya ki̱ni kwang ki̱chiredu a Fi̱ki̱m Kwamam. 5Wa̱ri yiyu a nangayu we dangtidangti, aya Tewuduwe wu ni maki̱mi̱nde wiin. 6Nangi̱ntu we dangtidangti, aya Kwama wiin wu ki̱ni kawure da make ki̱ni kwang. 7N Kwama ki̱ni kawure di̱mwal di̱du ki̱yung Fi̱ki̱m bi̱bu wauwadi̱mu we bwi kiye, di̱ne ke n kawure a ya makaku.

8Wuka ki̱ya ki̱ti̱me wu ka miya ni̱bu yingku chiimmi̱nde, aya wuka ki̱ya ki̱ti̱me wu a yingke we Fi̱ki̱m Kwamamu. 9Wuka a ya ki̱ti̱me wu a keku bi̱yili̱mange we Fi̱ki̱m bi̱bu, wuka a ya ki̱ti̱me wu a beku ni̱bange we ka Fi̱ki̱m bi̱biini̱m. 10Wuka a ya ki̱ti̱me wu a maku chi ka̱ta̱kiyange, wuka fakui a swaanku duum Fi̱ki̱m tiim, wuka a yingku ya̱ma̱ng ki̱ni yiini ni̱bi, wuka ki̱medu ki̱fwa ni̱bu mi̱n chi wuka nii a fwa ki̱ni wuka yiiye. 11Ti̱chitu wu kwang ki̱chiredu a Fi̱ki̱m bi̱biini̱m, ki̱keradu yinangu n kawure ki̱badangu.

Bwiyu ki̱ni fantiyu nabwen

12Yinangu bwi niyu we ki̱ni di̱mbi̱ri̱mangu, ki̱ni fantiyu nabwen, kasi ki̱ku fantiyu nabwenangu, bwiyu ki̱ni wiin. Nang tiyangu m Masiya we mi̱nangu. 13Di̱ne n chi̱ni ki̱ni kwang ni ma batisma a Fi̱ki̱m Kwamam ki̱ni wiin, kasi no m mun n wu ni̱bu Yafudam, ka ni̱bu Yelena, ka ka̱be ka bwe lo ki̱ni kwang, ni no ki̱fi̱be Fi̱ki̱me ki̱ni wiin.

14Ki̱kumang bwiyu ki̱ni fantiyu dangtidanngti, a newe fi wiin. 15Ka nangu a no fwa ya̱m ko, “Yo mi̱n n ke fa̱la̱nge, m mi̱n n ke fi we bwiye,” ti̱tu a ne yodu n ki̱n a ne kau fi we bwiyu. 16Yiko ti̱n, ka ki̱tele a fwa ya̱m ko, “M mi̱n n ke nu, di̱ne yiko m mi̱n n ke fi we bwiye,” ti̱tu a ne yodu n ki̱n a ne kau fi we bwiyu. 17Ka no bwiyu kwang kana nuwe, a no mang nwe chiti wule? Ka no bwiyi kwang Ki̱telenge, a no mang num chiti wule?

18Da̱ng n Kwama a yo ka nang wuwule fiye we bwiyu yinangu n ki̱n a ku a daang. 19Ka no bwiyi kwang fi wiine, no yikayu bwi a fi̱re? 20Aya da̱ng fantiyu we nabwen, aya bwiyu ki̱ni wiin. 21A ne dawe nu ka yi fa̱la̱ngu ko, “A ne lwangang mwang we n ti mi̱ne we,” Ka duru ka yi naniyu ko, “A ne lwangang mwang we n ti mi̱ne.”

22A bwinti̱ yiko, ki̱la fantiyu ni kudu yinangu a ne dukan weyu nang yiyu a ki̱la a la chi ki̱ni nangayu. 23Fantiyu ni kudu yinanga lambu yikaiyu ki̱ni ki̱siyangiyu ki̱ya ri̱kaku ki̱la chi. We yiko ti̱n n ti fantiyu a lebi̱ da̱ngkiyu, ki̱ya doku ki̱yilang. 24Fantiyu a le yinangiyu a babu kaang doku. Aya n Kwama a do bwiyu, a yo fi wukuse a la chi ki̱ni nangangu. 25Ke kwalan kunkake a ledu bwiyu we, a ya fantiyu a maka yichiyu, duum makaki̱mu ki̱ni wiin.

26Di̱ne yiko ka wuka fi a nwe burange, fantiyu kwang ki̱nwe burangu ware, ka wuka fi a ya werke, fantiyi kwang ka ma ti̱mi̱lantu a fi wiine.

27Di̱ne yiko, n ti̱n bwi Masiya, ka nang wuwule chi̱ne fi we bwiyu. 28We kwa̱l ni̱bu bunti̱ki̱mi̱mu, n Kwama a yo fandubu a fi wu kakke, yinu a ni fa̱kubu bi̱bu fi wu robe, a ni bi̱bu ki̱miya chimu fi wutare, yinu a bunti̱ni ki̱ni bi̱bu ki̱ma chi ka̱ta̱kimu, yinu bi̱bu ki̱be buramu, yinu bi̱bu ki̱ma makaki̱mu, n ti bi̱bu ki̱to nangi̱n ni̱bi̱mu n ti bi̱bu ki̱fwa ya̱mi yiini ni̱bi̱mu.

29Ni̱bu bunti̱ki̱mi kwang fanduba? Ka fa̱kubu? Ka ni̱bu miya ki̱ma? Ka n chi ki̱ni kwang ki̱ma chi ka̱ta̱kiya? 30N chi ki̱ni kwang ki̱ni ki̱ti̱me wu ki̱be buri̱na? N chi ki̱ni kwang ki̱fwa ya̱mu ki̱ni yiini ni̱biya? Ka n chi ki̱ni kwang ki̱fwa chi ni̱bu a fwa yii ni̱ba? 31We fi, ti̱yo ni̱ru a ki̱ti̱ntiyu a la chi. Mang yung chi̱n wa̱re wu a la chiye.

Currently Selected:

1 Koronti 12: Tula

Highlight

Copy

Compare