ꠔꠃꠞꠣꠔ ৩: ꠟꠦꠛꠤꠀꠘ 16
16
ꠇꠚꠞꠣꠞ ꠁꠖꠞ ꠘꠤꠅꠝ
1ꠁꠝꠣꠝ ꠢꠣꠞꠥꠘꠞ ꠛꠠ ꠖꠥꠁ ꠙꠥꠀꠄ ꠘꠣꠚꠞꠝꠣꠘꠤ ꠇꠞꠤꠀ ꠝꠣꠛꠥꠖꠞ ꠍꠣꠝꠘꠦ ꠙꠠꠤꠀ ꠝꠣꠞꠣ ꠉꠦꠟ ꠇꠞꠤ, ꠝꠣꠛꠥꠖꠦ ꠝꠥꠍꠣ ꠘꠛꠤꠞ ꠟꠉꠦ ꠛꠣꠔꠌꠤꠔ ꠇꠞꠟꠣ। 2ꠝꠣꠛꠥꠖꠦ ꠇꠁꠟꠣ, “ꠔꠥꠝꠣꠞ ꠜꠣꠁ ꠢꠣꠞꠥꠘꠞꠦ ꠇꠅ, ꠢꠦ ꠎꠣꠘꠥ ꠎꠦꠛꠟꠣ ꠝꠘꠦ ꠌꠣꠄ ꠄꠛꠟꠣ ꠡꠣꠢꠣꠖꠔ ꠡꠘ꠆ꠖꠥꠇꠞ ꠓꠣꠇꠘꠣꠞ ꠉꠦꠍꠦ ꠎꠣꠅꠀꠞ ꠟꠣꠉꠤ ꠢꠦꠞꠦꠝ ꠡꠞꠤꠚꠞ ꠙꠞ꠆ꠖꠣꠞ ꠜꠤꠔꠞꠦ ꠘꠣ ꠢꠣꠝꠣꠄ, ꠀꠞꠘꠣꠄ ꠢꠦ ꠝꠞꠛꠃ। ꠎꠣꠘ ꠔ, ꠅꠃ ꠓꠣꠇꠘꠣꠞ ꠃꠙꠞꠞ ꠗꠥꠝꠣꠞ ꠀꠘ꠆ꠖꠣꠁꠞꠞ ꠝꠣꠎꠦ ꠀꠝꠤ ꠘꠤꠎꠦ ꠀꠎꠤꠞ ꠅꠁ।
3“ꠁꠘꠅ ꠢꠣꠝꠣꠘꠤꠞ ꠀꠉꠦ ꠢꠦ ꠎꠣꠘꠥ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠣꠉꠤ ꠄꠉꠥ ꠛꠤꠍꠣꠟ ꠀꠞ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠟꠣꠉꠤ ꠄꠉꠥ ꠝꠦꠠꠣꠞ ꠙꠣꠑꠣ ꠟꠁꠀ ꠁꠘꠅ ꠀꠁꠀ ꠢꠣꠝꠣꠄ। 4ꠡꠣꠖꠣ ꠡꠥꠔꠤ ꠇꠣꠙꠠꠖꠤ ꠛꠣꠘꠣꠁꠟ ꠙꠛꠤꠔ꠆ꠞ ꠀꠟꠈꠦꠟ꠆ꠟꠣ ꠀꠞ ꠢꠣꠚ-ꠙꠦꠘ꠆ꠐꠞ ꠟꠣꠈꠣꠘ ꠎꠣꠋꠉꠤꠀ ꠚꠤꠘ꠆ꠖꠤꠀ ꠜꠤꠔꠞꠦ ꠢꠣꠝꠣꠁꠛ। ꠔꠣꠞ ꠇꠝꠞꠅ ꠛꠣꠘ꠆ꠖꠣꠞ ꠡꠥꠔꠤ ꠇꠣꠙꠠꠞ ꠛꠘ꠆ꠖꠘꠤ ꠛꠣꠘ꠆ꠖꠤꠛ ꠀꠞ ꠝꠣꠕꠣꠔ ꠡꠥꠔꠤ ꠇꠣꠙꠠꠞ ꠙꠣꠃꠉꠠꠤ ꠟꠣꠉꠣꠁꠛ। ꠁꠔꠣ ꠔ ꠙꠣꠇ-ꠙꠛꠤꠔ꠆ꠞ ꠟꠦꠛꠣꠍ, ꠁꠔꠣ ꠟꠦꠛꠣꠍ ꠚꠤꠘ꠆ꠖꠤꠛꠣꠞ ꠀꠉꠦ ꠙꠣꠘꠤꠖꠤ ꠘꠣꠁꠔꠦ ꠅꠁꠛ। 5ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠣꠉꠤ ꠢꠦ ꠛꠘꠤ ꠁꠍꠞꠣꠁꠟꠞ ꠉꠦꠍ ꠕꠣꠇꠤ ꠖꠥꠁꠐꠣ ꠙꠣꠑꠣ ꠍꠣꠉꠟ ꠀꠞ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠟꠣꠉꠤ ꠄꠉꠥ ꠝꠦꠠꠣꠞ ꠙꠣꠑꠣ ꠘꠤꠛ। 6ꠁꠝꠣꠝ ꠢꠣꠞꠥꠘꠦ ꠔꠣꠞ ꠘꠤꠎꠞ ꠀꠞ ꠔꠣꠞ ꠀꠅꠟꠣꠖ ꠅꠇꠟꠞ ꠉꠥꠘꠣꠞ ꠝꠣꠚꠤꠞ ꠟꠣꠉꠤ, ꠉꠥꠘꠣꠞ ꠇꠚꠞꠣꠞ ꠛꠤꠍꠣꠟꠞꠦ ꠇꠥꠞꠛꠣꠘꠤ ꠖꠤꠛ। 7ꠛꠣꠖꠦ ꠢꠃ ꠍꠣꠉꠟ ꠖꠥꠁꠅꠐꠣ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠉꠦꠍꠦ ꠝꠣꠛꠥꠖꠞ ꠍꠣꠝꠘꠦ ꠀꠘꠛ। 8ꠀꠘꠤꠀ ꠢꠦ ꠟꠐꠣꠞꠤ ꠝꠣꠞꠤꠀ ꠖꠦꠈꠛ, ꠇꠥꠘ ꠍꠣꠉꠟ ꠝꠣꠛꠥꠖꠞ ꠟꠣꠉꠤ ꠀꠞ ꠇꠥꠘꠐꠣ ꠀꠎꠣꠎꠤꠟꠞ#16:8 “ꠀꠎꠣꠎꠤꠟ” ꠅꠁꠟ ꠄꠇꠐꠣ ꠢꠤꠛꠞꠥ ꠡꠛ꠆ꠖ। ꠁ ꠡꠛ꠆ꠖꠞ ꠝꠥꠟ ꠅꠞ꠆ꠕ ꠛꠞ꠆ꠔꠝꠣꠘꠦ ꠇꠦꠃ ꠎꠣꠘꠦ ꠘꠣ। ꠅꠁꠟꠦ ꠛꠞ꠆ꠔꠝꠣꠘꠦ ꠇꠥꠘꠥ ꠇꠥꠘꠥ ꠛꠥꠎꠥꠞ꠆ꠉꠦ ꠇꠂꠘ ꠁꠇꠐꠣ ꠅꠁꠟ ꠄꠇꠐꠣ ꠎꠤꠘ ꠛꠣ ꠚꠤꠞꠤꠡ꠆ꠔꠣꠞ ꠘꠣꠝ। ꠇꠦꠃ ꠇꠦꠃ ꠇꠂꠘ ꠝꠞꠥꠜꠥꠝꠤꠞ ꠝꠣꠎꠦ ꠈꠣꠠꠣ ꠄꠇ ꠐꠤꠟ꠆ꠟꠣꠞ ꠘꠣꠝ ꠀꠎꠣꠎꠤꠟ, ꠀꠛꠣꠞ ꠇꠦꠃ ꠇꠦꠃ ꠇꠂꠘ ꠁ ꠡꠛ꠆ꠖꠞ ꠅꠞ꠆ꠕ ꠅꠁꠟ ꠡꠞ꠆ꠛꠘꠣꠡ। ꠟꠣꠉꠤ। 