Төрүттэнии 1

Аан дойду айыллыыта

1Бастаан Таҥара халлааны уонна сири айбыта.#1:1 Бастаан Таҥара халлааны уонна сири айбыта. – Эбэтэр «Бастаан Таҥара халлааны уонна сири айарыгар…» диэн тылбаастыахха сөп. 2Сир туох да киэбэ-киэлитэ суох, иччитэх этэ. Түгэҕэ биллибэт далайы бүтэй хараҥа бүрүйэн турара, арай уу үрдүнэн Таҥара Тыына#1:2 Таҥара Тыына – эбэтэр: «Таҥара тыала». тайаара көтөрө. 3Дьэ, онтон Таҥара: «Сырдык баар буоллун», – диэбитэ, онуоха сырдык баар буолбута. 4Таҥара сырдыгы көрөн сөбүлээбитэ, итиэннэ ону хараҥаттан араарбыта. 5Таҥара сырдыгы «күнүс», оттон хараҥаны «түүн» диэн ааттаабыта. Киэһэ буолбута, сарсыарда буолбута – биир күн бүппүтэ.

6Онтон Таҥара: «Уу ортотугар кытаанах араҥа баар буолан ууну икки аҥыы араардын», – диэбитэ. 7Таҥара кытаанах араҥаны оҥорон, араҥа аннынааҕы ууну араҥа үрдүнээҕи ууттан араарбыта. Эппитин курдук буолбута. 8Таҥара кытаанах араҥаны «халлаан» диэн ааттаабыта. Киэһэ буолбута, сарсыарда буолбута – иккис күн бүппүтэ.

9Онтон Таҥара: «Халлаан аннынааҕы уу бииргэ мустан, кураанах сир көһүннүн», – диэбитэ. Эппитин курдук буолбута. 10Таҥара кураанах сири «сир», оттон мустубут ууну «байҕал» диэн ааттаабыта. Итиэннэ Таҥара итини барытын көрөн сөбүлээбитэ. 11Онтон Таҥара: «Сир күөх үүнээйини – сиэмэтин ыһар от, сиэмэлээх аһын биэрэр мас эгэлгэ бииһин – үүннэрдин», – диэбитэ. Эппитин курдук буолбута. 12Сир күөх үүнээйини – сиэмэтин ыһар от, сиэмэлээх аһын биэрэр мас эгэлгэ бииһин – үүннэрбитэ. Итиэннэ Таҥара итини барытын көрөн сөбүлээбитэ. 13Киэһэ буолбута, сарсыарда буолбута – үһүс күн бүппүтэ.

14Онтон Таҥара: «Халлаан араҥатыгар сырдатар эттиктэр баар буолан күнүһү түүнтэн араардыннар, кэми-кэрдиини, күнү-дьылы биллэрэр бэлиэ буоллуннар, – диэбитэ. – 15Халлаан араҥатыттан сыдьаайан сири сырдаттыннар». Эппитин курдук буолбута. 16Таҥара икки сүҥкэн сырдатааччыны (улаханын күнүһү салайарга, кыратын түүнү салайарга анаан) уонна сулустары оҥорбута. 17-18Таҥара кинилэри, сири сырдаталларын, күнүһү-түүнү салайалларын, сырдыгы хараҥаттан арааралларын туһугар, халлаан араҥатыгар туруорбута. Итиэннэ Таҥара итини барытын көрөн сөбүлээбитэ. 19Киэһэ буолбута, сарсыарда буолбута – төрдүс күн бүппүтэ.

20Онтон Таҥара: «Ууга тыыннаах харамай кыймалас буоллун; сир үрдүнэн, халлаан араҥатынан көтөр бииһэ көттүн», – диэбитэ. 21Таҥара байҕал аарыма бэйэлээх амырыын кыылларын, ууга кыйма курдук кыынньар бары харамай, көтөр кынаттаах эгэлгэ бииһин айбыта. Итиэннэ Таҥара итини барытын көрөн сөбүлээбитэ. 22Таҥара кинилэри алҕаан эппитэ: «Төрөөҥ-ууһааҥ, үксээҥ-тэнийиҥ, байҕал уутун иччилээҥ; оттон сиргэ көтөр кынаттаах элбээтин». 23Киэһэ буолбута, сарсыарда буолбута – бэһис күн бүппүтэ.

24Онтон Таҥара: «Сир тыынар тыыннаах эгэлгэ бииһин: сүөһүнү, сыылар харамайы, эҥин-эгэлгэ кыылы-сүөлү үөскэттин», – диэбитэ. Эппитин курдук буолбута. 25Таҥара кыыл-сүөл, сүөһү, сиринэн сыылар харамай эҥин-эгэлгэ бииһин оҥорбута. Итиэннэ Таҥара итини барытын көрөн сөбүлээбитэ. 26Дьэ, онтон Таҥара: «Биһиги курдук мөссүөннээх, Биһиэхэ маарыннаах гына киһини айыахха, – диэбитэ. – Кини байҕал балыгын, халлаан көтөрүн, сүөһүнү, сири бүттүүнүн, сиринэн сыылар харамайы бука барытын баһылаатын». 27Таҥара киһини Бэйэтин курдук мөссүөннээх, Таҥаралыы мөссүөннээх гына айбыта, эр киһини уонна дьахтары айбыта. 28Таҥара кинилэри алҕаан эппитэ: «Төрөөҥ-ууһааҥ, үксээҥ-тэнийиҥ, сир үрдүн иччилээҥ, сири баһылааҥ. Байҕал балыгын, халлаан көтөрүн, сир бары кыылын-сүөлүн баһылыктааҥ». 29Итиэннэ Таҥара эппитэ: «Мин сир үрдүгэр баар сиэмэлээх оту, сиэмэтин ыһар астаах маһы барытын эһиэхэ биэрэбин. Ити эһиги аһыыр аскыт буолуоҕа. 30Оттон сир кыыла-сүөлэ, халлаан көтөрө, сиринэн сыылар харамай – тыынар тыыннаах бүттүүнэ сииригэр Мин күөх үүнээйини олоччу биэрэбин». Эппитин курдук буолбута. 31Таҥара тугу айбытын барытын кэриччи көрөн баран, ону олус сөбүлээбитэ. Киэһэ буолбута, сарсыарда буолбута – алтыс күн бүппүтэ.

Currently Selected:

Төрүттэнии 1: СБК

Highlight

Copy

Compare