ꠁꠘ꠆ꠎꠤꠟ ৬: ꠞꠥꠝꠣꠘ 9
9
ꠡꠞꠤꠅꠔꠦ ꠅꠙꠣꠞꠉ ꠅꠁꠟꠦꠅ ꠛꠘꠤ ꠁꠍꠞꠣꠁꠟꠞ ꠢꠦꠡ ꠞꠇ꠆ꠇꠣ ꠁꠝꠣꠘꠦ (৯:১-১১:৩৬)
ꠀꠟ꠆ꠟꠣꠞ ꠙꠍꠘ꠆ꠖ ꠀꠞ ꠅꠙꠍꠘ꠆ꠖ
1ꠀꠝꠤ ꠀꠟ-ꠝꠍꠤꠞꠦ ꠡꠣꠇ꠆ꠇꠤ ꠞꠣꠈꠤꠀ, ꠄꠇ꠆ꠇꠦꠞꠦ ꠢꠣꠍꠣ ꠇꠕꠣ ꠇꠁꠞꠣꠝ, ꠀꠝꠣꠞ ꠛꠤꠛꠦꠇꠦꠅ ꠙꠣꠇ ꠞꠥꠢꠥꠞ ꠟꠉꠦ ꠅꠁꠀ ꠅꠃ ꠡꠣꠇ꠆ꠇꠤ ꠖꠦꠞ। 2ꠛꠘꠤ ꠁꠍꠞꠣꠁꠟꠞ ꠟꠣꠉꠤ ꠀꠝꠣꠞ ꠛꠠ ꠀꠚꠍꠥꠍ ꠀꠞ ꠡꠤꠝꠣꠢꠤꠘ ꠇꠡ꠆ꠐ ꠟꠣꠉꠦꠞ। 3ꠢꠣꠄꠞꠦ ꠢꠣꠄ, ꠀꠝꠤ ꠟꠣꠘ꠆ꠘꠔꠤꠞ ꠇꠣꠔꠣꠞꠅ ꠉꠤꠀ ꠀꠟ-ꠝꠍꠤꠞ ꠉꠦꠍ ꠕꠣꠇꠤ ꠢꠞꠣꠁꠟ ꠅꠁꠀꠅ ꠎꠥꠖꠤ, ꠀꠝꠣꠞ ꠎꠣꠔꠤꠞ ꠜꠣꠁꠀꠁꠘ ꠛꠘꠤ ꠁꠍꠞꠣꠁꠟꠞꠦ ꠛꠣꠌꠣꠁꠔꠣꠝ ꠙꠣꠞꠔꠣꠝ। 4ꠀꠟ꠆ꠟꠣꠄ ꠔ ꠛꠘꠤ ꠁꠍꠞꠣꠁꠟꠞꠦ ꠔꠣꠘ ꠘꠤꠎꠞ ꠀꠅꠟꠣꠖꠞ ꠄꠈꠔꠤꠀꠞ ꠖꠤꠍꠂꠘ, ꠔꠣꠘ ꠡꠣꠘ-ꠔꠎꠟ꠆ꠟꠤ ꠖꠦꠈꠣꠁꠍꠂꠘ, ꠔꠣꠘ ꠟꠉꠦ ꠝꠤꠟꠘꠞ ꠃꠍꠤꠟ꠆ꠟꠣ ꠅꠇꠟ ꠇꠣꠁꠝ ꠇꠞꠍꠂꠘ, ꠡꠞꠤꠅꠔ ꠘꠣꠎꠤꠟ ꠇꠞꠍꠂꠘ, ꠔꠣꠘ ꠄꠛꠣꠖꠔ-ꠛꠘ꠆ꠖꠦꠉꠤꠞ ꠡꠥꠎꠥꠉ ꠇꠞꠤ ꠖꠤꠍꠂꠘ ꠀꠞ ꠛꠃꠔ ꠟꠣꠈꠣꠘ ꠅꠀꠖꠣꠅ ꠇꠞꠍꠂꠘ। 5ꠢꠎꠞꠔ ꠁꠛ꠆ꠞꠣꠢꠤꠝ, ꠁꠍꠢꠣꠇ ꠀꠞ ꠁꠀꠇꠥꠛ ꠘꠛꠤ ꠀꠍꠟꠣ ꠛꠘꠤ ꠁꠍꠞꠣꠁꠟꠞ ꠝꠥꠟ ꠝꠥꠞꠛ꠆ꠛꠤ। ꠛꠣꠖꠦ ꠁꠍꠣ ꠀꠟ-ꠝꠍꠤꠅ ꠔ ꠞꠇ꠆ꠔ-ꠝꠣꠋꠡꠞ ꠛꠣꠄ ꠕꠣꠇꠤ ꠄꠞꠣꠞ ꠈꠣꠘ꠆ꠖꠣꠘꠅꠃ ꠎꠘꠝ ꠟꠁꠍꠂꠘ, ꠄꠁꠘ ꠢꠇꠟꠔꠣꠞ ꠃꠙꠞꠀꠟꠣ, ꠎꠥꠉꠦ ꠎꠥꠉꠦ ꠌꠤꠞꠇꠣꠟ ꠔꠣꠘ ꠔꠣꠞꠤꠚ ꠅꠃꠇ। ꠀꠝꠤꠘ।