9ꠟꠐꠣꠞꠤꠔ ꠝꠣꠛꠥꠖꠞ ꠘꠣꠝꠦ ꠎꠦ ꠍꠣꠉꠟ ꠃꠑꠛ, ꠢꠣꠞꠥꠘꠦ ꠅꠉꠥꠖꠤ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ ꠀꠖꠣꠄ ꠇꠞꠛ। 10ꠀꠞ ꠀꠎꠣꠎꠤꠟꠞ ꠘꠣꠝꠦ ꠎꠦ ꠍꠣꠉꠟ ꠃꠑꠛ, ꠅꠉꠥꠞꠦ ꠎꠤꠔꠣ ꠢꠣꠟꠔꠦ ꠝꠣꠛꠥꠖꠞ ꠍꠣꠝꠘꠦ ꠕꠁꠛ, ꠎꠣꠔꠦ ꠛꠣꠖꠦ ꠅꠉꠥꠞꠦ ꠝꠞꠥꠜꠥꠝꠤꠔ ꠘꠤꠀ ꠀꠎꠣꠎꠤꠟꠞ ꠘꠣꠝꠦ ꠀꠃꠞꠤ ꠍꠣꠠꠤ ꠖꠦꠅꠀ ꠅꠄ। ꠅꠃ ꠘꠝꠥꠘꠣꠄ ꠉꠥꠘꠣꠞ ꠇꠚꠞꠣ ꠀꠖꠣꠄ ꠇꠞꠤꠅ।
11“ꠁꠝꠣꠝ ꠢꠣꠞꠥꠘꠦ ꠔꠣꠞ ꠘꠤꠎꠞ ꠀꠞ ꠔꠣꠞ ꠀꠅꠟꠣꠖ ꠅꠇꠟꠞ ꠉꠥꠘꠣꠞ ꠇꠚꠞꠣꠞ ꠟꠣꠉꠤ, ꠔꠣꠞ ꠘꠤꠎꠞ ꠀꠘꠣ ꠢꠃ ꠛꠤꠍꠣꠟꠞꠦ ꠎꠛ ꠇꠞꠛ। 12ꠝꠣꠛꠥꠖꠞ ꠍꠣꠝꠘꠦ ꠀꠉꠞ-ꠈꠥꠡꠛꠄ ꠎꠣꠟꠣꠘꠤꠞ ꠎꠦ ꠐꠦꠛꠥꠟ ꠀꠍꠦ ꠅꠃ ꠐꠦꠛꠥꠟ ꠕꠣꠇꠤ ꠇꠤꠍꠥ ꠎꠣꠟꠣꠁꠟ ꠀꠋꠞꠣ ꠟꠁꠀ ꠢꠦ ꠀꠉꠞ ꠖꠣꠘꠤꠞ ꠝꠣꠎꠦ ꠜꠞꠛ, ꠀꠞ ꠖꠥꠁ ꠝꠥꠁꠐ ꠀꠉꠞ-ꠈꠥꠡꠛꠄꠞ ꠉꠥꠠꠣꠅ ꠟꠁꠛ, ꠛꠣꠖꠦ ꠙꠞ꠆ꠖꠣꠞ ꠜꠤꠔꠞꠦ ꠢꠦꠞꠦꠝ ꠡꠞꠤꠚꠅ ꠢꠣꠝꠣꠁꠛ। 13ꠢꠣꠝꠣꠁꠀ ꠅꠃ ꠀꠋꠞꠣꠞ ꠃꠙꠞꠦ ꠀꠉꠞ-ꠈꠥꠡꠛꠄ ꠖꠤꠀ ꠝꠣꠛꠥꠖꠞ ꠍꠣꠝꠘꠦ ꠎꠣꠟꠣꠁꠛ, ꠔꠦꠃ ꠅꠔꠣꠞ ꠗꠥꠝꠣꠄ ꠡꠣꠢꠣꠖꠔ ꠡꠘ꠆ꠖꠥꠇꠞ ꠓꠣꠇꠘꠣꠞ ꠃꠙꠞꠞ ꠉꠣꠟꠣ ꠀꠘ꠆ꠖꠣꠁꠞꠦ ꠉꠥꠞꠤꠎꠤꠛ, ꠎꠣꠔꠦ ꠢꠦ ꠝꠣꠛꠥꠖꠞ ꠍꠣꠝꠘꠦ ꠘꠣ ꠝꠞꠂꠘ। 