Luugithõõ 2
2
ꞌTirriaanĩt cĩ Mũũꞌtha
1Nẽẽthĩ ꞌyioko, baa aꞌthũwan eet umwaa cĩ hattũũg cĩ ꞌLeevi ngaa umwaa ꞌcĩ aku hattũũgaa cĩ ꞌLeevi diooni, 2nẽ ikia aꞌnyahõ ngaa tĩho, nĩngĩtĩ ũũkcanĩ loholeec ꞌcĩ maacĩ. Ma baa adtuuha nẽẽ ngaatĩ ẽllẽẽmmĩ loholeec ko, ikia utuguny ĩnõõnnõ nyĩlõhĩ iyyio. 3Ma baa aꞌnyamanẽẽhĩ ĩnõõnnõ ngaatĩ agunyꞌthĩ loholeec, ikia ẽtẽhẽnya ꞌguuvva umwa ĩhaõõnnĩ nẽ idil doollianga. Ma ho, aarĩk loholeec ꞌguuvvawatõõ nĩĩcĩ nẽ aarĩk ĩhaõõnnĩtõõ dẽmẽtaa cĩ hidioo cĩ Naaĩlĩ. 4Baa abĩllaa ngõõnĩ loholeeco ngadiiha, hátĩ hĩcĩn ꞌgii ꞌcĩ hatĩ adak loholeec.
5Ma nĩngaata, ĩtĩnga tĩnaatĩ habu cĩ Ijjibi, ũũk ꞌraanitta hidiaatõõ cĩ Naaĩlĩ nẽ baa õvvõ dticcianniooha cĩgĩnnĩg anũ dẽmẽt cĩ hidiowwo. Ma ho, udtuuha tĩnaatĩ habuuo ho ꞌguuvva ĩhaõõnnĩtõõ, nĩngĩtĩ ĩꞌthõõĩ appahaca ꞌcĩ ngayyi hũũk haꞌnyaha. 6Ma baa abbuuk tĩnaatĩ habuuo ꞌguuvva nicci ho, adtuuha hinnia loholeec ꞌcĩ maacĩ aaĩ ĩttõõ. Baa arruui loholeec gẽrrẽẽt, nĩngĩtĩ ammaannĩkĩ tĩnaatĩ habuuo ĩnõõnnõ. Ma ho, õthõõth ĩĩ, “Loholeec cĩ Ebereeitto cieeni.”
7Nĩngĩtĩ ajini ngõõnĩ loholeeco tĩnaatĩ habuuo ho annẽẽkĩ, “Ĩcca occa hõkõ haꞌnyahaakii ngaa ꞌcĩ ĩĩn Ebereeinit hikia hitiroheehi ĩdõlĩ icci?”
8Ẽdẽcĩ tĩnaatĩ habuuo anneek, “Eei bĩĩt nyahaahaanĩ,” nĩngĩtĩ õkõ aꞌnyahaanĩ bũhẽẽcĩ nicciee aattĩ ĩdolo dẽẽdẽ. 9Ma nĩngaata, uduhaak tĩnaatĩ habuuo aattĩ loholeeco ĩĩnnĩk, “Bĩĩt tiroheehaa loholeec icci nẽ hatĩ hũdũmanii thõng.” Nĩngĩtĩ mĩĩ õkõ iroktĩ ngaa nicciee loholeec. 10Ma baa ĩtĩlĩth loholeec ĩĩ maka, ũũhĩ ngaannia ĩnõõnnõ hĩ tĩnaatĩ habuuo, hũũk hĩĩ ngeerĩnĩ. Nĩngĩtĩ akannẽẽkĩ tĩnaatĩ habuuo loholeec ꞌthaar ꞌcĩg haĩ Mũũꞌtha nĩngĩtĩ aĩ, “Baa hõdõnga ĩnõõnnõ maamĩtõõ.”
Ukul Mũũꞌtha ũũk ĩĩcĩ Midianĩ
11Ma kõr umwa, baa ĩtĩlĩtha Mũũꞌtha ĩĩ maka, ũũk ĩcĩn nẽẽ eet cĩgĩnnĩg ngaatĩ baa aattiyyi nẽ udtuuha ĩhõõggõ ngaatĩ attĩnganõõthĩkĩ dtiici. Ma nĩngaata, udtuuha Ijjibeenit umwa ngaatĩ uuki Ebereeinit eet cĩnnĩ dẽẽdẽ. 12Ma ho, ubbuud Mũũꞌtha lõmẽrrẽẽt vẽlẽk, ma baa adtuuha aĩ lõõcĩ ꞌthĩĩ ho, ikia uruk eet ꞌcĩ ĩĩn Ijjibeenit ko hadaak nẽ idtibaneek hathaacatõõ. 13Ma loohoth cĩnnĩ, ũũk ĩcĩn Mũũꞌtha eet cĩgĩnnĩg tarĩ, ammũdoothĩk hinnia aattĩ eet ũgĩ ꞌcĩg ĩĩn Ebereei ꞌramma aruhõõ ẽmmẽn. Ma nĩngaata, ijin nẽẽ Ebereeinit ꞌcĩ baa iꞌthianaanĩ jore ho nẽ ĩĩnnĩk, “Õhõda gõõng ꞌgoonu ꞌcĩ ĩĩn Ebereeinit hĩ nii dioo noho inni?”