6ꠢꠥꠘꠅ, ꠀꠟ꠆ꠟꠣꠞ ꠅꠀꠖꠣ ꠅꠇꠟ ꠅꠈꠘ ꠎꠦꠘ ꠛꠦꠇꠣꠝꠣ ꠅꠁꠉꠦꠍꠦ, ꠁꠟꠣ ꠇꠥꠘ꠆ꠔꠣ ꠘꠣꠄ। ꠇꠣꠞꠘ ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠎꠘꠝ ꠅꠁꠟ ꠇꠞꠤꠃ, ꠄꠞꠣ ꠢꠇꠟ ꠔ ꠀꠍꠟ ꠛꠘꠤ ꠁꠍꠞꠣꠁꠟ ꠘꠣꠄ। 7ꠢꠎꠞꠔ ꠁꠛ꠆ꠞꠣꠢꠤꠝꠞ ꠈꠣꠘ꠆ꠖꠣꠘ ꠇꠞꠤꠃ ꠔꠣꠞꠣ ꠎꠦꠘ ꠔꠣꠘ ꠀꠍꠟ ꠀꠅꠟꠣꠖ, ꠁꠟꠣ ꠇꠥꠘ꠆ꠔꠣ ꠘꠣꠄ। ꠛꠞꠋ ꠇꠤꠔꠣꠛꠅ ꠟꠦꠈꠣ ꠀꠍꠦ, “ꠔꠥꠝꠣꠞ ꠙꠥꠀ ꠁꠍꠢꠣꠇꠞ ꠈꠣꠘ꠆ꠖꠣꠘꠞꠦꠃ ꠔꠥꠝꠣꠞ ꠈꠣꠘ꠆ꠖꠣꠘ ꠇꠁꠀ ꠉꠘꠣ ꠅꠁꠛ।” 8ꠝꠣꠘꠤ ꠁꠍꠞꠣꠁꠟ ꠎꠣꠔꠤꠞ ꠝꠣꠎꠦ ꠎꠘꠝ ꠅꠁꠍꠦ ꠉꠔꠤꠇꠦꠃ ꠝꠘꠅ ꠇꠞꠤꠅ ꠘꠣ, ꠔꠥꠝꠞꠣ ꠀꠟ꠆ꠟꠣꠞ ꠀꠅꠟꠣꠖ ꠛꠘꠤꠉꠦꠍ। ꠈꠣꠟꠤ ꠀꠟ꠆ꠟꠣꠞ ꠅꠀꠖꠣ ꠝꠣꠚꠤꠇ ꠎꠦꠞꠣ ꠀꠅꠟꠣꠖ ꠛꠘꠍꠦ, ꠔꠣꠞꠣꠞꠦꠃ ꠁꠛ꠆ꠞꠣꠢꠤꠝꠞ ꠈꠣꠘ꠆ꠖꠣꠘ ꠢꠤꠡꠣꠛꠦ ꠉꠁꠘ꠆ꠘ ꠇꠞꠣ ꠅꠁꠛ।