14ꠛꠣꠖꠦ ꠢꠦ ꠇꠥꠞꠛꠣꠘꠤꠞ ꠢꠃ ꠛꠤꠍꠣꠟꠞ ꠕꠥꠠꠣ ꠟꠃ ꠘꠤꠀ ꠀꠔꠞ ꠀꠋꠉꠥꠁꠟ ꠖꠤꠀ ꠅꠃ ꠓꠣꠇꠘꠣꠞ ꠍꠣꠝꠘꠞ ꠉꠣꠟꠣꠛꠣꠄ ꠍꠤꠐꠣꠁ ꠖꠤꠛ। ꠄꠞꠛꠣꠖꠦ ꠀꠋꠉꠥꠟꠤꠞ ꠝꠣꠎꠦ ꠀꠞꠅ ꠕꠥꠠꠣ ꠟꠃ ꠟꠣꠉꠣꠁꠀ ꠓꠣꠇꠘꠣꠞ ꠍꠣꠝꠘꠞ ꠛꠣꠄ ꠡꠣꠔ ꠛꠣꠞ ꠍꠤꠐꠣꠁꠀ ꠖꠤꠛ।
15“ꠀꠞ ꠢꠦ ꠝꠣꠘꠡꠞ ꠉꠥꠘꠣꠞ ꠇꠚꠞꠣꠞ ꠘꠤꠅꠔꠦ ꠀꠘꠣ ꠍꠣꠉꠟꠐꠣꠞꠦ ꠎꠛ ꠇꠞꠛ, ꠇꠞꠤꠀ ꠅꠉꠥꠞ ꠟꠃ ꠘꠤꠀ ꠙꠞ꠆ꠖꠣꠞ ꠜꠤꠔꠞꠦ ꠢꠦꠞꠦꠝ ꠡꠞꠤꠚꠅ ꠉꠤꠀ, ꠛꠤꠍꠣꠟꠞ ꠟꠃꠖꠤ ꠎꠦꠟꠣ ꠇꠞꠣ ꠅꠁꠍꠤꠟ, ꠅꠉꠥꠞ ꠟꠃꠖꠤꠅ ꠅꠟꠣ ꠇꠞꠔꠦ ꠅꠁꠛ। ꠡꠘ꠆ꠖꠥꠇꠞ ꠓꠣꠇꠘꠣꠞ ꠃꠙꠞꠦ ꠀꠞ ꠍꠣꠝꠘꠦ ꠅꠃ ꠟꠃ ꠍꠤꠐꠣꠁꠔꠦ ꠅꠁꠛ। 16ꠛꠘꠤ ꠁꠍꠞꠣꠁꠟꠞ ꠉꠥꠘꠣ, ꠘꠣꠙꠣꠇꠤ, ꠀꠞ ꠘꠣꠚꠞꠝꠣꠘꠤꠄ ꠢꠦꠞꠦꠝ ꠡꠞꠤꠚꠞꠦꠅ ꠘꠣꠙꠣꠇ ꠇꠞꠤꠟꠣꠄ, ꠄꠞꠟꠣꠉꠤ ꠔꠣꠞꠣꠞ ꠝꠣꠎꠦ ꠎꠦ ꠝꠤꠟꠘ-ꠔꠣꠝ꠆ꠛꠥ ꠀꠍꠦ, ꠅꠈꠣꠘꠞ ꠘꠣꠙꠣꠇꠤ ꠢꠞꠣꠘꠤꠞ ꠘꠤꠅꠔꠦ ꠁꠝꠣꠝ ꠢꠣꠞꠥꠘꠦ ꠅꠃ ꠘꠝꠥꠘꠣꠄ ꠉꠥꠘꠣꠞ ꠇꠚꠞꠣ ꠀꠖꠣꠄ ꠇꠞꠛꠣ। 17ꠢꠦꠞꠦꠝ ꠡꠞꠤꠚꠞ ꠜꠤꠔꠞꠦ ꠢꠣꠝꠣꠁꠀ ꠢꠣꠞꠤ ꠢꠣꠞꠥꠘꠦ ꠔꠣꠘ ꠘꠤꠎꠞ, ꠔꠣꠘ ꠀꠅꠟꠣꠖ ꠅꠇꠟꠞ ꠀꠞ ꠀꠡ꠆ꠔꠣ ꠡꠝꠣꠎꠞ ꠉꠥꠘꠣꠞ ꠇꠚꠞꠣꠞ ꠢꠇꠟ ꠇꠣꠝ ꠡꠦꠡ ꠇꠞꠤꠀ ꠎꠔꠛꠤꠟ ꠘꠣ ꠛꠣꠞ ꠅꠁꠀ ꠀꠁꠘ, ꠅꠔꠛꠤꠟ ꠖꠥꠍꠞꠣ ꠇꠥꠘꠥ ꠝꠣꠘꠥꠡ ꠝꠤꠟꠘ-ꠔꠣꠝ꠆ꠛꠥꠞ ꠜꠤꠔꠞꠦ ꠢꠣꠝꠣꠘꠤ ꠘꠤꠡꠦꠗ। 