ꠔꠃꠞꠣꠔ ৩: ꠟꠦꠛꠤꠀꠘ 14
14
ꠙꠌꠣ-ꠇꠥꠡ꠆ꠑ ꠛꠦꠝꠣꠞꠤꠞꠦ ꠙꠣꠇ-ꠍꠣꠚ
1ꠛꠣꠖꠦ ꠝꠣꠛꠥꠖꠦ ꠝꠥꠍꠣꠞꠦ ꠇꠁꠟꠣ, 2“ꠙꠌꠣ-ꠇꠥꠡ꠆ꠑ ꠛꠦꠝꠣꠞꠤꠞꠦ ꠙꠣꠇ-ꠍꠣꠚ ꠇꠞꠣꠞ ꠖꠤꠘ ꠅꠃ ꠘꠤꠅꠝ ꠝꠣꠘꠤꠅ। ꠁꠝꠣꠝ ꠍꠣꠛꠦ ꠔꠣꠞꠦ ꠖꠦꠈꠣꠞ ꠟꠣꠉꠤ, 3ꠇꠦꠝ꠆ꠙꠞ ꠛꠣꠞꠦ ꠉꠤꠀ ꠙꠞꠤꠇ꠆ꠇꠣ ꠇꠞꠤꠀ ꠖꠦꠈꠛꠣ। ꠔꠣꠁꠘ ꠎꠥꠖꠤ ꠖꠦꠈꠂꠘ ꠢꠦ ꠢꠣꠍꠣꠃ ꠜꠣꠟꠣ ꠅꠁꠉꠦꠍꠦ, 4ꠔꠦ ꠁꠝꠣꠝꠦ ꠢꠥꠇꠥꠝ ꠖꠤꠛꠣ, ꠙꠣꠇ-ꠍꠣꠚ ꠅꠀ ꠎꠘꠞ ꠘꠤꠅꠔꠦ ꠎꠤꠔꠣ ꠖꠥꠁꠐꠣ ꠢꠣꠟꠣꠟ ꠙꠣꠈꠤ, ꠖꠦꠛꠖꠣꠞꠥ ꠉꠣꠍꠞ ꠇꠤꠍꠥ ꠟꠣꠇꠠꠤ, ꠄꠍꠥꠛ ꠉꠣꠍꠞ ꠒꠦꠐꠣ ꠀꠞ ꠟꠣꠟ ꠡꠥꠔꠣ ꠟꠁꠀ ꠀꠁꠔꠣ। 5ꠛꠣꠖꠦ ꠁꠝꠣꠝꠦ ꠢꠥꠇꠥꠝ ꠖꠤꠛꠣ, ꠚꠥꠔꠞ ꠙꠣꠘꠤ ꠕꠣꠇꠤ ꠙꠣꠘꠤ ꠀꠘꠤꠀ ꠝꠣꠐꠤꠞ ꠉꠣꠝꠟꠣꠔ ꠕꠅꠀ ꠙꠣꠘꠤꠞ ꠃꠙꠞꠦ, ꠢꠃ ꠖꠥꠁꠅ ꠙꠣꠈꠤꠞ ꠝꠣꠎꠞ ꠄꠇꠐꠣꠞꠦ ꠎꠛ ꠇꠞꠣꠞ ꠟꠣꠉꠤ। 6ꠎꠛꠞ ꠛꠣꠖꠦ ꠁꠝꠣꠝꠦ ꠛꠣꠇꠤ ꠢꠃ ꠎꠤꠔꠣ ꠙꠣꠈꠤꠞꠦ, ꠖꠦꠛꠖꠣꠞꠥ ꠉꠣꠍꠞ ꠟꠣꠇꠠꠤꠞꠦ, ꠟꠣꠟ ꠡꠥꠔꠣꠞꠦ ꠀꠞ ꠄꠍꠥꠛ ꠉꠣꠍꠞ ꠒꠦꠐꠣꠞꠦ, ꠚꠥꠔꠞ ꠙꠣꠘꠤꠞ ꠉꠣꠝꠟꠣꠞ ꠃꠙꠞꠦ ꠎꠛ ꠇꠞꠣ ꠢꠃ ꠙꠣꠈꠤꠞ ꠟꠃꠞ ꠝꠣꠎꠦ ꠍꠥꠛꠣꠁꠛꠣ। 7ꠀꠞ ꠅꠃ ꠎꠦ ꠛꠦꠝꠣꠞꠤꠞꠦ ꠙꠣꠇ-ꠍꠣꠚ ꠇꠞꠣ ꠅꠁꠔ, ꠁꠝꠣꠝꠦ ꠔꠣꠞ ꠃꠙꠞꠦ ꠢꠃ ꠟꠃ ꠡꠣꠔ ꠛꠣꠞ ꠍꠤꠐꠣꠁꠀ ꠢꠣꠞꠤ, ꠔꠣꠞꠦ ꠙꠣꠇ-ꠍꠣꠚ ꠇꠁꠀ ꠄꠟꠣꠘ ꠇꠞꠛꠣ। ꠛꠣꠖꠦ ꠁꠝꠣꠝꠦ ꠢꠃ ꠎꠤꠔꠣ ꠙꠣꠈꠤꠞꠦ ꠈꠥꠟꠣ ꠎꠣꠉꠣꠔ ꠍꠣꠠꠤ ꠖꠤꠛꠣ। 8ꠀꠞ ꠙꠣꠇ-ꠍꠣꠚ ꠛꠘꠞꠣ ꠅꠃ ꠛꠦꠝꠣꠞꠤꠄ ꠔꠣꠞ ꠇꠣꠙꠠ-ꠌꠥꠙꠠ ꠗꠁꠛ, ꠔꠣꠞ ꠉꠔꠞꠞ ꠀꠞ ꠝꠣꠕꠣꠞ ꠢꠇꠟ ꠌꠥꠟ-ꠞꠥꠝ ꠇꠣꠝꠣꠁꠀ ꠢꠣꠞꠤ ꠙꠣꠘꠤ ꠖꠤꠀ ꠘꠣꠁꠔꠦ ꠅꠁꠛ, ꠔꠦꠃ ꠢꠦ ꠙꠣꠇ-ꠍꠣꠚ ꠛꠘꠛ। ꠄꠞꠛꠣꠖꠦ ꠢꠦ ꠀꠁꠀ ꠛꠘꠤ ꠁꠍꠞꠣꠁꠟꠞ ꠇꠦꠝ꠆ꠙꠞ ꠜꠤꠔꠞꠦ ꠢꠣꠝꠣꠁꠔ ꠙꠣꠞꠛ, ꠅꠁꠟꠦ ꠔꠣꠞ ꠘꠤꠎꠞ ꠔꠣꠝ꠆ꠛꠥꠞ ꠛꠣꠞꠦ ꠡꠣꠔ ꠖꠤꠘ ꠞꠁꠔꠦ ꠅꠁꠛ। 