9ꠛꠥꠎꠞꠣꠄ ꠘꠤ, ꠀꠟ꠆ꠟꠣꠄ ꠔ ꠢꠎꠞꠔ ꠁꠛ꠆ꠞꠣꠢꠤꠝꠞ ꠉꠦꠍꠦ ꠅꠃ ꠅꠀꠖꠣ ꠇꠞꠍꠟꠣ, “ꠍꠣꠝꠘꠞ ꠛꠍꠞ ꠅꠃ ꠌꠣꠘ꠆ꠖꠅ ꠀꠝꠤ ꠚꠤꠞꠤꠀ ꠀꠁꠝꠥ, ꠅꠃ ꠡꠝꠄ ꠔꠥꠝꠣꠞ ꠛꠤꠛꠤ ꠍꠣꠄꠞꠣꠞ ꠇꠥꠟꠅ ꠄꠇ ꠙꠥꠀ ꠕꠣꠇꠛ।” 10ꠀꠞ ꠅꠃ ꠙꠥꠀ ꠅꠁꠟꠣ, ꠀꠝꠞꠣꠞ ꠙꠥꠞ꠆ꠛꠙꠥꠞꠥꠡ ꠢꠎꠞꠔ ꠁꠍꠢꠣꠇ। ꠈꠣꠟꠤ ꠁꠈꠣꠘ ꠘꠣꠄ, ꠅꠃ ꠁꠍꠢꠣꠇꠞ ꠛꠤꠛꠤ ꠞꠦꠛꠦꠇꠣꠞ ꠙꠦꠐꠞ ꠎꠥꠠꠞ ꠙꠥꠀꠂꠘ ꠄꠇꠁ ꠛꠣꠚꠞ ꠀꠅꠟꠣꠖ ꠅꠁꠟꠦꠅ, 11-12ꠄꠞꠣ ꠝꠣʼꠞ ꠙꠦꠐꠅ ꠕꠣꠇꠣ ꠢꠣꠟꠔꠦ ꠎꠦꠛꠟꠣ ꠜꠣꠟꠣ-ꠛꠥꠞꠣ ꠇꠤꠌ꠆ꠍꠥ ꠇꠞꠍꠂꠘ ꠘꠣ, ꠢꠃ ꠡꠝꠄ ꠀꠟ꠆ꠟꠣꠄ ꠞꠦꠛꠦꠇꠣꠞꠦ ꠇꠁꠍꠟꠣ, “ꠔꠥꠝꠣꠞ ꠛꠠ ꠙꠥꠀ ꠔ ꠢꠥꠞꠥ ꠙꠥꠀꠞ ꠉꠥꠟꠣꠝ ꠅꠁꠛ।” ꠅꠘ ꠕꠣꠇꠤ ꠛꠥꠎꠣ ꠎꠣꠄ, ꠀꠟ꠆ꠟꠣꠄ ꠔꠣꠘ ꠝꠥꠘꠡꠣ ꠙꠥꠞꠣ ꠇꠞꠣꠞ ꠈꠤꠀꠟꠦ ꠝꠣꠘꠡꠞꠦ ꠙꠍꠘ꠆ꠖ ꠇꠞꠂꠘ, ꠇꠦꠃꠞꠞ ꠀꠝꠟꠞ ꠛꠣꠄ ꠘꠣ ꠌꠣꠁꠀ, ꠔꠣꠘ ꠘꠤꠎꠞ ꠙꠍꠘ꠆ꠖ ꠝꠣꠚꠤꠇ ꠛꠣꠍꠤꠀ ꠘꠦꠁꠘ। 13ꠄꠞꠟꠣꠉꠤꠃ ꠙꠣꠇ ꠇꠤꠔꠣꠛꠅ ꠟꠦꠈꠣ ꠀꠍꠦ, “ꠀꠝꠤ ꠔ ꠁꠀꠇꠥꠛꠞꠦ ꠝꠢꠛ꠆ꠛꠔ ꠇꠞꠍꠤ, ꠅꠁꠟꠦ ꠔꠣꠞ ꠜꠣꠁ ꠁꠡʼꠞꠦ ꠢꠞꠣꠁꠀ ꠞꠣꠈꠍꠤ।”
14ꠔꠦ ꠅꠈꠘ ꠀꠝꠞꠣ ꠇꠁꠔꠣꠝ ꠘꠤ, ꠀꠟ꠆ꠟꠣꠄꠅ ꠅꠛꠤꠌꠣꠞ ꠇꠞꠂꠘ? ꠘꠣꠃꠎꠥꠛꠤꠟ꠆ꠟꠣ, ꠝꠥꠐꠦꠃ ꠘꠣ! 15ꠀꠟ꠆ꠟꠣꠄ ꠢꠎꠞꠔ ꠝꠥꠍꠣꠞꠦ ꠇꠁꠍꠟꠣ, “ꠀꠝꠤ ꠎꠣꠞꠦ ꠈꠥꠡꠤ ꠖꠄꠀ ꠇꠞꠝꠥ, ꠀꠞ ꠎꠣꠞꠦ ꠈꠥꠡꠤ ꠞꠢꠝ ꠇꠞꠝꠥ।” 