ꞌThianaattõ 2
2
1Nẽ ꞌgõõlaa cĩ, ikia ẽdẽcaak Nyekuci ngaatĩ ẽhẽnytaanĩ hẽẽtkujjieen hĩ looc hĩ hẽlẽggĩ vẽlẽk. 2Ma kõr ꞌcĩ ĩĩn tũrkĩramma, baa ẽdẽcaak Nyekuci dtiic, ikia iyyioman nẽẽ dtiicaa cĩnnĩ. 3Nẽ ikia aggatan Nyekuci kõr ꞌcĩ ĩĩn tũrkĩramma nẽ aaꞌnyĩk hĩĩ kõr ꞌcĩ aꞌngirannii ꞌcĩ ẽllẽẽmĩthĩ,#2:3 Kõr ꞌcĩ aꞌngirannii ꞌcĩ ẽllẽẽmĩthĩ: Ẽbẽra Nyekuci kõr icci hĩĩ kõr ꞌcĩ iyyiomanĩ nẽẽ dtiica, hĩnĩngĩtĩ baa ẽdẽcaak nẽẽ dtiic cĩ hẽlẽggĩ vẽlẽk. hĩnĩngĩtĩ baa ikia iyyioman nẽẽ dtiicaa cĩnnĩ. 4ꞌGõõl ꞌcĩ baa ẽhẽnytaanĩ Nyekuci looc ko cieeni.
Aadam hĩ Ẽẽvva
Baa ẽhẽnyta Makayyioohiti#2:4 Makayyioohit: Aĩ ꞌthaara cieeg Ebereeiyyi, Yiaawe. Aĩ Yiaawe Ebereeiyyi, Eet ꞌcĩ aalla arũgĩ ũdũt. Baa ꞌthaar ꞌcĩg tiirik cieeg gẽrrẽẽt, ꞌcĩg avvĩyyĩ eeta cĩg Ĩꞌthĩraẽlĩ Nyekuc. Havvĩ naag ꞌthaar ꞌcĩg haĩ Makayyioohit ko Dĩdĩngaayyi, hĩĩ nĩngĩtĩ ꞌthaar ꞌcĩg haĩ Yiaawe ho. Nyekuci hẽẽtkujjieen hĩ looc, 5baa nga aitiõõ hẽẽna hĩ artĩ hĩ haal ꞌcĩg abũtha loota nĩnga tõõ, hĩnĩngĩtĩ baa nga haaꞌnyĩk Makayyioohiti Nyekuci tammu hĩtĩĩl nẽ baa nga aitiõõ eeta ꞌcĩg akatĩ looc buúk tõõ. 6Nẽ baa aaꞌnyĩk Nyekuci maam ꞌcĩg au ꞌthẽẽmĩtõõ hocohit looc hĩĩ cooni.
7Nĩngĩtĩ õꞌngõnyaanĩ Makayyioohiti Nyekuci doob nẽ ẽtẽhẽnyaaĩ eet ꞌcĩ maacĩ nẽ ũtũbbeek ꞌlaũk hikia hũrũg. 8Nĩngĩtĩ ẽhẽnytaanĩ Makayyioohiti Nyekuci mana umwa ĩcĩ uruto, ngaatĩ haĩ Ẽẽdẽn nẽ aarĩk eet ꞌcĩ ẽhẽnyta ho nĩngaata.
9Baa nẽ ẽtẽhẽnya Makayyioohiti Nyekuci hẽẽn vẽlẽk ꞌcĩg abũnnaa gẽrrẽẽt ngaatĩ hacĩnĩ hĩ ngaatĩ haduhi. Nẽ hõrggẽẽnaa cĩ manu, baa aattĩg hẽẽna ꞌramma, hẽẽt cĩ rũgẽtõ hĩ hẽẽt ꞌcĩ hagaĩ thõõth ꞌcĩ abũnnaa hĩ ꞌcĩ abathĩ.