9ꠛꠣꠖꠦ ꠡꠣꠔ ꠖꠤꠘꠞ ꠖꠤꠘ ꠢꠤꠞꠛꠣꠞ ꠔꠣꠞ ꠡꠞꠤꠟꠞ ꠢꠇꠟ ꠌꠥꠟ, ꠝꠣꠘꠤ ꠝꠣꠕꠣꠞ ꠌꠥꠟ, ꠖꠣꠠꠤ-ꠝꠥꠍ, ꠌꠈꠥꠞ ꠜꠥꠞꠤ ꠀꠞ ꠉꠔꠞꠞ ꠢꠇꠟ ꠞꠥꠝꠣ ꠇꠣꠝꠣꠁꠔꠦ ꠅꠁꠛ। ꠛꠣꠖꠦ ꠔꠣꠞ ꠇꠣꠙꠠ-ꠌꠥꠙꠠ ꠗꠁꠀ ꠘꠣꠁꠀ ꠢꠣꠞꠟꠦ ꠢꠦ ꠙꠥꠞꠣꠙꠥꠞ ꠙꠣꠇ-ꠍꠣꠚ ꠅꠁꠛ।
10“ꠛꠣꠖꠞ ꠖꠤꠘ ꠢꠦ ꠙꠥꠞꠣꠙꠥꠞ ꠘꠤꠈꠥꠔ ꠖꠥꠁꠐꠣ ꠝꠦꠠꠣ-ꠛꠣꠁꠌ꠆ꠌꠣ ꠀꠞ ꠄꠇ ꠛꠍꠞꠞ ꠄꠉꠥ ꠝꠦꠠꠤ ꠟꠁꠀ ꠀꠁꠛ। ꠀꠞ ꠄꠞ ꠟꠉꠞ ꠗꠣꠘ-ꠉꠝꠞ ꠍꠖꠉꠣꠞ ꠘꠤꠅꠔꠦ ꠢꠦ ꠍꠄ ꠡꠦꠞ ꠔꠦꠟ ꠝꠣꠈꠣꠁꠟ ꠝꠄꠖꠣ ꠀꠞ ꠄꠇ ꠙꠣꠅꠀ ꠔꠦꠟ ꠀꠘꠛ। 11ꠀꠘꠤꠀ ꠢꠣꠞꠟꠦ ꠔꠣꠞ ꠙꠣꠇ-ꠍꠣꠚꠞ ꠟꠣꠉꠤ ꠎꠦ ꠁꠝꠣꠝ ꠍꠣꠛꠦ ꠇꠣꠝ ꠇꠞꠞꠣ, ꠄꠁꠘ ꠅꠃ ꠎꠘꠞꠦ ꠀꠞ ꠇꠥꠞꠛꠣꠘꠤꠞ ꠝꠣꠟ-ꠍꠣꠝꠣꠘꠣꠞꠦ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠉꠦꠍꠦ ꠝꠣꠛꠥꠖꠞ ꠍꠣꠝꠘꠦ ꠀꠎꠤꠞ ꠇꠞꠛꠣ।
12“ꠁꠝꠣꠝ ꠍꠣꠛꠦ ꠢꠃ ꠖꠥꠁꠅ ꠝꠦꠠꠣ-ꠛꠣꠁꠌ꠆ꠌꠣ ꠕꠣꠇꠤ ꠄꠉꠥ ꠝꠦꠠꠣ ꠀꠞ ꠢꠃ ꠔꠦꠟ ꠘꠤꠀ ꠖꠥꠡ-ꠇꠍꠥꠞꠤꠞ ꠇꠚꠞꠣꠞ ꠇꠥꠞꠛꠣꠘꠤ ꠀꠖꠣꠄ ꠇꠞꠛꠣ, ꠇꠞꠤꠀ ꠖꠥꠟꠘꠣ ꠇꠥꠞꠛꠣꠘꠤ ꠢꠤꠡꠣꠛꠦ ꠝꠣꠛꠥꠖꠞ ꠍꠣꠝꠘꠦ ꠁꠔꠣ ꠖꠥꠟꠣꠁꠛꠣ। 13ꠛꠣꠖꠦ ꠙꠛꠤꠔ꠆ꠞ ꠇꠣꠛꠣ ꠊꠞꠞ ꠡꠤꠝꠣꠘꠣꠞ ꠎꠦ ꠎꠣꠉꠣꠔ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ ꠀꠞ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠙꠡꠥ ꠎꠛ ꠇꠞꠣ ꠅꠄ, ꠢꠃ ꠎꠣꠉꠣꠔ ꠅꠃ ꠙꠡꠥꠞꠦꠅ ꠎꠛ ꠇꠞꠛꠣ। ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠣꠈꠣꠘ ꠖꠥꠡ-ꠇꠍꠥꠞꠤꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠉꠥꠡ꠆ꠔꠅ ꠁꠝꠣꠝ ꠍꠣꠛꠦ ꠙꠣꠁꠛꠣ, ꠁꠔꠣ ꠔ ꠈꠣꠍ ꠙꠛꠤꠔ꠆ꠞ ꠉꠥꠡ꠆ꠔ। 14ꠎꠦ ꠎꠘꠞꠦ ꠙꠣꠇ-ꠍꠣꠚ ꠇꠞꠣ ꠅꠁꠛ, ꠁꠝꠣꠝ ꠍꠣꠛꠦ ꠖꠥꠡ-ꠇꠍꠥꠞꠤꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠇꠤꠍꠥ ꠟꠃ ꠘꠤꠀ ꠔꠣꠞ ꠒꠣꠁꠘ ꠇꠣꠘꠞ ꠟꠔꠤꠔ, ꠒꠣꠁꠘ ꠀꠔꠞ ꠀꠞ ꠒꠣꠁꠘ ꠙꠣꠅꠞ ꠛꠥꠠꠤ ꠀꠋꠉꠥꠟꠤꠔ ꠟꠣꠉꠣꠁꠛꠣ। 15ꠛꠣꠖꠦ ꠁꠝꠣꠝꠦ ꠢꠃ ꠔꠦꠟ ꠕꠣꠇꠤ ꠇꠤꠍꠥ ꠔꠦꠟ ꠔꠣꠘ ꠛꠣꠃ ꠀꠔꠞ ꠔꠣꠟꠥꠞ ꠝꠣꠎꠦ ꠓꠣꠟꠤꠛꠣ। 16ꠀꠞ ꠒꠣꠁꠘ ꠀꠔꠞ ꠀꠋꠉꠥꠁꠟ ꠖꠤꠀ, ꠛꠣꠃ ꠀꠔ ꠕꠣꠇꠤ ꠔꠦꠟ ꠔꠥꠟꠤꠀ ꠝꠣꠛꠥꠖꠞ ꠘꠣꠝꠦ ꠡꠣꠔ ꠛꠣꠞ ꠍꠤꠐꠣꠁꠛꠣ। 17ꠛꠣꠖꠦ ꠀꠔꠞ ꠔꠣꠟꠥꠞ ꠛꠣꠖ-ꠛꠣꠇꠤ ꠔꠦꠟ ꠕꠣꠇꠤ ꠇꠤꠍꠥ ꠔꠦꠟ ꠘꠤꠀ ꠁꠝꠣꠝꠦ ꠢꠃ ꠎꠘꠞ ꠒꠣꠁꠘ ꠇꠣꠘꠞ ꠟꠔꠤꠔ, ꠒꠣꠁꠘ ꠀꠔꠞ ꠀꠞ ꠒꠣꠁꠘ ꠙꠣꠅꠞ ꠛꠥꠠꠤ ꠀꠋꠉꠥꠟꠤꠔ ꠖꠥꠡ-ꠇꠍꠥꠞꠤꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠃꠞ ꠃꠙꠞꠦ ꠟꠣꠉꠣꠁꠛꠣ। 18ꠀꠞ ꠀꠔꠞ ꠔꠣꠟꠥꠞ ꠛꠣꠇꠤ ꠔꠦꠟ ꠔꠣꠁꠘ ꠢꠃ ꠙꠣꠇ-ꠍꠣꠚ ꠅꠀ ꠎꠘꠞ ꠝꠣꠕꠣꠔ ꠟꠣꠉꠣꠁꠛꠣ।
“ꠀꠞ ꠅꠃ ꠘꠝꠥꠘꠣꠄ ꠔꠣꠞ ꠇꠚꠞꠣ ꠀꠖꠣꠄ ꠇꠞꠛꠣ, 19ꠎꠦ ꠎꠘꠞꠦ ꠙꠣꠇ-ꠍꠣꠚ ꠇꠞꠣ ꠅꠁꠛ, ꠔꠣꠞ ꠀꠘꠣ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠙꠡꠥꠞꠦ ꠁꠝꠣꠝ ꠍꠣꠛꠦ ꠎꠛ ꠇꠞꠛꠣ। ꠛꠣꠖꠦ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠙꠡꠥꠅ ꠎꠛ ꠇꠞꠤꠀ, 20ꠗꠣꠘ-ꠉꠝꠞ ꠍꠖꠉꠣꠞ ꠎꠤꠘꠤꠡꠞ ꠟꠉꠦ ꠝꠤꠟꠣꠁꠀ, ꠁꠝꠣꠝ ꠍꠣꠛꠦ ꠇꠥꠞꠛꠣꠘꠤ ꠈꠣꠘꠣꠞ ꠃꠙꠞꠦ ꠁꠔꠣ ꠖꠤꠛꠣ। ꠅꠃ ꠘꠝꠥꠘꠣꠄ ꠔꠣꠞ ꠇꠚꠞꠣ ꠀꠖꠣꠄ ꠇꠞꠤꠀ ꠔꠣꠞ ꠘꠣꠙꠣꠇꠤ ꠢꠞꠣꠁꠛꠣ।
21“ꠅꠁꠟꠦ ꠅꠃ ꠎꠘ ꠎꠥꠖꠤ ꠉꠞꠤꠛ ꠅꠄ, ꠁꠔꠣ ꠢꠇꠟꠔꠣ ꠀꠘꠣꠞ ꠔꠚꠤꠇ ꠔꠣꠞ ꠘꠣ ꠕꠣꠇꠦ, ꠔꠦ ꠖꠥꠡ-ꠇꠍꠥꠞꠤꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠣꠉꠤ ꠈꠣꠟꠤ ꠄꠉꠥ ꠝꠦꠠꠣ-ꠛꠣꠁꠌ꠆ꠌꠣ ꠀꠘꠔꠦ ꠅꠁꠛ, ꠀꠘꠟꠦ ꠁꠝꠣꠝꠦ ꠔꠣꠞ ꠇꠚꠞꠣ ꠀꠖꠣꠄ ꠇꠞꠣꠞ ꠟꠣꠉꠤ ꠅꠇꠐꠣꠞꠦ ꠇꠥꠞꠛꠣꠘꠤ ꠖꠤꠀ ꠖꠥꠟꠣꠁꠛꠣ। ꠀꠞ ꠄꠞ ꠟꠉꠞ ꠗꠣꠘ-ꠉꠝꠞ ꠍꠖꠉꠣ ꠢꠤꠡꠣꠛꠦ ꠔꠣꠞ ꠀꠘꠣ ꠔꠦꠟ ꠝꠣꠈꠣꠁꠟ ꠖꠥꠁ ꠡꠦꠞ ꠝꠄꠖꠣ, ꠄꠇ ꠙꠣꠅꠀ ꠔꠦꠟ 22ꠀꠞ ꠔꠣꠞ ꠖꠥꠁꠐꠣ ꠒꠥꠙꠤ ꠙꠣꠈꠤ ꠛꠣ ꠙꠣꠞꠅ ꠀꠘꠔꠦ ꠅꠁꠛ, ꠎꠦꠟꠣ ꠔꠣꠞ ꠔꠣꠇ꠆ꠇꠔꠦ ꠇꠥꠟꠣꠄ। ꠖꠥꠁꠅ ꠙꠣꠈꠤꠞ ꠝꠣꠎꠞ ꠄꠇꠐꠣ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠣꠉꠤ, ꠀꠞ ꠄꠇꠐꠣ ꠎꠣꠟꠣꠁꠟ ꠇꠥꠞꠛꠣꠘꠤꠞ ꠟꠣꠉꠤ। 23ꠛꠣꠖꠦ ꠀꠐ ꠖꠤꠘꠞ ꠖꠤꠘ ꠙꠣꠇ-ꠍꠣꠚ ꠅꠀꠞ ꠘꠤꠅꠔꠦ ꠢꠦ ꠁꠔꠣ ꠢꠇꠟꠔꠣ ꠀꠘꠤꠀ ꠝꠤꠟꠘ-ꠔꠣꠝ꠆ꠛꠥꠞ ꠖꠥꠀꠞꠞ ꠗꠣꠞꠅ ꠝꠣꠛꠥꠖꠞ ꠍꠣꠝꠘꠦ ꠁꠝꠣꠝꠞ ꠉꠦꠍꠦ ꠡꠝꠎꠣꠁꠔꠦ ꠅꠁꠛ। 24ꠁꠝꠣꠝꠦ ꠖꠥꠡ-ꠇꠍꠥꠞꠤꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠝꠦꠠꠣ ꠀꠞ ꠅꠃ ꠔꠦꠟ ꠘꠤꠀ ꠝꠣꠛꠥꠖꠞ ꠍꠣꠝꠘꠦ ꠖꠥꠟꠘꠣ ꠇꠥꠞꠛꠣꠘꠤ ꠢꠤꠡꠣꠛꠦ ꠖꠥꠟꠣꠁꠛꠣ। 