16ꠅꠘ ꠕꠣꠇꠤ ꠛꠥꠎꠣ ꠎꠣꠄ, ꠞꠢꠝꠔ ꠔ ꠇꠦꠃꠞꠞ ꠌꠦꠡ꠆ꠐꠣꠄ ꠛꠣ ꠁꠌ꠆ꠍꠣꠄ ꠝꠤꠟꠦ ꠘꠣ, ꠈꠣꠟꠤ ꠀꠟ꠆ꠟꠣꠞ ꠝꠦꠢꠦꠞꠛꠣꠘꠤ ꠕꠣꠇꠤꠃ ꠝꠤꠟꠦ। 17ꠀꠍꠝꠣꠘꠤ ꠇꠤꠔꠣꠛꠞ ꠀꠄꠀꠔꠅ ꠀꠍꠦ, ꠀꠟ꠆ꠟꠣꠄ ꠚꠦꠞꠣꠃꠘꠞꠦ ꠇꠁꠍꠟꠣ, “ꠀꠝꠤ ꠔꠥꠝꠣꠞꠦ ꠛꠣꠖꠡꠣ ꠛꠣꠘꠣꠁꠍꠤ, ꠎꠣꠔꠦ ꠔꠥꠝꠣꠞ ꠝꠣꠎꠖꠤ ꠢꠇꠟꠦ ꠀꠝꠣꠞ ꠟꠤꠟꠣ-ꠈꠦꠟꠣ ꠖꠦꠈꠤꠀ, ꠢꠣꠞꠣ ꠖꠥꠘꠤꠀꠁꠔ ꠀꠝꠣꠞ ꠘꠣꠝ ꠎꠣꠁꠞ ꠅꠄ।” 18ꠔꠦ ꠖꠦꠈꠣ ꠎꠣꠄ, ꠀꠟ꠆ꠟꠣꠄ ꠔꠣꠘ ꠘꠤꠎꠞ ꠈꠥꠡꠤ ꠝꠣꠚꠤꠇ ꠇꠦꠃꠞꠞꠦ ꠖꠄꠀ ꠇꠞꠂꠘ, ꠀꠞ ꠇꠦꠃꠞꠞ ꠖꠤꠟꠞꠦ ꠙꠣꠡꠣꠘ ꠛꠣꠘꠣꠁꠘ।
ꠀꠟ꠆ꠟꠣꠞ ꠉꠎꠛ ꠀꠞ ꠞꠢꠝꠔ
19ꠅꠈꠘ ꠔꠥꠝꠞꠣ ꠀꠝꠣꠞꠦ ꠎꠤꠇꠣꠁꠔꠣꠄ ꠙꠣꠞ, “ꠀꠟ꠆ꠟꠣꠞ ꠝꠞ꠆ꠎꠤꠞ ꠛꠣꠁꠞꠣ ꠎꠦꠛꠟꠣ ꠇꠦꠃ ꠇꠥꠘ꠆ꠔꠣ ꠇꠞꠔ ꠙꠣꠞꠦ ꠘꠣ, ꠔꠦ ꠀꠟ꠆ꠟꠣꠄ ꠇꠦꠘꠦ ꠝꠣꠘꠡꠞ ꠖꠥꠡ-ꠔꠤꠞꠥꠐꠤ ꠉꠘꠂꠘ?” 20ꠁ ꠍꠅꠀꠟꠞ ꠡꠥꠎꠣ ꠎꠥꠀꠙ ꠅꠁꠟ, ꠀꠟ꠆ꠟꠣꠞ ꠃꠙꠞꠦ ꠝꠣꠔꠣꠞ ꠔꠥꠝꠤ ꠇꠦ? ꠇꠦꠃ ꠎꠥꠖꠤ ꠇꠥꠘꠥ ꠎꠤꠘꠤꠡ ꠛꠣꠘꠣꠄ, ꠔꠦ ꠔꠣꠞ ꠛꠣꠘꠣꠁꠟ ꠎꠤꠘꠤꠡꠦ ꠎꠤꠇꠣꠁꠔ ꠙꠣꠞꠛ ꠘꠤ, ꠀꠝꠣꠞꠦ ꠇꠦꠘꠦ ꠁꠟꠣ ꠛꠣꠘꠣꠁꠟꠣꠄ? 21ꠄꠇ ꠝꠣꠐꠤ ꠕꠣꠇꠤ ꠇꠥꠝꠣꠞꠦ ꠘꠣꠘꠣꠘ ꠎꠣꠔꠞ ꠎꠤꠘꠤꠡ ꠛꠣꠘꠣꠁꠔ ꠙꠣꠞꠦ ꠘꠣ ꠘꠤ? ꠁꠔꠣꠞ ꠇꠥꠘꠥꠐꠣ ꠁꠎ꠆ꠎꠔꠤ ꠇꠣꠝꠅ ꠀꠞ ꠇꠥꠘꠥꠐꠣ ꠡꠣꠗꠣꠞꠘ ꠇꠣꠝꠅ ꠟꠣꠉꠦ।