10Baa arik hidiaa umwaa manatõõ tõõ cĩ Ẽẽdẽnĩ ho nẽ aaꞌnyĩk mana hĩĩ cũlak. Ma baa arik hidiaa nicciee ho, ikia ẽꞌngẽrĩ ĩĩ ꞌgoolliok ꞌwec. 11Haĩ hidioo ꞌcĩ oou Pithon, arik nẽẽ awanĩt looc ꞌcĩ haĩ Havvila, 12looc ꞌcĩ ammuddiaanĩ ꞌdaabĩ ꞌcĩ tẽllĩ, hĩ hẽlẽggĩ ꞌcĩg õꞌngõlĩ ẽmmẽdĩ, hĩ biyyiẽẽn ꞌcĩg attalĩthĩ. 13Haĩ hidioo ꞌcĩ ĩĩn ꞌramma ꞌGiihõn, arik nẽẽ awanĩt looc ꞌcĩ haĩ Kuuth. 14Haĩ hidioo ꞌcĩ ĩĩn iyyio ꞌTigirith, arik nẽẽ õkõ ĩcĩ uruto cĩ looc ꞌcĩ haĩ Athiiria. Haĩ hidioo ꞌcĩ ĩĩn ꞌwec Euvaratẽth.
15Ma baa ho, ũũhĩ Makayyioohiti Nyekuci eet baa ẽhẽnyta nẽẽ ho manatõõ cĩ Ẽẽdẽnĩ, hũũk hakatõ nẽ ẽbẽk mana. 16Nĩngĩtĩ aduhaakĩ Makayyioohiti Nyekuci ĩnõõnnõ annẽẽkĩ, “Duuk hẽẽn ꞌcĩg abbiiri ꞌcĩg aattĩg manatõõ nĩĩcĩ ho vẽlẽk, 17nẽẽthĩ, ma haduhi hẽẽt ꞌcĩ aaꞌnyi nganiit gaa thõõth ꞌcĩ abũnnaa hĩ ꞌcĩ abathĩ hata. Má uduhu dẽẽdẽ, adaahi hatĩ kõr tĩho noho!”
18Ma nĩngaata, õthõõth Makayyioohiti Nyekuci ĩĩ, “Hõllõngaa abũnnaa ngaatĩ aayyi ẽẽtĩ ꞌcĩ maacĩ ẽmmẽn, ĩꞌnya hẽtẽhẽnyaak ngaa hẽẽl ĩnõõnnõ.”
19Ma hĩdĩĩkoothong õꞌngõnya Makayyioohiti Nyekuci doob nẽ ẽtẽhẽnya idiꞌngwa ꞌcĩg aattĩg cũũmõ cũũmõ, hĩ hĩbaallĩ ꞌcĩg aattĩg cũũmõ cũũmõ nẽ aꞌnyahaak Aadam hakateek ꞌthaarriok. 20Nĩngĩtĩ akannẽẽkĩ Aadamĩ hẽlẽggĩ ꞌcĩg arũgĩ cĩg olu hĩ hĩbaallĩ hĩ idiꞌngwa vẽlẽk ꞌcĩg aattĩg mõrõtõõ tõõ ꞌthaarriok. Nẽẽthĩ, baa nga aitiõõ Aadam ngaa ꞌcĩ occa ẽẽl ĩnõõnnõ tõõ. 21Nĩngĩtĩ aaꞌnyĩkĩ Makayyioohiti Nyekuci Aadam hohoddia ũꞌnyaaha nẽ avvahana onyiit cĩnnĩ hõdẽĩ nẽ ĩdĩĩt nĩngĩtĩ avvahanaanĩ onyiit ko idiinga. 22Nẽ ittiha Makayyioohiti Nyekuci onyiit nicci ẽtẽhẽnyaaĩ ngaa ꞌcĩ ngayyi nẽ aꞌnyahaak Aadam.
23Nĩngĩtĩ õthõõthĩ Aadamĩ aĩnnĩ,
“Eet aattĩ ꞌcĩ aaĩ hĩ naa cieeni,
ꞌcĩ ẽhẽnytaa onyiitaa caannĩ!
Haĩ ꞌthaar cĩgĩnnĩg ‘Ngaa,#2:23 Ngaa: Aĩ thõõth ꞌcĩ haĩ ngaa ho Ebereeiyyi, ẽhẽnytaa onyiitaa.’
hĩnĩngĩtĩ baa ẽhẽnytaa nẽẽ onyiitaa caannĩ.”
24Hĩnĩngĩtĩ thõõth icci, ũũnnĩk hatĩ ẽẽtĩ õlõ cĩ maacõnĩ hĩcĩ aattĩnnĩ nẽ ũũk ũꞌthũwanõõ nẽ õõt ũrũmtĩ hĩ ngaa cĩnnĩ hĩĩtõ ẽlẽ hõdẽẽthõng.
25Baa aattĩg ẽẽtĩ hĩ ngaa cĩnnĩ ho ngũtũtũũny nẽ hõllõngaa aꞌngaõnĩ.
Currently Selected:
ꞌThianaattõ 2: did
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.