14Ẽdẽcĩ ẽẽtĩ nicciee anneek, “Nganĩ ꞌcĩ aaꞌnyi nganiit makaaꞌthĩt ꞌcĩ etteedĩkeet ngagĩĩt thõõth ko? Adiimi arukaa nganĩĩt buúk hĩ baa aruhi Ijjibeenit baa baalõ?” Nĩngĩtĩ itieelini Mũũꞌtha thõõth icci gẽrrẽẽt nẽ ummuk ĩĩ, “Ummuddia mõnõ thõõth baa hadĩmani naa thõng.”
15Ma baa athĩhĩ habuui cĩ Ijjibi thõõth icci ho, idiim uruk nẽẽ Mũũꞌtha, nĩngĩtĩ avvirẽẽkĩ Mũũꞌtha habu cĩ Ijjibi nẽ ũũk aau looccaa cĩ Midianĩ, ngaatĩ baa õkõ iccioloonganĩ loota wetaneeca. 16Nẽẽthĩ ꞌyioko, baa aꞌnyak paadĩrĩ umwaa cĩ Midianĩ buheeci tũkĩramma ꞌcĩg baag au õgõõc maam nẽ eellik hẽlẽggĩ cĩg maacõnĩ. 17Baa hinnia au iiggia tuhayyiooha ũgẽẽgĩ ĩhõõggõ thõng, nĩngĩtĩ aku ẽẽlanĩ Mũũꞌtha ĩhõõggõ nẽ eelĩk hẽlẽggĩ cĩggĩĩng.
18Ma baa oboddiõõthĩ buheeci cieegi, õõt ummuddioothĩk maaꞌnyĩ ꞌcĩ baa haĩ ꞌReuel ko, ma nĩngaata, ũũk ijin maaꞌnyia ĩhõõggõ ĩĩnnĩk, “Õbõdaannu aattĩ hatĩ kõr nicci hĩdĩĩkoothong inni?”
19Ẽdẽcĩ nẽẽg aĩ, “Iyyia aku ẽẽlanneet Ijjibeeniti umwaa ngaatĩ alaamĩ tũhaayyiook nẽ tarĩ ẽẽlĩkeet hẽlẽggĩ buúk.”
20Nĩngĩtĩ ajini lõhõlĩ cĩgĩnnĩg ko annẽẽkĩ, “Aaĩ ꞌyioko ẽẽtĩ tĩho ĩĩna? Ũũnniku gõõng hatĩ eet inni? Õõt da utuvvuyyia hikia hadak ꞌgiimwa.”
21Ma ho, ẽlẽm Mũũꞌtha ngaatĩ arũmẽẽnĩ hĩ ꞌReuel, nĩngĩtĩ attihaanĩ ꞌReuelĩ bũhaanyĩnĩ ꞌcĩ haĩ ꞌThippõra nẽ aaꞌnyĩk Mũũꞌtha hũꞌthũwan. 22Ma ho, ũtũhũa ꞌThippõra loholeec ꞌcĩ maacĩ, nĩngĩtĩ akannẽẽkĩ Mũũꞌtha ngeerĩnĩ ꞌthaar ꞌcĩg kaĩ Gerthom,#2:22 Gerthom: Aĩ ꞌthaara ꞌcĩg haĩ Gerthom ko Ebereeiyyi, haaĩ looccaa cĩ eet ꞌcĩg looc cĩrrĩĩng. nẽ ĩĩ, “Hĩĩna tahanit looccaa cĩrrĩĩng.”
23Ma waathinnioohĩĩ nĩĩcag, ikia adaak habuui cĩ Ijjibi. Iita accanattĩ eeta cĩg Ĩꞌthĩraẽlĩ, hĩnĩngĩtĩ apahacaaꞌthĩt cĩnĩĩng nẽ urruuyyio, nĩngĩtĩ õdõlanĩ ulwaanĩ cĩnĩĩng ꞌcĩ adiimi eliinit ko Nyekuc hẽẽtahujjieen. 24Ma ho, ĩthĩk Nyekuci ulwa cĩnĩĩng nẽ ummuhunõõthĩ lõhõt#2:24 Lõhõt cĩ Nyekuci: Baa adak Nyekuci hĩ Abũrahaamõ lõhõt ꞌcĩ aĩnnĩ Nyekuci, haaꞌnyihi hatĩ Abũrahaamõ lõhõlĩ ꞌcĩg mẽẽlĩg nẽ haaꞌnyĩha ĩhõõggõ looc cĩ Kanaanĩ hĩĩ cĩnĩĩng. Tigiil ꞌBuuk cĩ ꞌThianaattõ 17:1-8. baa adak nẽẽ hĩ Abũrahaamõ hĩ Iꞌthaako hĩ Yakobo. 25Nĩngĩtĩ ẽdẽẽnyanĩ Nyekuci eet cĩg Ĩꞌthĩraẽlĩ nẽ atamaatĩk ĩhõõggõ.
Currently Selected:
Luugithõõ 2: did
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.