25ꠛꠣꠖꠦ ꠁꠝꠣꠝꠦ ꠝꠦꠠꠣꠞꠦ ꠎꠛ ꠇꠞꠤꠀ ꠅꠉꠥꠞ ꠇꠤꠍꠥ ꠟꠃ ꠘꠤꠀ ꠢꠃ ꠎꠘꠞ ꠒꠣꠁꠘ ꠇꠣꠘꠞ ꠟꠔꠤꠔ, ꠒꠣꠁꠘ ꠀꠔꠞ ꠀꠞ ꠒꠣꠁꠘ ꠙꠣꠅꠞ ꠛꠥꠠꠤ ꠀꠋꠉꠥꠟꠤꠔ ꠟꠣꠉꠣꠁꠛꠣ। 26ꠛꠣꠖꠦ ꠢꠃ ꠔꠦꠟ ꠕꠣꠇꠤ ꠇꠤꠍꠥ ꠔꠦꠟ ꠔꠣꠘ ꠛꠣꠃ ꠀꠔꠞ ꠔꠣꠟꠥꠞ ꠝꠣꠎꠦ ꠓꠣꠟꠤꠛꠣ। 27ꠀꠞ ꠒꠣꠁꠘ ꠀꠔꠞ ꠀꠋꠉꠥꠁꠟ ꠖꠤꠀ ꠁꠝꠣꠝꠦ ꠛꠣꠃ ꠀꠔꠞ ꠇꠤꠍꠥ ꠔꠦꠟ ꠔꠥꠟꠤꠀ ꠝꠣꠛꠥꠖꠞ ꠍꠣꠝꠘꠦ ꠡꠣꠔ ꠛꠣꠞ ꠍꠤꠐꠣꠁꠛꠣ। 28ꠄꠞꠟꠉꠦ ꠔꠣꠞ ꠒꠣꠁꠘ ꠇꠣꠘꠞ ꠟꠔꠤꠔ, ꠒꠣꠁꠘ ꠀꠔꠞ ꠀꠞ ꠒꠣꠁꠘ ꠙꠣꠅꠞ ꠛꠥꠠꠤ ꠀꠋꠉꠥꠟꠤꠞ ꠎꠦ ꠎꠣꠉꠣꠔ ꠖꠥꠡ-ꠇꠍꠥꠞꠤꠞ ꠇꠚꠞꠣꠞ ꠇꠥꠞꠛꠣꠘꠤꠞ ꠟꠃ ꠟꠣꠉꠣꠁꠟ ꠅꠁꠍꠦ, ꠢꠃ ꠎꠣꠉꠣꠞ ꠃꠙꠞꠦ ꠅꠃ ꠔꠦꠟꠅ ꠟꠣꠉꠣꠁꠛꠣ। 29ꠝꠣꠛꠥꠖꠞ ꠍꠣꠝꠘꠦ ꠢꠃ ꠙꠣꠇ-ꠍꠣꠚ ꠅꠀ ꠎꠘꠞ ꠇꠚꠞꠣꠞ ꠘꠤꠅꠔꠦ ꠁꠝꠣꠝꠞ ꠀꠔꠞ ꠛꠣꠇꠤ ꠔꠦꠟ ꠔꠣꠞ ꠝꠣꠕꠣꠔ ꠓꠣꠟꠤ ꠖꠤꠛꠣ। 30ꠛꠣꠖꠦ ꠢꠃ ꠎꠘꠞ ꠔꠣꠇ꠆ꠇꠔ ꠝꠣꠚꠤꠇ ꠀꠘꠣ ꠒꠥꠙꠤ ꠛꠣ ꠙꠣꠞꠅ ꠎꠥꠠꠣ ꠘꠤꠀ, 31ꠁꠝꠣꠝꠦ ꠄꠉꠥꠞꠦ ꠉꠥꠘꠣꠞ ꠇꠚꠞꠣꠞ ꠇꠥꠞꠛꠣꠘꠤ ꠢꠤꠡꠣꠛꠦ, ꠀꠞ ꠖꠥꠍꠞꠣꠐꠣꠞꠦ ꠎꠣꠟꠣꠁꠟ ꠇꠥꠞꠛꠣꠘꠤ ꠢꠤꠡꠣꠛꠦ ꠇꠥꠞꠛꠣꠘꠤ ꠖꠤꠛꠣ। ꠟꠉꠦ ꠗꠣꠘ-ꠉꠝꠞ ꠍꠖꠉꠣꠞꠦꠅ ꠖꠤꠛꠣ। ꠁꠝꠣꠝꠦ ꠅꠃ ꠘꠝꠥꠘꠣꠄ ꠝꠣꠛꠥꠖꠞ ꠍꠣꠝꠘꠦ ꠔꠣꠞ ꠇꠚꠞꠣ ꠀꠖꠣꠄ ꠇꠞꠛꠣ। 32ꠙꠌꠣ-ꠇꠥꠡ꠆ꠑ ꠛꠦꠝꠣꠞꠤ ꠙꠣꠇ-ꠍꠣꠚ ꠅꠀꠞ ꠟꠣꠉꠤ ꠎꠦꠟꠣꠈꠣꠘ ꠇꠥꠞꠛꠣꠘꠤ ꠀꠖꠣꠄ ꠇꠞꠣꠞ ꠇꠕꠣ, ꠁꠔꠣ ꠀꠖꠣꠄ ꠇꠞꠣꠞ ꠔꠣꠇ꠆ꠇꠔ ꠎꠦꠞꠣꠞ ꠘꠣꠁ, ꠔꠣꠞꠣꠞ ꠟꠣꠉꠤ ꠅꠃ ꠘꠤꠅꠝ ꠖꠦꠅꠀ ꠅꠁꠍꠦ।”
ꠚꠦꠃꠇꠘꠤ ꠙꠠꠣ ꠊꠞ