22ꠑꠤꠇ ꠅꠟꠣꠈꠣꠘ, ꠀꠟ꠆ꠟꠣꠄ ꠔꠣꠘ ꠟꠣꠘ꠆ꠘꠔ ꠀꠞ ꠇꠥꠖꠞꠔꠤ ꠈꠦꠝꠔꠣ ꠖꠦꠈꠣꠁꠔꠣ ꠌꠣꠁꠍꠟꠣ, ꠀꠞ ꠎꠦꠞꠣꠞ ꠃꠙꠞꠦ ꠁ ꠟꠣꠘ꠆ꠘꠔ ꠓꠣꠟꠤꠔꠣ ꠌꠣꠁꠍꠟꠣ, ꠄꠞꠣꠞ ꠙꠣꠅꠘꠣ ꠀꠍꠤꠟ ꠈꠣꠟꠤ ꠛꠤꠘꠣꠡꠤ ꠉꠎꠛ, ꠔꠣ-ꠅ ꠔꠣꠁꠘ ꠛꠃꠔ ꠛꠠ ꠍꠛꠞ ꠇꠞꠤꠀ ꠔꠣꠞꠣꠞ ꠁꠔꠣ ꠡꠁꠎ꠆ꠎ ꠇꠞꠟꠣ। 23ꠔꠣꠁꠘ ꠁꠔꠣ ꠡꠁꠎ꠆ꠎ ꠇꠞꠟꠣ, ꠇꠣꠞꠘ ꠀꠞꠇꠛꠣꠞ ꠘꠤꠎꠞ ꠇꠥꠖꠞꠔꠤ ꠡꠣꠘ-ꠔꠎꠟ꠆ꠟꠤꠞ ꠇꠕꠣ ꠎꠣꠘꠣꠁꠔꠣ ꠌꠣꠁꠟꠣ। ꠀꠞ ꠎꠦꠞꠣꠞꠦ ꠖꠄꠀ ꠇꠞꠍꠂꠘ, ꠄꠞꠣꠞꠦ ꠔꠣꠁꠘ ꠀꠉꠦ ꠕꠣꠇꠤꠃ ꠎꠥꠁꠔ ꠇꠞꠤꠀ ꠞꠣꠈꠍꠤꠟꠣ, ꠔꠣꠘ ꠡꠣꠘ-ꠔꠎꠟ꠆ꠟꠤ ꠖꠦꠈꠣꠘꠤꠞ ꠈꠤꠀꠟꠦ। 24ꠀꠍꠟꠦ ꠀꠝꠞꠣꠃ ꠅꠁꠟꠣꠝ ꠢꠃ ꠖꠄꠀꠞ ꠎꠘ। ꠀꠝꠞꠣꠞꠦ ꠔꠣꠁꠘ ꠈꠣꠟꠤ ꠛꠘꠤ ꠁꠍꠞꠣꠁꠟꠞ ꠝꠣꠎ ꠕꠣꠇꠤꠃ ꠖꠣꠅꠔ ꠖꠤꠀ ꠀꠘꠍꠂꠘ ꠘꠣ, ꠅꠁꠘ꠆ꠘ ꠎꠣꠔꠤꠞ ꠝꠣꠎ ꠕꠣꠇꠤꠅ ꠔ ꠀꠘꠍꠂꠘ। 25ꠢꠎꠞꠔ ꠢꠥꠍꠤꠀ ꠘꠛꠤꠞ ꠍꠢꠤꠚꠣꠔ ꠀꠟ꠆ꠟꠣꠄ ꠇꠁꠍꠂꠘ,
ꠎꠦꠔꠣ ꠝꠣꠘꠥꠡ ꠀꠝꠣꠞ ꠙ꠆ꠞꠎꠣ ꠘꠣꠄ,
ꠔꠣꠞꠣꠞꠦꠅ ꠀꠝꠣꠞ ꠘꠤꠎꠞ ꠙ꠆ꠞꠎꠣ ꠛꠣꠘꠣꠁꠝꠥ।
