1 Korinthia 3

ꞌGõõl ꞌcĩ hadticanõõthĩkĩ Nyekuc hõdẽĩ

1ꞌGotoonoga hĩ ngoonoga, aattiyyu niig hĩ eeta cĩg looc nicci, ĩnõõ cĩ hõllõngaa hallimannuung naa ngagiit thõõth hĩ eeta ꞌcĩg agaacõ thõõth cĩ Nyekuci dĩdĩ, hĩnĩngĩtĩ nga aattiyyu niig hĩ ĩdõlẽẽta haaga thõõthaa cĩ Krĩstõ ho. 2Ĩnõõ cĩ hallimannuung naa hĩ ĩdõlẽẽta ꞌcĩg aam ira diooni, hõllõngaa hallimannuung hĩ eeta ꞌcĩg agaacõ thooꞌthiok dĩdĩ. 3Nga ĩĩgĩnnu niig eet cĩg looc nicci, hĩnĩngĩtĩ nga iinanoonnu niig nẽ eggerenytoou hõrggẽẽnaa cunuung, aitiõõ ꞌyioko niig hõllõngaa aattiyyu hĩ eeta cĩg looc nicci? Aitiõõ ꞌyioko niig hõllõngaa adticaniinnu hĩ eeta ꞌcĩg hollig ooti haaga? 4Hĩnĩngĩtĩ ma aĩ eet umwaa, “Hanũ naa Paaulo,” nẽ ĩĩ umwaa “Hanũ naa Appoolo,” hõllõngaa nooyyia ĩĩgĩnnu niig eet ꞌcĩg hollig ooti haaga?

5Nganĩ nooyyia ꞌyioko ꞌthẽk Appoolo? Nẽ nganĩ nooyyia ꞌyioko ꞌthẽk Paaulo? Ĩĩn nẽẽg dticcianniook haaga, ꞌcĩg aaꞌnyuung ngagiit iita aꞌnyahit lemiinit, hĩcĩ baallĩ aaꞌnyĩk Makayyioohiti ĩhõõggõ dtiic hõdẽĩ hõdẽĩ. 6Baa nganĩĩt ꞌcĩ hathaci hinyomooc nẽ ikia udduutik Appoolo maam, nĩngĩtĩ aaꞌnyĩkĩ Nyekuci hinyomooc nicci hĩtĩlĩth. 7Nẽẽthĩ, hõllõngaa eet ꞌcĩ athacĩ hode ꞌcĩ adduutik maam ꞌcĩ tiirẽẽnĩ, Nyekuc dioo ꞌcĩ aaꞌnyĩk hẽlẽggĩ vẽlẽk hĩtĩlĩthĩt ꞌcĩ tiirẽẽnĩ. 8Aduhõõ ẽẽtĩ ꞌcĩ athacĩ hinyomo hĩ ꞌcĩ adduutik maam ko thõng nẽ adũmanni hatĩ nẽẽg ꞌgõõlaa cĩ dtiicanĩ cĩggĩĩng. 9Hĩnĩngĩtĩ hĩĩgĩnna naag dticcianniook cĩg Nyekuci, iiginnu niig mana hĩ ꞌCieeth cĩ Nyekuci.

10Bũnnaiittaa ꞌcĩ aaꞌnya Nyekuci nganĩĩta, hikia hadaeeha naa õkõlaha hĩ ẽẽtĩ ꞌcĩ haganeehi tehenyiinit nẽ ikia ẽtẽhẽny ẽẽtĩ cĩrrĩĩng ꞌcieeth tĩho. Nẽẽthĩ, adiim acĩn eeta hõdẽĩ hõdẽĩ ꞌgõõl ꞌcĩ ehenytiini ho jurrung. 11Hĩnĩngĩtĩ iitiõõ ẽẽtĩ ꞌcĩ occa adaeek õkõlaha ũgĩ tarĩ tõõ, hĩnĩngĩtĩ Yeesu Krĩstõ dioo ꞌcĩ ĩĩn õkõlaha tĩko. 12Má ẽhẽnytĩ eet umwaa õkõlakꞌnyaannĩĩ ꞌcĩg occa ehenytiini nẽẽ hẽlẽggĩ ꞌcĩg mẽẽlĩg ꞌcĩg aattĩg hĩ ꞌdaabĩ hode maccĩrẽẽna hode biyyiẽẽna hode hẽẽna hode arteeniti. 13Nẽẽthĩ, kõr ꞌcĩ hatĩ ẽttẽẽdĩ Nyekuci thooꞌthiok, appulana hatĩ ꞌgwaa ꞌgõõl ꞌcĩ baa ehenytiini ẽẽtĩ. Ẽtẽrꞌtha hatĩ ꞌgwaa, hatĩ baa adtican ẽẽtĩ dtiic ꞌcĩ abũnnaa. 14Má aalla ꞌcieeth ꞌcĩ baa ẽhẽnyĩt nẽẽ ho, adũmanni hatĩ nẽẽnĩ. 15Má atũũthĩ ꞌcieeth cĩnnĩ ho, appĩĩrna hatĩ teheꞌnyioohiti gẽrrẽẽt, tananga eellia nẽẽnĩ.

16Hõllõngaa agayyu niig aĩ, ĩĩn eleeti cugguung ꞌCieeth cĩ Nyekuci nẽ aaĩ Lorii cĩ Nyekuci hĩ ngagiita? 17Má ĩꞌthaan eet umwaa ꞌCieeth cĩ Nyekuci, ĩꞌthaan hatĩ Nyekuci ĩnõõnnõ buúk, hĩnĩngĩtĩ ẽllẽẽmĩth ꞌCieeth cĩ Nyekuci nẽ iiginnu niig ꞌCieeth tĩho.

18Ma higgoollu eleeti. Má aĩ eet umwaa heggeenyi, hĩnĩngĩtĩ thõõth cĩ looc nicci, aꞌnyĩĩk hĩĩ ꞌgiiꞌthiahit, hátĩ hikia hẽggẽẽny. 19Hĩnĩngĩtĩ ĩĩn ꞌgẽẽnyĩthĩ cĩ looc nicci ꞌgiithẽnĩt muumaa cĩ Nyekuci. Hĩcĩ eheeddi ꞌBuuhaa cĩ Nyekuci aĩ, “Aggam nẽẽ ꞌgeeꞌnyiak ꞌgẽẽnyĩthaa cĩnĩĩng.”#Tigiil ꞌBuuk cĩ ꞌJõõbĩ 5:13 20Nẽ tarĩ, “Aga Makayyioohiti aĩ, abathĩ muhẽẽnĩtĩ cĩ eet ꞌcĩg ẽggẽẽnyĩthĩ.”#Tigiil ꞌBuuk cĩ Tegellwaanu 94:11 21Nẽẽthĩ hoti ho, occa iittiõõ hõllõngaa hathĩngõõnyan, hĩnĩngĩtĩ eeta! Ĩĩn hẽlẽggĩ vẽlẽk cugunnig, 22tananga Paaulo hode Appoolo hode ꞌCeeva, hode lõõcĩ hode rũgẽtĩ hode daahĩthĩ hode thõõth ꞌcĩ kõr icci hode thõõth ꞌcĩ hatĩ nga aku, ĩĩn vẽlẽk cugguung, 23nẽ iiginnu niig eet cĩg Krĩstõ nẽ ĩĩn Krĩstõ cĩ Nyekuci.

Currently Selected:

1 Korinthia 3: did

Highlight

Copy

Compare