33ꠛꠣꠖꠦ ꠝꠣꠛꠥꠖꠦ ꠝꠥꠍꠣ ꠀꠞ ꠢꠣꠞꠥꠘꠞꠦ ꠇꠁꠟꠣ, 34“ꠀꠝꠤ ꠎꠦ ꠖꠦꠡꠈꠣꠘꠞꠦ ꠔꠥꠝꠞꠣꠞ ꠝꠣꠟꠤꠇꠣꠘꠣꠄ ꠖꠤꠝꠥ, ꠅꠃ ꠇꠦꠘꠣꠘ ꠖꠦꠡꠅ ꠢꠣꠝꠣꠘꠤꠞ ꠛꠣꠖꠦ, ꠀꠝꠤ ꠎꠥꠖꠤ ꠢꠘꠞ ꠇꠥꠘꠥ ꠊꠞꠞ ꠝꠣꠎꠦ ꠘꠣꠙꠣꠇ-ꠚꠦꠃꠇꠘꠤ ꠛꠦꠝꠣꠞ ꠙꠣꠑꠣꠁ, 35ꠔꠦ ꠊꠞꠞ ꠝꠣꠟꠤꠇꠦ ꠉꠤꠀ ꠁꠝꠣꠝ ꠍꠣꠛꠞꠦ ꠇꠁꠛꠣ, ꠀꠝꠣꠞ ꠊꠞꠅ ꠘꠣꠙꠣꠇ-ꠚꠦꠃꠇꠘꠤꠞ ꠟꠣꠈꠣꠘ ꠇꠤꠔꠣ ꠎꠣꠘꠥ ꠖꠦꠈꠤꠀꠞ। 36ꠔꠦꠃ ꠁꠝꠣꠝꠦ ꠁ ꠚꠦꠃꠇꠘꠤ ꠙꠞꠤꠇ꠆ꠇꠣ ꠇꠞꠤꠀ ꠖꠦꠈꠣꠔ ꠀꠁꠀ, ꠊꠞꠞ ꠢꠇꠟ ꠝꠣꠟ-ꠍꠣꠝꠣꠘꠣꠞꠦ ꠎꠣꠔꠦ ꠘꠣꠙꠣꠇ ꠇꠁꠀ ꠄꠟꠣꠘ ꠇꠞꠣ ꠘꠣ ꠟꠣꠉꠦ, ꠅꠃ ꠘꠤꠅꠔꠦ ꠔꠣꠁꠘ ꠝꠣꠟꠤꠇꠞꠦ ꠢꠥꠇꠥꠝ ꠖꠤꠛꠣ, ꠀꠝꠤ ꠊꠞꠅ ꠢꠣꠝꠣꠘꠤꠞ ꠀꠉꠦ ꠔꠥꠝꠣꠞ ꠊꠞꠞ ꠢꠇꠟ ꠝꠣꠟ-ꠍꠣꠝꠣꠘꠣ ꠛꠣꠞꠦ ꠛꠣꠞ ꠇꠞꠤꠟꠣꠅ। ꠢꠇꠟꠔꠣ ꠛꠣꠞ ꠇꠞꠤꠀ ꠢꠣꠞꠟꠦ ꠔꠣꠁꠘ ꠊꠞꠅ ꠢꠣꠝꠣꠁꠀ ꠙꠞꠤꠇ꠆ꠇꠣ ꠇꠞꠛꠣ। 37ꠔꠣꠁꠘ ꠎꠥꠖꠤ ꠖꠦꠈꠂꠘ, ꠊꠞꠞ ꠅꠀꠟꠞ ꠇꠥꠘꠥ ꠚꠦꠃꠇꠘꠤꠞ ꠖꠣꠉ ꠉꠤꠀ ꠜꠤꠔꠞꠦꠖꠤ ꠢꠣꠝꠣꠁꠍꠦ, ꠀꠞ ꠅꠃ ꠖꠣꠉꠞ ꠞꠋ ꠇꠌꠥꠀ ꠛꠣ ꠟꠣꠟꠐꠤ, 38ꠔꠦ ꠔꠣꠁꠘ ꠁ ꠊꠞ ꠕꠣꠇꠤ ꠛꠣꠞ ꠅꠁ ꠀꠁꠀ, ꠊꠞꠞ ꠖꠥꠀꠞ ꠡꠣꠔ ꠖꠤꠘ ꠛꠘ꠆ꠖ ꠇꠞꠤ ꠕꠁꠛꠣ। 39ꠅꠃ ꠡꠣꠔ ꠖꠤꠘ ꠛꠣꠖꠦ ꠢꠤꠞꠛꠣꠞ ꠙꠞꠤꠇ꠆ꠇꠣ ꠇꠞꠤ ꠖꠦꠈꠛꠣ, ꠎꠥꠖꠤ ꠖꠦꠈꠣ ꠎꠣꠄ, ꠁ ꠖꠣꠉ ꠅꠀꠟꠞ ꠝꠣꠎꠦ ꠀꠞꠅ ꠍꠤꠔ꠆ꠞꠤꠍꠦ, 40ꠔꠦ ꠔꠣꠁꠘ ꠢꠥꠇꠥꠝ ꠖꠤꠛꠣ, ꠅꠃ ꠅꠀꠟꠞ ꠖꠣꠉ ꠀꠟꠣ ꠙꠣꠔ꠆ꠔꠞ ꠛꠣ ꠁꠐ ꠈꠥꠟꠤꠀ ꠢꠣꠞꠤ, ꠉꠣꠃ ꠛꠣ ꠐꠣꠃꠘꠞ ꠛꠣꠞꠦ ꠘꠤꠀ ꠘꠣꠙꠣꠇ ꠇꠥꠘꠥ ꠎꠣꠉꠣꠔ ꠚꠣꠟꠣꠁ ꠖꠤꠔꠣ। 41ꠛꠣꠖꠦ ꠀꠡ꠆ꠔꠣ ꠊꠞꠞ ꠜꠤꠔꠞꠞ ꠢꠇꠟ ꠅꠀꠟ ꠌꠣꠍꠤꠀ ꠀꠡ꠆ꠔꠞ ꠔꠥꠟꠤꠀ ꠢꠣꠞꠤ, ꠅꠔꠣ ꠘꠤꠀ ꠐꠣꠃꠘꠞ ꠛꠣꠞꠦ ꠘꠣꠙꠣꠇ ꠇꠥꠘꠥ ꠎꠣꠉꠣꠔ ꠚꠣꠟꠣꠁꠔꠣ। 42ꠀꠞ ꠅꠀꠟꠞ ꠎꠦ ꠎꠣꠉꠣ ꠕꠣꠇꠤ ꠙꠣꠔ꠆ꠔꠞ ꠛꠣ ꠁꠐ ꠈꠥꠟꠣ ꠅꠁꠍꠦ, ꠢꠘꠅ ꠘꠄꠀ ꠙꠣꠔ꠆ꠔꠞ ꠟꠣꠉꠣꠁꠛꠣ, ꠟꠣꠉꠣꠁꠀ ꠀꠡ꠆ꠔꠣ ꠊꠞ ꠢꠤꠞꠛꠣꠞ ꠘꠄꠀ ꠀꠡ꠆ꠔꠞ ꠇꠞꠔꠣ।