18ꠢꠦꠞꠦꠝ ꠡꠞꠤꠚ ꠕꠣꠇꠤ ꠛꠣꠞ ꠅꠁꠀ ꠢꠣꠞꠥꠘꠦ ꠝꠣꠛꠥꠖꠞ ꠍꠣꠝꠘꠦ ꠎꠦ ꠀꠉꠞ-ꠈꠥꠡꠛꠄ ꠎꠣꠟꠣꠘꠤꠞ ꠐꠦꠛꠥꠟ ꠀꠍꠦ ꠅꠃ ꠐꠦꠛꠥꠟꠞ ꠇꠣꠘ꠆ꠖꠣꠔ ꠎꠣꠁꠛꠣ, ꠎꠣꠁꠀ ꠐꠦꠛꠥꠟꠞ ꠟꠣꠉꠤꠅ ꠇꠚꠞꠣ ꠀꠖꠣꠄ ꠇꠞꠛꠣ। ꠢꠃ ꠛꠤꠍꠣꠟ ꠀꠞ ꠍꠣꠉꠟꠞ ꠕꠥꠠꠣ ꠟꠃ ꠘꠤꠀ ꠔꠣꠁꠘ ꠅꠃ ꠐꠦꠛꠥꠟꠞ ꠢꠤꠋꠉꠞ ꠝꠣꠎꠦ ꠟꠣꠉꠣꠁꠛꠣ। 19ꠛꠘꠤ ꠁꠍꠞꠣꠁꠟꠞ ꠉꠥꠘꠣꠞ ꠇꠣꠞꠘꠦ ꠐꠦꠛꠥꠟꠞ ꠝꠣꠎꠦ ꠎꠦ ꠘꠣꠙꠣꠇꠤ ꠟꠣꠉꠣꠁꠟ ꠅꠁꠍꠦ, ꠢꠃ ꠘꠣꠙꠣꠇꠤ ꠢꠞꠣꠁꠀ ꠅꠃ ꠐꠦꠛꠥꠟꠞꠦ ꠙꠛꠤꠔ꠆ꠞ ꠇꠞꠣꠞ ꠟꠣꠉꠤ ꠢꠣꠞꠥꠘꠦ ꠔꠣꠞ ꠀꠔꠞ ꠀꠋꠉꠥꠁꠟ ꠖꠤꠀ ꠅꠃ ꠐꠦꠛꠥꠟꠞ ꠃꠙꠞꠦ ꠡꠣꠔ ꠛꠣꠞ ꠟꠃ ꠍꠤꠐꠣꠁꠛ।
20“ꠢꠦꠞꠦꠝ ꠡꠞꠤꠚ, ꠝꠤꠟꠘ-ꠔꠣꠝ꠆ꠛꠥ, ꠀꠞ ꠇꠥꠞꠛꠣꠘꠤ ꠈꠣꠘꠣꠞ ꠘꠣꠙꠣꠇꠤ ꠢꠞꠣꠘꠤꠞ ꠇꠚꠞꠣꠞ ꠇꠣꠝ ꠡꠦꠡ ꠇꠞꠤꠀ ꠢꠣꠞꠟꠦ ꠢꠣꠞꠥꠘꠦ ꠀꠎꠣꠎꠤꠟꠞ ꠘꠣꠝꠦ ꠖꠦꠅꠀꠞ ꠟꠣꠉꠤ ꠢꠃ ꠎꠤꠔꠣ ꠍꠣꠉꠟꠞꠦ ꠟꠁꠀ ꠀꠁꠛꠣ। 21ꠀꠁꠀ ꠅꠃ ꠍꠣꠉꠟꠞ ꠇꠟ꠆ꠟꠣꠞ ꠃꠙꠞꠦ ꠔꠣꠞ ꠖꠥꠁꠅ ꠀꠔ ꠕꠁꠀ, ꠛꠘꠤ ꠁꠍꠞꠣꠁꠟꠞ ꠢꠇꠟ ꠉꠥꠘꠣ-ꠘꠣꠚꠞꠝꠣꠘꠤ ꠀꠞ ꠛꠖ ꠇꠣꠝꠞ ꠇꠕꠣ ꠡ꠆ꠛꠤꠇꠣꠞ ꠇꠞꠤꠀ ꠍꠣꠉꠟꠞ ꠇꠟ꠆ꠟꠣꠞ ꠃꠙꠞꠦ ꠅꠔꠣ ꠛꠞ꠆ꠔꠣꠁ ꠖꠤꠛ। ꠛꠣꠖꠦ ꠀꠉ ꠕꠣꠇꠤ ꠎꠥꠁꠔ ꠅꠀ ꠄꠇ ꠛꠦꠐꠣꠞꠦ ꠖꠤꠀ ꠅꠃ ꠍꠣꠉꠟꠞꠦ ꠢꠦ ꠝꠞꠥꠜꠥꠝꠤꠔ ꠙꠣꠑꠣꠁ ꠖꠤꠛ। 