Luugithõõ 5

Othooꞌthik Mũũꞌtha hĩ Arõõnẽ habu cĩ Ijjibi

1Ma baa uruta, iita õõt ummuddioothĩk Mũũꞌtha hĩ Arõõnẽ habu cĩ Ijjibi nẽ ĩĩttĩk, “Thõõth ꞌcĩ aduha Makayyioohiti Nyekuci cĩ Ĩꞌthĩraẽlĩ cieeni, ‘Aꞌnyĩĩk eet cĩgannĩg hõõt hadahit karrama ꞌcĩ adĩhĩꞌtha nganĩĩt horrwaa ꞌcĩ õdõhõhĩĩ kak.’ ”

2Ẽdẽcĩ hinnia habuui cĩ Ijjibi aĩ, “Makayyioohit iina ꞌcĩ occa hathihi naa nẽ halahaneeha eet cĩg Ĩꞌthĩraẽlĩ hõõt ko? Ẽrẽka nganĩĩt Makayyioohiti tĩho nẽ hõllõngaa hẽlẽmaakĩ eet cĩg Ĩꞌthĩraẽlĩ hõõt.”

3Ma ho, ĩĩttĩk Mũũꞌtha hĩ Arõõnẽ ĩnõõnnõ, “Baa hommotoonna naag hĩ Nyekuc cĩ Ebereei. Nẽẽthĩ ꞌyioko, anyeet heeroni cĩ waathinniook iyyio, hõõt hibboorriha Makayyioohit Nyekuc cĩnaang ꞌgaarriẽẽn horrwaa ꞌcĩ õdõhõhĩĩ kak, hátĩ hiittiõõ hõllõngaa uukeet mooriꞌthioohĩ hode eꞌngedĩtteet nyetuboota.”

4Aĩ hinnia habuui cĩ Ijjibi, “Niig Mũũꞌtha hĩ Arõõnẽ, adiim occa ehetheeku eet dtiic cĩnĩĩng inni? Oboddiooth dtiicaa cunuung!” 5Ma ho, ĩĩ habuui cĩ Ijjibi, “Ĩcĩnĩt nõõnĩ, ĩĩtõ mẽẽlĩg eeta cugunnig loota nĩnga, adiim hinnia abillu niig ĩhõõggõ dtiicaa cĩnĩĩng!”

6Ma kõr niccia noho, uduhaak habuui cĩ Ijjibi makayyiook ꞌcĩg attĩnganeek appahacaaꞌnya dtiic hĩ makayyiook ꞌcĩg aggam eet ĩĩnnĩk, 7“Ma nga haꞌnyahaaku eet tabarra hutturriaaĩ namatavvaalĩ, aanytĩk hõõt huluttia nẽẽg ẽmmẽn. 8Aanytĩk hutturria namatavvaalĩ hĩĩtõ hĩ gõõng hõdõõkõthĩ, ma haaꞌnyiku hutturria hĩĩtõ hĩdĩcĩg. Ĩĩn nẽẽg nyamuttiook, ĩnõõ ꞌcĩ arruuẽnĩ aĩnnĩ, ‘Aanyteetu hoottia hibboorriha Nyekuc cĩnaang ꞌgaarriẽẽn ko.’ 9Aanytĩk dtiic hõkõm hĩ eet ꞌcĩg maacĩg, hátĩ haallattia dtiicatõõ, hiittiõõ hõllõngaa athĩhĩ oloꞌngiook.”