ꠀꠞ ꠎꠦꠞꠣ ꠀꠝꠣꠞ ꠝꠣꠄꠀꠞ ꠝꠣꠘꠥꠡ ꠀꠍꠤꠟ ꠘꠣ,
ꠔꠣꠞꠣꠞꠦꠅ ꠝꠣꠄꠀꠞ ꠝꠣꠘꠥꠡ ꠇꠁꠀ ꠒꠣꠇꠝꠥ।
26ꠎꠦ ꠎꠝꠤꠘꠅ ꠇꠅꠀ ꠅꠁꠍꠤꠟ,
ꠔꠥꠝꠞꠣ ꠀꠝꠣꠞ ꠙ꠆ꠞꠎꠣ ꠘꠣꠄ,
ꠢꠃ ꠎꠝꠤꠘꠅꠃ ꠔꠣꠞꠣꠞꠦ
ꠎꠤꠘ꠆ꠖꠣ ꠀꠟ꠆ꠟꠣꠞ ꠀꠅꠟꠣꠖ ꠇꠅꠀ ꠅꠁꠛ।
27ꠅꠁꠟꠦ ꠛꠘꠤ ꠁꠍꠞꠣꠁꠟꠞ ꠛꠦꠙꠣꠞꠦ ꠢꠎꠞꠔ ꠁꠡꠣꠄꠀ ꠘꠛꠤꠄ ꠇꠁꠍꠟꠣ,
ꠉꠘꠣꠞ ꠛꠣꠟꠣ ꠎꠥꠖꠤꠅ ꠔꠣꠞꠣ ꠖꠞꠤꠀꠞ ꠌꠞꠞ ꠛꠣꠟꠥꠞ ꠟꠣꠈꠣꠘ ꠛꠦꠢꠤꠡꠣꠛ,
ꠔꠦꠛꠃ ꠔꠣꠞꠣꠞ ꠝꠣꠎꠞ ꠈꠥꠛ ꠢꠥꠞꠥ ꠄꠇ ꠅꠋꠡꠄ ꠈꠣꠟꠣꠍ ꠙꠣꠁꠛꠣ।
28ꠝꠣꠛꠥꠖ ꠝꠃꠟꠣꠄ ꠎꠉꠔꠞ ꠙꠣꠅꠘꠣ ꠎꠦ ꠡꠣꠎꠣ ꠎꠥꠁꠔ ꠇꠞꠍꠂꠘ,
ꠅꠃ ꠡꠥꠟ꠆ꠟꠀꠘꠣ ꠡꠣꠎꠣ ꠈꠥꠛ ꠎꠟꠖꠤꠃ ꠖꠤꠛꠣ।
29ꠢꠎꠞꠔ ꠁꠡꠣꠄꠀ ꠘꠛꠤꠄ ꠀꠞꠅ ꠛꠣꠔꠣꠁꠍꠂꠘ, “ꠀꠟ꠆ꠟꠣ ꠞꠣꠛ꠆ꠛꠥꠟ ꠀꠟꠣꠝꠤꠘꠦ ꠎꠥꠖꠤ ꠀꠝꠞꠣꠞ ꠟꠣꠉꠤ ꠇꠤꠍꠥ ꠝꠣꠘꠡꠞꠦ ꠎꠤꠘ꠆ꠖꠣ ꠘꠣ ꠞꠣꠈꠔꠣ, ꠔꠦ ꠀꠝꠞꠣꠞ ꠖꠡꠣ ꠔ ꠟꠣꠘ꠆ꠘꠔꠤ ꠍꠣꠖꠥꠝ ꠀꠞ ꠀꠝꠥꠞꠣ ꠐꠣꠃꠘꠞ ꠟꠣꠈꠣꠘ ꠅꠁꠟ ꠅꠘꠦ।”
ꠛꠘꠤ ꠁꠍꠞꠣꠁꠟ ꠛꠦ-ꠙꠕꠤ ꠅꠀꠞ ꠇꠣꠞꠘ