22ꠢꠃ ꠛꠦꠐꠣꠄ ꠘꠤꠀ ꠅꠉꠥꠞꠦ ꠝꠞꠥꠜꠥꠝꠤꠔ ꠍꠣꠠꠤꠀ ꠀꠁꠛ। ꠔꠣꠞꠣꠞ ꠢꠇꠟ ꠘꠣꠚꠞꠝꠣꠘꠤꠞꠦ ꠅꠃ ꠍꠣꠉꠟꠦ ꠟꠁꠀ ꠘꠤꠞꠣꠁ ꠘꠤꠞ꠆ꠎꠘ ꠝꠞꠥꠜꠥꠝꠤꠔ ꠀꠎꠤꠛꠘ ꠊꠥꠞꠤꠛ।
23“ꠀꠞ ꠢꠦꠞꠦꠝ ꠡꠞꠤꠚꠅ ꠢꠣꠝꠣꠁꠛꠣꠞ ꠇꠣꠟꠅ ꠢꠣꠞꠥꠘꠦ ꠡꠣꠖꠣ ꠡꠥꠔꠤ ꠇꠣꠙꠠꠞ ꠎꠔ ꠟꠦꠛꠣꠍ ꠚꠤꠘ꠆ꠖꠤꠍꠟꠣ, ꠔꠣꠁꠘ ꠝꠤꠟꠘ-ꠔꠣꠝ꠆ꠛꠥꠔ ꠚꠤꠞꠤꠀ ꠀꠁꠀ ꠁꠔꠣ ꠈꠥꠟꠤꠀ ꠕꠁ ꠖꠤꠛꠣ। 24ꠈꠥꠟꠤꠀ ꠔꠣꠁꠘ ꠇꠣꠛꠣ ꠊꠞꠞ ꠡꠤꠝꠣꠘꠣꠞ ꠜꠤꠔꠞꠦ ꠙꠣꠘꠤꠖꠤ ꠘꠣꠁꠀ ꠔꠣꠘ ꠘꠤꠎꠞ ꠟꠦꠛꠣꠍ ꠚꠤꠘ꠆ꠖꠤꠛꠣ। ꠛꠣꠖꠦ ꠔꠣꠁꠘ ꠛꠣꠞꠦ ꠀꠁꠀ ꠔꠣꠘ ꠘꠤꠎꠞ ꠀꠞ ꠝꠣꠘꠡꠞ ꠟꠣꠉꠤ ꠄꠉꠥ ꠇꠞꠤ ꠎꠣꠟꠣꠁꠟ ꠇꠥꠞꠛꠣꠘꠤ ꠀꠖꠣꠄ ꠇꠞꠤꠀ, ꠔꠣꠘ ꠘꠤꠎꠞ ꠀꠞ ꠝꠣꠘꠡꠞ ꠉꠥꠘꠣꠞ ꠇꠚꠞꠣꠅ ꠀꠖꠣꠄ ꠇꠞꠛꠣ। 25ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠌꠞ꠆ꠛꠤꠞꠦ ꠔꠣꠁꠘ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠎꠣꠟꠣꠁꠟꠤꠛꠣ। 26ꠎꠦ ꠛꠦꠐꠣꠄ ꠀꠎꠣꠎꠤꠟꠞ ꠘꠣꠝꠞ ꠍꠣꠉꠟꠞꠦ ꠝꠞꠥꠜꠥꠝꠤꠔ ꠍꠣꠠꠤꠀ ꠀꠁꠛ, ꠢꠦ-ꠅ ꠔꠣꠞ ꠇꠣꠙꠠ-ꠌꠥꠙꠠ ꠗꠁꠀ ꠢꠣꠞꠤ ꠙꠣꠘꠤ ꠖꠤꠀ ꠘꠣꠁꠀ ꠛꠣꠖꠦ ꠇꠦꠝ꠆ꠙꠞ ꠜꠤꠔꠞꠦ ꠢꠣꠝꠣꠁꠔ ꠙꠣꠞꠛ। 