1 Koronti 10

Ki̱kure a siiku ti̱yobiyang

1Da̱ng mi̱n baddu mang fwa chimi̱nu Kebu mi̱m, tukebi̱ chi̱remu ki̱ni kwang a ya yayu we di̱twinu, n chi ki̱ni kwang a bunti̱ la rude. 2N chi a ma batisma we di̱twinu n ti la rude di̱ne n chi ki̱bunti̱ Musa. 3N chi ki̱ni kwang a chab chabtu Tewuduwe ti̱tu a Fi̱ki̱mitu.

4N chi ki̱ni kwang a no mwe wu a Fi̱ki̱me. N chi ki̱ni kwang a no mwe we kale wu ki̱yikadu ki̱ni chiye, ka nang chikiye ni fwa Masiya. 5Ki̱ni yiko, n Kwama a nwebu ta̱ma̱ng ki̱ni chi nabwen, di̱ne yiko a chi̱be bi̱kamu we di̱chi̱lanchangi̱n.

6Ti̱tu ki̱wu ni̱mi̱n ki̱tele di̱ne ke ni madu chi ti̱bwilatu n chi a maatu we. 7Ti̱kaddu ni̱bu ki̱sii di̱yor we yinangu bi̱kam chimu a kabangu. Yinangu a mwal ko, “Ni̱bu a swe, a chau, a no, a swana ti̱ni yilang, ki̱ma dwadi ni̱bu di̱yore.”

8Nii kedu da ti̱kuliye we, yinangu bi̱kamu a ma, a yo ni̱bu kuniritu wan turau chiri yitta a bwaran di wiin. 9Ni swedu Tewuduwe Yesu Masiya we, yinangu bi̱kamu a mangu, a yo sooti a chi̱be chi. 10Ni madu bi̱ngaiyu we, yinangu bi̱kamu a mangu, a yo naba di̱tumbi̱re chike a chi̱be chi.

11Ti̱chitu wu a fwe n ti chi ki̱ni kwange, a kau ni mi̱n ki̱kure, n chi̱ni bi̱bu di swan kute ka ridu a di̱chi̱niyemu. 12Di̱ne yiko, ka m mun wu mun kamadu mwiko n ti ki̱ri̱nge, ti yinang ke ki̱la m mun n yar. 13Tabi̱duwe mwi ka nang ki̱ki̱le sweku ki̱ku a yanange, ni̱bu a bwarani̱mu a tu a twaitwaiye, n ke chi ti̱fwi. N Kwama a ne ka du chi̱nu ko sweki̱ku a la dukan chi̱nu. N ki̱n ka ma wa̱re wu ta chiru we swa̱ka̱ki̱ke.

14Di̱ne n ti̱n bi̱bu mang mi̱lani̱mu, tiko siiku di̱yor rangu. 15Mi̱n fwa ya̱mu n ti chi̱n di̱ne n ti̱n yinang ni̱bu bi̱yili̱m, ti̱da̱ng chi mi̱n fwade n ti̱n ti̱fwan. 16Yo ni no mwe ki̱danne, wu a dela ke ki̱ni sa̱ne, mi ka ki̱yungdu n chi̱ni wiin we ki̱tuum Masiyame? Ki̱danne ni wuladu ni kerade n ke wu ki̱yodu n chi̱ni a fi wiine we bwi Masiya ya? 17N chi̱ni kwang ni chau a ki̱danne wiin, ti̱tu a yung n chi̱ni a bwi wiin.

18Ti̱da̱ng ni̱bu Yisrelamu, bi̱bu ki̱chadu a niku ki̱tuumangi̱mu, n chi a newe fi wiine yo ki̱chau ki̱danne nike we se Kwama? 19Mi̱n fwadu mi wureni we fi? Mi̱n yidu mi ti̱yobitu ni̱bu di̱yori̱m ki̱siiditu, Kwamati yiyili yinu ti̱nti̱ne niku chidu ki̱ni ki̱kwiya? 20A newe yiko, a newe ko bayim, mi̱n yung chi̱nu we fi mi niku ki̱tumang chiyangu ki̱ni ki̱fi̱bti n ke Kwama. Di̱ne yiko, Mang babu ta kau fati̱bu ki̱fi̱bti̱m.

21A dakabu ta no chitu we sa̱ne Kwama yinu ki̱la ta no ti̱nu we sa̱ne ki̱fi̱btiye. Ti̱nti̱ne a ne dawe ta chadu we kakku Tewuduwe, yinu ta chau ti̱nu we wu a ki̱fi̱btiye. 22A mayire ni yo Tewuduwe mi̱n ki̱fwiniye? Ti̱ kamadu ni la Kwama ki̱ni dukana?

Ma kanang ti̱ti̱le chiye ti̱tu ka ni Kwama dwiyenitu

23A ke nimi̱n kanang ti̱ti̱le chiye, aya n ke kanang chiye ka ma nangang. A ke nimi̱n kanang ti̱ti̱le chiye, aya n ke kanang ti̱ti̱le chiye ka bedu ki̱ni mukku. 24Kuru ka dur mun we, nang kurti̱ kebi̱ mumu.

25Ta medu ta wu ka nang wuwule ki̱duum nami̱me we fi ni̱bu ki̱ miin nam we kwa̱ma̱re, ti̱bi̱du we ti̱wu nam di̱yora ka n ke wu a di̱yora? Ke ti̱bwa̱u ni̱ru we ti̱kurantu. 26Ya̱m Kwamamu a fwa ko, “Ti̱ti̱nitu n ti kwa̱li̱n chi̱nu a murenu n ti̱u Tewuduwe.”

27Ka wuka ni wu a mabu bunti̱ke a yali̱n ko m be ti̱chau chabtu, yinu n ke ti̱n n yange, ti̱chau kanang ti̱ti̱le chiye ti̱tu a be ki̱nitu, ti̱bi̱du chi we di̱ne ti̱kurante. 28Aya ka ti̱ya mwarangu ko, “Nam wu n wu butu ka di̱yore, ti̱wuduwe, di̱ne ni wu a fwami̱ne, a le mwang ri̱ka ya̱m ki̱mu.” 29Mi̱n fwa ti̱kuran mitu, n ke ti̱chintu. Wuka chi̱n ka medu ka yidu ko amayire ti̱kuran wuka ni ka mwatiye? 30Chi mang chau mang wanati̱ Kwama, di̱ne wule wuka ni ka swa̱ba mi chi mang chau mang wanti̱ Kwamate?

31Kanang ti̱ti̱le chiye ti̱tu ti̱maditu n ti ti̱tu ti̱chaditu n ti̱ ti̱tu ti̱noditi kwang, ti̱ma chi ka ni Kwama dwiyene. 32Ti̱yodu ki̱le we a ni̱bu Yafudamu, ka Yelena ka ni̱bu bunti̱ki̱ Kwamame. 33Ti̱ma yinangu mi̱n madangu, mi̱n funti̱bwi mi ke n kawure a nwe ta̱ma̱ng mangu, mang mabu di̱ne yimi m mi̱kun aya di̱ne ni̱bu nabwen ke n kawure a ya yuku.

Currently Selected:

1 Koronti 10: Tula

Highlight

Copy

Compare