43“ꠅꠀꠟꠞ ꠙꠣꠔ꠆ꠔꠞ ꠈꠥꠟꠤꠀ ꠚꠣꠟꠣꠁꠀ ꠌꠣꠍꠤꠀ ꠀꠡ꠆ꠔꠞ ꠔꠥꠟꠣꠞ ꠛꠣꠖꠦ, ꠘꠄꠀ ꠀꠡ꠆ꠔꠞ ꠟꠣꠉꠣꠁꠀ ꠢꠣꠞꠟꠦꠅ ꠎꠥꠖꠤ ꠅꠀꠟꠅ ꠢꠤꠞꠛꠣꠞ ꠅꠟꠣ ꠖꠣꠉ ꠖꠦꠈꠣ ꠎꠣꠄ, 44ꠔꠦ ꠁꠝꠣꠝꠦ ꠢꠤꠞꠛꠣꠞ ꠉꠤꠀ ꠁꠔꠣ ꠙꠞꠤꠇ꠆ꠇꠣ ꠇꠞꠤ ꠖꠦꠈꠛꠣ। ꠔꠣꠁꠘ ꠎꠥꠖꠤ ꠖꠦꠈꠂꠘ, ꠅꠀꠟꠞ ꠝꠣꠎꠞ ꠖꠣꠉ ꠍꠤꠔ꠆ꠞꠤꠀ ꠀꠞꠅ ꠛꠣꠠꠍꠦ, ꠔꠦ ꠛꠥꠎꠛꠣ, ꠅꠃ ꠊꠞꠅ ꠘꠣꠙꠣꠇ-ꠚꠦꠃꠇꠘꠤ ꠛꠦꠝꠣꠞ ꠀꠍꠦ, ꠄꠞꠟꠣꠉꠤ ꠁ ꠊꠞ ꠈꠣꠘ ꠘꠣꠙꠣꠇ। 45ꠘꠣꠙꠣꠇ ꠅꠃ ꠊꠞꠞ ꠢꠇꠟ ꠙꠣꠔ꠆ꠔꠞ ꠛꠣ ꠁꠐ, ꠢꠇꠟ ꠀꠡ꠆ꠔꠞ, ꠊꠞꠞ ꠟꠣꠇꠠꠤ, ꠢꠇ꠆ꠇꠟꠔꠣ ꠜꠣꠋꠉꠤꠀ ꠐꠣꠃꠘꠞ ꠛꠣꠞꠦ ꠇꠥꠘꠥ ꠘꠣꠙꠣꠇ ꠎꠣꠉꠣꠔ ꠘꠤꠀ ꠚꠣꠟꠣꠁꠔꠦ ꠅꠁꠛ।
46“ꠀꠞ ꠢꠃ ꠡꠣꠔ ꠖꠤꠘ ꠛꠘ꠆ꠖ ꠞꠣꠈꠣꠞ ꠇꠣꠟꠅ ꠎꠥꠖꠤ ꠇꠥꠘꠥ ꠝꠣꠘꠥꠡ ꠉꠤꠀ ꠁ ꠊꠞꠅ ꠢꠣꠝꠣꠄ, ꠔꠦ ꠢꠦ ꠅꠃ ꠖꠤꠘ ꠢꠣꠁꠘ꠆ꠎꠣ ꠙꠞ꠆ꠎꠘ꠆ꠔ ꠘꠣꠙꠣꠇ ꠢꠣꠟꠔꠦ ꠞꠁꠛ। 47ꠀꠞ ꠇꠦꠃ ꠎꠥꠖꠤ ꠅꠃ ꠊꠞꠅ ꠈꠣꠘꠣ-ꠙꠤꠘꠣ ꠈꠣꠄ ꠛꠣ ꠊꠥꠝꠣꠄ, ꠔꠦ ꠔꠣꠞ ꠚꠤꠘ꠆ꠘꠞ ꠇꠣꠙꠠ-ꠌꠥꠙꠠ ꠗꠁꠀ ꠖꠤꠔꠦ ꠅꠁꠛ।
48“ꠅꠁꠟꠦ ꠁ ꠊꠞ ꠀꠡ꠆ꠔꠞ ꠇꠞꠣꠞ ꠛꠣꠖꠦ ꠁꠝꠣꠝꠦ ꠙꠞꠤꠇ꠆ꠇꠣ ꠇꠞꠤꠀ ꠎꠥꠖꠤ ꠖꠦꠈꠂꠘ, ꠅꠀꠟꠞ ꠖꠣꠉ ꠀꠞ ꠖꠦꠈꠣ ꠎꠣꠞ ꠘꠣ, ꠔꠦ ꠁꠝꠣꠝꠦ ꠁ ꠊꠞꠞꠦ ꠙꠣꠇ-ꠍꠣꠚ ꠇꠁꠀ ꠄꠟꠣꠘ ꠇꠞꠛꠣ। ꠁ ꠊꠞꠅ ꠔ ꠘꠣꠙꠣꠇ-ꠚꠦꠃꠇꠘꠤ ꠛꠦꠝꠣꠞꠞ ꠇꠥꠘꠥ ꠀꠟꠣꠝꠔ ꠅꠈꠘ ꠘꠣꠁ। 49ꠀꠞ ꠊꠞꠞꠦ ꠙꠣꠇ-ꠍꠣꠚ ꠇꠞꠣꠞ ꠟꠣꠉꠤ ꠁꠝꠣꠝ ꠍꠣꠛꠦ ꠖꠥꠁꠐꠣ ꠙꠣꠈꠤ, ꠖꠦꠛꠖꠣꠞꠥ ꠉꠣꠍꠞ ꠇꠤꠍꠥ ꠟꠣꠇꠠꠤ, ꠄꠍꠥꠛ ꠉꠣꠍꠞ ꠒꠦꠐꠣ, ꠀꠞ ꠟꠣꠟ ꠞꠋꠉꠞ ꠡꠥꠔꠣ ꠟꠁꠀ ꠅꠘꠅ ꠀꠁꠛꠣ। 