27ꠉꠥꠘꠣ ꠝꠣꠚꠤꠞ ꠟꠣꠉꠤ ꠇꠥꠞꠛꠣꠘꠤꠞ ꠎꠦ ꠛꠤꠍꠣꠟ ꠀꠞ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠎꠦ ꠍꠣꠉꠟꠞ ꠟꠃꠞꠦ ꠢꠦꠞꠦꠝ ꠡꠞꠤꠚꠅ ꠘꠤꠛꠣꠞ ꠢꠥꠇꠥꠝ ꠖꠦꠅꠀ ꠅꠁꠍꠦ, ꠅꠔꠣꠞ ꠢꠇꠟ ꠉꠥꠡ꠆ꠔ, ꠈꠣꠟ, ꠉꠥꠚꠞ ꠀꠞ ꠢꠇꠟꠔꠣꠞꠦ ꠇꠦꠝ꠆ꠙꠞ ꠛꠣꠞꠦ ꠘꠤꠀ ꠄꠇꠎꠘꠦ ꠎꠣꠟꠣꠁꠟꠤꠅ। 28ꠎꠦ ꠎꠘꠦ ꠁꠔꠣ ꠢꠇꠟꠔꠣ ꠛꠣꠞꠦ ꠘꠤꠀ ꠎꠣꠟꠣꠁꠛ, ꠢꠦ-ꠅ ꠔꠣꠞ ꠇꠣꠙꠠ-ꠌꠥꠙꠠ ꠗꠁꠀ, ꠙꠣꠘꠤꠖꠤ ꠘꠣꠁꠀ ꠢꠣꠞꠤ ꠛꠣꠖꠦ ꠀꠁꠀ ꠇꠦꠝ꠆ꠙꠞ ꠜꠤꠔꠞꠦ ꠢꠣꠝꠣꠁꠔ ꠙꠣꠞꠛ।
29“ꠄꠞꠛꠣꠖꠦ ꠀꠝꠤ ꠎꠦꠔꠣ ꠇꠁꠞꠣꠝ, ꠁꠔꠣ ꠅꠁꠟ ꠔꠥꠝꠞꠣꠞ ꠟꠣꠉꠤ ꠢꠞ-ꠢꠣꠝꠦꠡꠣꠇꠥꠞ ꠘꠤꠅꠝ। ꠙꠞꠔꠦꠇ ꠛꠍꠞꠞ ꠡꠣꠔ ꠘꠝ꠆ꠛꠞ ꠌꠣꠘ꠆ꠖꠞ ꠖꠡ ꠘꠝ꠆ꠛꠞ ꠖꠤꠘ, ꠔꠥꠝꠞꠣꠞ ꠙꠞꠔꠦꠇ ꠎꠘꠦ ꠢꠇꠟ ꠎꠣꠔꠞ ꠇꠣꠝ-ꠇꠣꠎ ꠀꠞ ꠞꠥꠎꠤ-ꠞꠥꠎꠉꠣꠞ ꠛꠣꠖ ꠖꠤꠀ, ꠘꠔ ꠅꠁꠀ ꠖꠤꠟ ꠡꠙꠤꠀ ꠖꠤꠛꠣꠄ। ꠛꠘꠤ ꠁꠍꠞꠣꠁꠟ ꠛꠣ ꠔꠥꠝꠞꠣꠞ ꠟꠉꠦ ꠛꠡꠔ ꠇꠞꠞꠣ ꠜꠤꠘ-ꠖꠦꠡꠤ ꠢꠇꠟ ꠎꠘꠦ ꠁꠔꠣ ꠝꠣꠘꠔꠦ ꠅꠁꠛ। 30ꠇꠣꠞꠘ ꠅꠃꠖꠤꠘ ꠔꠥꠝꠞꠣꠞ ꠉꠥꠘꠣ ꠝꠣꠚꠤꠞ ꠟꠣꠉꠤ ꠉꠥꠘꠣꠞ ꠇꠚꠞꠣ ꠀꠖꠣꠄ ꠇꠞꠣ ꠅꠁꠛ, ꠔꠦꠃ ꠔꠥꠝꠞꠣ ꠝꠣꠛꠥꠖꠞ ꠍꠣꠝꠘꠦ ꠢꠇꠟ ꠘꠝꠥꠘꠣꠞ ꠉꠥꠘꠣ ꠕꠣꠇꠤ ꠙꠣꠇ-ꠍꠣꠚ ꠅꠁꠛꠣꠄ। 