10Ma nĩngaata, õõt uduktaak makayyiooha ꞌcĩg uukik appahacaaꞌnya dtiic, hĩ eet ꞌcĩg ĩĩn makayyiook ꞌcĩg aggam eet dtiica ĩĩttĩk, “Aduha habuui cĩ Ijjibi aĩ, ‘Iittiõõ naa hõllõngaa haaꞌnyuung ngagiit tabarra tarĩ. 11Oottik tabarra cugguung ẽmmẽn ꞌgoolliohĩĩ ꞌcĩg agayyu niiga, nẽẽthĩ, aalla dtiici hĩgõõng hõdõõkõthĩ noho.’ ” 12Nĩngĩtĩ ĩꞌthanõthõõthĩkĩ eeta Ijjib hũtũrũũr, hõõt huluttia urutẽẽn cĩg tabarraannu, hátĩ hidticattõõĩ. 13Baa ẽhẽc eet makayyiooha ꞌcĩg attĩnganeek appahacaaꞌnya dtiic gẽrrẽẽt anneek, “Edecciaak dtiic vẽlẽk ꞌcĩ etteeddiakuung ngagiit kõr nicci hĩĩ ꞌthĩĩ, hĩ baa gõõng nga aꞌnyakiaakuung tabarra.” 14Ma ho, uukito makayyiooha cĩg habu cĩ Ijjibi, ꞌcĩg attĩnganeek appahacaaꞌnya dtiic, makayyiook cĩg Ĩꞌthĩraẽlĩ, ꞌcĩg baag ẽbẽra nẽẽg hebekteek eet dtiic nẽ ijinit ĩhõõggõ ĩĩttĩk, “Inni baa hõllõngaa atturaannu namatavvaalĩ baalõ hode kõr nicci hĩĩtõ hĩ baa gõõng ko?”

15Ma nĩngaata, õõt ĩĩlallieek makayyiooha cĩg Ĩꞌthĩraẽlĩ cĩg dtiicak habu cĩ Ijjibi ĩĩttĩk, “Adĩmani occa gõõng dticcianniook cugunnig hoti inni? 16Iittiõõ dticcianniook cugunnig hõllõngaa aꞌnyakiaak tabarra nẽ aalla nga adukiaak thõõth ꞌcĩ aĩ, ‘Utturria namatavvaalĩ noho!’ Uuk eeta dticcianniook cugunnig, ĩko nẽẽ aaĩ thõõth ꞌcĩ abathĩ hĩ eet cugunnig dẽẽdẽ.”

17Aĩ hinnia habuui cĩ Ijjibi, “Iiginnu niig nyamuttiook! Ĩnõõ ꞌcĩ arayyu thõõth ꞌcĩ ainnu, ‘Anyeet ngagĩĩt hoottia hibboorriha Makayyioohit ꞌgaarrieenit ko.’ 18Nẽẽthĩ ꞌyioko, õõt idticattõ. Iittiõõ hõllõngaa aaꞌnyĩhoothĩkuung tabarra tarĩ, nẽẽthĩ, utturria namatavvaalĩ hĩĩtõ mẽẽlĩg hĩgõõng hõdõõkõthĩ.”

19Nĩngĩtĩ au adtuuhanĩ makayyiooha cĩg Ĩꞌthĩraẽlĩ ngaatĩ akuuni bathi hĩ ĩhõõggõ baa adukiaak thõõth ꞌcĩ aĩ, “Utturria namatavvaalĩ hudukto hĩgõõng hõdõõkõthĩ, ma hatturaannu hĩĩtõ hĩdĩcĩg.” 20Ma baa ũtũngteek makayyiooha cĩg Ĩꞌthĩraẽlĩ habu cĩ Ijjibi, iita ommottio nẽẽg hĩ Mũũꞌtha hĩ Arõõnẽ ꞌcĩg baag ẽrẽ ĩhõõggõ, 21nẽ ĩĩtõ, “Aanytĩk Makayyioohit hĩcĩnaauung nẽ uukuung ngagiita. Ĩtĩhĩĩttaheetu niig ngagĩĩt hĩĩtta eet ꞌcĩg habaꞌtha muumaa cĩ habu cĩ Ijjibi hĩ makayyiook cĩgĩnnĩg nẽ ꞌyioko aggamit nẽẽg nyetubooꞌnya ꞌcĩg arukeet ngagĩĩta.”

Uduhaak Nyekuci Mũũꞌtha thõõth cĩ oggiaattõ

22Ma nĩngaata, õbõdõõthĩ Mũũꞌtha ũũk ĩĩnnĩk Makayyioohit, “Makayyioohit, aĩnanaahi eet iccig pĩĩrnanĩt inni? Thõõth ꞌyioko baa ĩꞌthõõanna nii nganĩĩt ko cieeni? 23Nganĩngĩtĩ hõkõõĩ naa hĩ habu cĩ Ijjibi nẽ hõthõõtha ꞌthaarĩĩ cugunnig, ikia aꞌnyahaak nẽẽ eet iccig pĩĩrnanĩt nẽ tarĩ hõllõngaa ẽẽla nii eet cugunnig ũdũt.”

Currently Selected:

Luugithõõ 5: did

Highlight

Copy

Compare