50ꠀꠁꠀ ꠚꠥꠔꠞ ꠙꠣꠘꠤ ꠕꠣꠇꠤ ꠀꠘꠣ ꠝꠣꠐꠤꠞ ꠉꠣꠝꠟꠣꠔ ꠕꠅꠀ ꠅꠃ ꠙꠣꠘꠤꠞ ꠃꠙꠞꠦ ꠄꠇꠐꠣ ꠙꠣꠈꠤꠞꠦ ꠎꠛ ꠇꠞꠛꠣ। 51ꠀꠞ ꠖꠥꠍꠞꠣ ꠎꠤꠔꠣ ꠙꠣꠈꠤꠞꠦ, ꠖꠦꠛꠖꠣꠞꠥ ꠉꠣꠍꠞ ꠟꠣꠇꠠꠤꠞꠦ, ꠟꠣꠟ ꠡꠥꠔꠣ ꠀꠞ ꠄꠍꠥꠛ ꠉꠣꠍꠞ ꠒꠦꠐꠣꠞꠦ, ꠚꠥꠔꠞ ꠙꠣꠘꠤꠞ ꠉꠣꠝꠟꠣꠞ ꠃꠙꠞꠦ ꠎꠛ ꠇꠞꠣ ꠢꠃ ꠙꠣꠈꠤꠞ ꠟꠃꠞ ꠝꠣꠎꠦ ꠁꠝꠣꠝ ꠍꠣꠛꠦ ꠍꠥꠛꠣꠁꠛꠣ, ꠍꠥꠛꠣꠁꠀ ꠢꠣꠞꠤ ꠅꠃ ꠊꠞꠞ ꠝꠣꠎꠦ ꠡꠣꠔ ꠛꠣꠞ ꠍꠤꠐꠣꠁꠛꠣ। 52ꠙꠣꠈꠤꠞ ꠟꠃ, ꠚꠥꠔꠞ ꠙꠣꠘꠤ, ꠎꠤꠔꠣ ꠙꠣꠈꠤ, ꠖꠦꠛꠖꠣꠞꠥ ꠉꠣꠍꠞ ꠟꠣꠇꠠꠤ, ꠄꠍꠥꠛ ꠉꠣꠍꠞ ꠒꠦꠐꠣ ꠀꠞ ꠟꠣꠟ ꠡꠥꠔꠣ ꠖꠤꠀ ꠅꠃ ꠊꠞꠞꠦ ꠙꠣꠇ-ꠍꠣꠚ ꠇꠞꠣ ꠅꠁꠛ। 53ꠄꠞꠛꠣꠖꠦ ꠅꠃ ꠎꠤꠔꠣ ꠙꠣꠈꠤꠞꠦ ꠘꠤꠀ ꠉꠣꠃ ꠛꠣ ꠐꠣꠃꠘꠞ ꠛꠣꠞꠦ ꠈꠥꠟꠣ ꠎꠣꠉꠣꠔ ꠍꠣꠠꠤ ꠖꠤꠛꠣ। ꠅꠃ ꠘꠝꠥꠘꠣꠄ ꠢꠃ ꠊꠞꠞ ꠘꠣꠙꠣꠇꠤ ꠢꠞꠣꠁꠀ ꠢꠣꠞꠟꠦ, ꠁꠈꠣꠘ ꠙꠣꠇ-ꠍꠣꠚ ꠅꠁꠛ।”
54ꠔꠦ ꠢꠇꠟ ꠟꠣꠈꠣꠘ ꠙꠌꠣ-ꠇꠥꠡ꠆ꠑ ꠛꠦꠝꠣꠞ, ꠖꠣꠃꠖ-ꠈꠣꠃꠎꠟꠤ, 55ꠇꠣꠙꠠ ꠛꠣ ꠊꠞꠞ ꠅꠀꠟꠞ ꠚꠦꠃꠇꠘꠤꠞ ꠖꠣꠉ, 56ꠉꠔꠞꠞ ꠌꠣꠝꠠꠣꠔ ꠇꠥꠟꠡ ꠃꠑꠣ, ꠛꠞꠘ ꠛꠣ ꠇꠥꠘꠥ ꠎꠣꠔꠞ ꠖꠣꠉꠞ ꠛꠦꠙꠣꠞꠦ ꠅꠃ ꠟꠣꠈꠣꠘ ꠢꠥꠇꠥꠝ ꠎꠣꠘꠣꠁꠟ ꠅꠁꠟ। 57ꠁꠔꠣ ꠛꠦꠝꠣꠞꠦ ꠇꠥꠘ ꠡꠝꠄ ꠙꠣꠇ, ꠀꠞ ꠇꠥꠘ ꠡꠝꠄ ꠘꠣꠙꠣꠇ, ꠅꠈꠣꠘ ꠎꠣꠘꠣꠘꠤꠞ ꠟꠣꠉꠤ ꠅꠃ ꠘꠤꠅꠝ-ꠇꠣꠘꠥꠘ ꠖꠦꠅꠀ ꠅꠁꠟ।
Currently Selected:
ꠔꠃꠞꠣꠔ ৩: ꠟꠦꠛꠤꠀꠘ 14: sylN
Highlight
Share
Copy
Want to have your highlights saved across all your devices? Sign up or sign in
© Ahle Kitab Society. All rights reserved.