30ꠔꠦ ꠀꠝꠞꠣ ꠅꠃ ꠇꠕꠣꠃ ꠇꠁꠝꠥ, ꠜꠤꠘ ꠎꠣꠔꠤ ꠅꠇꠟꠦ ꠎꠥꠖꠤꠅ ꠀꠟ꠆ꠟꠣꠞ ꠙꠞꠦꠎꠉꠣꠞ ꠛꠘ꠆ꠖꠣ ꠅꠀꠞ ꠌꠦꠡ꠆ꠐꠣ ꠇꠞꠍꠦ ꠘꠣ, ꠔꠦꠛꠃ ꠁꠝꠣꠘ ꠀꠘꠣꠞ ꠝꠣꠎꠖꠤ ꠔꠣꠞꠣ ꠀꠟ꠆ꠟꠣꠞ ꠖꠞꠛꠣꠞꠅ ꠙꠞꠦꠎꠉꠣꠞ ꠛꠘꠤꠉꠦꠍꠦ। 31ꠀꠞ ꠛꠘꠤ ꠁꠍꠞꠣꠁꠟꠦ ꠈꠣꠟꠤ ꠡꠞꠤꠅꠔ ꠝꠣꠘꠤꠀ ꠙꠞꠦꠎꠉꠣꠞ ꠛꠘꠔ ꠌꠣꠁꠍꠤꠟ, ꠅꠁꠟꠦ ꠡꠞꠤꠅꠔ ꠝꠣꠘꠔ ꠙꠣꠞꠍꠦ ꠘꠣ। 32ꠀꠁꠌ꠆ꠍꠣ, ꠔꠣꠞꠣ ꠇꠦꠘꠦ ꠙꠣꠞꠍꠦ ꠘꠣ? ꠔꠣꠞꠣ ꠁꠝꠣꠘꠞ ꠃꠙꠞꠦ ꠜꠞꠡꠣ ꠘꠣ ꠇꠞꠤꠀ, ꠈꠣꠟꠤ ꠇꠣꠝ-ꠇꠣꠎꠞ ꠀꠝꠟꠞ ꠃꠙꠞꠦ ꠜꠞꠡꠣ ꠇꠞꠍꠦ, ꠄꠞꠟꠣꠉꠤ ꠙꠣꠞꠍꠦ ꠘꠣ। ꠝꠣꠘꠡꠦ ꠎꠦ ꠙꠣꠔ꠆ꠔꠞꠅ ꠃꠡ꠆ꠐꠣ ꠈꠣꠁꠘ, ꠔꠣꠞꠣꠅ ꠅꠃ ꠙꠣꠔ꠆ꠔꠞꠅ ꠃꠡ꠆ꠐꠣ ꠈꠣꠁꠍꠂꠘ। 33ꠁ ꠛꠦꠙꠣꠞꠦ ꠀꠍꠝꠣꠘꠤ ꠇꠤꠔꠣꠛꠅ ꠟꠦꠈꠣ ꠀꠍꠦ,
ꠢꠥꠘꠅ, ꠀꠝꠤ ꠎꠦꠞꠥꠎꠣꠟꠦꠝꠅ ꠅꠟꠣ ꠄꠇ ꠙꠣꠔ꠆ꠔꠞ ꠛꠅꠀꠁꠍꠤ,
ꠎꠦ ꠙꠣꠔ꠆ꠔꠞꠅ ꠝꠣꠘꠡꠦ ꠃꠡ꠆ꠐꠣ ꠈꠣꠁꠀ ꠙꠠꠛ।
ꠅꠁꠟꠦ ꠎꠦ ꠎꠘꠦ ꠔꠣꠘ ꠃꠙꠞꠦ ꠁꠝꠣꠘ ꠀꠘꠛ,
ꠢꠦ ꠇꠥꠘꠥꠝꠘ꠆ꠔꠦꠃ ꠡꠞꠝꠤꠘ꠆ꠖꠣ ꠅꠁꠔ ꠘꠣꠄ।
Currently Selected:
ꠁꠘ꠆ꠎꠤꠟ ৬: ꠞꠥꠝꠣꠘ 9: sylN
Highlight
Share
Copy
Want to have your highlights saved across all your devices? Sign up or sign in
© Ahle Kitab Society. All rights reserved.