31ꠅꠃꠖꠤꠘ ꠔꠥꠝꠞꠣ ꠢꠇꠟ ꠘꠝꠥꠘꠣꠞ ꠇꠣꠝ-ꠇꠣꠎ ꠛꠣꠖ ꠖꠤꠀ ꠀꠞꠣꠝ ꠇꠞꠛꠣꠄ, ꠙꠞꠔꠦꠇꠦ ꠘꠔ ꠅꠁꠀ ꠎꠣꠞꠎꠤꠞ ꠖꠤꠟ ꠡꠙꠤꠀ ꠖꠤꠛꠣꠄ। ꠁꠐꠣ ꠅꠁꠟ ꠔꠥꠝꠞꠣꠞ ꠟꠣꠉꠤ ꠌꠤꠞꠇꠣꠟꠤꠘ ꠘꠤꠅꠝ। 32ꠎꠦꠇꠥꠘꠥ ꠁꠝꠣꠝꠞꠦ ꠎꠦꠛꠟꠣ ꠙꠞꠗꠣꠘ ꠁꠝꠣꠝ ꠢꠤꠡꠣꠛꠦ ꠔꠣꠞ ꠛꠣꠚꠞ ꠎꠣꠉꠣꠔ ꠈꠦꠟꠣꠚꠔꠤ ꠡꠝꠎꠣꠁꠀ ꠛꠅꠀꠁꠟ ꠇꠞꠣ ꠅꠁꠛ, ꠢꠦ-ꠅ ꠅꠟꠣ ꠡꠣꠖꠣ ꠡꠥꠔꠤ ꠇꠣꠙꠠꠞ ꠙꠛꠤꠔ꠆ꠞ ꠟꠦꠛꠣꠍ ꠚꠤꠘ꠆ꠖꠤꠀ ꠅꠃ ꠘꠝꠥꠘꠣꠄ ꠉꠥꠘꠣꠞ ꠇꠚꠞꠣ ꠀꠖꠣꠄ ꠇꠞꠛ। 33ꠢꠦꠞꠦꠝ ꠡꠞꠤꠚ, ꠙꠛꠤꠔ꠆ꠞ ꠇꠣꠛꠣ ꠊꠞ, ꠇꠥꠞꠛꠣꠘꠤ ꠈꠣꠘꠣ, ꠛꠣꠇꠤ ꠁꠝꠣꠝ ꠅꠇꠟ, ꠀꠞ ꠀꠡ꠆ꠔꠣ ꠛꠘꠤ ꠁꠍꠞꠣꠁꠟ ꠡꠝꠣꠎꠞꠦ ꠙꠣꠇ-ꠍꠣꠚ ꠇꠞꠣꠞ ꠟꠣꠉꠤ ꠇꠚꠞꠣ ꠀꠖꠣꠄ ꠇꠞꠛ। 34ꠁꠐꠣ ꠅꠁꠟ ꠔꠥꠝꠞꠣꠞ ꠟꠣꠉꠤ ꠢꠞ-ꠢꠣꠝꠦꠡꠣꠇꠥꠞ ꠘꠤꠅꠝ। ꠙꠞꠔꠦꠇ ꠛꠍꠞ ꠄꠇꠛꠣꠞ ꠢꠇꠟ ꠛꠘꠤ ꠁꠍꠞꠣꠁꠟꠞ ꠉꠥꠘꠣꠞ ꠇꠚꠞꠣ ꠅꠟꠣ ꠀꠖꠣꠄ ꠇꠞꠔꠦ ꠅꠁꠛ।”
ꠔꠦꠃ ꠝꠣꠛꠥꠖꠦ ꠝꠥꠍꠣꠞꠦ ꠎꠦꠟꠣ ꠢꠥꠇꠥꠝ ꠖꠤꠍꠟꠣ, ꠑꠤꠇ ꠅꠃ ꠟꠣꠈꠣꠘ ꠢꠇꠟꠔꠣ ꠇꠞꠣ ꠅꠁꠟ।
Currently Selected:
ꠔꠃꠞꠣꠔ ৩: ꠟꠦꠛꠤꠀꠘ 16: sylN
Highlight
Share
Copy
Want to have your highlights saved across all your devices? Sign up or sign in
© Ahle Kitab Society. All rights reserved.
